Romános 9

Dupade ajegaite israélgosode nanique jeta cho darása iji ore

Páblo chatata uje áyuguhebátaguipíse uté ome darasade israélgose ore áyipie uajádedie

1,2,3Ome Páblo uyu ga cucha iménuone dépisi yáyipie gatuaque, ga a jé yatatame uaque iji de gajiné. Jé ũrepíso yatatagode ome uaque, enga yajnesṍri Crísto uté chiraja uje que taque yu. Enga yuruode udojo pijoguto upúsu Dupade Ujopié uaté to, jé aja yáyipie iji yajei, uje Dupade Ujopié uaté chijocase ga cho ũréji yuruode udojo to.

Uje yáyuguhebátigadatéi ome yurasade israélgose ore chijõrorase yáyipie gatuaque, enga cho jetiga a jé ca eruénique cuse jne. Enga gose yurasade israélgoso ore isocai uté uje ore áyipiedie uajádei. Yujnusipísi ga a pisocárique dérasi ome uyu ga a yujuégarasa uyu ome yúringárique pujuya ome Dupade, jeta yisocai uté chiborátarásaja ore úringárique piquetaque jne erase. ¡A yẽrarása uyu ga pajuguque uyu iji Crísto gari jetiga yisocai uté chatarásaja yurasade, yujode judío ore! 4Chamáñaje israélgosode ore gãrapi jé upúsu jnani bajai Israel uté.#9:4 Ajnusináño uje cucha pagutíyabádode jiei chise judíode ore gu uje Dupade ajegaite ore nanique ome ore úringane Jacob uté ape disi ejo, uje uté i uñai tu Israel. Ga uté ape disi ejode udore jé u uje Dupade cho darása dedójnari iji ore nanique uje cho dabi iji ore. Que gusu uté, mu Dupade chácariji israélgosode ore ujade ga chingongara dangoningájnai aja ore. Jé upo rĩ uje Dupade chisíome daru iyiejnane ome ore. Ga Dupade chisiapome daru pirosobádode ome ore rĩ, uje Moisés urusarane cucha puyácho u. Israélgosode jé upo rĩ uje Dupade chopise ore quique ome uté úringárique pisígai isoca ũré uté, jé aja ujetiga gosi doi adode.#9:4 Iji versículo 4, uje chĩ́care uje Dupade chopise ore quique ome uté úringárique pisígai isoca ũré uté, ga ojningai a u ore isocade iji Dupade iguíjnai cucha ao nanique, jé aja Dupade Iguíjna Cuchábi uté. Ga israélgosode ore gajnecápo Dupade ichagájade darúo to nanique rĩ, uje chichaga cucha ueradode aja ore yui. 5Israélgosode ore jé upúsu uje ore dáqui ujnomerane u Abraham, Isaac, Jacob ore, uje Dupade ajegaite ore enga cho darása iji ore.

Jé ũré uje israélgosode udore cho dãrapíode iji Abraham, Isaac, Jacob cásodicáite udore ore. Mu cuchadatei tu uje israélgosode ore ijnati Crísto, Dupade Júdebei Piquetangore uté, cho dãrapíode iji israélgosode ore nanique to iji ore quicujaidie, uje chinoningase re nanique ga base ome dáringai ayoré. Ga Crísto uté jé upúsu uje úringai Dupa sué cuchade jnese gáyode, ¡enga uté gajnéone picotaquéo que eruénique cusipise iji deréjnane jnese! Amén.

Dupade que cho darásapísiji israélgosode ore jnese arĩa, mu ore pei u.

6Jé ca ajoso ati cucha bisidécho Dupade ichagájade darúo ome israélgosode udore ore. Chamáñaje que Dupade ajéningapúsu daruode gu. Jé ũré uje israélgose jiéode que ore chimo Dupade ichagájade darúo úringane tocachucho ome raque. Pijoguipise uje que Dupade uruode uñeque toja. Mu jé qui tu uje Dupade que cho darásapísiji israélgosode udore jnese gu, uje jnani bajai Israel ujnié disi ejo ore múñi. 7Ga a jé chopome Abraham uté rĩ, uje que Dupade cho Abraham abipísode iji uté ujnié disi ejode jnese gotique, mu chedu Isaac ujnié disi ejode udore ome ore úringane Dupade ajegaicho, uje Dupade chósi tome Abraham uté icaite: "Yichagájade bájnape disi ejo ore ga, gusu ore uje ore gãrapi u Isaac jne."#9:7 Dupade uruode udojo tṍraji Génesis 21:12.

