BILANGAN 3
3
Nai Harun in anah-anah sin
1Le i Nai Harun ma Nai Musa sin ume nanan anbi tabu Uisneno nakua a'an neu Nai Musa anbi Tubu Sinai in tunan ma in fafon. 2Nai Harun anmu'i anmone ha: Nai Nadab es anmone nae, oke te Nai Abihu, Nai Eleazar ma Nai Itamar.
3Fun namepan sin anfani Ana' fuat knino nok luli besa an op min fomeni neu sin anakan. 4Mes Nai Nadab ma Nai Abihu sin anmate anbi mnela snaen Sinai, anbi tabu sin neki ai le ka naleko fa anbi Uisneno In human ma In matan. Sin nua sin kan mu'in fa anah. Es nane te anbi tabu Nai Harun fe anmoni, Nai Eleazar ma Nai Itamar sin nanaoba mepu on Ana' fuat knino.
Anlek atoni-atoni Lewi hen tuthae Ana' fuat knino sin
5 Uisneno nakua a'an neu Nai Musa nak, 6“Amlenu uf Lewi he sin nem anhaumak Kau ma amlek sin anfani atuthaes-atuthaes neu Nai Harun. 7Sin anmepu anbi Au Um-ume ma mes sin antuthae ale Ana' fuat knino ma ale nonot ok-oke nok sin anmepu anbi Au Um-ume. 8Sin mepu esle' nabalab ale bale' anbi Au Um-ume ma nanaoba mepu anbi Au Um-ume nane on anseka atoni Israel. 9Na'ko nonot Israel, al uf Lewi es Au utetab sin anfani atuthaes nabala neu Nai Harun ma sin sanut mofut sin. 10Mes Nai Harun nok in anah sin mes ho maiti sin he nanaoba mepu on Ana' fuat knino; naik na'ko sin, sekau amsa le ansu' he nanaoba mepu nane mes namate sin.”
11 Uisneno nakua a'an neu Nai Musa nak, 12-13“Anbi tabu le i Au beti atoni-atoni Lewi anfani Au in-ini. Anbi tabu Au umate ale an unu atoni Mesir, Au beti utetab neu Kau ale li'anmone unu atoni Israel ma sin mu'it le nahonis nahunun sin. Ale nane ok-oke anfani Au in-ini kun. On anfani aseka li'anmone unu Israel, Au aiti atoni Lewi neu Kau; sin of anfani Au in-ini kun. Au Uisneno kau.”
Anso'i smanaf atoni Lewi
14Anbi mnela snaen Sinai Uisneno anlenu Nai Musa 15anmo'e sul kanaf atoni-atoni Lewi natuin sin ume mese-mese kun; ale anmone mese-mese le sin uan funan mese nek in sae mes antui sin kankenu. 16Oke te Nai Musa nanaoba plenat Uisneno nane. 17-20Nai Lewi anmu'i anmone tenu: Nai Gerson, Nai Kehat ma Nai Merari. Antek sin kankenu natuin sin amfen kanken mese-mese. Nai Gerson anmu'i anmone nua: Nai Libni ma Nai Simei. Nai Kehat anmu'i anmone ha: Nai Amram, Nai Yizhar, Nai Hebron ma Nai Uziel. Nai Merari anmu'i anmone nua: Nai Mahli ma Nai Musi. Sin le nane sin amfenu na'ko ume le antek sin natuin sin kankenu.
21Nonot Nai Gerson sin esle' na'ko ume Nai Libni ma na'ko ume Nai Simei. 22Nonot Nai Gerson sin atoni amfaun le sin uan funan mese nekin sae le antui sin amfaukenu atoni 7.500. 23-24Nai Elyasaf nai Lael anah anmone in anfani nakaf neu nonot nane. Anbi um-ume Israel, nonot nane in naiti bale anbi bian a'li Um-ume Uisneno in kotin. 25Anbi mepu nabalab Um-ume Uisneno, sin ansutai neu Um-ume ma in toben, pilu anbi eno he tam, 26pilu kubat ume po'an le anfun natef nan Um-ume ma baki tulu, pilu ekat ume po'an nane. Sin ansutai neu ale mepu le anmu'i malutas nok bale'-bale' nane.
