Ɖìvéɖékɔ̀ 10
10
Náɖà kè Àbíhùɛ̀ nàmàǔnɔ̀
1Wé ɖòɛ̀ ɓaɖaa, Náɖà kè Àbíhùɛ̀ mɔ̀à Eɖóúnɛ̀ dyú-gàà ɓěɔ̀ kɛɛ ɖò-ɖò ɖú ma waà nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓěɔ̀ dyí. Ké wa poɛ nyɛ mú, ké wa po ɖé nyɔ́ún-nɔ̀mɔ̀-ɖɛ̀, ké wa fɔ̃ɔ ma ɓó Bounɓoɔ̀ dyúa. Ɖɛ nìà kɛ mɔ̀ nyɛ kɔ̃̀ jè ɓɛ́ Bounɓoɔ̀ se wuɖu kɔ̃ zà kɛ. 2Ɔ jèɛɛ, Bounɓoɔ̀ tò ma nyɛ. Ké ɔ fɔ̃ ma wa, ké wa mɛ́ìn ɓó Bounɓoɔ̀ dyúa. 3Hwɛ̀ ké Mózè cɛ̃ɛ ma Eɖóún gbo, ké ɔ ɖá, “Ɖɛ nìà kɛ mɔ̀ ɖɛ Bounɓoɔ̀ kpàìn ma kà hwòɖǒ, ti ɓɛ́ ɔ cɛ̃ɛ ma kà, ɓɛ́ ɔ dyi níiń, ‘Nyɔ ɓě ɓɛ́ wa xwɛ̃́ìn ḿ bũ̌in nyɛɛ ɓéɖé ɓɛ́ wa ké ḿ dya dè, sepóɛɖé ḿ hwɛ̀ mú. Ní nyɔ ɓěɔ̀ ɓéɖé ɓɛ́ wa ké ḿ kpéín dyéo’ wɛ.” Kɛɛ Eɖóún se ma wùɖù.
4Hwɛ̀ ké Mózè ɖá ma Mìsáè kè Ɛ̀záfàùn. Wa mɔ̀ Dyùzíè mɔ̀à Eɖóún ɓǎ ɖíí-gàà ɖò kɛɛ dyú-gàà ɓě. Ké ɔ cɛ̃ɛ ma wa gbo, ké ɔ ɖá, “Ɓě dyi, ɓɛ́ ɓě ké ɓěɛ̀ ɖííɛ̀ dyú ɓěɛ̀ dà jàɖàìn-gbò hwɛ̀ǐn-hwɛ̀ǐnɔ̀ dyúa zà, ɓɛ́ ɓě ké wa ɖé jàɖàìn-hwɔ̀ɖɔ̀ɔ̀ ɖeín kpa.” 5Ké wa dyi ma, ké wa kpa ma wa ɖé jàɖàìn-hwɔ̀ɖɔ̀ɔ̀ ɖeín kà Mózè nyuɛ ma kà cɛ̃ɛ kɛ. Waà gã́ùn ɓěɔ̀ gã̀ ma waà xwɛ́ ɓěɔ̀ múin, ké wa kpa wa.
6Hwɛ̀ ké Mózè cɛ̃ɛ ma Eɖóún kè ɔ dyú-gàà ɓě sè ma ɓíɖíi mɔ̀à Ɛ̀ɖɛ̀ázà kè Ìfámà kɛɛ gbo, ké ɔ ɖá, “Ɓě mɛ po ɓěɛ̀ míɔ̀ dya, ké ɓěǐn ɖá ɓɛ́ ɓě ké ɓě mìɔùn ɖɔún dyi fáìn, ɓɛ́ ɓě ní kɔ̃̀ ɖà mɛ́, ɔ kè ɓɛ́ Bounɓoɔ̀ ní kɔ̃̀ ɖà nyɔ séín ɓěɔ̀ dyoɖoún kpáìn. Kɛɛ ɓěɛ̀ ɖíí ɓě mɔ̀à Éézùɖùɛ̀-dyù tɔ̀ɔ̀ ɓěɔ̀ kɛɛ ɓɛ́ìn vĩ̌ɛ ɓó ɓěɛ̀ nyɔ ɓě ɓɛ́ Bounɓoɔ̀ ɖǎà mú gbɔɔ̀ dyììn ɖé nyɛ múɛɛ jè. 7Ɓěǐn ɖá ɓɛ́ ɓě ké jàɖàìn-gbòɔ̀ wĩín sɔ̀ dyɛ mɔ̀ùn, ɓěǐn kɔ̃̀ ɖà mɛ́. Sepóɛɖé Bounɓoɔ̀ ɖǎ ɓě wáká po.” Ɔ jèɛɛ, wa nyu ɖɛ Mózè cɛ̃ ma kà wa gboɛ.