8Ga Dupade urúiso udore qui tu uje Dupade que cho dabíji Abraham ájnape disi ejode uñane uje cachi ore cho dãrapi iji Abraham ome dáringai ayoré. E mu gusu udore ore uje Dupade chichaga daru iyiejnane aja ore yui, udore ape disi ejode jé upúsu uje Dupade cho dape uréone iji udore. 9Ga pijoque udojo ome Dupade ichagájade darúo uje chichagája Abraham uté yui nanique, uje chósi te: "Enga a yĩriápo iji uaque jne rĩ iji sequeré ejo enga a amónõ jne ujetiga bacoté Sára atique cus."#9:9 Ga Dupade uruode udojo jogadi tu Génesis 18:14 (mu dépoji versículo 10 rĩ). Ajnusináño uje Abraham abi Ismael e déji, mu que Dupade ichagájade darúo gajnesṍri uté to, mu gusu Isaac, jé aja uté ujnié disi ejode. Mu a jé ca toguírase jetiga ayorérique doi ga chachase Dupade ome áyipie quigode udojo, uje jé tiógara jetiga Dupade doi dajéode ome damaningone cucha jnese gu.

10Enga que gusu uje Dupade ichagájade darúo tocade ome Abraham uté, mu jé ojningane cucha tocade ome Rebéca to ome ape basugode uje garaja ore. Uje jnani chojmarai ica upúsu, enga uté u yocãrapi Isaac uté. 11-13Ga jé Dupade úringai pujnuéngaisṍre choquípisiji guesi uje pésu dajéode ome Rebéca, Isaac ore ape garajade udore ore uje cáma ore base nanique. Uje chichaga daruode aja Rebéca yui nanique ome abode udore, ga chósi tome: "A babode udore base jne mu a bajai u jne ujeta doi ejoi iroquéode."#9:11-13 Dupade uruode udojo ome Rebéca déji Génesis 25:23. Enga Dupade uruode udore jé cho daruode uñane uje purusãracho iji jogadi uñai, uje chósi te: "Jacob u uje yijnorapise nanique. Jé basa ga yetaque uyai Esaú to nanique."#9:11-13 Dupade uruode udojo jogadi tu Malaquías 1:2-3 ore.

Adójnacho uje Dupade e áyipie cuse ome udore ore nanique uje cáma ore base, enga que áyipie déji jetiga ore pésurásu cucha gajnarétique jeoga cucha onique jne. Mu Dupade gaidi tu jetiga pijoque uje uté gajnepídi u ujetiga jé gaite dajéode ome gosi úringárique pibijnangaite, enga que garani tu gosi ipesutique cucha gotique.

Jé ũré uje Dupade chedu re ome dáringai Dupa, jecute jé tiógara ujetiga osongaqué gajnengórone u dedopíode

14Obiréjna uje Dupade edugádi jé u re, jecute doi dajéode ome gosi úringárique pibijnangaite. ¿Mu yocuruode chorási ringome uté a? ¿Jé qui turásu jeta ca ujñapetaque Dupade ome dasocai uté a? ¡Que toguírase jetiga ca ujñapetaque Dupade ome dasocárique uñeque arĩa! 15Uje Dupade uruode chósi tome Moisés casicaite uté nanique: "Uyu u uje a yi yáyipiedie ome gosi jeta cho dajnéngu yosongaquéode jne, enga a yosõre gosi jne jeta yajéo."

16Jecute ome Dupade uruode udojo ga que toc ujetiga gosi cho dajnéngu Dupade osongaquei gu uje chichaga dajéode aja; jeoga gosi chejnapise daguesi ome dasatique dejo, e mu que Dupade ajegaite gosi gu ipesutique cucha, uje garani jé u gosi gu. Mu qui u uje Dupade jé gaite dajéode, jecute a Dupade ajéo ga guẽrate dosongaquéode ome gosi. 17Enga udojo quigode choquípisiji guesi uje Dupade doi dajéode ome egíptogosode ore eduguéjna cuchábi Faraón nanique. Uje Dupade uruode chósi tome Faraón uté nanique: "Uyu upúsu uje yichajapite ua aja báringai eduguéjna. Enga yigaidi tu gu jeta yagúome ua ga ayorébujnai ore pañaji yúringai ujopíerãque cuchape gu yisocade ome ua, enga jé upo rĩ jeta pute yujnomei ome purása uñane jnese iji erámi údode jnese."

18Jecute obiréjna uje jé Dupade juegabate cuchade ome ayoré chojmara, chojmarane uyoque iji erámone udojo. Ujetiga Dupade ajéode u jeta chosõre gosi, enga jé u uje guẽrate dosongaquei ome gosi. Mu jeta ajéo ome uñeque ga pésu uté gosi úringai ducusuréchoquí, ga uté gosi chajo raja dáyipie uajádedie qui uté.#9:18 Ajnusináño uje Faraón isocai tupúsu uje cusu re ome Dupade uruode gatuaque. Jé jno dáyipie uajádedie údi, údi, enga quene Dupade pésu uté úringai ducusuréchoquípise.

