Romános 8
8
Dupade Ujopié Espíritu Sánto déji yocajei enga chisíome detotiguei ome yoque ujetiga yipéco cucha ujñapetade
1E pĩroque yoquisijnaringuéone, jecute a jé ca yimóngo yocúringai pujuya iji dínique jne. ¡Udore ore jnese uje ore déji dáringane Jesucrísto gajnecho enga e ore úringane máracho bijnapise ome ore jé idé, enga a jé chuságaja deréjna pitade jne! 2Enga gose pucuecaringuei guẽrato Dupade Ujopié uaté isocai uté. Chamáñaje uaté chijnime uyu jé aja uaque iji pisijnaringuéone, pitoringai ore josipiedie jmainie ome detotiguei uté. Enga jé qui tu uje quene yoquisocai déji yoque, ome pucuecaringuei guẽrato Dupade Ujopié etotiguei uté, ujetiga jé ca pisijnaringuéone doi ga chirócapo yógaja daroquéode rĩ. Uje e yugúcoji yocúringane icha uje garani u Jesucrísto adode ome yoque.
3Uacamóño uje Moisés urusarane cucha puyácho chiroque uyógaja daroquéode úringane pipesucho marínga, que bisitique cuse ome yoque ujetiga pésu yoque ga yibóco quigode. Chamáñaje yoquipotigué ayoréode pésu Moisés urusarane udore iserẽrachúringai gu.
Mu Dupade u uje doi dasocai ome yoque ujetiga yico yocúringane ujñapetácho, uje Moisés urusarane que chibote go. Enga jé u uje Dupade chisíome Dabi ome yoque ujetiga cho ayoré iji re ga toi iji pisijnaringuéone ipesusórone uyoque jogadi ome dáringai pẽrapaite ome Dupade. Jé ũré uje Jesús aoi cho pisijnaringuéone ipesusórone yocaoi nanique uje diguina erámi, mu ueque uté ome pisijnaringuéone úringane pipesucho jnese nanique.
Enga uje Jesús toi ga chijna yoquisijnaringuéone jnese aja re, ga Dupade cho dajuñame Dajnacari uté iji yoquiyaridi.
Adi jé u uté uje Dupade chinoningase pisijnaringuéone etotiguei ome uyoque, jeta jé ca chijocásapo yoque rĩ. 4Enga Dupade gaidi tu gu ujetiga cucha ujñapetade jnese uje uté chĩ́care iji Moisés urusarane, quene pimanique aja guesi iji uyoque ome Dupade Ujopié Espíritu Sánto uje déji yocajéode. Que ayoréode uyoque u uje yimáco udore aja uéchai ome ayoréode yoquijmapié noñangue gotique arĩa, mu uje yajnángo Dupade Ujopié jmapié iji jnumone, yocangurené tu uaté ujetiga chátaja uyógome detotiguei uté.
5-6Ujetiga Dupade Ujopié Espíritu Sánto etotiguei u uje chijocase yoque iji yocucuecaringuei iji erámi udé, ga pijoque uje yocáyipiedie chejna raja uté ajegaidode cucha ome yoque jeta yipéjo. Enga ujetiga yocáyipiedie qui jé u uté, enga obiréjna uje yoquisocade udore iborátajade u pucuecaringué eyúgojmai, pajesereringai ore, uje Dupade Ujopié Espíritu Sánto a gueranome yoque jne.
Mu quique uñai cuse ome gosi uje chajo raja dapotigué ayoréode, ga chajna dáyipie gajnarénguenie iji jnumone iji diri tudé. ¿Ama pisocai uté chiborátaja cuchárique ome gosi jne a? Uté iborátajai jé upúsu pitoringai ome gosi, enga uté gosi a doi datéringane jne iji siñeque uje a cãra dajogadi ome Dupade iji deréjna pitade jnese. 7Ga yuruode qui tudé: Udore ore uje ore áyipie chajo raja dapotigué ayoréode ga ore áyipie uaté chopise damajo Dupade, uje que juéga re ome Dupade ajegaidode cucha úringáringo pipesute. Mu a jé ca toguírase ore arĩa ujetiga angoninguite guesaque ore ome Dupade ojningane cucha ueracho quigode, uje que ore chimécãre gu. 8Adójnachopísa uje udore ore uje ore juéga re ome dapotigué ayoréode ujetiga cho daróguiji ore, ga que toc ujetiga Dupade chimesẽre ore gotique.
