Ìfísĩ̀ɔ̀ 1

Nyíɔún-zà-zà

1Céè-ɖɛ̀ nìà kɛ sɔ̀ mɔ̄ Pɔ́ɔ̀ mɔ̀ nyɔ ɓɛ́ Gèɖèpɔ́ɔ̀ ɖǎà gã, ɓɛ́ ḿ kéà Kɛ́ɖɛ́ì Jízɛ̀ɛ̀ àpɔ́sò jǔ kɛɛ gbo.

Ḿ zà ɓě mɔ̀à Gèɖèpɔ́ɔ̀-nyɔ̀ ɓě nìà ɖé Ɛ́fɛ́sà-hwɔ̀ɖɔ̀ɔ̀ mú, ké ɓě mɔ̀à hwòɖǒ-kɔ̃-dè-nyɔ̀ ɖé Kɛ́ɖɛ́ì Jízɛ̀ múɛɛ nyíɔún.

2Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.

Zùǔn-mànà ɓě ɓɛ́ à dyé ɖé Kɛ́ɖɛ́ì múɛ

3Ɓěà mɛ ɓàìn Gèɖèpɔ́ɔ̀ mɔ̀à à Bounɓo Jízɛ̀ Kɛ́ɖɛ́ì Ɓǎ kɛ, sepóɛɖé kà à nìà Kɛ́ɖɛ́ì múɛɛ, Gèɖèpɔ́ɔ̀ ɖǎ à mana-ɖɛ̀ ɓě mɔ̀à ɖɛ séín ɓě nìà ɖé dyɔún-pà ɓěɔ̀ mú, ɓɛ́ ɔ ɖǎà à nyí ɓó à zùùɔ̀ bììɛɛ nyí. 4Hwɛ̀ ɓóɖó-kpàà ké ma nìɛɛ, Gèɖèpɔ́ɔ̀ gã zɔ̃̌ɔ̀ à kĩ́ín, ɓɛ́ à ké ɔ nyɔ ɓě jǔ ɖé Kɛ́ɖɛ́ì mú, ɓɛ́ à ké se bɛ̃̌ kè kɛɛ ɖò ɓéɖé ɓó ɔ dyúa.

Gèɖèpɔ́ɔ̀ ɖɛ̀ɓɛ̀ à mú jèɛɛ, 5ɔ ɖǎa zɔ̃̌ɔ̀ gbɔ po, ɓɛ́ dyììn ɖé Jízɛ̀ Kɛ́ɖɛ́ì múɛɛ, ɔ ké à ɔ mìɔùn gbo dyà, ɓɛ́ à ké ɔ dyú jǔ. Ɖɛ nìà kɛɛ, ɔ mɔ̀ ɖɛ ɔ mɔ́ maa, ké ɔ dè ma ɔ hwòɖǒ dyi. 6Ɔ nyuɛ náa, ɓɛ́ à ké ɔ ɓàìn ɓó ɔ kpeɖeɛ̀-dyíin-nɔ̀mɔ̀-nɔ̀mɔ̀ zi ɖɛ kpauńɔ̀ jè. Dyììn ɖé ɔ múɛɛ, ɔ nyí ma à mana-ɖɛ̀ pídyi, ti ɓɛ́ ɔ nyí ma kà à ɔ hwòɖǒ-kɔ̃-dè-dyùɔ̀ kɛ. 7Sepóɛɖé dyììn ɖé Kɛ́ɖɛ́ì nyɔmɔɔ̀ múɛɛ, à ɖǎ buɛ̀, ké Gèɖèpɔ́ɔ̀ ɖǎ à ɖɛ gbà ɓěɔ̀ kɔ̃in zĩ̀ìn. Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ ɓúá kpéín. 8Ɔ nyuɛ ké ɔ nyí ma à mana-ɖɛ̀ pàɖǎ.

