1 KORINTUS 4

Kristus wawan ḇyesi

4:1-21

1Mkokara inkoḇe Kristus manfamyan ḇyesi ḇekarem ma ḇeḇaryas Allah aw ḇyena faro supswan ine sifawi ḇaim na. 2Ḇepon kaku roi sor ro manfamyan ḇerariryasya isoine ḇaḇeuser faro tuan sedi. 3Aya ḇardi yaḇe fakfukenḇa ro rosai naek srar – roḇa manseirya wer – skara ro aya. Rarirya rosai mankundaya yakara fa ḇekur aya kako ḇyefakfukenḇa. 4Yaḇaḇir yaḇesasar ro roi osoḇaḇeri, ḇape naiso ḇefasnaḇa mboi kaku yaḇesasarḇaya. Manseren mankundi nari ḇefasna yaḇesasarke roḇa. 5Inja rofyor fafisuya isya ḇaim, naek srar fasna fasaw awer snonkaku oso ḇyesasarke roḇa. Wawaf rao isof Manseren ryama resari. Iso nari ḇeḇas kankunes ḇeḇor ḇeyokef ro pampan. Iso nari ḇekakok swaruser ḇeḇor ḇekram ro snonkaku sisnesna. Rofafisu ani insape snonkaku oser-oser isma ro Allah sanandik ḇyuk ḇeina.

6Naek srar! Snar ḇaḇefandun mkoḇedi, yaḇuk nakam kwar faro Apolos ma faro mankundaya ḇardi. Insa nkoḇe fasasnai faro mko, fa mkofarkor rona, “Insa Mkokara syadi awer faro snonkakusya ro rosai sfas kwar.” Rarirya snonkaku osoḇa rofandu mko darer snonkaku oso, mboi kyoryae ḇeseya. 7Mansei ḇefrur aw fa wasyadi ro snonkaku ḇeseya? Wafawiḇake roi ḇeḇor nakam wasmana ro Allah? Snaro wamarisen wamarares mankundaw, imnis rosai isya ro aw roi ḇeḇuk naisyaḇake?

8Mboi naek srar mkofandun roi oso werḇa! Naek srar mkonana kwar! Naek srar mkoḇe wairek kwar! Mboi nkoma roḇa. Iḇye syadi kaku rofyor naek srar mkoḇe wairek kwar, insa nko ma naek srar mko koḇuk sasoser kam. 9Snar ro kakara yena nkoḇe manwawan, Allah ifrur nko kwar imnis roi ḇeser mamam roḇarpon snonkaku ma malaikat. Nkomnis snonkaku ḇekaryonḇa ḇesmai samamyai marmari ro fababa ma supswan sibras nko. 10Snar Kristus, nkoḇe snonkaku ḇefawi royoḇa, ma naek srar Kristen mkoiso ḇefawi! Nkosambraḇ ḇa, naek srar mkosambraḇ! Skoryaye nko, ma sisandik mko! 11Isof rofafisu ine nkosma basbiser ma marawrow; mar nkoḇena ḇero baken nerer monda; snonkaku sewayam nko; nkosma moḇ anenef faswef onoḇa; 12#Kis. 18:3nkofararur fa nkosewar nanan. Rofyor nkoḇe ḇefras, nkomunsu na kuker ḇok; rofyor sḇewayam nko, nkokḇaḇ; 13rofyor snonkaku sfamamai nko, nkomunsu na kuker wos ḇemyaren. Inkomnis kaku bakof supswan ine; isof rofafisu ine skara nkomnis arwarem supswan ine.

14Yafas ine mufa ḇenaek srar fa yaḇukfrur mamyai mkoḇa, ḇape yafarkor naek srar imnis romawa ayesi. 15Mboi imnis snonkaku Kristen, naek srar mkosma kwar guru syaran samfur, ḇape oso ḇyekma faro mkoḇa. Yerer monda yaḇekma faro mko, snar ayai ḇeyun Ankankinem Ḇeḇye ro Kristus faro mko. 16#1 Kor. 11:1; Flp. 3:17Eḇedari kaku ḇeri yor fa mkomamepen ro aya. 17Rarirya yawan kwar Timotius mufa ḇemko. Raris ḇeso Kristus, ikada imnis romawa karyer yaswar kaku. Ikada romawa kokyar rirya. Nari ḇyuk swarepen faro mko ro moḇ yakenem raya rofyor yakyar faro Kristus, isoine kankenem yafarkor kwar faro jemaat ro moḇ rosairya kaker.

18Ono rofandu mko simarares si kwar, snar skara ḇo soḇo nari yaramufa faro mkoḇa. 19Ḇape, nari yara fasaw mufa faro mko, rofyor Manseren byuk rarirya. Rofafisu ani nari yamam kako snonkaku ḇemarares ansi rosai sifrur na; mboi sawos monda awer. 20Snar rofyor Allah ḇyuk sasoser ḇyedi faro kankenem snon oso, ro roi ḇeḇesya ani ḇyeḇefasna ro samambraḇ kankenem snonkaku ani, mboi ro wos ḇyedi mondaḇa. 21Inja naek srar mkokinfir monda rosai mkomarisen syadiya! Naek srar mkomarisen yaramufa insa yaḇuk farkarkor ḇepakrek roḇa yarafa yaḇuk farkarkor ḇemyaren ma saneraro?

Currently Selected:

1 KORINTUS 4: LAIBHW

Highlight

Copy