9Mu ome yijorane uáguiji uaquedai Róma uté, e uacangaráño uacajmapié ome ore isoca noñai uté. Jecute que uacapotigué ayoréode upo rĩ uje chijocase uacáyipiedie. Mu e uacajnáño Dupade Ujopié ipotigádode cucha iji jnumone, enga gusu uaté ujetiga chijocase uaque, ujetiga jé ũrepise enga Dupade Ujopié Espíritu Sánto déji uacajéode. Jé basa ga ujetiga jé ca Crísto Ujopié déji gosi, enga unejaque uté gosi ome Crísto uté.
10Mu uje jé ũré enga Crísto jogate uacajéode ome Dajopié uaté, jecute jé ũré to uje a jecucha ueca uacáyipiedie jne. Ga gose Dupade isocai uté uje e cho ayoré ujñapetáguiji uaque gu. Jec ũré uje uacao ayorei qué déji uaque, ga jé qué uacajneque pitoringai iji erámi tudé, uje pisijnaringuéone a chujé uacaoi gu. 11A atoyoi jne, mu a piringarangápo uaque jne rĩ iji dirode uñeque, uje Dupade Ujopié Espíritu Sánto e déji uacajéode gu. Adi jé u Jesucrísto isocai uté nanique uje toi ome yoquisijnaringuéone ga Dupade chiringare uté nanique iji úringai toque ome Dajopié uaté. Ga Dupade a tagúome Dajopié uaté uje e déji uaque to jne ujetiga chiringare uacao ayoré toguébei iji uacáringane toque quigade.
Uje Dupade Ujopié Espíritu Sánto e déji yoque, ga yocajnepídi u ujetiga yangácoi oquigode cucha ome yoque
12Yujode Jesús anguresõre uaque á, yuruode quique ibijoi tudé: E yocajnepídi cuse arĩa, mu que cunguésõri pipotigué ayoréode quigode gotique, jeta yejnángopo yocáyipiedie aja udore ore úringáringo pigaicho rĩ. ¡Jé ca yujuéjo jetiga yocúringai ayoré ipotiguéode cucha chopo daróguiji yoque rĩ! 13Uje e pijoque ujetiga ajnóraño uacapotigué ayoréode adode iji jnumone iji erámi tudé, enga uacaquique obiréjnai tu pitoringai arĩa.
Jé ũré uje que toc ujetiga ajnuéño uacapotigué ayoréode gai ome puajatigué ayorei uté. Mu ujetiga oyo toguíji uacao ayorei ipotiguéode cucha ome Dupade Ujopié Espíritu Sánto etotiguei uté, ga a aquecáyo iji deréjnane jnese jne.
Dupade Ujopié uaté que josipíerẽ ome yoque go, mu nejéru yocúdode
14Adójnacho uje udore ore jnese uje ore juéga re ome dáringane Dupade Ujopié Espíritu Sánto ijocayaque, ga Dupade abode jé upúsu udore ore. 15Uje jé ũré enga Dupade abío uaque, ga pijoque uje cucha dacadi uté tocade ome uaque gu Dupade guerané Dajopié uaté etotiguei uje pésu uacáringane Dupade abío. Enga Dupade Ujopié uaté cho uacaquique, mu que josipíerẽ ome uaque go, jeta chirócapo uágaja uacáringane pisadodéringane isacho rĩ.
E mu uaté jnari yógome ujetiga yijnórango Dupade ga yĩ́caco "Papá" aja uté. Jecute ome Dupade Ujopié uaté adi uté ga e pujuegate ome Dupade atique gosi jeta chijócha Dupade ajei údi ome re, ga chojninga: "¡Iapá, yijnoránguipísi Yai tu ua!"
16Enga yocúringane Dupade abío ipijogúsorone upúsu Dupade Ujopié Espíritu Sánto uaté, jé aja yocáyipie ajépisi uté. Uje Dupade Ujopié nejéru yocáyipiedie údode ga chingongara cuchade udojo aja yoque. 17Enga yocúringane Dupade abío a chiborátaja yocajnéone cucha pagutíyabácho jne. U gu uje cucha ueradode jnese uje Dupade chichagája dabode ore yui, ga a yoco yocajnéngu to jne. Enga yocajnéone cucha udore a jé chopise Dupade gueranone cucha ome Crísto uté to, uje Jesucrísto, yoquipérogai jnese jne. Enga a jé chuságaja Crísto uté úringai ingoningarãque jne, uje a yoquipérogai to jne.
