BILANGAN 1
1
Atoni Israel so'i smanaf le anbi ahunut
1Anbi neno mese fun nua anbi ton nua leka atoni Israel sin nasaitan nalali Mesir, Uisneno nakua a'an neu Nai Musa anbi Um-ume Uisneno anbi mnela snaen Sinai. In nakua a'an nak, 2“Ho ma Nai Harun mes hem so'i smanaf to Israel ok-oke, natuin nonot ma ume mese-mese. Anmo'e sul kanaf, 3atoni ok-oke le ton bo'nua nekin sae le nabe'i hen fani solalus. Mes amtui sin natuin sin pukan mese-mese. 4Na'ko uf mese-mese, amtoti kanaf mese hen tuntaku ki.” 5-16Le i kanaf atoni-atoni le anbeti sin na'ko nonot hen tuntaku Nai Musa ma Nai Harun ma le anfani nakaf neu uf mese-mese, esle':
| Uf | Nakaf |
|---|---|
| Nai Ruben | Nai Elizur Nai Syedeur anah |
| Nai Simeon | Nai Nai Selumiel Nai Zurisyadai anah |
| Nai Yehuda | Nai Nahason Nai Aminadab anah |
| Nai Isakhar | Nai Netaneel Nai Zuar anah |
| Nai Zebulon | Nai Eliab Nai Helon anah |
| Nai Efraim | Nai Elisama Nai Amihud anah |
| Nai Manasye | Nai Gamaliel Nai Pedazur anah |
| Nai Benyamin | Nai Abidan Nai Gideoni anah |
| Nai Dan | Nai Ahiezer Nai Amisyadai anah |
| Nai Asyer | Nai Pagiel Nai Okhran anah |
| Nai Gad | Nai Elyasaf Nai Rehuel anah |
| Nai Naftali | Nai Ahira Nai Enan anah |
17Nok tuntakus na'ko atoni bo'es am nua le nane, Nai Musa ma Nai Harun 18anlenu nonot Israel ok-oke nabuan anbi neno mese fun nua, oke te sin tu'an ma sin naon antui natuin asal nonot anbi uf mese-mese. Kanaf na'ko ale atoni le ton bo'nua nekin sae antui sin ma anso'i sin, 19onle Uisneno naplenat nani. Ale nane ok-oke Nai Musa anmo'e nani anbi mnela snaen Sinai. 20-46Ale atoni le ton bo'nua nekin sae le nabe'i anfani solalus, antui sin kanken natuin asal nonot ma ume mese-mese, naubon na'ko Nai Ruben, Nai Yakub anmone nae talante Nai Naftali. Sin amfauken esle' i:
| Uf | Atoni amfaun |
|---|---|
| Nai Ruben | 46.500 |
| Nai Simeon | 59.300 |
| Nai Gad | 45.650 |
| Nai Yehuda | 74.600 |
| Nai Isakhar | 54.400 |
| Nai Zebulon | 57.400 |
| Nai Efraim | 40.500 |
| Nai Manasye | 32.200 |
| Nai Benyamin | 35.400 |
| Nai Dan | 62.700 |
| Nai Asyer | 41.500 |
| Nai Naftali | 53.400 |
| Ok-oke | 603.550 |
47Atoni Lewi kan tui fa sin nok uf-uf bian, 48natuin Uisneno nakua nalali a'an neu Nai Musa nak, 49“Anbi tabu hom tui kanaf atoni-atoni le nabe'i hen fani solalus, uf Nai Lewi ka nabe'i fa hem tui sin. 50Amlenu sin he nabalab Au Um-ume nok ale in bale' sin. Sin mepu esle' anloi Au Um-ume nok ale in bale' sin ma nabalab nani. Sin mes antao sin um-ume anfun natef nan Au Um-ume. 51Leka hi mitnani, atoni-atoni Lewi nane sin mes anpukai Au Um-ume, oke te antao nafani anbi bale me le nahakeb um-ume fe'u. Naik na'ko sin sekau esle' anhaumak Um-ume nane mes namate nani. 52Atoni-atoni Israel bian mes nahakeb sin um-ume pukan-pukan, es-es anbi kun sin pukan kun nok anfun natef nan sin pen-pene. 53Mes atoni-atoni Lewi mes nahakeb sin um-ume anfun natef nan Au Um-ume. Sin mes hen panat he nati' kan mu'i fa atoni le anhaumak nani talante antao ma anmo'e Kau Au uto' ma kas nonot Israel.” 54Mes atoni Israel sin antao ma anmo'e ale lasi le Uisneno anlenu ma naplenat nani neu Nai Musa.
Currently Selected:
BILANGAN 1: AOZ
Highlight
Copy
Compare
Share
Want to have your highlights saved across all your devices? Sign up or sign in
