Romános 7
7
Páblo pésu ejémplo, ga chacãra dacajnaquéode aja chequé amanachuguéraque uje abai toi
1Yujode Jesús anguresõre uaque á, e pijoque uje uacarajáyo páyipie pirosobádedie isocade, uje peduguéjnane churúsãre "léyode" ome darasade ujetiga ore doi quigode. Mu ¿peduguéjnane ore urusarane udore etotiguei jé chuságaja ayoré togode to a? ¡Úngare! Yirajágo arĩa uje gusu páyipie pirosobádedie udire etotiguei cuse ome ayoré uecade iji erámi tudé.
2A yipésu ejémplo ome uaque jne, enga yacãra yuruode aja chequé amanachuguéraque: A chequé goto chisarase damanique ga uaté gajnepídi tupúsu ujetiga chajo raja dabai iji uté úringai ueca, uje "ley" qui jé u gu ome ore uje ore chóji ñane gari. Jé basa ga uaté abai uté torási, enga "ley" uté e que etotiguei cusapome uaté rĩ uje abai e íjnoque gu. 3Mu ujetiga chequé uaté cho dabai iji uñeque uje abáipisi jé eca, enga ujode ayoré a ore chĩ́care uaté ome úringa dipoté, uje canaji dabai ejode gu. Uje "ley" qui jé u gu. Mu ujetiga uaté abai e toi, enga "ley" uté uje chajo ore aja ñane iji abai uté ucuecaringué casé e que chigarupo uaté rĩ. Enga a chisarase dabai ejórique, mu a jé ca peduguéjnane urusarane chorase chequé dipoté iji uaté ome isocai uté gotique, uje e guesája iquei ome abai ejórique jeta chisapo rĩ.
4Enga uacadi uté jé cunguésõri casamiénto isocai uté to, yujode Jesús anguresóño uaque á. Uje uacajóyo uágaja Moisés urusarane cucha puyácho quigode nanique, mu e pejñuque Moisés urusarane isapídode iji uaque, jecute que amechópo uáguiji udore rĩ. Chamáñaje uacajnúone u ayoré togode ome Moisés urusarane udore, uje uacapatíoraño Crísto uje pajópi uté aja curesei gai nanique. Enga pijoque uje e que Moisés urusarane udore etotiguei cusapome ayoré togode rĩ, jecute e que etotiguei cusapome uaque rĩ.
Jé qui tupúsu uje Dupade chejñu Moisés urusarane isapídode iji uaque ujetiga átayo uágaja uñeque ome uté úringai uacajnesõre. Enga yojningai uacajnesõre uté u Crísto, uje uté e piringarangápo iji dáringai toque quigade rĩ. Gaidi tu gu ujetiga yocadie cuse enga cucha arégode tṍraji yoque ome Dupade.
5Uacamóño iji yocucuecaringué casica, ga yocúringai ayoré jecucha chijocase yocáyipiedie enga chiroque uyógaja ujetiga yinguírango yocadode ome yoquipotigué noñángone udore. Uje yirajágo Dupade garéngone cucha iji Moisés urusarane marínga, que yocate gajnaréngone doi jnutique, mu yoquirajade Moisés urusãracho udore chõre pisijnaringuéone unéningajnane ome uyoque gaté, enga sué yoquibáyode. Enga cuchade udore iborátajai jé upúsu pitoringai.
6Mu iji de ga e pejñuque Moisés urusarane isapídode iji yoque, jecute e que udore etotiguei cusapome uyoque rĩ. U gu uje yoco yoquibaya Crísto iji itoringai, enga yocajnúone u togode, ujetiga jé ca Moisés urusarane chigarupo uyoque rĩ.
Enga jé u uje yoquijmapié icha cuse ome yocajnéone Dupade iroquéo. Enga que qui tupo rĩ ujetiga yicoi uté iroquéode ome yoquijmapié bajé uaté, uje yedugo Moisés urusãra cásodicáite úringane pigaicho ome yoque. Mu e yicoi Dupade iroquéode ome Dupade Ujopié Espíritu Sánto etotiguei uté.