Gma ɓě nì ɓó sáa-zà-nyɔ̀ ɓěɔ̀ bììɛ
8Hwɛ̀ ké Bounɓoɔ̀ cɛ̃ɛ ma Eɖóún gbo, ké ɔ ɖá, 9“M̀ kè nì dyú-gàà ɓěɔ̀ mɛ ɓɔ́ wã́ìn mɔɔ náá-ɖɛ̀ kàmà-kàmà ɖò náa fɔɔ cá, ti ɓɛ́ ɓě mu ɓěɛ̀ sáa-zà-kũ̀àɔ̀ nyuɛń nììn nyɛ, ɓɛ́ ɓěǐn kɔ̃̀ ɖà mɛ́. Ɖɛ nìà kɛ mɛ mɔ̀ gma kánáá pū ɓó ɓě kè ɓěɛ̀ xwíníín-dyù ɓě bìì. 10Ɓě mɛ ɓɔ́ náá-ɖɛ̀ kàmà-kàmà ɖò náa, ɓɛ́ ɓě ké gbo-zaìn-zaìn ɓó ɖɛ ɓě kpá wáká ɓó ḿ bììɛ kè ɖɛ ɓě se wáká kpá ɓó ḿ bììɛɛ pṹa poɛ ɓɛ́ìn, ɔ kè ɓɛ́ ɓě ké gbo-zaìn-zaìn ɓó ɖɛ ɓě ḿ ɖá wa se mú hwɛ̀ɛ kè ɖɛ ɓě ḿ ɖá wa hwɛ̀ múɛɛ pṹa poɛ ɓɛ́ìn, 11nìí ɓɛ́ ɓě ké Éézùɖùɛ̀-dyù ɓěɔ̀ gma séín ɓě ḿ nyí ma kà wa dyììn ɖé Mózè múɛɛ tɛ̀mɛ̀ìn.”
12Hwɛ̀ ké Mózè cɛ̃ɛ ma Eɖóún kè ɔ dyú-gàà ɓě mɔ̀à Ɛ̀ɖɛ̀ázà kè Ìfámà kɛɛ gbo, ké ɔ ɖá, “Ɓě ɖú ɖii-ɖɛ̀-sàǎ-zàìn-ɖɛ̀ ɓě ɓɛ́ wa nyíà Bounɓoɔ̀ kɛɛ nyɔ sèà ɓóɛɛ dyí, ɓɛ́ ɓě ké wa bɛɖɛɛ̀ mú nyu. Ɓě mɛ ɓɔ́ wa bɛɖɛɛ̀-dyáìn-ɖɛ̀ ɖò gbo poɛ. Ɓě ɖǎa náa nyuín, nìí, ɓě mɛ ɖìɛ̀n ɓóɛ sáa-kɔ̃-zàìn-gbààɔ̀ wáún, sepóɛɖé ɖii-ɖɛ̀-sàǎ-zàìn-ɖɛ̀ ɓěɔ̀ nyɔ sèà ɓóɛɛ hwɛ̀ mú mìɔ. 13Ɓě mɛ ɖììn wa pá hwɛ̀ǐn-hwɛ̀ǐn ɖò mú, sepóɛɖé ɖɛ nìà kɛ mɔ̀ ɓě nììn sɔ̀ìn ɖé ɖii-ɖɛ̀ ɓě ɓɛ́ wa nyí Bounɓoɔ̀ kɛɛ hwìɛ̀. Ɓě mɛ nyuɛ náa, sepóɛɖé kǎà Bounɓoɔ̀ nyuɛ ma ḿ gbo cɛ̃ɛ. 14Kɛɛ ɓě kè ɓěɛ̀ dyú-gàà kè ɓěɛ̀ dyú-màà ɓěɔ̀ mɛ tà gbo-kpɔ̃ìn-sàǎ-zàìn-ɖɛ̀ ɓěɔ̀ kɛ́ ɓě ɓɛ́ wa vũàà dyiɛ kè waà ɖiaún-pɔ̃̀ ɓě ɓɛ́ wa tòà ɓě dyíɛ. Ɓě mɛ tàìn wa ɖé pá ɓɛ́ Bounɓoɔ̀ ɖá ɔ hwɛ̀à múɛɛ mú, sepóɛɖé ɖɛ nìà kɛ mɔ̀ Éézùɖùɛ̀-nyɔ̀ ɓěɔ̀ gbo-kpɔ̃ìn-sàǎ-zàìn-ɖɛ̀ ɓěɔ̀ nyɔ ɓɛ́ Bounɓoɔ̀ nyí ɓě kè ɓě dyú ɓěɔ̀ kɛ. 15Ti wa mu gbo-kpɔ̃ìn-sàǎ-zàìn-ɖɛ̀ ɓěɔ̀ cáná-dà ɓěɔ̀ dyàùn wɛ̃ɛ, wa mɛ dyà waà ɖiaún-pɔ̃̀ ɓěɔ̀ kè waà kɛ́ ɓěɔ̀ ɖekè, ɓɛ́ wa ké wa dyi vũà, ɓɛ́ wa ké nyíí-ɖɛ̀ kpa ɖɛ ɓě jǔ ɓó Bounɓoɔ̀ bìì. Ɔ ɖǎ ná nìǐn, nìí, waà kɛ́ ɓěɔ̀ kè waà ɖiaún-pɔ̃̀ ɓěɔ̀ mɔ̀ ɓě kè ɓěɛ̀ dyú ɓěɔ̀ kɔ̃̀ɔ̀-ɖɛ̀. Kà Bounɓoɔ̀ nyuà cɛ̃ɛ kɛɛ, kǎà ɔ mɛ nyu nìɛ̀ kánáá pū.”
16Hwɛ̀ ké Mózè diè ma wiɖi mɔ̀à nyɔ ɓěɔ̀ nàmàǔn-sàǎ-zàìn-ɖɛ̀ɔ̀#10:16 Gmɔ̀ ɖé Ɖìvéɖékɔ̀ 9:15 mú. kɛɛ jè dyi. Ti ɓɛ́ ɔ wɔ̃́ɔ ma kà wiɖiɔ̀ ɖǎ ma sĩɛ hwɛ̀ɛ, púɛɛ, ɔ kpáìn ma Ɛ̀ɖɛ̀ázà kè Ìfámà mɔ̀à Eɖóúnɛ̀ dyú-gàà ɓě sèà ɓíɖíiɛɛ dyoɖoún, ké ɔ ɖá, 17“Ɖɛ́ kɔ̃̀ jè ɓě se nàmàǔn-sàǎ-zàìn-ɖɛ̀ɔ̀ suaɖɛ̀ɔ̀ dyí ɖú, ɓɛ́ ɓě kéɛ pá hwɛ̀ǐn-hwɛ̀ǐn nìà ɓó jàɖàìn-gbòɔ̀ kɔ̃̀pã́ùnɔ̀ kɔ̃ɛɛ mú tàìn nyɛ́? Sepóɛɖé ɖɛ nìà kɛ hwɛ̀ mú mìɔ. Bounɓoɔ̀ nyíɛ ɓě, ɓɛ́ ɓě kéɛ ɖi, ɓɛ́ dyììn ɖéɛ múɛɛ, ɓě ké nyɔ ɓěɔ̀ nàmàǔn ɓěɔ̀ dyí ɖú. Ɔ xwíníín mɔ̀, ɓě ké waà nàmàǔn ɓěɔ̀ kɔ̃in-ɓáìn-ɖɛ̀ jǔ ɓó Bounɓoɔ̀ dyúa. 18Kà ɓɛ́ ɓě seà ɔ nyɔmɔɔ̀ ɖé jàɖàìn-gbò hwɛ̀ǐn-hwɛ̀ǐnɔ̀ mú kpa kɛɛ, ɓě ɓéɖé ɓɛ́ ɓě kéɔ́ má suaɖɛ̀ɔ̀ pá hwɛ̀ǐn-hwɛ̀ǐn nìà ɓó jàɖàìn-gbòɔ̀ kɔ̃̀pã́ùnɔ̀ kɔ̃ɛɛ mú tàìn kà ḿ nyuɛ ma kà cɛ̃ɛ kɛ.”
