HABAKUK 2
2
Han taes Uisneno neu Nai Habakuk
1Au he sae neu fatu elak le au malinat, ma pao neu Uisneno he namolok sa' neu kau ma In han taes onme ka neu au sakoit.
2 Uisneno natae kau onle i, “Amtui ma amlun nok alekot anbi afu makli'at pisa mese, sa' le Au uton ani neu ko, he nati' nabe'i hom so'i. 3Amtui nai le nane, natuin tabu le i ka fe antia fa in etin. Mes in etin nane mes anbol. labah, ma sa' le Au uton ulali neu ko namneo of anbol Maski nak anbi kisot fe na'lo, mes ampao nai! In etin nane of nem ma of ka naskotu anteni fa. 4Ma mimnau nai: Atoni amaufinut of ka napeni fa honis, mes atoni le nanaoba Uisneno In lomin of napeni honis natuin in nek aki'at neu Uisneno.”
Sukat neu atoni amaufinut
5Amaus nane anfuli atoni piut. Atoni apalu nane in neka naebon ma an ole. Onle maten, in amsa kan len nit fa; in nasik nan ale uf-uf sin. 6Mes neu alsin le in ankuas sin of naslaet ma nasi'u in. Sin of namolok nak, “Sukat neu ko natuin hom nibun ale amaus le ho ka ini fa! Leka anteni ka ho he mumu'ib ho aom nok lasi natuin atoni-atoni he natus na'ko ko neu he nati' anbaen sin tusa?”
7Mes ho ka muhin fa, hom kuas mulali atoni bian, of natus amsa ma ho museke sin he nati' anbaen noni sufan. Ho musu-musu sin of anhakatau ko. Ma sin of nasik nan ho mu'im! 8Ho musik mulali uf namfau, mes uf-uf le nafetnok of nasik nan ko, natuin lasi malolot le ho mo'e mulali, ma natuin ho maufinut neu pah-pah, kot-kot in a'maika sin.
9Sukat neu ko! Ho mumu'ib ho ume nanan meki mnisat le ho mupeni nok bulalut he nati' ho ume nanan napeni tainine ma nafetnon na'ko nukat ma snama. 10Mes ho salit nane al neki lasi mae neu ho ume nanan. Nok ho musik man uf namfau, ho muneku kum ho aom anmes. 11Ma fatu-fatu anbi baki lape amsa ansukat ko, ma ume in ninu amsa ankakan lasi nane.
12Sukat neu ko! Ho muhakeb kot ma amsukin anbi maufinu ma ho mufena in meki malolot. 13Uf-uf le hom kuas sin nasusbok son-sona, ma ale sa' le sin nafena nane ai of notu nani. Ale lasi nane salit ma lomit na'ko Uisneno Akuasat Afin-finit. 14Mes onle tasi nahenu nok oe, onane amsa pah pinan of nahenu nok hinet neu Uisneno ma In kuasat.
15Sukat neu ko! Ho musi'u ma mumaeba ume-ume le anhaumak nok ko; ho mo'e sin nasni'an onle atoni-atoni amafut. 16Tabu le i ho eti antia neu ho he mumaebom, ma ka neu he nabes fa neu ko. Ho apinat nane of nabaina anfani si'ut. Uisneno of naseke ko he minu na'ko klas mninut le matua kasat neu ko. Ho of minu ma musni'. 17Hom ote mutseleb hau-hau anbi nasi Libanon, ma tabu le i ho of anse' ko. Ho mumate in mu'it-mu'it sin, ma tabu le i mu'it-mu'it nane of anhakatau ko. Ale lasi nane of anbol natuin malolot ma bulalut le ho mo'e mulali neu pah-pah, kot-kot ma atokos-atokos sin.
18-19Sukat neu ko! Ho mumolok neu hau tuka mese mak, “Amfen nai!” ai neu fatu naek mese mak, “Amhake nai!” Nabe'i ka fatu mamasab mese naton ko sa' es neu ko? Oni fatu mamasab nane an amu neki mnatu ma noni muti, mes in ka masnasa fa. Fatu mamasab fuat nane in otan sa' ka? Nane alkun mansian es anmo'e nani. Le hom simo na'kone alkun lasi poi. Palsait neu uisneno teta le mamo'ek neki nimaf nane son-sona kun, le ka nabe'i fa he namolok sa'-sa'.
20 Uisneno natua anbi In Ume knino in nanan; so ale atoni anbi pah pinan anta' anbi In matan.
Currently Selected:
HABAKUK 2: AOZ
Highlight
Copy
Compare
Share
Want to have your highlights saved across all your devices? Sign up or sign in
