ZEFANYA 3
3
Kasat ma fetin neu Yerusalem
1Sukat neu kot Yerusalem, kot amle'ut le anlomi lasi mabanat neu Uisneno ma le nasusu' ma anmusi in to anmes! 2Amle'ut neu kot le kan lomi fa Uisneno, ma Uisneno In amnaut, ma kan lomi fa amsa hen panat In fainekat sin, ma le ka nana'at fa in monin neu Uisneno, ma kan toti fa babat ma tuntakus neu In.
3Ale anaet anbi kot onle meo asu le anbai. In alef lasi sin onle asu fui-asu fui le namnah, sin anpalu nisan talantia nuif mese amsa sin ka nani fa neu noka. 4In Mafefa knino kan mu'i fa nek sutais ma sin ka mapalsai fa; ale ana' fuat sin nalahib sin le anbeti nalali neu Uisneno ma naklelo plenat-plenat Uisneno le neki mnisat neu sin aon anmes kun. 5Mes Uisneno fe nokan kot le nane, le anmo'e amneot piut ma kan mo'e nit fa le asanat. Anbi ale nok-noka sin, In anfe amnonot neu In to. Mes atoni le ka nahin fa amnonot anbi kot le nane of anmo'e maufinu piut ma ka nahin fa mae.
6 Uisneno nakua a'an nak, “Au uneku ulali uf namfau; sin kot-kot sin Au uskuku ani sin ma sin baki lape sin ma sin el fatu sin, Au mo'e sin anfani fatu atupuk. Sin kot-kot sin luman ma kan mu'i fa atuas ma in lanan-lanan sin nauba'. 7Au utenab, ‘Namneo tabu le i Au to nabes neu Kau ma anpanat Au noina sin. Namneo of sin namnau noina le Au fe ulali neu sin.’ Mes anbi kisot sin nao mat piut anbi maufinut on afi ahunut.
8Mes ampantom! Ampao in neno Au of a'fen ma a'fani amnek lasi. Natuin Au ufek ulali he nibun ale uf-uf ma ale pah-pah le usanut neu sin Au to'as ma Au maunu. Pah pinan of namsab, Au ai to'as of neku nani.
9Mes anbi amunit Au of uklelo ale uf-uf nane sin nekan, talantia sin an onen alkun neu Kau, ma ka neu fa uisneno teta bian. Uf-uf nane alsin of natuin Kau. 10Ma na'ko Sudan le na'lo amsa, Au to le nasitbon nane of nem ma natulu fua tulu neu Kau. 11Anbi tabu le nane, hoi Au to, hi kais amnek mae amteni natuin hi am laban milali Kau. Au of a'li'u ale atoni a'moko ma neka naeb ma of hi ka maban mok amteni Kau fa anbi Au netu knino. 12Anbi nane of Au ufetin pah mese le in nek amnebet namaika anbine, ma le nafnek neu Au babat ma tuntakus. Nabe'i sin natua anbine. 13Atoni Israel sin nesin, of kan mo'e anteni fa maufinu neu sekau amsa, sin of ka namolok fa lasi poi ma kan mo'e fa lasi kake. Of sin moni nok athoes ma malinat, ma ka namtausan fa sekau amsa.”
Sit malinat
14Hoi Israel, mi'ba' nai ma mimlil nai!
Hoi Yerusalem, mimlil meki hi nekam oke!
15Natuin Uisneno nasnasab kasat neu ki;
In anli'u nalali ale hi musu sin.
Uisneno anmes anfani Kesel Israel le namneo ma nahafo ki.
Tabu le i ka nabe'i fa he hi mimtau amteni.
16Of antia in tabu atoni-atoni of namolok nak,
“Hoi Yerusalem, kais mumtau ma amnek oni.
17Hi Uisneno es naneo ma nahafo ki.
Hi mis milali natuin In kuasat.
Uisneno namlil ma namoke natuin ki,
In anfe ki monit fe'u anbi In manekan.
18Natuin hi, In ansi nok amlilat
onle atoni le fe anmo'e fesat.”
Uisneno nakua a'an nak,
“Snama le antoman ki Au ufinib ani.
Ho mae sin Au nose ani sin.
19Antia in tabu Au of uskuku ani atoni le nasusu' ma anmusi ko,
ma atoni hae a'olet Au ufetin ani;
ale atoni mapolin of Au topu an sin anfani nem.
Si'ut neu sin Au ubaina ani anfani apinat;
anbi me amsa, anbi pah pinan ok-oke,
mes napeni kan apinat ma anpules sin.
20In eti ma in tabu of anbol,
ho to sin le nasitbok Au eki ufani sin anfani nem.
Hi of mateka ki anfun natef pah pinan,
ma Au of uloitan ufani hi athoes.”
Uisneno es namolok nalali onane.
Currently Selected:
ZEFANYA 3: AOZ
Highlight
Copy
Compare
Share
Want to have your highlights saved across all your devices? Sign up or sign in