19Ké Eɖóún cɛ̃ɛ ma Mózè gbo, ké ɔ ɖá, “Dyéɛ, à dyà à nàmàǔn-sàǎ-zàìn-ɖɛ̀ɔ̀ kè à fɔ̃ɔ-sàǎ-zàìn-ɖɛ̀ɔ̀ Bounɓoɔ̀ gbo ɓó zɛ̃̌ɛ̀, kɛɛ ɖɛ ku wɔ̃ nìà kɛ ɖǎ ḿ gbo kpá. Ɔ jǔ ké à dyiɔ́ má nyɔ ɓěɔ̀ nàmàǔn-sàǎ-zàìn-ɖɛ̀ɔ̀ tà ní, nìí, Bounɓoɔ̀ hwòɖǒ muɔ́ má dyi dèìne?” 20Ti ɓɛ́ Mózè wɔ̃́ɔ ma kɛɛ, púɛɛ, ɔ hwòɖǒ dè ma dyi.
Currently Selected:
Ɖìvéɖékɔ̀ 10: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Ɖìvéɖékɔ̀ 10
10
Náɖà kè Àbíhùɛ̀ nàmàǔnɔ̀
1Wé ɖòɛ̀ ɓaɖaa, Náɖà kè Àbíhùɛ̀ mɔ̀à Eɖóúnɛ̀ dyú-gàà ɓěɔ̀ kɛɛ ɖò-ɖò ɖú ma waà nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓěɔ̀ dyí. Ké wa poɛ nyɛ mú, ké wa po ɖé nyɔ́ún-nɔ̀mɔ̀-ɖɛ̀, ké wa fɔ̃ɔ ma ɓó Bounɓoɔ̀ dyúa. Ɖɛ nìà kɛ mɔ̀ nyɛ kɔ̃̀ jè ɓɛ́ Bounɓoɔ̀ se wuɖu kɔ̃ zà kɛ. 2Ɔ jèɛɛ, Bounɓoɔ̀ tò ma nyɛ. Ké ɔ fɔ̃ ma wa, ké wa mɛ́ìn ɓó Bounɓoɔ̀ dyúa. 3Hwɛ̀ ké Mózè cɛ̃ɛ ma Eɖóún gbo, ké ɔ ɖá, “Ɖɛ nìà kɛ mɔ̀ ɖɛ Bounɓoɔ̀ kpàìn ma kà hwòɖǒ, ti ɓɛ́ ɔ cɛ̃ɛ ma kà, ɓɛ́ ɔ dyi níiń, ‘Nyɔ ɓě ɓɛ́ wa xwɛ̃́ìn ḿ bũ̌in nyɛɛ ɓéɖé ɓɛ́ wa ké ḿ dya dè, sepóɛɖé ḿ hwɛ̀ mú. Ní nyɔ ɓěɔ̀ ɓéɖé ɓɛ́ wa ké ḿ kpéín dyéo’ wɛ.” Kɛɛ Eɖóún se ma wùɖù.
