Wɛ́ɖɛ́ 20
20
Ɓaà-wùɖù ɓó kã́áɔ̀ bìì
Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo.
1Ti nì mu fũ̀à-fṹá-tì mú nììn, ké nì mu Bounɓoɔ̀ ɖáùn wɛ̃ɛ, ɔ mɛ wɔ̃́ nì wuɖuɔ̀.
Jékɔ̀ɛ̀ Gèɖèpɔ́ɔ̀ mɛ gmɔ̀ m̀ dyí.
2Ɔ mɛ kpá m̀ gbo sɔ̀ìn ɖé ɔ gbǒ hwɛ̀ǐn-hwɛ̀ǐn nìà ɖé Zádyɔún-tòɖòɔ̀ dyaa mú.
3Ɔ mɛ kpɔ̃ nì nyíí-ɖɛ̀ séín ɓěɔ̀ dyi,
ké ɔ hwòɖǒ mɛ dèìn nì sáa-zàìn-ɖɛ̀ ɓěɔ̀ múin.
4Ɔ mɛ nyí m̀ ɖɛ nì mɔ́ kɛ,
ké ɔ mɛ nyuɛ ɓɛ́ nì hwòɖǒɛ̀-gbɔ-po-ɖɛ̀ séín ɓěɔ̀ ké ná nì.
5Ɔ dyi ná nìǐn, nìí, à mu múà-kùɖǔ-kuɖu nyuùn ɓó nì to-ɖu-ɖuɔ̀ jè,
ké à mu kɔ́ɖɔ̀ dyií poùn ɓó to-ɖu-ɖu ɓɛ́ à Gèɖèpɔ́ɔ̀ muà m̀ nyíìn nyɛɛ jè.
Bounɓoɔ̀ mɛ nyí m̀ ɖɛ séín ɓɛ́ nì mu ɔ zɔ̀ìn nyɛ.
6Ɓó kàǔn wɛ̃ɛ, ḿ ɖǎa dyuò kà Bounɓoɔ̀ nyí kã́á ɓɛ́ ɔ ɖǎ gãa to-ɖu-ɖuɛ.
Bounɓoɔ̀ nì ɖé dyɔún mɔ̀ ɔ pá hwɛ̀ǐn-hwɛ̀ǐnɔ̀ kɛɛ mú, ké ɔ jǔ kã́áɔ̀ ɓaà-wùɖùɔ̀ gɔ̃̌,
ké ɔ nyí kã́áɔ̀ to-ɖu-ɖu vɛ̀nɛ̀ ɓě dyììn ɖé ɔ kpéɔ̀ mú.
7Nyɔ ɖíɛ́ ɓě taɓa hwíì-sǒ ɓě hwìɖǐǐ,
ké ɖíɛ́ ɓě taɓa sǒ ɓě hwìɖǐǐ.
Kɛɛ à mɔ̀ùn taɓa Bounɓo mɔ̀à à Gèɖèpɔ́ɔ̀ kɛɛ kpéɔ̀ hwìɖǐǐ.
8Nyɔ ɓěa mu gbǒùn, ɓɛ́ wa ké ɓuɖu,
kɛɛ à mɔ̀ùn mu dyí sɔ̀ùn, ɓɛ́ à ké dyi nyànà gãun-gãun.
9Bounɓo, nyí à kã́áɔ̀ to-ɖu-ɖu.
À dyi m̀ ɖá ní, jǔ à ɓaà-wùɖùɔ̀ gɔ̃̌.
Currently Selected:
Wɛ́ɖɛ́ 20: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
