Máfíò 13

Nɔ́ɔ́ ɓá ɖɛ-ɓá-nyɔ̀ ɖò jè dyíɛ

(Máà 4:1-9; Ɖúù 8:4-8)

1Ɓó wé dyúáɖòɔ̀ ɓaɖaa, Jízɛ̀ sɔ̀ ma ɖé gbǒɔ̀ mú, ké ɔ mu ma ɖé Gáɖàɖíì Dòùnɓìǎɔ̀ wĩín, ké ɔ dèɖě ma dya. 2Ké nyɔ kúɖúú ɓě poìn ma ɓó ɔ gbo dyí. Ɔ jèɛɛ, ɔ dyá ma ɓáɖáà-dyù ɖò mú, ké ɔ dèɖě ma ɖé dya. Ké nyɔ kúɖúú ɓěɔ̀ nì ma ɖé kpóóɔ̀ kɔ̃. 3Ké ɔ cɛ̃ ma wa ɖɛ pàɖǎ gbo ɖé nɔ́ɔ́ mú, ké ɔ ɖá, “Gmɔ̀ nɔ̄, gàa ɖò sɔ̀ ma dyí, ké ɔ mu ma ɓáá-ɖɛ̀ ɓáùn. 4Ti ɔ nì ma ɓáá-ɖɛ̀-dyùàɔ̀ mɛ́nɛ́iń nyɛɛ, ɔ dyúàɔ̀ ɖíɛ́ ɓě wáɖá ma ɓó hwìèɔ̀ gbìǐ dyi, ké naà ɓě dyi, ké wa manaa ma. 5Ké ɖíɛ́ ɓě kpá ma ɓó ɓóɖó wè ɓáìn ma sɔ́ɔ́-pìɔ̌ kɔ̃in nyɛɛ mú. Wa se ɓóɖó pàɖǎ ɓéɖé, ké wa gbǎ ma kɔ̃́ɔ́ wàɖà. 6Kɛɛ ti dyóɖóɔ̀ sí ma ɓáá-ɖɛ̀-kɔ̃̀ɔ̌ mú mìɔ kɛɛ, wa mɛ́ ma, sepóɛɖé wa se ma ɓóɖó pàɖǎ ɓéɖé jè. 7Ké ɓáá-ɖɛ̀-dyùàɔ̀ ɖíɛ́ ɓě kpá ma dɛ̀ ɓɛ́ wí-gbǎ ɓě nì ma kɛ, ké wí ɓěɔ̀ mɛ ma, ké wa taɓaìn ma ɓáá-ɖɛ̀ ɓěɔ̀ dyi. 8Ké ɓáá-ɖɛ̀-dyùàɔ̀ ɖíɛ́ ɓě kpá ɓóɖó bùɛ̀-bùɛ̀ mú, ké wa gbǎ ma kɔ̃́ɔ́, ké wa mɛ, ké wa zaìn dúún. Ɖíɛ́ ɓě tòɖò ma ɓo hɔ̃dɛ̀ɖɛ̀ ɖò, ké ɖíɛ́ ɓě tòɖò ma ɓo kpáɖá-nyɔ tã, ké ɖíɛ́ ɓě tòɖò ma ɓo kpáɖá-nyɔ ɓaɖa-bùè. 9Nyɔ ɓɛ́ ɔ ɓéɖé ɖùǔ kɛɛ, ɔ mɛ tò ɖùǔ.”

Xwíníín kɔ̃̀ jè Jízɛ̀ poà nɔ́ɔ́ kɛ

(Máà 4:10-12; Ɖúù 8:9-10)

10Ké Jízɛ̀ɛ̀ ɖeín-nà-nyɔ̀ ɓěɔ̀ dyi ma ɔ gbo, ké wa diè ma ɔ dyi, ké wa ɖá, “Ɖɛ́ kɔ̃̀ jè m̀ dyià nyɔ ɓěɔ̀ gbo wùɖùɛ̌n nìǐn, m̀ poà nɔ́ɔ́ kɛ́?”