Ɖé ɔ fɔ̀nɔ̀-hwòɖǒ kè ɔ ɖɛ-múin-wɔ̃́-wɔ̃́ séín ɓěɔ̀ múɛɛ, 9Gèɖèpɔ́ɔ̀ nyu ɖɛ ɓɛ́ ɔ mɔ́ maa, ké ɔ nyuɛ ké à dyuò ma ɔ hwìɖǐi-poìn-ɖɛ̀ ɓɛ́ ɔ vǐè ma kĩ́ín nyɛɛ dyí. Ɔ mɔ̀ hwìɖǐi-poìn-ɖɛ̀ ɓɛ́ ɔ po ma gbɔ, ɓɛ́ ɔ ké ma nyu ɓɛ́ ɔ ké gbɔ hwɛ̀ dyììn ɖé Kɛ́ɖɛ́ì múɛ. 10Gèɖèpɔ́ɔ̀ hwìɖǐi-poìn-ɖɛ̀ ɓɛ́ ɔ muà nyuùn ɓɛ́ ɔ kéà ɔ gbɔ hwɔ, ti ɓɛ́ ɔ tiɔ̀ muà nyiniìn nyɛɛ, ɔ mɔ̀, ɓɛ́ ɔ ké ɖɛ séín ɓě mɔ̀à ɖɛ ɓě ɔ kè nyɔ ɓě nìà ɖé dyɔún ɔ kè nɔ̄ ɓóɖó-kpàà kɔ̃ɛɛ dyí poìn, ɓɛ́ Kɛ́ɖɛ́ì ké wa kɔ̃in nì. 11Sepóɛɖé Gèɖèpɔ́ɔ̀ nyu ɖɛ séín kà ɔ nyu ɖɛ hwìɖǐi poɛ̀n nyɛ, ɔ kè kà ɔ nyuɛ gbɔ poɛ kɛ. Ké Gèɖèpɔ́ɔ̀ gã ma à, ɓɛ́ à ké ɔ nììn nyɔ ɓě jǔ ɖé Kɛ́ɖɛ́ì mú, sepóɛɖé kǎà ɔ nyuɛ ma mɔ́ɔ. Ɔ ɖǎa zɔ̃̌ɔ̀ náa gbɔ po. 12À mɔ̀à Júù-nyɔ̀ ɓěɛɛ, à mɔ̀ nyɔ kĩ́ín-kĩ́ín ɓě dè ma Kɛ́ɖɛ́ì hwòɖǒ kɔ̃ɛɛ mɛ nyuɛ ɓɛ́ Gèɖèpɔ́ɔ̀ dĩ́ín-dĩ̀ìnɔ̀ ké ɓàìn-ɓàìn ɓéɖé. 13Kǎà ɔ nyu ma nìɛ̀ ɓó ɓě mɔ̀ùn gbo ɖekè. Ti ɓě wɔ̃́ ma jǎà-wùɖù mɔ̀à bɔ̃̌ nɔ̀mɔ̀ dyíin ɓɛ́ ɔ dyàà ɓě pó-pó kɛɛ, ɓě taɓa ma Kɛ́ɖɛ́ì hwìɖǐǐ, ké Gèɖèpɔ́ɔ̀ po ɔ dyí-dyuòìn-bɛ̃̀ɔ̀ ɓě kɔ̃. Ɔ nyuɛ ma náa dyììn ɖé Zùù Hwɛ̀ǐn-hwɛ̀ǐn ɓɛ́ ɔ ɖá ma kà nyɛ́nɛ́ɛ tò-tò mú. 14Zùùɔ̀ mɔ̀ ɖɛ ɓɛ́ Gèɖèpɔ́ɔ̀ ɖáìn ɔ nyɔ ɓěɔ̀ nyɛ́nɛ́ín nyɛɛ ɓo-kɔ̃-pòìn-ɖɛ̀, ɓɛ́ Gèɖèpɔ́ɔ̀ ké ɔ kɔ̃̀ɔ̀-ɖɛ̀ ɓěɔ̀ gbǎà hwɛ̀, ɓɛ́ ɔ dĩ́ín-dĩ̀ìnɔ̀ ké ɓàìn-ɓàìn ɓéɖé.