19Mu ja seca uacuñeque chetaque yuruode ga chojningárasa ome yu jne: "Ujetiga jé ũré baruode uje Dupade e pésu dáyipie iji piquéode ome cucha dacadode jnese uje tocade ome yoque ga, ¿cuchárique u gu a uje Dupade qué chajo raja yocúringai máraque? ¿Ama gosi iji yoque chaquĩ́rarase Dupade ome ajegaitique cucha úringárique tocachuque a?"

20Mu ujetiga baruode urásu udore ome yu ga, a yichajnárasi baruode ga yojningárasa: "¿Jé ua gosi a, jnani chá, uje banguíra babijnani aja Dupade ome babotaquéode udore? ¡Que bajnei tu gotique jetiga abotare Bamanisṍri uté! Uje jé tiógara ujetiga doi dajéode ome dajegaitique cucha."

Ga a jé adi tu co orangónique uje chirórase dacóbia, mu a ca toguírase jetiga uté orátaque dacope doi ga botárirase dorangóri uté, jeta chojninga: "¿Cuchárique u gu a uje bósi tome yu?" 21E mu jé tiógara jeta co orangóri doi dajéode ome dajnei dachabeque arĩa. Jecute dácha orangónique ajéraso, ga chijna dachabei uté pei jeta chiro cucha onínguiji. Ga ore chañuru guio uje ore chedu cucha ujñapetai uté ome pujnusinamánone dire udore enga ujode ayoré ore cho cucha oreránguiji. Jé basa ga dácha orangóri uté ajéraso ga chijnapo dachabei uté peque uñai te rĩ ga chiro dora uje que ujñapeque go, mu gusu gaidi tu gu jetiga ujode ayoré ore chinguíraja dirode uñane, ga jé ca ore chinguíraja pujnusinamánone dire gotique.

22Enga dácha orangóri isocai uté jé cunguésõri Dupade isocai ome damaningone ayoré ore to. Jé ũré uje Dupade ipotigádi tu ujetiga ájningai, úringai ujopíerã́quedatéi ore choquípisiji guesi ome dajuyaquei gajnengórone ore, mu jé chidota re ome ore ijnimingone uté ájninga. Jé ore gajnenguipise Dupade ujuyaquei arĩa, mu que jĩraque tocade ome ore uje cáma Dupade ajéo gu. 23Dupade chidota rome ore gu uje gaidi tu ujetiga chingongara dangoningájnai úringai orerã́quedaté aja dosongaquei gajnesórone udore ore. Enga udore ore u uje Dupade pésu jeta dimane ore iji piquéode ome ore úringane ingoningarã́cho yui, uje qué erã́ta cuchade yui nanique. 24Enga yojningane upúsu uyoque, uje Dupade cháta yógaja dajegaidode to. Mu que yuruode qui tu jeta Dupade uté chedu tibidi judíode yocuñane aja re, mu tibidápoi uñane aja re to iji purása quedéjnane ore ujade rĩ, uje que ore tiógarapísa uté osongaquei ome re múñi.

Pujnuéngaisṍri Dupade uté áyipie iyajmenie cuse ome israélgosode, purása quedéjnane ore jnese

Dupade uté áyipie quigode udore choqui guesi ome angúroméone proféta ore urusãra cásodicáite

25Enga Dupade isocai uté ome purása quedéjnane jé péroji daruode júsõri Oseas casicaite urusarane iji Dupade uru quigode nanique. Uje Dupade chojninga nanique:

–A yiji jnenga a yo yurása iji purása quedéjnane jne,

Uje que yurása ore to nanique múñi.

Enga a yĩ́care "Yurása yedójnarie" aja uaté

uje que ijnorangónique cuse nanique.– #9:25 Versículo 25 uru quigode tṍraji jnani bajai Oseas urusarane iji Dupade uruode iji Oseas 2:23.

26Ga qué déji Oseas casicaite ajnerámeone Dupade uru quicho iji jogadi uñai to, uje chatatapo Dupade uruode ome purása quedéjnane ore rĩ, ga chojninga:

–Iji ore achamini uté nanique ga yojningame ore:

"Que yurása uaque go."

Mu pachamini jé u uté jne jeta yo yabíji ore iji dínique gajneri.

Enga ayorébujnane a chojningame ore jne: "Dupa Uecai ore abío jõ."–#9:26 Versículo udé jogadi déji jnani bajai Oseas urusarane Dupade urúo iji Oseas 1:10.