11Ké Jízɛ̀ jǔ ma wa gɔ̃̌, ké ɔ ɖá, “Gèɖèpɔ́ɔ̀ ɖǎa nyu ɓɛ́ ɓě ké ɖɛ ɓě vǐè ma kĩ́ín ɓá ɔ kã́á-ɓòɖò nìà ɖé dyɔún wɛ̃ɛ jè dyíɛɛ dyí dyuò, kɛɛ Gèɖèpɔ́ɔ̀ se mɔ́ wa mɔ̀ùn kéɛ jè dyuò. 12Sepóɛɖé nyɔ mɔ̀ nyɔ ɓɛ́ ɔ wɔ̃́ Gèɖèpɔ́ɔ̀ kã́á-ɓòɖòɔ̀ jè múin nyɛɛ, Gèɖèpɔ́ɔ̀ mu ɔ ɖɛ-múin-wɔ̃́-wɔ̃́ pàɖǎ nyíìn ɖe. Kɛɛ nyɔ mɔ̀ nyɔ ɓɛ́ ɔ se ɖɛ-múin-wɔ̃́-wɔ̃́ ɖò ɓéɖéɛɛ, Gèɖèpɔ́ɔ̀ mu nyɔ wè ɓɛ́ ɔ ɓéɖé kɛɛ ɔ xwa zàùn. 13Ɖɛ kɔ̃̀ jè ɓɛ́ ḿ wùɖùà wa gbo ɖé nɔ́ɔ́ múɛɛ nìà ɓó kɛ̀. Ɔ mɔ̀, wa gmɔ̀ ɖɛ, kɛɛ wa ní dyéɛ múin. Wa tò ɖùǔ, kɛɛ wa ní wɔ̃́ ɖɛ múin. 14Ɔ jèɛɛ, ɖɛ ɓɛ́ kpáá-ɖɛ̀-cɛ̃-nyɔ̀ Àzédyà cɛ̃ zɔ̃̌ɔ̀ ɓá wa jè dyí kɛɛ ɖǎ jǎà kpá. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá,

‘Nyɔ ɓěɛ wɔ̃́ ɖɛ ɓě jǎà dyɛo, kɛɛ wa ní wɔ̃́ɔ múin.

Wa gmɔ̀ ɖɛ dya dyɛo, kɛɛ wa ní dyéɛ múin.

15Sepóɛɖé waà hwòɖǒ-dyùà ɖǎ kùmù,

ké waà ɖùǔ ɖǎ mú ku,

ké waà dyéɖé ɖǎ kɔ̃in kpè,

ɓɛ́ wa ní kɔ̃̀ ɖà waà dyéɖéɔ̀ dyi dyéìn,

wa ní kɔ̃̀ ɖà waà ɖùǔɔ̀ dyi wɔ̃́ìn,

waà hwòɖǒ-dyùàɔ̀ ní kɔ̃̀ ɖà ɖɛ múin wɔ̃́,

wa ní kɔ̃̀ ɖà ḿ gbo gmɔ̀ìn,

mɔ́ún kɔ̃̀ ɖà wa dyi kánáìn.’

16“Kɛɛ ɔ dyi ɓě mɔ̀ùn jè jǔǐn, Gèɖèpɔ́ɔ̀ po ɓě mana kɔ̃, ké ɓě dyé dyi, ké ɓě wɔ̃́ dyi. 17Ḿ cɛ̃ ɓě jǎà gbo, kpáá-ɖɛ̀-cɛ̃-nyɔ̀ pàɖǎ kè dyí-sɛ́ɖɛ́ìn-nyɔ̀ pàɖǎ mɔ́ ɓɛ́ wa ké ma ɖɛ ɓě ɓɛ́ ɓě mɔ̀ùn dyéà kɛɛ dyé, kɛɛ wa seɛ ma dyé. Ké wa mɔ́ ɓɛ́ wa ké ma ɖɛ ɓě ɓɛ́ ɓě mɔ̀ùn wɔ̃́à kɛɛ wɔ̃́, kɛɛ wa seɛ ma wɔ̃́.