4Hwɛ̀ ké Mózè ɖá ma Mìsáè kè Ɛ̀záfàùn. Wa mɔ̀ Dyùzíè mɔ̀à Eɖóún ɓǎ ɖíí-gàà ɖò kɛɛ dyú-gàà ɓě. Ké ɔ cɛ̃ɛ ma wa gbo, ké ɔ ɖá, “Ɓě dyi, ɓɛ́ ɓě ké ɓěɛ̀ ɖííɛ̀ dyú ɓěɛ̀ dà jàɖàìn-gbò hwɛ̀ǐn-hwɛ̀ǐnɔ̀ dyúa zà, ɓɛ́ ɓě ké wa ɖé jàɖàìn-hwɔ̀ɖɔ̀ɔ̀ ɖeín kpa.” 5Ké wa dyi ma, ké wa kpa ma wa ɖé jàɖàìn-hwɔ̀ɖɔ̀ɔ̀ ɖeín kà Mózè nyuɛ ma kà cɛ̃ɛ kɛ. Waà gã́ùn ɓěɔ̀ gã̀ ma waà xwɛ́ ɓěɔ̀ múin, ké wa kpa wa.
6Hwɛ̀ ké Mózè cɛ̃ɛ ma Eɖóún kè ɔ dyú-gàà ɓě sè ma ɓíɖíi mɔ̀à Ɛ̀ɖɛ̀ázà kè Ìfámà kɛɛ gbo, ké ɔ ɖá, “Ɓě mɛ po ɓěɛ̀ míɔ̀ dya, ké ɓěǐn ɖá ɓɛ́ ɓě ké ɓě mìɔùn ɖɔún dyi fáìn, ɓɛ́ ɓě ní kɔ̃̀ ɖà mɛ́, ɔ kè ɓɛ́ Bounɓoɔ̀ ní kɔ̃̀ ɖà nyɔ séín ɓěɔ̀ dyoɖoún kpáìn. Kɛɛ ɓěɛ̀ ɖíí ɓě mɔ̀à Éézùɖùɛ̀-dyù tɔ̀ɔ̀ ɓěɔ̀ kɛɛ ɓɛ́ìn vĩ̌ɛ ɓó ɓěɛ̀ nyɔ ɓě ɓɛ́ Bounɓoɔ̀ ɖǎà mú gbɔɔ̀ dyììn ɖé nyɛ múɛɛ jè. 7Ɓěǐn ɖá ɓɛ́ ɓě ké jàɖàìn-gbòɔ̀ wĩín sɔ̀ dyɛ mɔ̀ùn, ɓěǐn kɔ̃̀ ɖà mɛ́. Sepóɛɖé Bounɓoɔ̀ ɖǎ ɓě wáká po.” Ɔ jèɛɛ, wa nyu ɖɛ Mózè cɛ̃ ma kà wa gboɛ.
Gma ɓě nì ɓó sáa-zà-nyɔ̀ ɓěɔ̀ bììɛ
8Hwɛ̀ ké Bounɓoɔ̀ cɛ̃ɛ ma Eɖóún gbo, ké ɔ ɖá, 9“M̀ kè nì dyú-gàà ɓěɔ̀ mɛ ɓɔ́ wã́ìn mɔɔ náá-ɖɛ̀ kàmà-kàmà ɖò náa fɔɔ cá, ti ɓɛ́ ɓě mu ɓěɛ̀ sáa-zà-kũ̀àɔ̀ nyuɛń nììn nyɛ, ɓɛ́ ɓěǐn kɔ̃̀ ɖà mɛ́. Ɖɛ nìà kɛ mɛ mɔ̀ gma kánáá pū ɓó ɓě kè ɓěɛ̀ xwíníín-dyù ɓě bìì. 10Ɓě mɛ ɓɔ́ náá-ɖɛ̀ kàmà-kàmà ɖò náa, ɓɛ́ ɓě ké gbo-zaìn-zaìn ɓó ɖɛ ɓě kpá wáká ɓó ḿ bììɛ kè ɖɛ ɓě se wáká kpá ɓó ḿ bììɛɛ pṹa poɛ ɓɛ́ìn, ɔ kè ɓɛ́ ɓě ké gbo-zaìn-zaìn ɓó ɖɛ ɓě ḿ ɖá wa se mú hwɛ̀ɛ kè ɖɛ ɓě ḿ ɖá wa hwɛ̀ múɛɛ pṹa poɛ ɓɛ́ìn, 11nìí ɓɛ́ ɓě ké Éézùɖùɛ̀-dyù ɓěɔ̀ gma séín ɓě ḿ nyí ma kà wa dyììn ɖé Mózè múɛɛ tɛ̀mɛ̀ìn.”