27Mu Dupade uruode cusome israélgosode ore to nanique, uje Dupade uruode júsõri Isaías casicaite chajnerame ome darasade israélgose ore. Ga Isaías uté chejnapúsu daruode ome dabijnane, uje chósi te:

–Uje Israel ujnié disi ejode jiépisi ga ore gajnúone u yote quedéjnai arĩ iji edógai ome dabetígajnai marínga, gusu petique iji ore jeta ore chise dáringane piquetacho jne. 28U gu uje Dupa Pujnuéngaisṍri uje déji gaté e cho dáñiejáme ore yui nanique jeta chejna ore, ga a jé ca toque jetiga pumuchayaque uruode. E dimane Dupade ome dajegaidi dire yui ga a jĩraque chimanipise dáyipie aja guesi ome erámi jne ome dáringai ũré.–#9:28 Versículo udé uje Isaías chajnerame darasade israélgose ore nanique déji Isaías 10:22-23.

29Enga cucha dacadode udore júdi jé u cucha piqueminórone uje Isaías uté chatata to nanique, uje chósi te:

–Ujetiga Dupa Pujnuéngaisṍri iji gaté ca chosṍrirase yoque jeta noñome yocape disi ejórigo uñéngo iji guesi ome dáringane ueca, enga a e íjnonguirase israélgosode uyoque iji erámi. Ga yocadi a jé chorase sodómagosode ore; a jé yocajnúone urásu gomórragosode udore,#9:29 Sodómagosode, gomórragosode ore adode purusãracho iji jogadode udojo: Génesis 13:9-13; 18:16-33; jé aja 19: 1-29, mu cuchiyi tu versículode 24-25 iji Génesis capítulo 19. uje Dupade chejnápise udore ore idáyode ¡pógopógo! nanique.–#9:29 Ga Dupade uruode júsõri Isaías urusarane udore jogadi tu Isaías 1:9.

Israélgosode ore otigayaquéode ome pujnomé ueradi uté uje garani tu Dupade jé chuságaja diri tudé

30Uje yidójnajo cucha dacadode udojo ome purása quedéjnane, jé aja israélgosode udore ore, ¿ama cuchárique uje choqui guesi ome ore isocade a? Quique obiréjnai tu uje purása quedéjnane uje que ore áyipieraque déji jetiga ore chise dáringáringo ujñapetágome Dupade nanique, mu ore chise. Uje Dupade doi ga cho ayoré ujñapetáguiji ore gu ore anguretigai iji uté.

31Jé basa ga israélgosode ore ucuei tupúsu jeta ore chise dáringane ujñapetácho ome Dupade gu dagaidode Moisés urusãracho, mu que ore chibote go. 32¿Ama cuchárique u gu a uje que ore chibote? U gu uje que ore chedu Dupade ojningai panguretíga uté ome re jeta ore chise dáringai ujñapetaque ome uté. E mu ore jose ati ore chimanirase raja dagaidi uté ome dapesudode cucha udore. Ome ore isocai uté ga cho jetiga ore cṍra iji cucaranéraque ga chona dajegaidi yui. 33Ga proféta Isaías casicaite churúsãre cucha piqueminórone udojo iji darusarane Dupade urúo uje a tocade ome israélgosode jne. Enga Dupade chĩ́care "cucarané pucuáya" aja cucarané uaté uje a dorási ga chucuase ore jne. Mu que ojningai tu cucarané guesímitó, mu uruode chichaga raja Dupade Júdebei Piquetangore uté. Ga chósi te Isaías ajnerámeone Dupade urúo:

–¡Cajichope to! Uyu u uje yicha "cucarané pucuáya" uñáraque gajnui aja Cucarani Sión iji Israel uté,#9:33 Pichajapite israélgosode ore idai Jerusalén aja Cucarani Sión uté ójo uje ore pésu ore idai uté nanique. Quĩrique ore cho jogadi chojmara ome ore. ga yojningai uté cucarané gajnu a pésu ga chucuase ore jne, ga a ore cṍraji. Mu gosode jnese uje ore chicha danguretigai aja uté, ore u uje a jé ca ore cṍra jne. Enga a ca ore chimo dipótique ome re, uje que cucha bisideque ore anguretigai ome uté gu.–#9:33 Isaías uté urusarane udojo jogadi tu Isaías 8:14, jé aja Isaías 28:16. Ga quigode upúsu uje Dupade gaidi tu ujetiga israélgosode ore changureta Dupade Júdebei Piquetangore uté ome re ujetiga ore chise dáringáringo piquetacho, mu ore chetaque uté, enga ore gajnui tu jnanírique uje cṍra iji cucaranéraque ga chona dajegaidi yui.

Currently Selected:

Romános 9: Ayore

Highlight

Copy

Compare