Jízɛ̀ zà nɔ́ɔ́ ɓá ɖɛ-ɓá-nyɔ̀ɔ̀ jè dyíɛɛ xwíníín mú

(Máà 4:13-20; Ɖúù 8:11-15)

18“Ɓě tò ɖùǔ, ɓɛ́ ɓě ké ɖɛ mɔ̀ nɔ́ɔ́ ɓá ɖɛ-ɓá-nyɔ̀ɔ̀ jè dyíɛɛ xwíníín wɔ̃́. 19Nyɔ ɖò dyi bɔ̃̌ ɓá Gèɖèpɔ́ɔ̀ kã́á-ɓòɖòɔ̀ jè dyíɛɛ wɔ̃́, ké ɔ seɛ múin wɔ̃́ ní, ɔ nì kà ɓáá-ɖɛ̀-dyùà ɓě wáɖáìn ma kà ɓó hwìèɔ̀ gbìǐ dyiɛɛ nìà kɛ. Ɖɛ-gbà-nyu-nyɔ̀ɔ̀ dyi, ké ɔ bǎ ɖɛ ɓɛ́ ɖɛ-ɓá-nyɔ̀ɔ̀ ɓá ma kà ɖé ɔ múɛ. 20Ɓáá-ɖɛ̀-dyùàɔ̀ nyɔ kpáà ɓó sɔ́ɔ́-pìɔ̌ɔ̀ kɔ̃ɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké wa kpá múàǔn, ké wa kpɔ̃ ɔ jè dyi wàɖà kɛ. 21Kɛɛ wuɖuɔ̀ se ɖé waà fɛ̀ɛ̀ɔ̀ mú kpá jɛ́ɛ́ cá. Wuɖuɔ̀ nyu ɖé wa mú ti xwã́ún-xwã́ún wè pū. Ti ɓɛ́ nyɔǔn ɓě dyéìn wa gǎ ɓó wuɖuɔ̀ jè kɛɛ, wa táà ɔ jè dyi wàɖà. 22Ɓáá-ɖɛ̀-dyùàɔ̀ nyɔ kpáà wí-gbǎɔ̀ múɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, kɛɛ wa poìn ɓóɖó-kpàà jè hwìɖǐi mìɔ, ké bã jè kpɔ̃ wa hwòɖǒ, ké ɔ hwɔìn wí ké ɔ taɓaìn bɔ̃̌ nɔ̀mɔ̀ dyíinɔ̀ dyi, ké wuɖuɔ̀ se ɖɛ ɖò nyu ɖé waà fɛ̀ɛ̀ɔ̀ múɛ. 23Ké ɓáá-ɖɛ̀-dyùàɔ̀ nyɔ ɓɛ́ ɖɛ-ɓá-nyɔ̀ɔ̀ mɛ́nɛ́ ma kà ɖé ɓóɖó bùɛ̀-bùɛ̀ɔ̀ múɛɛ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké wa wɔ̃́ɔ múin nyɛ. Ké bɔ̃̌ nɔ̀mɔ̀ dyíinɔ̀ zaìn dúún ɖé wa mú. Ɖíɛ́ ɓě zaìn dúún kpa hɔ̃dɛ̀ɖɛ̀ ɖò, ké ɖíɛ́ ɓě zaìn dúún kpa kpáɖá-nyɔ tã, ké ɖíɛ́ ɓě zaìn dúún kpa kpáɖá-nyɔ ɓaɖa-bùè.”

