ROMA 11
11
Mian Bisa namonondokan konoano doi bangsa Israel
1 #
Flp. 3:5
Yaku mansadai: Oilakai ko Mian Bisa lapamo sakukene Kona mian susuungo? Tantu aki! Yaku susuunggu meeng ko Israel miano katulunan Abraham, tukon doi suku Benyamin. 2Aki! Mian Bisa aki nasakukene Kona mian mo lapamo Nalilike salataa doi looluk. Utus-utus toiyo oila komo totulis doi Kitab Moliyous lalomo manganai Elia, salataa yana popitoikene kosoal Israel doi Mian Bisa. Elia bantile, 3#1Tom. 19:10, 14 “Temeneno, komian lapamo akateyo Komu nabi-nabi tukon momanase kotampat-tampat mososubakonan sosubakon motuuk doi-Koo. Totinggal yaku susuunggu tukon yanila yase akateyo yaku.” 4#1Tom. 19:18 Oilakai ko Mian Bisa napotimbili doi Elia? Mian Bisa timbiliyo, “Yaku lapamo otinggale kopitu kolono komian motuuk doi butong-Ku susuunggu. Yanila akiyoon nabiasa mososubaiyo ko Dewa Baal.” 5Bunomo koidan budodoiya nia: Daano kosoisik koaito komian mo lapamo Mian Bisa lilike sabab Namaasi. 6Yana lilike yanila luwe Namaasi tukon bolikon luwe yanila nakokubai. Sabab kalu do Mian Bisadoo namolilikan luwedoi banggapi nakokubai, maka ko Mian Bisa namaasidoo bolikon kai maasi mo bisa.
7Jadi, bulaandomo? Israel miano aki nalaate oila komo yanila konapo inumbal. Komo malaat tongo meeng kotambuno poipoisik doi mian mo lapamo Mian Bisa lilike. Kobailon sasaibino teali matikas konoano doi Mian Bisa naponguang. 8#Kua. 29:4; Yes. 29:10 Sabab doi Kitab Moliyous lalomo totulis buno naiya, “Ko Mian Bisa kubaiyo yanila noano tukon yanila napikilan kalipookan; tukon polong nai tempo nia yanila matano aki namoola mokita tukon yanila tolingaino aki namoola molongol.” 9#Sad. 69:22-23 Daud bantile koidan,
“Sodiiyomo yanila nalame-lamean teali palako doi yanila susuungo,
tukon teali buang, tampat yanila naotuwongan tukon manas!
10Sodiiyomo yanila napokita teali kalipookan sulano yanila aki namoola mokita;
tukon sodiiyomo yanila teali aki namoloyos posidutukon.”
11Yaku mansadai koidan: Salataa ko Yahudi miano otuwong, oilakai doiya teali sulano yanila namanas? Aki nabuno doiya! Bai sabab yanila baladosa, maka kobangsa bailon naikon sinalamaton, tobikon mangaanikene ko Yahudi miano masakit konoano doi bangsa bailon. 12Sabab bangsa Yahudi daano kona sala tukon aki naloloiyo ko Mian Bisa namongiasan, maka bangsa-bangsa bailon Mian Bisa balakaatiyo. Baimo kai kalu kopataamian kobangsa Yahudi tukon Mian Bisa teali monondok koidan; tantu lobian babasal koidan kobalakaat naikon Mian Bisa nabineekon!
Kasalamatan bangsa-bangsa bailon mo bolikon Yahudi
13Bai budodoiya kona monondokan yaku mobasilingan doi Utus-utus mo bolikon Yahudi! Buuniamo, buno meeng korasul motuuk doi bangsa-bangsa mo bolikon Yahudi, yaku holomatiyo tuuno daku limang nia. 14Yaku moinikene yaku moola osumbutene konoa masakit doi kubangsa susuunggu, sulano tukon doiya loloonoo yaku moola salamatene kosoobos doi yanila. 15Sabab yanila Mian Bisa tolake, maka kona potaamian kodunia tukon Mian Bisa teali monondok koidan; baimo kai kalu yanila Mian Bisa talimayomo! Tantu doiya pokakanamo buno komian momate tubo koidan!
16Kalu meeng kopatolo koloti tumbeno lapamo bineekon doi Mian Bisa, doiya koalatino sasaibino kona loti bineekon doi Mian Bisa koidan. Tukon kalu kokayung anggolo daano Mian Bisa koona, doiya koalatino kolanga-langaano daano koona koidan. 17Kosoobos doi kayung zaitun langa-langaano – doiyamo Yahudi miano – molapamo linengei. Tukon doi nalinengeiyanoo inosulikon kokayung zaitun mosolot langaano, doiyamo Utus-utus mo bolikon Yahudi. Utus sinumbokiikon idoo sulano Utus nalasaiyo sasaibino komo monondok luwedoi tuboan rohani Yahudi miano. 18Tobikon doiya inaikai komuyu moambanggene yanila mo lapamo linengei buno do kayungo langaano. Komuyu sio poneneeke baikon komuyu tongo langaano tolong. Tukon bolikono langaano komo beena kaan doi anggolo, bai anggolo komo beena kaan doi langaano.