Páblo jnusiname uyoque uje que gajnareque Moisés urusarane quigode gotique, uje quene pisijnaringuéone úringane gajnarécho choqui guesi ome Moisés urusarane udore
7Ja seca uñeque chojningárasa:
–¿Ama jé ca gajnareque Moisés urusarane cucha puyácho a, ujetiga jé ũré enga udore pésu ga pisijnaringuéone niji iji yocajei ome udore a?–
Mu a yichajnárasi gosi uruode, enga yojningárasa:
–¡Úngare! Obiréjnapise uje que gajnareque Moisés urusarane quigode udore gotique, mu ueracho, gu uje Moisés urusarane udore pésu ga pisijnaringuéone igajnarétigade choquípisiji guesi ome uyoque. Ga yacãrájai tu uyu ome cuchade udojo to, uje a jé ca yirajárase nanique uje pisijnaringuei tu ujetiga yitãráyime ayoré unejai ugúchade, mu jé gusu uje choqui guesi ome yu nanique ome Moisés urusarane cucha puyácho uje chósi te: "Jé ca apota cucha unejátique."
8Uje Moisés urusarane chatata Dupade gãrei cucha uté, mu yipotiguéode ome ayoré unejángone ore ugúchade cho ujetiga pésu danéningame yu gaté uje yudute udore. E chijna piotiguei jeta chiringare pipotiguéode ome cucha unejaque ponáyone iji yajei.
Uacamóño uje pisijnaringuéone que etotiguérique cuse ujetiga íjnoque ley ujetiga chãraque cucha gajnaréngone úringane pipesucho ome uyoque.#7:8 Mu uje ley e cuse ga yoquipotigué ayoréode etotiguei quérã gaté jé aja ujetiga cho daróguiji uyoque. Jecute a jé chorase ujetiga toque yoquipotiguéode udore, uje que pãreque cucháringome uyoque gu.
9Ome Páblo uyu iji yucuecaringué casica ga agúpurai yu ome Moisés urusarane cucha puyácho iroquéode udore. Enga que yo yáyugu yu iji deréjnane udore ome yisijnaringuéone gotique nanique; jé basa ga quene yiraja Dupade garéngone cucha ome Moisés urusarane cucha puyácho nanique, enga e pijógome yu uje yajneque pitoringai ome yiyógayode Dupade iroquéo udore. 10¡Chimo jóroque re! Dupade iroquei uté iborátajai turásu pucuecaringuei ome yu, mu jé iríringui tupúsu pitoringai ome yu, uje yiyó gai gu. 11Cho jeta pisijnaringuéone uté chucué piotiguérique ga tagúome Dupade uru pirosobádode ujetiga chãra yu. Uje pésu ga yijos eti yisocai dérasi ujetiga chimate yu aja pucuecaringuei uté ome yangoninguite guesáringane ome Dupade uru pirosobádode. Mu que yimécãre go, enga gusu yiquique obiréjnai tu pitoringai, ga gose yiyógayode cucha puyácho udore uje chujé yu.
12Jecute e pijoguipise uje que gajnareque Moisés urusarane cucha puyácho udore gotique, mu ujñapetácho jnese. Ga jmapiedie ujñapetei to, ga ũrepíso quigode jnese. Jé aja uje udore jnese eteque iyonguerãi ome dáringane ueracho, uje garani tupúsu Dupade gu. 13Mu jeta ueracho Moisés urusarane udore, ¿ama jé ũrérase jeta udore ipesute pitoringai ome uyu a? ¡Úngare, a jé ca toguírase arĩa! Mu pisijnaringuéone u uje tagúome Dupade uru pirosobate ueradode udore ome yúringai chuque uté. Dupade gaidi tupúsu ome daru pirosobádode udore ujetiga pisijnaringuéone úringane noñánguipíso choqui guesi. Enga jé pijoque uje poritaguipise pisijnaringuéone, ga iquiñiringuetaque iborátajai cucha ome yu, uje pitoringai u, enga gose yiyógayode Dupade iroqué ueracho udore.