Nɔ́ɔ́ ɓá pìǐ mɛ ɓáá-ɖɛ̀ hwìɛ̀ kɛɛ jè dyíɛ

24Ké Jízɛ̀ po ma nyɔ ɓěɔ̀ nɔ́ɔ́ ɖò gbo ɖe, ké ɔ ɖá, “Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà gàa ɖò ɓɛ́ ɔ po ma hwítì ɖé ɔ ɓíɖí-geɖeín nyɛɛ nìà kɛ. 25Ɓó máaún-kà kɛɛ, ti ɓɛ́ nyɔǔn séín nì ma mɔ́uń wɛ̃ɛ, gàaɔ̀ mú-nyɛ́-nyɔ̀ ɖò dyi ma, ké ɔ mɛ́nɛ́ìn ma pìǐ-gɛ̃̀ ɖé ɔ geɖeɔ̀ gboi, ké ɔ mu ma. 26Ti ɓɛ́ hwítìɔ̀ nìǎ ma xwíɖí nìɛ̌n nyɛɛ, púɛɛ, wa ɖú ma pìǐɔ̀ dyé kpàǐ. 27Hwɛ̀ ké gàaɔ̀ gbo-nì-nyɔ̀ ɓěɔ̀ dyi ma ɔ gbo, ké wa diè ma ɔ dyi, ké wa ɖá, ‘Ɓɔ̌ɔ̀, má, m̀ po ma hwítì ɖé nì geɖeɔ̀ gboe? Ké dɛ̀ pìǐ sɔ̀ìn nyɛ́?’ 28Ké ɔ cɛ̃ɛ ma wa gbo, ké ɔ ɖá, ‘Ní mú-nyɛ́-nyɔ̀ ɖò mɔ̀ nyɔ nyuà ɖɛ nìà kɛɛ̀.’ Ké ɔ gbo-nì-nyɔ̀ ɓěɔ̀ diè ma ɔ dyi, ké wa ɖá, ‘Nì mɔ́ ɓɛ́ à ké mu, ɓɛ́ à ké pìǐɔ̀ hwuɖu zàà?’ 29Kɛɛ gàaɔ̀ ɖá, ‘Gbào, ḿ se wɔ̃́, ɓě ní kɔ̃̀ ɖà pìǐɔ̀ hwuɖu zàǔn nìǐn, ɓě ní kɔ̃̀ ɖà ní hwítìɔ̀ ɖò hwuɖu zà. 30Wa sɔ̃́ɔ̀ mɛ ɓúá, ɓɛ́ hwítìɔ̀ cɛ̃-tìɔ̀ ké nyini hwɛ̀. Ké nìí, ní muɛ hwítì-cɛ̃-nyɔ̀ ɓěɔ̀ gbo cɛ̃ìn, ɓɛ́ ḿ ké níiń, “Ɓě zà pìǐɔ̀ kĩ́ín, ɓɛ́ ɓě ké wa pṹ sã, ɓɛ́ ɓě ké wa dyéɖé po. Sɔ̀ìn ɓóɛ gboɛɛ, nìí, ɓě mɛ poìn hwítì ɓěɔ̀ dyí, ɓɛ́ ɓě ké wa ɖé ní sáɖáɔ̀ mú po.” ’ ”

Nɔ́ɔ́ ɓá ɓáá-ɖɛ̀-dyùà tííwè ɖò jè dyíɛ

(Máà 4:30-32; Ɖúù 13:18-19)

31Ké Jízɛ̀ po ma nyɔ ɓěɔ̀ nɔ́ɔ́ ɖò gbo ɖe, ké ɔ ɖá, “Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà dyɛ̀ɛ̀-dyùà nìà kɛ. Gàa ɖò ɖú ma dyɛ̀ɛ̀-dyùà nìà kɛ ɖò dyí, ké ɔ ɓáa ɖé ɔ ɓíɖí-geɖeín. 32Ɓáá-ɖɛ̀ nìà kɛ dyúà ɓíè dyí ké ɔ zi ɓáá-ɖɛ̀-dyùà séín dyí. Kɛɛ ɔ dyi mɛ ní, ɔ ɓúá dyí ké ɔ zi ɓáá-ɖɛ̀ ɖíɛ́ ɓě dyí. Ɔ nyu gɔ̃ vɛ̀nɛ̀, ké naà ɓě dyi, ké wa dè waà téɖé ɖé ɔ ɖɔ́ ɓěɔ̀ dya.”