19Bai Utus naikon bantile, “Oode, bai do langa-langaanodoo pinatol sulano yaku moola sinumbokiikon doi batango!” 20Doiya bisa tuuno. Bai yanila sinakukon sabab aki namangangga, bai kai Utus tinalima sabab Utus mangangga. Jadi inaikai Utus teali banggaal doi yana; kobalino Utus sio mumatakut. 21Sabab kalu ko Mian Bisa aki nalasayo moseange sulano nasakukene ko Yahudi miano mo buno do kayung-kayungoo langa-langaano tuuno, inai moaanggene yana naikon malasa seang mosakukene ko Utus. 22Jadi dimbaa kita kitayo bulaa kona monondokan ko Mian Bisa tukon bulaa kona motikasan koidan. Yana tindokiiyo motikas doi yanila mo baladosa, bai Yana monondok konoano doi Utusoo – asal Utus tataap tubo doi namonondokan. Kalu aki, maka Utus koidan naikon sinakukon. 23Tukon manganai Yahudi mianodoo, kalu yanila tade doi nasikap moaki namangangga, maka yanila naikon tinarima koidan; sabab ko Mian Bisa balakuasa sulano natarimayo yanila koidan. 24Utus mo bolikon kona luwean doi Yahudi bangsa modaano buno langaano doi zaitun batango mo solot. Nah, kalu Utus, podangaanikene tukon Utus nasipat, moola nasinumbokiikon doi zaitun batangodoo tuuno, baimo kai koidan ko Yahudi miano mo inandekon tukon zaitun batango tuuno langa-langaano. Tantu lobian kona gampangan koidan doi Mian Bisa sulano naabalinggene yanila doi napo zaitun batango yanila susuungo.
Mian Bisa naseangano sasaibino kobanggapi
25Utus-utus! Yaku moinikene komuyu inai molasayo lapamo toiyo sasaibinodoo. Sabab daano komeeng kolangge Mian Bisa mo yase, bai mo akiyoon mian natoiyo. Tukon yaku yase komuyu potoiyo; doiyamo nia: Kosoobos ko Yahudi miano motikas konoano, bai doi yanila nandondoongoo naikon banggadudul tongo polong koaito mian-mian mobolikon Yahudi komo lubat doi Mian Bisa lapamo tasadia. 26#Yes. 59:20-21 Bunomo lakon sasaibino ko Yahudi miano naikon salamat. Sabab doi Kitab Moliyous lalomo totulis buno naiya,
“Tomundo Pasalamat naikon lubat, luwedoi Sion;
yana naikon apuse sasaibino kona kulokisan doi Yakub nakatulunan.
27 #
Yer. 31:33-34
Yaku naikon boboiyo naperjanjian nia tukon yanila
doi tempo yaku ompuniyo yanila nalalim-lalim.”
28Sabab ko Yahudi miano aki nayase mantalima Bilita Monondok moluwedoi Mian Bisa, maka yanila teali Mian Bisa namusu; tukon doiya maka teali kauntungan doi Utus-utus mo bolikon Yahudi. Bai sabab Mian Bisa molilike, maka do Yahudi mianodoo Mian Bisa tataap seseange sabab tumbunoila. 29Sabab kalu Mian Bisa lilike komian tukon balakaatiyo do mianoo, ko Mian Bisa aki nabiasa abali talike oila komo lapamo yana kubaiyo. 30Loolukon komuyu aki potaat doi Mian Bisa. Bai diabudodoo ko Mian Bisa lapamo okitakanggene baikon komuyu tongosodiimo doi kasalaan, sabab ko Yahudi miano aki nataat. 31Bunomo lakon koidan tukon do Yahudi mianodoo. Diabudodoo nia yanila aki nataat doi Mian Bisa, sulano komuyu poinokitakon tongosodiian doi kasalaan. 32Sabab ko Mian Bisa lapamo sodiikene sasaibino kobanggapi doi naakiyan nataat nakuasaiyo, sulano yana namoola tudoikene kona seangano doi yanila sasaibino.
Nggaalano ko Mian Bisa
33 #
Yes. 55:8
Bisa tuuno ko Mian Bisa nakaasaan! Bisa babasal kona pandoiyan tukon namongotoiyan! Indee kai komo moola selidikiyo kona kaputusan? Indee kai komo moola mangalatikene yana nacara-cara balimangan? 34#Yes. 40:13 Doi Kitab Moliyous lalomo totulis buno naiya,
“Indee kai komo toiyo ko Temeneno napikiran?
Indee kai komo moola mebee otunggul doi yana?
35 #
Ayb. 41:11
Indee kai komo biasa beena lobo meeng doi Temeneno
tobikon namoola tuntute koposobolino?”
36 #
1Kor. 8:6
Mian Bisa komo tealikene sasaibino kolangge. Sasaibino kona luwean doi Mian Bisa tukon doiya tuuk doi Mian Bisa. Tanggaal ko Mian Bisa tuuk sidutu-posidutukon! Amin.
Currently Selected:
ROMA 11: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