Mu adójnacho uje bajaque Crísto uté uje chejnáreque re uje cho daba Dupade adode nanique iji erámi tudé. E mu chise gojni diri nanique uje cuchade chinoningase re ome Jesucrísto nanique uje basapója dáringai ingoningarãque nanique rĩ. Ga a jé yoquigaidi u to iji diri tudé ujetiga yipérogoji Jesucrísto adode ome Dupade, ga yejnárejo yoque to ome cuchade bajaguíji yocúringáringo ingoningarã́cho yui.
Jec ũré uje cuchade iji erámi udé ga chisa yoquejode; mu a chise Dupade ajegaitique dire ome yoque jeta chingo yocúringane ingoningarãque aja yoque jne
18Jé ũré yu uje yo cucha bisidéguiji yocúringai ducañerájma iji deréjnane udojo. U gu uje yatingara yocúringai ducañerájma udé aja yocúringane ingoningarã́cho yui uje Dupade a chingongarája yoque iji yoquiquei jne, enga obiréjna ome yu uje cuchadatépisi tu yocúringane ingoningarã́cho jne. A uté u gu uje yo cucha bisidéguiji yocúringai ducañerájma iji deréjnane udojo.
19Dupade imaningone cucha ponáyo jnese ore jnatupúsu yui ujetiga Dupade uté chingongara dabode jnese aja erámi ga ore pijógome dáringane ingoningarã́cho jne. 20-21Uje a chise dire piqueminóri uté jne ga cucha pimaningone jnese a chagutíyame jne, uje quene erámi a chécãre re jne. Enga gose Dupade uje a chirame damaningone cucha uásejna udore ome dáringane toguébecho iji diri uté. ¡Que gusu uté, mu Dupade a pésu damaningone udore úringai icha, ga a ore cho Dupade abode ome dáringane ingoningarã́cho to jne!
Ajnusináño uje Dupade pésu cuchade iji taningai ga ueracho jnese nanique, que uñeque gajnareque. Mu chise gojni diri nanique uje jnani bajai ore pésu dasijnaringuei, enga chiborátaja cuchade jnese úringane pujuya. Que cucha pimaningone udore ajéode u gotique ujetiga ore chise dáringane cucha bisidécho, mu Dupade u uje juegabate cuchade udojo ome ore. E mu Dupade pésu to ujetiga imaningone cucha udore jé ca ore cha dangoroné ome daquetangónique cucha yui.
22Enga jé chuságaja deréjnane udojo uje qué ore chirote yui. Uje obiréjna ome yoque uje Dupade imaningone cucha jnese chejnáreque re iji dajnéone cucha dacate jmainie. Cho ujetiga ore pusugúi chojmara ome dajñacade uje ore jnaríji jnumone. Ga ore ujñapié ajã́tigai gajnua tu chequé uje abi a tagúji ga que tiógara achaminone. 23E mu que Dupade imaningone cucha udore chedu re ome dajñacade go. Mu jé chuságaja Jesús anguresórone uyoque to, ga cho jetiga yijnaco iji yocáyipiedie uje yiroco yocúringane ingoningarã́cho yui. Pijoguipise uje a tocade jne, uje Dupade guerané Dajopié e déji yoque gu, enga Dupade guerané bajé tu uaté ome guẽrate ejode. ¡A jé ca toguírase jetiga guẽrate ejode chona yoque jne arĩa!
Jé ũré uje yirajágo cuchade urõsoringuei iji erámi udé, mu qué yiroco deréjnai uté yui ujetiga Dupade chirame uyógome yocao jnutiminóri udé, ga chisíome yocao ichai ome yoque jne. Ujetiga chise diri uté, enga a Dupade chimanipise yógaja re ome yocúringane abipíso. Enga a quene yipijójome yocúringane ingoningarã́cho iji Dupade imaningone cucha uásejna edominone. 24Jé iji taningai uje yico yocúringai piquetaque gu yocanguretigai iji Jesucrísto, enga yijnátugo yui ujetiga quene yocao ichai uté déji yoque. Ujetiga e yimóngorase yocáyipie gaidi cucha uté ome yoquedodie, enga a jé ca toguírase ujetiga yojnijo: "Yanguretágo yui," ¿jec ũré?