Nɔ́ɔ́ ɓá bɛɖɛɛ̀-dyáìn-ɖɛ̀ jè dyíɛ

(Ɖúù 13:20-21)

33Ké Jízɛ̀ po ma nyɔ ɓěɔ̀ nɔ́ɔ́ ɖò gbo ɖe, ké ɔ ɖá, “Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà bɛɖɛɛ̀-dyáìn-ɖɛ̀ nìà kɛ. Màa ɖò ɖúɛ dyí, ké ɔ caìn ɔ kè fáɖáɓà gbǎ-wĩín-wè sɔ̃́, ké ɔ séín dyá ma.”

Ɖɛ kɔ̃̀ jè Jízɛ̀ nyùìn kà nɔ́ɔ́ kũ̀à múɛ

(Máà 4:33-34)

34Jízɛ̀ cɛ̃ ma ɖɛ séín ɓěɛ̀ nyɔ kúɖúú ɓěɔ̀ gbo ɖé nɔ́ɔ́ mú. Ɔ se ma nɔ́ɔ́ po ní, nìí, ɔ se ma wa ɖɛ ɖò gbo cɛ̃ɛ ɓɛ́ìn. 35Ɔ nyu ma ɖɛ nìà kɛ, ɓɛ́ ɖɛ ɓɛ́ kpáá-ɖɛ̀-cɛ̃-nyɔ̀ ɓěɔ̀ ɖò cɛ̃ zɔ̃̌ɔ̀ kɛɛ ké jǎà kpá. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá,

“Ní mu wɔ̃ ɓáàùn ɖé nɔ́ɔ́ mú.

Ní mu ɖɛ kàmà múin wɔ̃́uń sɔ̀ìn ɖé ɓóɖó-kpàà gbɔ-dè-tìǐn nyɛɛ kɔ̃in zaìn.”

Jízɛ̀ zà nɔ́ɔ́ ɓá pìǐ mɛà ɓáá-ɖɛ̀ɔ̀ hwìɛ̀ kɛɛ jè dyíɛɛ xwíníín mú

36Sɔ̀ìn ɓóɛ gboɛɛ, Jízɛ̀ sɔ̀ ma dɛ̀ nyɔ kúɖúú ɓěɔ̀ poìn ma kà dyíɛ, ké ɔ mu ma ɖé gbǒǔn. Ké ɔ ɖeín-nà-nyɔ̀ ɓěɔ̀ dyi ma ɔ gbo, ké wa ɖá, “Zà nɔ́ɔ́ ɓá pìǐ ɓɛ́ ɔ mɛà ɖé geɖeɔ̀ gboɛɛ jè dyíɛɛ xwíníín mú ɓó à bìì.”

