1 YOHANES 2
2
Kristus dadosa baemosomtam dambir atemtamero atakam
1Tiparais! Dere ara surat tara aeapomtammin, ere tare dosa baem-ombar. Yesus Kristus ere, turunak Ipit. Dare dosa aemtam apaye, Armat Ipit atakam Daritipit ajanimtamtemaro. 2Emesare, dare dosa aemom. Me, Yesus Kristus dadosa bimak binip bajanimemtam, dambir atemtamero. Ara dambir ateme pak, bimak binip dadosa taka bajanimemtam pak apok. Ere ara asamot owe takesam adosa bimak binip bajanimemtam are. 3Dare Allah asakamtame atakam ji aemarom apaye, dare Allah damsam apormarom. 4Owe atakam akoretetertas apaye, “Allah demsam,” emes atakam aesimtetertas apaye, me, are Allah atakam ji bae apok aemtetertas apaye, are pote owe. Ara atakamnak amsam apok. 5Allah atakam ji aeemas owe ere, Allah bafaimnak afaimkorommas. Dare aatakam ji aemarom apaye, dare aowe eteememom apormarom. 6Owe atakam akoretetertas apaye, “Dere Allah takan aememaaremin,” emes atakam aesimtetertas apaye, are Yesus Kristus aemaarir pak jipu baemtetertas.
Ai basakamtam atakam
7Dejoo owe akot! Ara aeapomtammin surat, ai basakamtam atakam apok. Are tarai basakamtam atakam. Are era bonaknak jane ajiaarukum basakamtam atakam taka are. Tarai basakamtam atakam, jane emejiekem. 8Me, ara aeapomtammin surat, anom ai basakamtam atakam. Emesare, era jiiti pak aesosem. Era sare anakotam asaramtiim. Dare Kristus aeme pakam, era aemmakam pakam, emes apormarom. Erarawa dare ara basakamtam atakam, atakamnak apormarom.
9Owe atakam akoretetertas apaye, “Dere era sarepu aemapmin,” emes atakam aesimtetertas apaye, me, are ajoo owe bifane afeomemtas apaye, era owe waaam jiiti bomon aemapemas. 10Ajoo owe afaimemas owe, sare bomon aemapemas. Erarawa are, owe Kristus bajamkai bamompim, baemapom apok aememas. 11Ajoo owe bifane afeomememas owe ere, jiiti bomon aemapemas. Are jiiti bomon ajaremas. Abanamekam jiiti. Erarawa are era aesosmas asan bapor apok aeemas.
12Tiparais! Allah Kristus aeme pak apore. Erarawa Are tadosa bimak binip emejanimemtame. Emesamare, dere ara surat aeapomtammin. 13Duturu owee! Tare bonaknak aememaarir Ipit tamsam. Erarawa dere ara surat aeapomtammin. Ai owee! Tare asan pota Ipit emekumimosomekem. Erarawa dere ara surat aeapomtammin. 14Tiparais! Daritipit tamsam. Erarawa dere ara surat aeapomtammin. Duturu owe! Tare bonaknak aememaarir Ipit tamsam. Erarawa dere ara surat aeapomtammin. Ai owee! Tare jak fiak. Allah atakamam tajak bomon aapeta. Tanom era Asan Pota Ipit emekumimosomekem. Erarawa dere ara surat aeapomtammin. 15Tare ara aemansa tapirmiam, ara aemansa tapirmi pakam, jak baseseromem bas. Ara aemansa tapirmi pak jak aseseromemas owe, Allah bafaim apok aememas. 16Owe jak basenomem pak, ere ara aemansa tapirmi pak. Owe pak aporemas, wanam era pak bataet bimak binip daytinak atetaramemas. Anom ara aemansa tapirmi pak. Oweam amba aemetemtememas. Anom ara aemansa tapirmi pak. Era pak takes Daritipit atetamemar pak apok. 17Ara tapirmi ajaniostem. Era asamot owe asinomememas pakam ajaniostem. Allah atakam ji bae owe ere, jiine aememaartemas.
Kristus Ajokoman Ipit atakam
18Taparaise! Era Asepnak Bare, ere setep aosisimara. Me Kristus Ajokoman Ipitam ajinaotem. Tanom emes atakam jane emejiekem. Waaam, Kristus jokoman owe tanane aomatisa. Dare emes apormarom arawa, era Asepnak Bare, ere setep apormarom. 19Era owe ere, dara bajamkainak apok. Erarawa are beken ajioseroes. Era owe dara bajamkainak ere, are dare takan aemapmaroma. Era owe ere, beken ajioseroes. Erarawa era owe dara bajamkainak apok aporom. 20Kristus ere, Allah Jip emetetamteteren. Erarawa tanom takes era atakamnak tamsam. 21Tare ara atakamnak tamsam apok apok. Tanom tamsam. Atakamnakam, pote atakamam, awar apok apormakam. Erarawa dere ara atakam, surat tara aeapomtammin.
22Era pote ipit tanam? Jipit takaam, “Yesus ere, Kristus Ipit apok,” emes atakam aesima. Erarawa emes atakam akoremar ipit ere pote ipit. Era ipit Kristus Ajokoman Ipit. Are Daritipitam, Andepam, jamnuk takes awotapememe. 23Allah Andep awotapememas owe takes, Aritipitam bajamkai apok aememas. Me Andep eemnak ambesemkoromemas owe, Aritipitam ajamkaiemas.
24Tare ere, bonaknak jane ajiaarukum atakam, tajak bomon emes baemapteterto. Me bonaknak jane ajiaarukum atakam, tajak bomon emes aemapteterto apaye, tare Andepam, Daritipitam, takan aemapaartemakam. 25Kristusam, emes dara baemtam, ataaji aeetamero. Are jiinenak dara batetam ataaji aeetamero.
26Wan owe potet tara atutumporman. Emesare. dere emes atakam surat tara aeapomtammin. 27Me, Kristus, Allah Jip emetetamen. Me Allah Jipam tajak bomon aemapaareman. Erarawa. owe, atakam tara baememtam bas. Emesare, Allah Jip atakam takes tara aememtamman. Era atakam aememtammar atakam, atakamnak. Ere pote atakam apok. Tare ere ara atakam ji aeay. Tanom Kristus takan aemapaaray.
28Tiparais! Emesare, tare Kristus takan aemapaaray. Erarawa, Armat Ipit ajisemto, dare jak fiak aememtemarom. Andaeto ere, dare abipu damke bakem-ombar. 29Tanom Armat Ipit, turunak Ipit apormakam. Era turu pak aememas owe takesam Allah arereis. Tanom emes apormakam.
Currently Selected:
1 YOHANES 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
