HABAKUK 1
1
1Le i fef ba'an le Uisneno naton nani neu Mafefa Knino Nai Habakuk.
Nai Habakuk ansakoi neu kan mu'i fa amneot ma amnonot
2Koi Uisneno, antia leka anteni ka au he sakoi ma toti tuntakus? Of leka anteni ka na' Hom nen ma mufetin kai na'ko lasi susu'? 3Nansa' es Ho mufetin kau he nati' au it maufinut anaek le i? Oni nabe'i ka he Hom kiso ale elet tanhais namfau? Anbi me-me anmu'i skuku, hamu'it, matoes ma mabanat. 4Ale plenat manebet ma ka natau fa amneot ma amnonot nane. Atoni amaufinut nane antom mat na'ko atoni amneot, es nane te naklelo amnonot.
Han taes Uisneno
5Nalali te Uisneno nakua a'an neu In to nak, “Ampanat uf-uf le anhaumak ko, es nane te of hi mimkak ma miskek. Natuin of Au mo'e sa' es anbi hi neno monit, le of hi kam palsai fa kalu al maetun ma matonan neu ki. 6Uf Babel le ato'as ma amaunut nane of Au mo'e anfani uf le ansimo kuasat. Of sin nalol'ok ma anpoi na'ko sin pah ma sin nao anfun natef pah pinan, he nati' nanebet uf-uf bian. 7Uf sin nafena amtaus anbi me-me; ma nok neka naeb sin antite ale aplenat alaha le anmatom nok sin salit es sin ansimo.
8Sin bikase ankeo nesin bikase fui, ma in namaun anesin asu fui le namnah. In meo pa'e le ansae bikase nem na'ko pah-pah le na'lo; sin nem onle kaka tasi panis le anpas in amnahat.
9In meo pa'e sin anmaken neu he nati' nasik, ale atoni na'tai leka sin nit sin anbol. Sin natam atoni anbi pa'an nane sin ain ka maso'ik fa. 10Sin nasi'u ale kesel ma sin anmanis ana' plenat amnanut sin. Sin nanebet ale kot, sin nibun afa ma nasik kot nane.” 11Onle anin le anfu atoni-atoni le anfutnok neu sin matanik sin anfen ma anao.
Nai Habakuk ansakoi anteni neu Uisneno
12Koi Uisneno, anbi ahun-hunut Ho esle' nane au Uisneno. Ho le nane au Uisneno le aknino tal nabal-bal. Au Uisneno nane au aneot ahafot, uf Babel nane Hom beti ma Ho mo'e anfani meo pa'e he nati' ankas kai. 13Mes anmo'e onme ka es Hom ta' ma mail atoni-atoni amaufinut le anbulalu onane? Ai Ho ka knino Ko fa neu he nati' amkiso amaufinut? Ai Ho ka mainisin fa lasi susu'? Nansa' es Hom ta' leka atoni abulalut naskuku atoni knino?
14Nansa' es mansian nane Ho mubaina on ika abit tasi, ma onle kauna le kan mu'i fa in atopus? 15Uf Babel sin anheke atoni-atoni neki taunu, sin anfani onle ika. Antite natam atoni-atoni nane neu tifkai ma uf Babel sin namlil natuin sin penit nane. 16Namuni te sin nabes neu tifkai nane ma nalali te sin natulu fuat, natuin nok tifkai nane nabe'i sin penit nok athoes.
17Mo'e onme ka es sin he nosu sin suni piut ma namate uf-uf ma ka nahin fa alekot?
Currently Selected:
HABAKUK 1: AOZ
Highlight
Copy
Compare
Share
Want to have your highlights saved across all your devices? Sign up or sign in