12Hwɛ̀ ké Mózè cɛ̃ɛ ma Eɖóún kè ɔ dyú-gàà ɓě mɔ̀à Ɛ̀ɖɛ̀ázà kè Ìfámà kɛɛ gbo, ké ɔ ɖá, “Ɓě ɖú ɖii-ɖɛ̀-sàǎ-zàìn-ɖɛ̀ ɓě ɓɛ́ wa nyíà Bounɓoɔ̀ kɛɛ nyɔ sèà ɓóɛɛ dyí, ɓɛ́ ɓě ké wa bɛɖɛɛ̀ mú nyu. Ɓě mɛ ɓɔ́ wa bɛɖɛɛ̀-dyáìn-ɖɛ̀ ɖò gbo poɛ. Ɓě ɖǎa náa nyuín, nìí, ɓě mɛ ɖìɛ̀n ɓóɛ sáa-kɔ̃-zàìn-gbààɔ̀ wáún, sepóɛɖé ɖii-ɖɛ̀-sàǎ-zàìn-ɖɛ̀ ɓěɔ̀ nyɔ sèà ɓóɛɛ hwɛ̀ mú mìɔ. 13Ɓě mɛ ɖììn wa pá hwɛ̀ǐn-hwɛ̀ǐn ɖò mú, sepóɛɖé ɖɛ nìà kɛ mɔ̀ ɓě nììn sɔ̀ìn ɖé ɖii-ɖɛ̀ ɓě ɓɛ́ wa nyí Bounɓoɔ̀ kɛɛ hwìɛ̀. Ɓě mɛ nyuɛ náa, sepóɛɖé kǎà Bounɓoɔ̀ nyuɛ ma ḿ gbo cɛ̃ɛ. 14Kɛɛ ɓě kè ɓěɛ̀ dyú-gàà kè ɓěɛ̀ dyú-màà ɓěɔ̀ mɛ tà gbo-kpɔ̃ìn-sàǎ-zàìn-ɖɛ̀ ɓěɔ̀ kɛ́ ɓě ɓɛ́ wa vũàà dyiɛ kè waà ɖiaún-pɔ̃̀ ɓě ɓɛ́ wa tòà ɓě dyíɛ. Ɓě mɛ tàìn wa ɖé pá ɓɛ́ Bounɓoɔ̀ ɖá ɔ hwɛ̀à múɛɛ mú, sepóɛɖé ɖɛ nìà kɛ mɔ̀ Éézùɖùɛ̀-nyɔ̀ ɓěɔ̀ gbo-kpɔ̃ìn-sàǎ-zàìn-ɖɛ̀ ɓěɔ̀ nyɔ ɓɛ́ Bounɓoɔ̀ nyí ɓě kè ɓě dyú ɓěɔ̀ kɛ. 15Ti wa mu gbo-kpɔ̃ìn-sàǎ-zàìn-ɖɛ̀ ɓěɔ̀ cáná-dà ɓěɔ̀ dyàùn wɛ̃ɛ, wa mɛ dyà waà ɖiaún-pɔ̃̀ ɓěɔ̀ kè waà kɛ́ ɓěɔ̀ ɖekè, ɓɛ́ wa ké wa dyi vũà, ɓɛ́ wa ké nyíí-ɖɛ̀ kpa ɖɛ ɓě jǔ ɓó Bounɓoɔ̀ bìì. Ɔ ɖǎ ná nìǐn, nìí, waà kɛ́ ɓěɔ̀ kè waà ɖiaún-pɔ̃̀ ɓěɔ̀ mɔ̀ ɓě kè ɓěɛ̀ dyú ɓěɔ̀ kɔ̃̀ɔ̀-ɖɛ̀. Kà Bounɓoɔ̀ nyuà cɛ̃ɛ kɛɛ, kǎà ɔ mɛ nyu nìɛ̀ kánáá pū.”
