ROMA 15
15
Sanaanggene komian bailon, inai kobutomu susuungo
1Kita mo tutuu anggayomo naikon oilamo kita nainangga, siokai nda sabar doi mian mo lemah kona manganggaan nakabaratan-kabaratan. Inaikai kita yase sanaanggene kobutonggita susuungo. 2Kobalino kita memeeng sio nda sanaanggene koutusondoo noano tuuk doi namonondokan, sulano kona manganggaan tosuungi moonggol. 3#Sad. 69:9 Sabab Kristus aki napikikene kobutongo nasanaangan susuungo. Doi Kitab Moliyous lalomo totulis buno naiya, “Sasaibino kososibolii mo kinonoikon doikoo lapamo otuwong doi Yaku.” 4Sasaibino komo totulis doi Kitab Moliyous lalomo doiya tuuk otunggul kita. Sabab kootunggul kita mo talimayo doi Kitab Moliyous tealikene kita sabar tukon bukuan tobikon kita moola moini doi Mian Bisa. 5Boliisi ko Mian Bisa, mo beekene kosabaran tukon pengiburan doi banggapi, tulunge komuyu sulano potubo tukon pomeenggon noa, moloingi contoh Kristus Yesus. 6Tukon pomeenggon noa Utus sasaibino polaing-laing moola nggaale ko Mian Bisa, Tamanggita Yesus Kristus.
Bilita Monondok tuuk doi bangsa-bangsa mo bolikon Yahudi
7Sabab doiya siokai Utus-utus mantarima meeng tukon bailon tukon noa sanaang, buno pokakana Kristus koidan talimayo komuyu sulano pokabasale ko Mian Bisa. 8Sabab, neneeke, baikon Kristus lapamo leleaniyo ko Yahudi miano sulano naotudoikene baikon ko Mian Bisa satia doi nadaanokanano kona perjanjian doi tumbunggita. 9#2Sam. 22:50; Sad. 18:49 Yesus kubaiyo koidan kobangsa-bangsa bailon mokabasale ko Mian Bisa sabab namonondokan Konoano doi yanila. Doi Kitab Moliyous lalomo totulis buno naiya,
“Sabab doiya yaku naikon nggaale Ikoo doi antara bangsa-bangsa,
yaku naikon mananikene nggaalano motuuk doi sambu-Mu.”
10 #
Kua. 32:43
Daano mototulis buno naiya koidan,
“Polaba-labamo polaing ko Mian Bisa namian mo tolilik,
hai bangsa-bangsa!”
11 #
Sad. 117:1
Tukon naiya koidan,
“Ponggaale ko Mian Bisa, hei sasaibino kobangsa,
siokai sasaibino kobanggapi nanggaale Yana!”
12 #
Yes. 11:10
Tukon nia koidan Yesaya nabinantil,
“Doi Isai naturunan naikon sumbut komeeng komian
naikon mo parentayo kobangsa-bangsa;
doi Yanamodoo kobangsa-bangsadoo namoinian.”
13Mian Bisa doiyamo kopo moinian. Boliisi Yana naontokiyo konoamu tukon sasaibino kolaba-labaan tukon namonondokan sabab komuyu anggayo doi Yana, sulano tukon ko Mian Bisa Na Roh kuasa komuyu pololokon moini doi Mian Bisa.
