1 Musa 1
1
Sukuten tersèngèt penempaen suberri dunia
1Imulana tikan itempa Dèbata suberri dunia èn, 2bagè sinigargaren ngo tanoh i, janah madèng lot potongenna. Laut i pè kumetcaho ngo menangkemmi sagumanna silot, janah gellap gulita, tapi mayap-ayap ngo kuasa Tendi Jahowa i babo laè i. 3#2 Kor. 4:6 Nai mongkam mo Dèbata, “Hana mo sinterrang!” Nai mèter nterrang mo. 4Sennang ngo ukur Jahowa midah i. Nai isirang mo sinterrang i ibas sigellap nai, 5igerari mo sinterrang i “Mahar” janah sigellap i “Berngin”. Bon mo ari, nai nterrang nola mo ari, imo ari perlebbè.
6-7 #
2 Ptr. 3:5
Nai mongkam nola mo Dèbata, “Hana mo ko sada baleng perbintoha lako menirang laè i gabè dua bekkas.” Nai hana mo bagi. Bagi mo baleng perbintoha i ibaing Dèbata lako menirang laè siniteruhna dekket sini babona. 8Igerari mo baleng perbintoha i “Langit”. Bon mo ari, nai nterrang nola mo ari, imo ari peduaken.
9Nai mongkam nola mo Dèbata, “Merserrap mo laè siniterruh langit i mi sada bekkas, asa teridah tanoh.” Nai hana mo bagi. 10Igerari Dèbata mo tanoh i “Darat”, janah laè sipulung i igerari “Laut”. Sennang ngo ukur Jahowa midah i. 11Mongkam nola dèng ma mo Dèbata, “Ipenturahken tanoh i mo karina matcam bagè suan-suanen, imo simerbuahken buah merbatu dekket simerbuahken buah merlomi.” Nai hana mo bagi. 12Bagi mo ipenturahken tanoh i karina matcam bagè suan-suanen. Sennang ngo ukur Jahowa midah i. 13Bon mo ari, nterrang mo ari, imo ari petelluken.
14-15Nai mongkam nola mo Dèbata, “Naing mo lot penendang i langit lako menendangi tanoh èn, lako menirang mahar dekket berngin, janah lako menebbenai ari, tahun dekket musim.” Nai hana mo bagi. 16Bagi mo penghanaken Dèbata dua penendang mbellen, imo mataniari menendangi tikan mahar, janah bulan menendangi tikan berngin; laènkenna idi ihanaken ma ngo bintang-bintang. 17Ibaing Dèbata ma ngo penendang i langit lako menendangi tanoh èn, 18mahan perguruen mahar dekket berngin, dekket menirang sinterrang dekket sigellap. Janah sennang mo ukur Jahowa mengidah i. 19Bon mo ari, janah nterrang nola mo ari, imo ari peempatken.
20Nai mongkam nola mo Dèbata, “Naing mo lot ibagasen laè i mermatcam bagè singgelluh, janah i abang-abang i merkabangen matcam bagè manuk-manuk.” 21Nai ihanaken Dèbata mo binatang-binatang mbellen i laut, dekket mermatcam bagè singgelluh ibagasen laè, bagi ma matcam bagè manuk-manuk. Janah sennang mo ukur Dèbata midah i. 22Nai ipasu-pasu Dèbata mo karina i, ninganna idokken taba singgelluh ibas laè asa merrak-merrik janah idomi laut i, bagima taba manuk-manuk asa makin mbuè. 23Bon mo ari, nai nterrang nola mo ari imo ari pelimaken.
24Nai mongkam nola mo Dèbata, “Naing mo hana i tanoh i nai karina matcam binatang melemmuk dekket meriar, mebellen dekket kèdèk.” Nai hana mo bagi. 25Bagi mo ibaing Dèbata pehanaken karinana i janah sennang ngo Dèbata midah i.
26 #
1 Kor. 11:7
Nai mongkam nola mo Dèbata, “Bagèndari sitempa mo jelma codi bagè kita janah cumaen bagè rupanta. Asa irajai kalak i karina ikan, manuk-manuk, dekket karina binatang-binatang sidèban, simelemmuk bak simeriar, mbellen barang kèdèk.” 27#Mat. 19:4; Mrk. 10:6 Bagi mo itempa Dèbata jelma i, janah itempa mo kalak i tosè mi diriNa. Daholi dekket daberru ngo kalak i itempa. #1 Ms. 5:1-2 28Nai ipasu-pasu mo kalak i, nina mo, “Meranak merberru mo kènè janah meppar asa iiani pinemparmu suberri tanoh èn janah irajai. Rajai kènè mo karina ikan, manuk-manuk, bak karina binatang sidèban simeriar i. 29Ukum panganmu Kuberèken mo bamu karina matcam bagè suan-suanen simerbuahken buah merbatu dekket buah merlomi. 30Tapi ukum taba karina manuk-manuk, dekket binatang meriar sidèbanna i, Kuberèken mo dukut-dukut dekket suan-suanen simerbulung mahan panganna.” Nai mènter hana mo bagi. 31Itengen Dèbata mo karinana sienggo nihanakenNa i, janah sennang kalohon mo ukurna. Nai bon mo ari nterrang nola mo ari imo ari peenemken.
Currently Selected:
1 Musa 1: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)