Pɔ́ɔ̀ ɓaà-wùɖù

15Ɖɛ ɓěa kɛɛ kɔ̃̀ jè ti ɓɛ́ ḿ wɔ̃́ ma ɓěɛ̀ Bounɓo Jízɛ̀ hwìɖǐǐ taɓa jè ɔ kè ɓěɛ̀ Gèɖèpɔ́ɔ̀-nyɔ̀ séín ɓěɔ̀ mú ɖɛ̀ɓɛ̀ jèɛɛ, 16ḿ séè Gèɖèpɔ́ɔ̀ zùo poɛ ɓɔ́ ɓó ɓě jè. Ḿ dyi ɓaà ní, ɓě jè nì ḿ hwìɖǐi, 17ké ḿ diè Gèɖèpɔ́ɔ̀ mɔ̀à à Bounɓo Jízɛ̀ Kɛ́ɖɛ́ìɛ̀ Gèɖèpɔ́ɔ̀ kè à dĩ́ín-dĩ̀ìn Ɓǎ kɛɛ dyi, ɓɛ́ ɔ ké ɔ Zùùɔ̀ ɓě nyí. Ɔ muɛ nyuùn ɓɛ́ ɓě ké hwòɖǒ fɔ̀nɔ̀, ké ɔ mu ɓě Gèɖèpɔ́ɔ̀ dyí tɛ̀mɛ̀ìn, ɓɛ́ ɓě ké ɔ dyí dyuò. 18Ḿ nì ɔ dyi dièɛ̌n, ɓɛ́ ɓěɛ̀ hwòɖǒ-dyùà ké kaà, ɓɛ́ ɓě ké ɔ ceɔ̀ dyé. Ɔ nì ná, ɓɛ́ ɓě ké hwòɖǒ-kɔ̃-dè-ɖɛ̀ kɔ̃̀ jè ɓɛ́ ɔ ɖáà ɓěɛ kè kà ɓɛ́ mana-ɖɛ̀ ɓě ɓɛ́ ɔ ɖáìn ɔ nyɔ ɓěɔ̀ nyɛ́nɛ́ín nyɛɛ zi dyí vòɛ̌n nyɛ 19ɔ kè kà ɓɛ́ ɔ kpé ɓɛ́ ɔ nìà kũ̀à nyuɛń ɖé à mɔ̀ nyɔ ɓě ɓɛ́ à taɓaà ɔ hwìɖǐǐɛ múɛɛ zi dyí ɓúáuń mìɔ kɛɛ dyí dyuò. Kpé ɓɛ́ ɔ nìà à múɛ ɔ kè ɔ gana vɛ̀nɛ̀ 20ɓɛ́ ɔ zàìn ma kà Kɛ́ɖɛ́ì gĩɔ, ké ɔ dèɖěìn ma kà ɔ ɖé ɔ ɖiaún dya ɖé dyɔún-pà ɓěɔ̀ múɛɛ mɔ̀ ɖɛ dyúáɖòɔ̀. 21Kɛ́ɖɛ́ì nì ɓó, ké ɔ mɔ̀ nyɔ vɛ̀nɛ̀ ɓó nyɔ-wuɖuí-kɔ̃̀-nyɔ̀ ɓěɔ̀ kè gɔ̌mànà ɓěɔ̀ kè kpé ɓěɔ̀ ɔ kè nyɔ-kɔ̃in-nì-nyɔ̀ ɓěɔ̀ kɔ̃in. Ké ɔ nyɛ́nɛ́ɔ̀ nì nyɛ́nɛ́ séín ɓɛ́ nyɔǔn jǔìn nyɔ nɔ̄ ɓóɖó-kpàà kɔ̃ɛ ɔ kè ɓóɖó-kpàɔ̀ nyɔ muà dyiìn nyɛɛ kɔ̃ɛɛ kɔ̃in. 22Gèɖèpɔ́ɔ̀ nyuɛ ké Kɛ́ɖɛ́ì kɔ̃̀ ɖɛ séín kpé kɔ̃ún, ké ɔ nyí Kɛ́ɖɛ́ì cɔ́cì-nyɔ̀ ɓěɔ̀, ɓɛ́ ɔ ké ɖɛ séín ɓěɔ̀ kɔ̃in-nì-nyɔ̀ vɛ̀nɛ̀ jǔ. 23Cɔ́cì-nyɔ̀ ɓěɔ̀ mɔ̀ Kɛ́ɖɛ́ì kpóɖó-dyùàɔ̀, ké wa nyuɛ ké Kɛ́ɖɛ́ì mɔ̀ nyɔ nyuà ké ɖɛ séín hwɛ̀à gbɔ dà séín nyɛɛ hwɛ̀ gbɔ.

Currently Selected:

Ìfísĩ̀ɔ̀ 1: ƁB02

Highlight

Copy