37Ké Jízɛ̀ cɛ̃ɛ ma wa gbo, ké ɔ ɖá, “Nyɔ mɔ̀ nyɔ ɓɛ́ ɔ poà hwítìɔ̀ kɛɛ mɔ̀ mɔ̄ mɔ̀à Nyɔǔn-dyùɛ̀ Dyú-gààɔ̀ kɛ. 38Geɖeɔ̀ mɔ̀ ɓóɖó-kpàà, ké hwítìɔ̀ mɔ̀ Gèɖèpɔ́ɔ̀ kã́á-ɓòɖòɔ̀ dyú ɓěɔ̀. Pìǐɔ̀ mɔ̀ Ɖɛ-gbà-nyu-nyɔ̀ɔ̀ dyú ɓěɔ̀, 39ké mú-nyɛ́-nyɔ̀ ɓɛ́ ɔ mɛ́nɛ́à pìǐ-gɛ̃̀ ɓěɔ̀ kɛɛ mɔ̀ Nɔɔ́-nàmàǔn. Hwítì-cɛ̃-tìɔ̀ mɔ̀ ti ɓɛ́ ɖɛ séín muà mánáín hwɛ̀ìn nyɛ, ké hwítì-cɛ̃-nyɔ̀ ɓěɔ̀ mɔ̀ ínjà ɓěɔ̀. 40Kà ɓɛ́ wa poìn kà pìǐ ɓěɔ̀ dyí, ké wa dyià wa fɔ̃ kɛɛ, kǎà ɔ mu nììn ti ɓɛ́ ɖɛ séín muà mánáín hwɛ̀ìn nyɛ. 41Mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu ní ínjà ɓěɔ̀ ɖoɓoùn, ké wa mu nyɔ séín ɓě nyu ké nyɔǔn dyi nàmàǔn nyuɛ kè ɖɛ-gbà-nyu-nyɔ̀ séín ɓě nì ɖé ní kã́á-ɓòɖòɔ̀ kɔ̃ɛɛ zàùn, ɓɛ́ wa ké wa dyí poìn, 42ɓɛ́ wa ké wa nyɛ-gbà-wɔ̃̀ɔ̀ mú po. Ɖéɛ̀ wa mu kpé poùn, ké wa mu nyɛ́nɛ́ tàùn. 43Nìí, dyí-sɛ́ɖɛ́ìn-nyɔ̀ ɓěɔ̀ mu fãùn kà dyóɖóɔ̀ fãà kɛ, ɖé wa Ɓǎɔ̀ kã́á-ɓòɖòɔ̀ kɔ̃. Nyɔ ɓɛ́ ɔ ɓéɖé ɖùǔ kɛɛ, ɔ mɛ tò ɖùǔ.

Nɔ́ɔ́ ɓá bã-ɖɛ̀ ɓɛ́ wa vǐè ma kɛɛ jè dyíɛ

44“Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà bã-ɖɛ̀ ɓɛ́ wa vǐè ma ɖé geɖe ɖò gboɛɛ nìà kɛ. Gàa ɖò cɛ̃́ɛ ma dyi, ké ɔ wáɖáa ɖɛ kɔ̃in. Ɔ zi ma múàǔn kpáuń mìɔ. Ɔ jèɛɛ, ɔ mu, ké ɔ peɖe ma ɖɛ séín ɓɛ́ ɔ ɓéɖé kɛ, ké ɔ dɔ̃ ma geɖeɔ̀.

Nɔ́ɔ́ ɓá sɔ́ɔ́ kpa ɖɛ ɖò jè dyíɛ

45“Ké ɖeɛɛ, Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà ɖɛ-peɖe-nyɔ̀ ɖò ɓɛ́ ɔ nì ma sɔ́ɔ́ kpa ɖɛ nɔ̀mɔ̀ dyíin ɓě dyi mɔ́uń wɛ̃ɛ nìà kɛ. 46Ti ɓɛ́ ɔ dyé ma dyúáɖò, ké ɔ zi ma ɖɛ kpauń mìɔ kɛɛ, ɔ mu, ké ɔ peɖe ma ɖɛ séín ɓɛ́ ɔ ɓéɖé ma kɛ, ké ɔ dɔ̃ sɔ́ɔ̀.

Nɔ́ɔ́ ɓá kpéɖé ɖò jè dyíɛ

47“Ɓó kɔ̃in ɖeɛɛ, Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà kpéɖé ɖò ɓɛ́ wa wáɖá ní ɖò kɔ̃, ké ɔ kpɔ̃ zimii kã̀ìn-kã̀ìn ɓě kɛɛ nìà kɛ. 48Kpéɖéɔ̀ dyi dyíín, nyɔ ɓěɔ̀ dyàà toɖoí, ké wa kò dyi, ké wa cɛ̃́ zimii ɓěɔ̀ múin. Wa po ɔ nɔ̀mɔ̀ kɔ̃in ɓěɔ̀ ɖɛ-fùù ɓě mú, ké wa wáɖá ɔ nyìnììn kɔ̃in ɓěɔ̀ xwáɖáún. 49Kǎà ɔ mu nììn ti ɓɛ́ ɖɛ séín muà mánáín hwɛ̀ìn nyɛ. Ínjà ɓěɔ̀ mu dyiìn, ké wa mu ɖɛ-gbà-nyu-nyɔ̀ ɓěɔ̀ dyí-sɛ́ɖɛ́ìn-nyɔ̀ ɓěɔ̀ hwìɛ̀ zàùn, 50ké wa mu wa nyɛ-gbà-wɔ̃̀ɔ̀ mú poùn. Ɖéɛ̀ wa mu kpé poùn, ké wa mu nyɛ́nɛ́ tàùn.”

