SADEONG 9
9
Sambeang sukuur sabab Temeneno naadilan
1Tuuk komo katuaiyo konyanyian. Menurut Mut-Laben nalagu. Daud na Sadeong.
2Tukon totubo konoanggu yase mobasukuur doi-Koo Temeneno,
tukon babilitakene Komulimang mo kinabasal.
3Yaku yase tedes tukon laba-laba sabab Ikoo
tukon yaku nggaale kosambu-Mu,
Temeneno Mo Tatandak Tuuno.
4Doi salaa-Mu dakumusu abali tukon bulen;
yanila tuwong takait tukon mate.
5Sabab Ikoo maparenta salaku hakim mo adil;
Ikoo lapamo belayo daku perkara.
6Ikoo ukumemo kobangsa-bangsa
tukon akateomo komian-mian molokis;
yanila tinoliminggono polong sidutu-posidutukon.
7Komai musuh kabuso molopu
konapo kota-kota ikoo manasemo;
akiyono komo neneke koidan.
8 Temeneno maparenta polong sidutu-posidutukon;
yana kekendenge konabatomundoan sulano nahakimnyo kodunia.
9Yana parentayo kobangsa-bangsa tukon adil
tukon akimiyo yanila tukon jujur.
10 Temeneno doo tampat soopan doi mian mopiniipik,
tampat soopan doi tempo susaan.
11Mian motingoniyo Ikoo moinikene doi-Koo, oh Temeneno,
komian mo susubaiyo Ikoo aki Mutinggale.
12Nggaalekai ko Temeneno momaparenta doi Sion!
Basalitakenekai Konakokubai doi bangsa-bangsa!
13Sabab Yana neneeke doi mian mosakisaa
tukon akinatoliminggene konapo kilisonan;
mian molakukene kokakalasan Yana ukume.
14Kitayokai komusuh sakisayo yaku;
mamasikanakukai, oh Temeneno
osobiyokai yaku luwedoi matean,
15sulano yaku nggaale Ikoo
doi Yerusalem tumbuno salaano.
Yaku naikon wookon laba-laba
sabab Ikoo salamatene yaku.
16Bangsa-bangsa moaki Natingonikon
tuwong doi bitu lalomo yanila mokaliyo susungo;
yanila tositak doi napotalong lalomo susungo.
17 Temeneno lapamo okitakene Kobutongo
sabab Konakaputusan moadil.
Mian molokis tongusokon luwedoi nakokubai susungo.
18Komatean daanokai konapupusan komian-mian lokis,
bangsa-bangsa moaki napusinggene ko Mian Bisa.
19Aki natuuk posidutukon komian motallais natinoliminggon;
aki natuuk momeenggon komian mosakisaa akiyo kona moinian.
20Kokondongokai, Temeneno, hakimiyomokai kobangsa-bangsa,
inai mosodiiyo kobangkapi nababanggakene kobutongo.
21Batadikenemokai yanila napomatakut, oh Temeneno,
tukon napotoiyo baikon yanila tolongo bangkapi.
Currently Selected:
SADEONG 9: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