Adi jé u ayorérique uje chichaga dajéode aja cuchárique ga changureta yui ujetiga chise uté. Mu ujetiga áyipie gaidi cucha e chise uté, ¿enga qué chichagápo dajéode aja yui te rĩ a? Úngare, e que toc uje e chimópise dáyipie gaidi cucha ome dedodie gu. 25E mu ome yoque uje cáma yimóngo yocáyipie gaidi cucha uté ome yoquedodie, mu que yiyágo yocangoroné ome yui gotique. Uje qué yugúcoji yocúringane ducañerájma jmainie iji erámi udé marínga, yirajágo uje Dupade a chimanipise dáyipie iyajmenie aja guesi jnese ome uyoque, uje chichaga cuchade udore aja gadoi nanique. Jecute yidotágo yógaja ome yocajnéone cucha dacate, ga yanguretágo Dupade ojningane cucha tocachuque yui gaté.
Dupade Ujopié Espíritu Sánto chátaja yoque iji yocucuecaringuei udé uje chijócha Dupade ajei údi ome uyoque, uje serẽrája yoque gu
26Que gusu yocanguretigai ome Dupade ojningane cucha yúode uje chátaja yoque jeta yitiójo yocajnéone cucha dacate, mu Dupade Ujopié Espíritu Sánto uje déji yocajei chátaja uyoque to. Uacamóño uje iji ujade ga yisererángoja iji cucha dacadode jmainie iji yocúringane Jesús anguresóño. Enga jé chuságaja uje e que yirajágo yocuru quitique jeta yutágoi Dupade. E mu Dupade Ujopié upúsu uje chiraja ga chijócha Dupade ajei údi ome uyoque. Ga ajei jochaquéode chome ayoré uje jnare ome dáyuguhebátigadaté gajnéone cucha, mu a jé ca toguírase jetiga pajnerámeo ome purupísode. 27E mu Dupade uté chidójnangapísa yocáyipie iji yocajei, ga uté chirajápo Dajopié Espíritu Sánto gaidi cucha ome Jesús anguresórone uyoque rĩ uje chijócha Dupade ajei údi ome uyoque. Uje Dupade Ujopié Espíritu Sánto a chutai cuchárique ome uyoque mu jé ajegaidi cucha chedu Dupade ajegaidi cucha ome uyoque, uje chojmara ore áyipiedie iji jnumi gu.
Dupade uté a chimate dáyipie ueradedie udire aja guesi jnese ome danguresórone uyoque jne
28Yujode Jesús anguresõre uaque á, yirajágo uje cuchade jnese uje chise Dupade ijnorasórone ore, enga Dupade doi enga chinoningase cuchade udore enga nóña ga cucha omío ome dajnorasórone ore jnese. Ga udore ore u uje Dupade ajegaite ore nanique uje e pésu dáyipiedie ome ore gu. 29Uje iji taningárique nanique ga Dupade jĩraque chiraja danguresórone ore. Enga e pésu dáyipie bajaguíji yui ome udore jnese to jetiga jé ore chopise Jesucrísto uté. Dupade ajegaidi jé u gu ujetiga ujnacari hermánone jiépiso, ga ore cho darẽjáji Jesucrísto uté jnese ome uté úringai ibijoque, uje bajai tu uté ome ore gu. 30Enga udore ore uje Dupade e pésu dáyipie ome ore ujetiga ore cho ujnacari Jesucrísto uté, enga Dupade e pijnangaite ore to. Enga udore uje Dupade pijnangaite ore, ga jé chinoningase ore to ga cho ayoré ujñapetáguiji ore. Enga udore ore uje Dupade cho ayoré ujñapetáguiji ore ga, uté e chĩ́care uje a pésu ga ore úringane ingoningarã́cho a tocade to jne ome ore rĩ.
Yoquijnorasṍri Crísto u uje chimate yógaja yocúringane pujnuéngaisṍripíso
31¿Ama yocáyipie chorási ringome Dupade átedatéode udojo ome yoque a? E pijoguipise uje yoquirotangóri tu Dupade arĩa, ¿jecute gosi urásu a, ujetiga doi ga suérase yoquibánique? ¡Íjnoque! 32Uacamóño uje Dupade que chãraque Dajnacari uté, uje ujnacaripise múñi. Mu tẽra uté ome úringai chuque, ujetiga toi ome uyoque jnese. Jecute uje Dupade e chisíome Jesucrísto ome uyoque, enga obiréjna uje a jé ca charángapo cucha ueradode uñeque ome uyoque rĩ, mu a chisíome dachagájade cucha udore jnese ome yoque, ome dacaniratiguédatéi uté.