Jǎà-ɖɛ̀ ɖìè ɓě kè ɔ súá ɓě

51Ké Jízɛ̀ diè ma ɔ ɖeín-nà-nyɔ̀ ɓěɔ̀ dyi, ké ɔ ɖá, “Ɓě wɔ̃́ ɖɛ séín ɓě nìà kɛ múinǹ?”

Ké wa ɖá, “Ǹdye.”

52Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Gèɖèpɔ́ɔ̀-cèè-ɖɛ̀ dyuò-nyɔ̀ séín ɓě ɓɛ́ wa ɖǎ Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ jè cɛ̃́ɛ, wa nì kà gbǒ-ɓǎ ɖò ɓɛ́ ɔ zàà ɖɛ ɖìè kè ɖɛ sùà ɓě ɖé ɔ ɖɛ-dyi-dèìn-naínɔ̀ kɛɛ nìà kɛ.”

Wa se Jízɛ̀ jè dyi kpɔ̃ ɖé Názɛ̀ɖɛ̀-hwɔ̀ɖɔ̀ɔ̀ mú

(Máà 6:1-6; Ɖúù 4:16-30)

53Ti ɓɛ́ Jízɛ̀ ɖǎ ma nyɔ ɓěɔ̀ ɖɛ tɛ̀mɛ̀ìn hwɔ ɖé nɔ́ɔ́ múɛɛ, ɔ sɔ̀ ma ɖé páɔ̀ mú, 54ké ɔ mu ma ɖé ɔ ɓíɖí-hwɔɖɔún ɖe. Ké ɔ tɛ̀mɛ̀ìn ma nyɔ ɓěɔ̀ ɖɛ ɖé Júù-nyɔ̀ ɓěɔ̀ cɔ́cì-gbòɔ̀ mú, ké wa giniìn ma dyi mìɔ ɓá ɔ tɛ̀mɛ̀ìn-ɖɛ̀ɔ̀ jè dyí. Ké wa diè ma ɖɛi, ké wa ɖá, “Dɛ̌ gàa nìà kɛ zà hwòɖǒ-fɔ̀nɔ̀-fɔ̀nɔ̀ kè zɛ̃̀ìn-ɖɛ̀ nyu-nyu nì kà ɓěɛ̀ kɛ́? 55Má, ɔ mɔ̀ ɖɛ-kɔ-nyɔ̀ɔ̀ dyú-gààɔ̀e? Má, ɔ ɖe mɔ̀à Meɖé kɛ̀e? Ké ɔ ɖíí-gàà ɓě se Jĩ́ìn kè Jòsé kè Sã́ɓò ɔ kè Júdàà? 56Ké ɔ ɖíí-màà séín ɓěɔ̀ seà dà nyɔ gbo nìɛɛ̀? Nìí, dɛ̌ gàa nìà kɛ zà ɖɛ séín ɓě nìà kɛ kɛ́?” 57Ké wa se ma ɔ kpéín dyé.

Ké Jízɛ̀ cɛ̃ɛ ma wa gbo, ké ɔ ɖá, “Wa dyé kpáá-ɖɛ̀-cɛ̃-nyɔ̀ kpéín dà séín, kɛɛ ɔ sèìn ɔ mìɔùn ɓíɖí-hwɔɖɔún kè ɔ ɓíɖí-taún ɖòùn.” 58Ɔ se ma ɖé zɛ̃̀ìn-ɖɛ̀ pàɖǎ nyu, sepóɛɖé wa se ma hwìɖǐǐ-taɓa-taɓa ɓéɖé jè.

Currently Selected:

Máfíò 13: ƁB02

Highlight

Copy