Kona sabab-sabab Paulus tulise tukon tegas
14Utus-utusonggu! Yaku anggayomo baikon daano badaang tuuno kolangge mo monondok doikoo. Komuyu toiyo sasaibino tukon moola mongotunggul meeng maka bailon koidan. 15Bai manganai langge-langge motantu, yaku ingotiikene komuyu tukon tegas nai suratia lalomo, sabab ko Mian Bisa lapamo beekene doi yaku do tugasoo. 16Yana lapamo tealikene yaku peleleani Kristus Yesus sulano nainutus doi bangsa-bangsa mo bolikon Yahudi. Tukon yaku motindokio buno imam, mo babilitakene ko Bilita Monondok doi Mian Bisa, sulano komian mo bolikon Yahudi teali meeng kososubakon doi Mian Bisa mo moola Yana tarimayo. Boliisi ko Mian Bisa Na Roh nakubaiyo yanila teali meeng kososubakon mo tongo kusus doi Mian Bisa. 17Jadi, tobikon yaku lapamo pomeenggon tukon Kristus Yesus, maka yaku moola lasayo banggaal doi kulimang motuuk Mian Bisa. 18Yaku barani basilingan buno doiya tongo manganai oila komo lapamo Kristus lakukanggene luwedoi yaku motuuk tealikene komian mo bolikon Yahudi taat doi Mian Bisa. Yaku lakukene doiya tukon bantilan-bantilan mau kai tukon palabuatan, 19mo pinoolainggon tukon langge-langge mominasaingdinggon; sasaibino doiya Mian Bisa Na Roh nakuasa. Bilita Monondok tentang Kristus yaku lapamo pelenggene sasaibino doi mian, tambuun doi Yerusalem polong ke Ilirikum. 20Daku tetel doiyamo mobabilitakene ko Bilita Monondok moluwedoi Mian Bisa doi lipu-lipu inaando komian moakiyoon namolongol tentang Kristus. Sabab yaku aki kuyase mokekendenge kobalimangan doi pandasi mian bailon mo abese. 21#Yes. 52:15 Doi Kitab Moliyous lalomo totulis,
“Mian mo akiyoon namantalima bilita tentang yana, naikon kitayo;
tukon yanila mo akiyoon namolongol, naikon mangalati.”
Paulus natetel moampakon doi Roma
22 #
Rm. 1:13
Doiya kosababpo biasamo yaku tahalangi moduutiyo komuyu. 23Bai diabudodoo daku limang doi lipu-lipudoo lapamo tolimang. Doi taun-taun lalomo yaku yase duutiyo komuyu. 24Totiili kalu yaku alon doi mukota doi kuampakonan lalomo doi Spanyol, yaku moinikene moola nda pososuung tukon komuyu tukon polaba-labakon naapa tukon komuyu. Lapamo doiya yaku moinikene komuyu moola tomboniiyo yaku tuuk daku ampakonan doi Spanyoloo. 25#1Kor. 16:1-4 Bai diabudodoo nia yaku yase doi Yerusalem sulano kubabayo kobantuan doi Mian Bisa namian imbali. 26Sabab ko jemaat-jemaat doi Makedonia tukon Akhaya lapamo satujuiyo sulano namebee sumbangan doi utus-utus mo talalais doi antara Mian Bisa namian doi Yerusalem. 27#1Kor. 9:11 Tukon sanaang konoano yanila putusiyomo sulano nakubaiyo doiya. Takainomo kona kanaan yanila sio natulungiyo koutus-utus mo talalais doi Yerusalemoo; sabab luwedoi Yahudi miano do mianoo mobolikon Yahudi lapamo mantarima balakaat-balakaat moluwedoi Mian Bisa. Jadi, do mianoo mobolikon Yahudi patut koidan tulungiyo ko Yahudi miano tukon balakaat-balakaat buat. 28Kalu yaku lapamo alapayo daku limang nia, tukon salakanggene doi yanila doi Yerusalemoo do sumbanganoo mo lapamo tokombul, maka yaku naikon lenggeto doi lipu Spanyol loloiyo komu kota. 29Kalu yaku lubat doikoo, pasti yaku lubat tukon badaang kobalakaat doi Kristus motuuk doi komuyu.
30Demi nda Temeneno Yesus Kristus, tukon demi soyang Mian Bisa Na Roh mo beekene, yaku kabiyo tukon tutuu doikoo, boliisi komuyu potulut sambeang tutuu polaing-laing yaku doi Mian Bisa tuuk doi yaku. 31Posambeang sulano ko Mian Bisa nasodiiyo yaku doi mian limano mo aki namangangga doi Yudea, tukon sulano daku tugas kubabaano kosumbangan doi Yerusalem natinarima tukon noa sanaang doi Mian Bisa namian imbali. 32Tukon buno doiya, kalu ko Mian Bisa yase, yaku moola lubat doikoo tukon noa mo sanaang. Tukon yaku naikon malasa tohibul doi komuyu tanga-tangano. 33Boli-boliisi ko Mian Bisa, mo beekene komonondokan doi banggapi, loolainge Utus sasaibino. Amin.
Currently Selected:
ROMA 15: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
