PANGARATAION 33
33
Si Musa mamasumasu angka marga ni Israel
1Painte so marujung ngolu ni si Musa, utusan ni Debata i, dipasupasu ia ma marga-marga ni bangso Israel, dohot hata on:
2“Ro do Tuhan sian Dolok Sinai
bincar di ginjang ni Edom songon mataniari.
Sian Dolok Paran murgap Ia
laho manyondangi bangsoNa,
diudurkon sampulu ribu surusuruan
api na marjilam di tanganna songon hilap.
3Dihaholongi Tuhan do bangsoNa
dijagohon Ia do nampunaNia.
Manungkap ma hita di jolo ni patNia
mangoloi angka parentaNa.
4Taoloi ma Tona Ni Tuhan na nilehen ni si Musa,
i ma sinadongan ni bangso on na ummarga.
5Di na marlagut bangso on dohot angka pamimpinNa,
Tuhan do na gabe raja di bangsoNa.”
6Salaho tu Marga Ruben didok si Musa ma:
“Sai ulang nian Marga Ruben unjung pusa,
haru pe hum saotik bilanganna.”
7Salaho tu Marga Juda didok ia:
“Tuhan, tangihon ma pio-pio ni halahi.
Anso marsada dohot marga na asing mangulahi.
Urupi ma halahi di paraloan,
mangadopi musu ni halahi.”
8Salaho tu Marga Levi didok ia:
“Marhite Urim dohot Tumim#33:8 URIM DOHOT TUMIM: Dua barang na nipake ni malim laho manontuhon hagiot ni Debata; nada binoto pastina sanga songon dia pamakena. torang ma giot ni rohamu,
sian halak Levi naposoMu na burju-burju.
Diuji Ho do halahi di Masa,
martangkangi dohot halahi di sumur Meriba.
9Sumurung do haburjuon ni halahi tu Ho.
Sumurung sian simatobang maradu koum sisolkot.
Dioloi halahi do angka parentaMi
parjanjianMu pe digohi.
10Diajari halahi do bangsoMu mangoloi UhumMu;
dibaen halahi do haul di langgatanMu.
11 Tuhan, dongani ma marga on anso margogo,
marhite na nibaen ni halahi, anso sonang Ho.
Ropuk ma sude musu ni halahi;
anso ulang be bisa halahi bangkit.”
12Salaho tu Marga Benyamin didok ia:
“On ma marga hasudungan
marga na nihaholongan ni Tuhan.
Dijagohon Ia do i borngin dohot arian
di antara ni dolokNia halahi maringanan.”
13Salaho tu Marga Josep didok si Musa ma:
“Sai dipasupasu Tuhan ma tano ni halahi
mardongan aek sian toru ni tano dohot udan sian langit i.
14Na lobi jeges sian na nisuhahon ni mataniari
dohot na lobi jeges na nitubuhon ni bulan,
15dohot na umporlu sian dolok-dolok mulai najolo,
dohot na umporlu sian angka tor na marratus taon,
16dohot na lobi jeges sian sude isi ni portibi on,
na nisatujui ni Tuhan sian ramba na gara
di si Josep ma pasupasu on dohot di pomparanna.
Si Josep on do pamimpin di kahanggina.
17Gogo ni si Josep songon lombu harangan
marribu pinompar ni si Manase, marpulu ribu pinompar ni si Efraim i ma tanduknia.
Didogo ia angka bangso
dionjar ia halahi lopus tu ujung ni tano.”
18Salaho tu Marga Zebulon dohot Isakar didok si Musa:
“Sai mardohar ma Zebulon hara ni boniaga di laut
jana hamoraon ni Isakar martamba di hutana.
19Diontang halak sileban tu dolok ni halahi
haul na asli dihaulkon disi.
Sian laut halahi dapotan arta
sian horsik sapanjang ni pantaina.”
20Salaho tu Marga Gad didok si Musa:
“Nipuji ma Debata na mangalehen tano i
tu si Gad maradu bidang anso diingani.
Inte si Gad suman tu singa
laho mangaluak tangan sanga uluna.
21Tano na dumenggan do dibuat baen ia puna,
bagian ni pamimpin do dilehen disia.
Oloanna do Uhum Ni Tuhan maradu sude parenta
di na marpokat pamimpin ni Israel sudena.”
22Salaho tu Marga Dan didok si Musa,
“Singa na poso do si Dan.
Mangalumpat ia ruar sian Basan.”
23Salaho tu Marga Naftali didok si Musa:
“Dipalobi do tu Naftali pasupasu holong ni roha ni Tuhan;
tanonia manggistang sian Dano Galilea tu Selatan.”
24Salaho tu Marga Aser didok si Musa:
“Sian sude marga ni Israel
na umbahat do marpasupasu Marga Aser.
Haholongan ni kahanggina do ia
zetun pe tubu simbur di tanonia.
25Angka hutana pe dijagoi pintu bosi
anso mangolu ia di bagasan dame humani.”
26“O, Israel, boto hamu ma,
sumurung do Debata sian sasude debata.
Dibolus Ia do langit di bagasan hamuliaan
mamintas di ombun mangalehen di hamu tolongan.
27Sai tongtong do Debata na gabe pambelamunu;
tanganNa na so ra mantak i panungkolmunu.
Dipaorot Ia musu sian jolomunu,
disuru Ia ho mangaropuk sude alomu.
28Mardame ma ngolu ni pomparan ni si Jakob i,
sonang di tano na jogi
gandum dohot aek ni anggur marlobi-lobian
mangaehi tanona pe ombun na sian langit an.
29O Israel, na godang ma antong tuamu,
nada adong bangso na dipalua songon bangsomu.
Tuhan i sandiri do parince dohot podangmu,
mambela dohot mangalehen hamonanganmu.
Marroan ma musumu mangido ibo ni roha,
dege-degeonmu ma halahi sudena di dolok-dolok ni halahi.”
Currently Selected:
PANGARATAION 33: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