Yoquipotigué ayoréode, yocúringane Dupade abío ore cho dajocaningame ñane iji yocajéode
14Yirajágo jnese uje Moisés urusarane cucha puyácho udore tṍraji Dupade uté. Jé basa uyu ga, cachi ayoré yu uje que yetotiguérique cusipise. Enga pẽrate yu ome pisijnaringuéone, uje cho daróguiji yu ga chiroque yu aja dapotigádode cucha noñácho udore gatuaque. 15Mu cachi yirajágode cucha u yipesudode cucha noñácho udore. Uje yipotigádi tu jórogu ujetiga yipésu cucha arégode; mu jé basa ga yetingarane upúsu yetégode cucha udore gatuaque. 16Mu ujetiga ca yajéode upúsu ujetiga yipésu yate gajnaréngone udore, enga obiréjnapise uje jé ũré uje yo cucha ueradode iji Dupade uru pirosobádode udore ore. 17Jecute quene pijoque to uje que uyu upo rĩ uje yipésu yate gajnaréngone gu uje yipota udore úringane pipesucho, mu pisijnaringuéone iji yajei u uje sué yibai.
18E pijoguipise ome yu uje que yátegoningá unátaque dépisiji yajei. Enga yojningai tu yúringai ayoré jnutiminore, uje que cucha onique déji uté. Enga obiréjna yuruode udojo úringane ũréo gu uje yúringai ayoré que juéga yu ome cucha arégode úringane pipesucho, uje yipota jóroga múñi. 19Jecute que toc ujetiga yimate yu aja yipotigádode cucha omío. Uje yajéode upúsu ujetiga jé ca yipésu cucha gajnarétique marínga, cucha gajnaréngone udore u uje yajnera údi. 20Enga jé upúsu yurúiso udore quigode: Ujetiga yipésu yetégode cucha udore, enga obiréjna uje que uyu u uje yipésu, mu pisijnaringuéone iji yajei upúsu uje sué yibai enga chiroque yu aja cucha gajnaréngone úringane pipesucho.
21E yimo cucha dacate tocachui udé ome yu gatuaque: Uje e nimane yáyipie ome cucha arégode úringáringo pipesucho yui, mu páyipie gajnarénguenie iji yajei etotiguei cuse ome yu, ga chãraque yu ome yáyipie ueradedie gaidode cucha udore. 22Jé ũré uje yachietáji Dupade uru pirosobádode iji yáyipie ajépisi, ome yúringai ayoré icha. 23Mu yidójnanga uje ujopíerãque cucha uñai uje déji yúringai ayoré jnutiminore udé, enga yingóri uté cho dajosipié ome yu jeta jé ca yipésu yáyipie icha quigode. Jé basa ga cho daróguiji yu ome pisijnaringuéone úringáringo pipesucho gatuaque.
24-25Que yimécãre yipesudode cucha gajnarécho uje ujuya yu, enga ¡érãtique yiraja yátajasónique ome yu jõ! ¿Ama gosi chirame yu jne a? ome yibai ayoré toguébei tudé uje quique obiréjnai tu pitoringai, ome yate gajnaréngone úringane pipesucho.
Jé ũré iji yáyipie udaque ga yẽra yu ome Dupade uru pirosobádode úringáringo pipesucho udore; jé basa ga yúringai ayoré jnutiminore udé e tẽra re ome darósõri uñai, uje pisijnaringuéone u, enga tagúome pisijnaringuéone uté etotiguei ujetiga chiroque yu.
¡Mu yacãre Dupade gai, uje Yocangarádejnai Jesucrísto adode u uje chirame yu ome yisijnaringuéone, jé aja yúringai ayoré udé josipiedie ome yu!
Currently Selected:
Romános 7: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
Romános 7
7
Páblo pésu ejémplo, ga chacãra dacajnaquéode aja chequé amanachuguéraque uje abai toi
1Yujode Jesús anguresõre uaque á, e pijoque uje uacarajáyo páyipie pirosobádedie isocade, uje peduguéjnane churúsãre "léyode" ome darasade ujetiga ore doi quigode. Mu ¿peduguéjnane ore urusarane udore etotiguei jé chuságaja ayoré togode to a? ¡Úngare! Yirajágo arĩa uje gusu páyipie pirosobádedie udire etotiguei cuse ome ayoré uecade iji erámi tudé.
