IMAMAT 23
23
Neno-neno naek
1 Uisneno anfe neu Nai Musa 2lekat lulut antom lasi luli besa, le mes he naton nani on neno naek neu lasi luli besa. 3Anmu'i neno ne' he hi mepu, mes neno hitu nane, Neno Snasat, nane neno he hi misnas le nateta nani neu Uisneno. Anbi neno nane hi mes anmo'e buat he miluli mibes ma ka nabe'i fa he hi mepu. 4Le i neno-neno naek le Uisneno anlek nani sin ma mes hi miton mani sin anbi tabu le anlek nani.
Neno Naek Paskah ma U'tunu Kan Pake fa Lalu haef
(Bil. 28:16-25)
5Neno Naek Paskah le naliatas nane he naliatas Uisneno, naubon na'ko tabu neno antes anbi neno bo'es am ha fun mese. 6Noka fa, neno bo'es am nim, miuba miliatas Neno Naek Utunu' Kan Pake fa Lalu haef, ma anbi neno hitu in a'lon hi ka nabe'i fa he miah utunu' le anmo'e anpake lalu haef. 7-8Anbi neno hitu in a'lon nane hi mes mitulu mitnat fua tulu bukae neu Uisneno. Anbi neno ahunut talante neno hitu hi miliatas neno nane hi mes anmo'e buat he miluli mibes ma ka nabe'i fa he hi meup mepu mafena.
9-10Kalu him tia ma amtam anbi pah le Uisneno anfe neu ki, ma him nibun ma mibua pah in afan, futu ahunut na'ko ane kase le him abul mes hi meki neu Ana' fuat knino. 11Anbi neno leka Neno Snasat anfini ma ankono Ana' fuat knino mes natulu ma natnat ane kase nane on tulu tnatas neu Uisneno, he nati' Uisneno anmalin neu ki. 12Anbi neno hi mitulu ma mitnat ane kase nane, hi mes mitulu mitnat amsa fua tulu mnotu bibi kase keso mese le in ton fe ton mese ma kan mu'i fa in amle'un. 13Neu fua tulu bukae hi mitulu mitnat ut kilo nua le amselo nok mina bub fua mina. Fua tulu nane in fon anhalin Uisneno In nekan. Bua-bua nok nane mitulu ma mitnat amsa tua mina mtasa botil mese am batis. 14Nahun na'ko hi he meki tulu tnatas nane neu Uisneno, hi ka nabe'i fa he miah akle'o amsa na'ko ane kase fe'u nane, leko he mate, ai anse'i ai antunu anfani utunu'. Lekat lulut nane ale ho sanut mofut mes natuin nani talante nabal-bal.
Tolas mnonut ma sekit
(Bil. 28:26-31)
15Naubon na'ko leka Neno Snasat anfini ma ankono, tabu hi mitulu mitnat neu Uisneno nae kase futu mese ahunut, hi mes amso'i klei hitu in nanan. 16Anbi neno bo'nim, esle' Neno Snasat hae hitu anfini ma ankono nalali, hi mes meki fua tulu bukae neu Uisneno. 17Ume toko mese-mese mes natulu ma natnat utunu' nua neu tulu etus tonas neu Uisneno. Utunu' mese-mese mes anmo'e na'ko ut malule kilo nua anpake lalu haef ma mes nana'at neu Uisneno on tulu tnatas pah in afan ahunut. 18Bua-bua nok utunu' nane to Israel mes natulu bibi kase keso ana hitu le es-es te in uan ton mese, bijae ana' mese ma bibi nua es-es te in uan ton mese ka nabe'i fa hen mu'i in amle'un ma mes natulu natnat neu fua tulu mnotu ma fua tulu tua mina mtasa. Fua tulu nane in fon anhalin Uisneno In nekan. 19Mitulu ma mitnat amsa bibi keso mese neu fua tulu sako sanat ma bibi kase keso nua le es-es te in uan ton mese neu fua tulu halan. 20Utunu' ma bibi kase ana nua en nane mes Ana' fuat knino natulu natnat nani on tulu tnatas etus tonas neu Uisneno, ma nane neu pa' ma nama' Ana' fuat knino. Ale tulu tnatas nane knino kun. 21Anbi neno nane hi mes anmo'e buat he miluli mibes ma ka nabe'i fa he him tao ma mo'e mepu mafena. Lekat lulut nane hi sanut mofut mes nanaoba nani talante nabal-bal.