27Nonot Nai Kehat sin esle' na'ko ume Nai Amram, Nai Yizhar, Nai Hebron ma Nai Uziel. 28Atoni le sin uan funan mese nekin sae na'ko nonot nane sin amfaukenu atoni 8.600. Sin ansutai mepu nabalab ale bale' anbi Um-ume Uisneno. 29-30Nai Elisafan Nai Uziel anah anfani nakaf neu nonot nane. Anbi Um-ume, nonot nane sin bale' anbi bian a'ne'u Um-ume Uisneno. 31Sin ansutai mepu neu Peti Fef Bela, mei, paku in haen, ale baki tulu, ale bale' le ale Ana' fuat knino anpake anbi Ke'an Knino, ma pilu eka le anbati ma an eka Ke'an Knino. Sin ansutai mepu le anmu'i malutas nok ale bale' nane.
32Nakaf uf Lewi es Nai Eleazar, Nai Harun anmone. In es anpanat atoni-atoni le anmepu anbi Ke'an Knino.
33Nonot Nai Merari sin esle' na'ko ume Nai Mahli ma na'ko ume Nai Musi. 34Atoni le sin uan funan mese nekin sae na'ko nonot nane sin amfaum atoni 6.200 35Nai Zuriel Nai Abihail anah es anfani nakaf neu nonot nane. Anbi um-ume, nonot nane sin naiti bale' anbi bian a'li na'ko Um-ume Uisneno. 36Sin ansutai neu mepu Um-ume Uisneno in haunu nane esle' in nonof sin, ale in ni sin, in kapeni sin, ma ale bale' ma ale mepu le anmu'i malutas nok ale bale' nane. 37Onane amsa neu ale in ni sin, ale in kapeni sin, ale in suaf-suaf sin, ma tani-tani sin neu po'an um-ume nane kotin.
38Anbi um-ume, Nai Musa ma Nai Harun ma in anah sin mes naiti bale' anbi Um-ume Uisneno antom matan, anbi neno saen. Sin mes ansutai neu mepu luli besa to Israel anbi Ke'an Knino. Naik na'ko sin, sekau am sekau le ansu' he nanaoba mepu nane mes namate nani. 39Ale atoni anbi uf Lewi le uan funan mese nekin sae le Nai Musa antui sin natuin asal nonot mese-mese natuin plenat Uisneno sin amfaun ok-oke 22.000.
Atoni Lewi anfani aseka li'anmone unu Israel
40-41 Uisneno nakua a'an neu Nai Musa nak, “Ale li'anmone unu Israel nane Au ini kun. Amtui sin kankenu le sin uan funan mese nekin sae. Mes on anfani aseka neu sin, Au uton ak ale atoni Lewi sin anfani Au ini kun. Au Uisneno kau! Ma atoni Lewi sin mu'it amsa Au uton ak anfani aseka neu ale mu'it le nahonis nahunun anbi mu'it to Israel.” 42Nai Musa antao ma anmo'e sa' le Uisneno, naplenat nani neune; in antui ale li'anmone unu sin 43le sin uan funan mese nekin sae. Sin ok-oke sin amfaun atoni 22.273.
44Oke te Uisneno nakua a'an neu Nai Musa nak, 45“Ambeti muteta atoni-atoni Lewi le sin anfani aseka neu ale li'anmone unu Israel; onane amsa mu'it atoni Lewi le anfani aseka mu'it atoni Israel. 46Natuin ale li'anmone unu atoni Israel anesi atoni 273 na'ko atoni Lewi sin amfaun, es nane te anesit nane mes him soi sin. 47Neu li'anmone mese, hi mes ambaen noni muti nim matom nok osaf le nanaobon anbi Au Um-ume; 48amfe noni nane neu Nai Harun ma in anah-anah sin.” 49Nai Musa antao ma anmo'e plenat Uisneno nane. 50In naiti noni muti 1.365, 51ma in nana'at sin neu Nai Harun ma in anah-anah sin.
Currently Selected:
BILANGAN 3: AOZ
Highlight
Copy
Compare
Share
Want to have your highlights saved across all your devices? Sign up or sign in
