ROMA 12
12
Tubo tuuk Mian Bisa
1Utus-utus! Ko Mian Bisa monondok tuuno doi kita. Doiyamo kosababpo yaku kabiyo tukon tutuu sulano komuyu pososubakene kobutomuyu buno meeng kososubakon motubo mo kusus tuuk doi Mian Bisa tukon mo sanaanggene Konoano. Komu manganggaan doi Mian Bisa siokai nabuno doiya. 2Inai mololoiyo nadunia nia namongiasan. Sodiiyomo ko Mian Bisa nakubaiyo kobutomu teali boolu, sulano komuyu tobolii. Tukon kalu buno doiya komuyu moola toiyo ko Mian Bisa namongiasan – doiyamo oila komonondok tukon mo sanaanggene Konoano tukon mo talakana.
3Mian Bisa lapamo beena doi yaku kona monondokan. Doiya kosababpo yaku mongotinau Utus-utus sasaibino: Inaikai molasaiyo kobutomu lobian tatandak doi mo tutuu. Tadukai komuyu ponilaiyo kobutomuyu nandondoong tukon poekependeyo konoamuyu; meeng-meeng komian nilaiyo kobutongo menurut nakamampuan Mian Bisa mo beekene doi yana sabab yana mangangga doi Yesus. 4#1Kor. 12:12 Kobutonggita daano badaang kona anggota. Sasamba koanggota daano kona limang susuungo. 5Bunomo koidan tukon kita. Mau kai kita sasaibino nabadaang, bai kita pokakana meeng kobutonggita sabab kita pomeenggon doi Kristus. Tukon kita meeng-meeng komian potaami meeng tukon bailon buno anggota-anggota doi meeng kobutonggita. 6#1Kor. 12:4-11 Kita meeng-meeng komian daano kona karunia baleleanian mo posasala. Karunia-karuniadoo Mian Bisa beekene doi kita luwe namaasi. Tobikon doiya kita sio nda pakeyo do karunia-karuniadoo. Komian mo daano kona karunia sulano nababilitakene kobilita moluwedoi Mian Bisa sio nababilitakene do bilitadoo moluwedoi Mian Bisa menurut nakamampuan mo daano doi Yana. 7Mian mo daano kona karunia motuuk motulungian mian bailon, sio natutuuno tulungiyo komian bailon. Mian mo daano kona karunia sulano namongotunggul, sio natu-tuuno mongotunggul. 8Mian mo daano kona karunia motuuk mobeean samangat doi mian bailon, sio natutuu mobee samangat doi mian bailon. Mian mo daano kona karunia motuuk mendebean doi mian bailon oila komo daano doi yana, sio nalakukanggene doiya tukon noano nasanaangan secara natalakanaan. Mian mo daano kona karunia motuuk katuaiyo sio natutuu katuaiyo. Mian mo daano karunia motuuk motudoikonan seang doi mian bailon, sio nalakukanggene tukon noa sanaang.
9Seseange tukon sanaang. Misikitene komo lokis, tukon bataani doi oila komo monondok. 10Siokai Utus-utus poposeanggon meeng tukon bailon tukon polasaiyo buno mian mo montolutus doi meeng kobonua lalomo, siokai komuyu po matailukiyo beena adat. 11Pobalimang tukon molole. Inai mobea. Balimango motuuk doi Temeneno tukon samangat moluwedoi Mian Bisa Na Roh. 12Siokai Utus mumoini doi Temeneno tukon laba, sabar doi susaan lalomo, tukon tataap sambeang. 13Tulungiyo muosukupe ko Salani miano bailon nakapalaluuwan tukon tarimayo Utus-utus mopomeenggon manganggaan Utus mo aki natingoniiyo, tukon noa sanaang doi mubonua lalomo.
14 #
Mat. 5:44; Luk. 6:28 Kabiyomo doi Mian Bisa sulano Yana nabalakaatiyo komian mo lokis doikoo. Oode, kabiyo ko Mian Bisa nabalakaatiyo yanila, inai mokutuke. 15Poloingi molaba tukon komian mo laba-laba, tukon kokiil tukon yanila mo kokiil. 16#And. 3:7 Potubo pokindok meeng tukon bailon. Inaikai mobati-batinggai, bai pokonoikene kobutomu tukon mian kona kadudukan mo pepende. Inai moaanggene kobutomu lobian pandoi doi natutuuan.
17Kalu komian kubaiyo lokis doikoo, inaikai mobalase tukon nalokisan. Kubaiyomo oila komo inaanggon monondok doi sasaibino komian. 18Doikoo tambikon, kakaatemo mumoola laate sulano mutubo dame tukon sasaibino komian. 19#Kua. 32:35 Utus-utusonggu! Inai mobalase konggimalan, sodiiyomo Mian Bisa komo ukume. Sabab doi Kitab Moliyous lalomo totulis, “Yakumo komo balase. Yaku naikon komo ukume yana, Temeneno bantile.” 20#And. 25:21-22 Kobalino, kalu komu musu malaal, beena yana kaan; tukon kalu yana molou, beena yana monginum. Sabab tukon kubaiyo mobuno doiya, Utus naikon kubaiyo yana teali mammaa. 21Inai mosodiikene kobutomu kolokis nalungguiyo, bai siokai Utus mulungguiyo domo lokisoo tukon namonondokan.
Currently Selected:
ROMA 12: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