22Kalu him abul ai hi monu kais him lefi ane kase le anmoni anbi hi lene in ninen ma kaisa amfani hi mibuab ane kase saif leka him abul ai hi monu milali. Mihena ma mimaika nane neu atoni amamu'it ma atoni anao amnemat. Hi Uisneno nane hi Uisneno kun.
Tolas ton fe'u
(Bil. 28:26-31)
23-24Anbi neno mese fun hitu mes hi miliatas mani on neno le nateta nani he hi misnas. Neno nane hi mo'e in atakan meki to'is in hanan ma mes hi mo'e buat neu he miluli ma mibes. 25Mitulu mitnat fua tulu bukae neu Uisneno ma kaisa him tao ma mo'e mepu mafena anbi neno nane.
Neno sako sanat
(Bil. 29:7-11)
26-27Anbi neno bo'mese fun hitu nane neno luli besa ton neu sako sanat to Israel. Anbi neno nane hi mes minahom ma anmo'e buat he miluli mibes ma mitulu mitnat fua tulu bukae neu Uisneno. 28Kais hi mepu, natuin neno nane neno sako sanat, he nati' hi mipeni sako sanat anbi hi Uisneno In human In matan. 29Sekau nah sa' es anbi neno nane, kan so'i anteni fa in on lokif taluf nonot Uisneno. 30Ma sekau nanaoba mepu anbi neno nane, Uisneno In neki non ankas neki lasi maten. 31Lekat lulut i nanaobon neu hi sanut mofuk ok-oke le anbi bale me amsa sin natua anbine. 32Naubon na'ko tabu neno antes anbi neno sio funan nane talante tabu neno antes anbi neno bo'mese, mes hi miliatas on Neno Snasat, nane le nateta nani he hi misnas. Neno nane ok-oke hi mes minahom.
Tolas La' Hau No'
(Bil. 29:12-40)
33Tolas La' Hau No' naubon na'ko neno bo'es am nim fun hitu ma in a'lon nane neno hitu. 34-36Anbi neno hitu in a'lon nane, neno-neno hi mes mitulu mitnat fua tulu bukae. Anbi neno ahunut ma anbi neno fanu hi mes anmo'e buat he miluli mibes ma mitulu mitnat fua tulu bukae neu Uisneno. Kais hi meup mepu mafena anbi neno nane.
37Nane neno-neno naek luli besa le Uisneno anlek nani ma le mes hi miton mani. Anbi hi miliatas neno-neno naek nane mes him tola Uisneno nok hi mo'e buat he miluli mibes ma mitulu mitnat fua tulu bukae, fua tulu mnotu, fua tulu loitan balab bukae, fua tulu mu'it ma fua tulu tua mina mtasa, in amfaun onle him pake anbi neno-neno. 38Hi miliatas neno-neno naek nane anfani on him sato neu neno-neno Snasat, nane amsa on him sato neu hi mnekit, neu hi fua tulu hem baen hi han manta'en, ai fua tulu nek alomit le him fe neu Uisneno.
39Leka him abul ai him seki milali te, na'ko neno bo'es am nim fun hitu, hi mes anmo'e lasi mnaut anteni nan neno hitu in a'lon. Anbi neno ahunut ma anbi neno fanu nane neno le natetab nani he nati' hi misnas. 40Anbi neno ahunut hi mes amseu hi hau fuan leok le'uf na'ko hi lene, onane amsa petah in non sin ma hau tlaef na'ko hau-hau maslubu, oke te amfatan luli besa amlilat he mitola hi Usi Uisneno. 41Neno naek nane mes hi minaoba mani anbi neno hitu in a'lon. Lekat lulut nane hi sanut mofut mes nanaoba nani talante nabal-bal. 42Anbi neno hitu in a'lon to Israel ok-oke mes natua anbi la' hau no', 43ha nati' hi sanut mofut sin nahin nak Uisneno anlenu to Israel natua anbi la' abaut leka In neki sin anpoi na'ko Mesir. In le nane hi Usi hi Uisneno.
44Nai Musa natiaba onle nane neu to Israel lekat lulut he nati' sin anmo'e mnaut neu neno-neno naek he natola Uisneno.
Currently Selected:
IMAMAT 23: AOZ
Highlight
Copy
Compare
Share
Want to have your highlights saved across all your devices? Sign up or sign in