16Hwɛ̀ ké Mózè diè ma wiɖi mɔ̀à nyɔ ɓěɔ̀ nàmàǔn-sàǎ-zàìn-ɖɛ̀ɔ̀#10:16 Gmɔ̀ ɖé Ɖìvéɖékɔ̀ 9:15 mú. kɛɛ jè dyi. Ti ɓɛ́ ɔ wɔ̃́ɔ ma kà wiɖiɔ̀ ɖǎ ma sĩɛ hwɛ̀ɛ, púɛɛ, ɔ kpáìn ma Ɛ̀ɖɛ̀ázà kè Ìfámà mɔ̀à Eɖóúnɛ̀ dyú-gàà ɓě sèà ɓíɖíiɛɛ dyoɖoún, ké ɔ ɖá, 17“Ɖɛ́ kɔ̃̀ jè ɓě se nàmàǔn-sàǎ-zàìn-ɖɛ̀ɔ̀ suaɖɛ̀ɔ̀ dyí ɖú, ɓɛ́ ɓě kéɛ pá hwɛ̀ǐn-hwɛ̀ǐn nìà ɓó jàɖàìn-gbòɔ̀ kɔ̃̀pã́ùnɔ̀ kɔ̃ɛɛ mú tàìn nyɛ́? Sepóɛɖé ɖɛ nìà kɛ hwɛ̀ mú mìɔ. Bounɓoɔ̀ nyíɛ ɓě, ɓɛ́ ɓě kéɛ ɖi, ɓɛ́ dyììn ɖéɛ múɛɛ, ɓě ké nyɔ ɓěɔ̀ nàmàǔn ɓěɔ̀ dyí ɖú. Ɔ xwíníín mɔ̀, ɓě ké waà nàmàǔn ɓěɔ̀ kɔ̃in-ɓáìn-ɖɛ̀ jǔ ɓó Bounɓoɔ̀ dyúa. 18Kà ɓɛ́ ɓě seà ɔ nyɔmɔɔ̀ ɖé jàɖàìn-gbò hwɛ̀ǐn-hwɛ̀ǐnɔ̀ mú kpa kɛɛ, ɓě ɓéɖé ɓɛ́ ɓě kéɔ́ má suaɖɛ̀ɔ̀ pá hwɛ̀ǐn-hwɛ̀ǐn nìà ɓó jàɖàìn-gbòɔ̀ kɔ̃̀pã́ùnɔ̀ kɔ̃ɛɛ mú tàìn kà ḿ nyuɛ ma kà cɛ̃ɛ kɛ.”
19Ké Eɖóún cɛ̃ɛ ma Mózè gbo, ké ɔ ɖá, “Dyéɛ, à dyà à nàmàǔn-sàǎ-zàìn-ɖɛ̀ɔ̀ kè à fɔ̃ɔ-sàǎ-zàìn-ɖɛ̀ɔ̀ Bounɓoɔ̀ gbo ɓó zɛ̃̌ɛ̀, kɛɛ ɖɛ ku wɔ̃ nìà kɛ ɖǎ ḿ gbo kpá. Ɔ jǔ ké à dyiɔ́ má nyɔ ɓěɔ̀ nàmàǔn-sàǎ-zàìn-ɖɛ̀ɔ̀ tà ní, nìí, Bounɓoɔ̀ hwòɖǒ muɔ́ má dyi dèìne?” 20Ti ɓɛ́ Mózè wɔ̃́ɔ ma kɛɛ, púɛɛ, ɔ hwòɖǒ dè ma dyi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.