33¿Ama ayorérique dorási ga chaguhéta cuchárique Dupade ajegaidode udore gánique jne a? A jé ca toguírase arĩa. Chamáñaje Dupade uté upúsu uje e cho ayoré ujñapetáguiji dajegaidode uyoque jnese gu, jecute a jé ca juéga jeta gosi chijnime yocadode ome uté. 34¿Jeoga piyaguirase uñeque jetiga doi ga chĩ́carapo yocúringáringo pujuyagaite rĩ ome Dupade a? ¡Úngare! Uacamóño uje Jesucrísto uté e chijnime yóguiji yocajnei pujuyaqué erase uje toi iji yoquiyaridi nanique. Enga que gusu uje pẽrapaite ome yoquisijnaringuéone, mu nijiápo iji dáringai chuque quigade rĩ ome dáringai pujnuéngaisṍre. Enga jé idé ga Jesucrísto uté e déji Dupade ãrachua ome dáringai cuchape, ga uté jé upúsu uje chijócha Dupade uté ajei údi ome uyoque gatuaque to iji uté.
¡Jecute pijoque uje que toc ujetiga ayorérique doi ga chĩ́carapo yocúringáringo pujuyagaite ome Dupade rĩ!
35¡Obiréjna uje cuchadaté Crísto ijnoraquei uté ome uyoque, jõ! ¿Ama gosi dérasi ujetiga chajnose uyógome uté ijnoraquédatéi jne a? ¿Jeoga cucha dacate gajnarétique dorási ga chejñu Crísto ijnoraquédatéi iji yoque a? ¡Úngare, jé jogate yoque! Jé ũré uje cuchade guiyaque yoque iji erámi tudé arĩa: jeoga yejnárejo yógome yocajnenie pujurei; jeoga páyuguhebátigade na yógaja jnumi; jeoga ducañerájma yoque; jeoga chaguhédatérique chise yoque; jeoga pijmátaringuéi déji yoque; jeoga cucha dacate iquiñiringuetade yore yoquibai; jeoga yico yocúringane chuque jne. 36Mu pijoque uje pisocade udojo que chedu yoque gotique, uje Dupade angúroméone proféta uñai chósi tome darusarane Dupade urúo nanique:
"Yoco yoquiba badode, uje pitoringai socárome yoque iji deréjnai údode. Ga yocajnunie u áyasadie uje yungóremétique chujé udire." #8:36 Versículo udé jogadi tu Sálmo 44:22 iji Dupade Uruode.
37Mu ome cucha tocachuque uajádode udojo jnese, ga Yoquijnorasṍri Crísto chátaja yógome detotiguejnai, jecute yujnuéngo cuchade udojo gáyode jnese. ¡Enga datéringa uje uté chimate yógaja yocúringane pujnuéngaisṍripíso!
38-39¡A jé ca toguírase ujetiga cuchárique dorási ga chajuque yóguiji Dupade ijnoraquei uté, jõ! Enga que potigayaquérique dépisi yu ome yuruode udojo úringane ũréo. Ujetiga pitoringai u, jeoga cucha dacatique uñeque uje guiyaque yóguiji yocúringane ueca, mu que toc ujetiga udore uñeque chejñu Dupade ijnoraquei iji yoque. Jeoga Dupade iroque gateminórone u, jeoga pujopié noñánguenie u, mu que toc ujetiga udore uñeque chajnose yógome Dupade ijnoraquei gotique to. Enga a jé chopome cucha dacadode diríe jogonóño rĩ, jé aja cucha dacate piqueminórone jnese, uje Dupade ijnoraquei jé jogate yoque. A jé ca togome cucha ujopíerane jnese arĩa, jeoga cuchade jnese uje umaningai idája iji gaté, jeoga cuchade jnese iji jnumi údi uje idájai guesi, jeoga cuchade uñeque iji Dupade ipesudode cucha uásejna ujade, jeta udore uñeque chajuque yóguiji Dupade ijnoraquei uté to go.
¡Dupade ijnoraquédatéi uje uté chingongarája uyoque ome Yocangarádejnai Jesucrísto adode ome uyoque ga, e que toguipise ujetiga pejñunguíji uyoque!
Currently Selected:
Romános 8: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