2A yipésu ejémplo ome uaque jne, enga yacãra yuruode aja chequé amanachuguéraque: A chequé goto chisarase damanique ga uaté gajnepídi tupúsu ujetiga chajo raja dabai iji uté úringai ueca, uje "ley" qui jé u gu ome ore uje ore chóji ñane gari. Jé basa ga uaté abai uté torási, enga "ley" uté e que etotiguei cusapome uaté rĩ uje abai e íjnoque gu. 3Mu ujetiga chequé uaté cho dabai iji uñeque uje abáipisi jé eca, enga ujode ayoré a ore chĩ́care uaté ome úringa dipoté, uje canaji dabai ejode gu. Uje "ley" qui jé u gu. Mu ujetiga uaté abai e toi, enga "ley" uté uje chajo ore aja ñane iji abai uté ucuecaringué casé e que chigarupo uaté rĩ. Enga a chisarase dabai ejórique, mu a jé ca peduguéjnane urusarane chorase chequé dipoté iji uaté ome isocai uté gotique, uje e guesája iquei ome abai ejórique jeta chisapo rĩ.
4Enga uacadi uté jé cunguésõri casamiénto isocai uté to, yujode Jesús anguresóño uaque á. Uje uacajóyo uágaja Moisés urusarane cucha puyácho quigode nanique, mu e pejñuque Moisés urusarane isapídode iji uaque, jecute que amechópo uáguiji udore rĩ. Chamáñaje uacajnúone u ayoré togode ome Moisés urusarane udore, uje uacapatíoraño Crísto uje pajópi uté aja curesei gai nanique. Enga pijoque uje e que Moisés urusarane udore etotiguei cusapome ayoré togode rĩ, jecute e que etotiguei cusapome uaque rĩ.
Jé qui tupúsu uje Dupade chejñu Moisés urusarane isapídode iji uaque ujetiga átayo uágaja uñeque ome uté úringai uacajnesõre. Enga yojningai uacajnesõre uté u Crísto, uje uté e piringarangápo iji dáringai toque quigade rĩ. Gaidi tu gu ujetiga yocadie cuse enga cucha arégode tṍraji yoque ome Dupade.
5Uacamóño iji yocucuecaringué casica, ga yocúringai ayoré jecucha chijocase yocáyipiedie enga chiroque uyógaja ujetiga yinguírango yocadode ome yoquipotigué noñángone udore. Uje yirajágo Dupade garéngone cucha iji Moisés urusarane marínga, que yocate gajnaréngone doi jnutique, mu yoquirajade Moisés urusãracho udore chõre pisijnaringuéone unéningajnane ome uyoque gaté, enga sué yoquibáyode. Enga cuchade udore iborátajai jé upúsu pitoringai.
6Mu iji de ga e pejñuque Moisés urusarane isapídode iji yoque, jecute e que udore etotiguei cusapome uyoque rĩ. U gu uje yoco yoquibaya Crísto iji itoringai, enga yocajnúone u togode, ujetiga jé ca Moisés urusarane chigarupo uyoque rĩ.
Enga jé u uje yoquijmapié icha cuse ome yocajnéone Dupade iroquéo. Enga que qui tupo rĩ ujetiga yicoi uté iroquéode ome yoquijmapié bajé uaté, uje yedugo Moisés urusãra cásodicáite úringane pigaicho ome yoque. Mu e yicoi Dupade iroquéode ome Dupade Ujopié Espíritu Sánto etotiguei uté.
Páblo jnusiname uyoque uje que gajnareque Moisés urusarane quigode gotique, uje quene pisijnaringuéone úringane gajnarécho choqui guesi ome Moisés urusarane udore
7Ja seca uñeque chojningárasa:
–¿Ama jé ca gajnareque Moisés urusarane cucha puyácho a, ujetiga jé ũré enga udore pésu ga pisijnaringuéone niji iji yocajei ome udore a?–
Mu a yichajnárasi gosi uruode, enga yojningárasa:
–¡Úngare! Obiréjnapise uje que gajnareque Moisés urusarane quigode udore gotique, mu ueracho, gu uje Moisés urusarane udore pésu ga pisijnaringuéone igajnarétigade choquípisiji guesi ome uyoque. Ga yacãrájai tu uyu ome cuchade udojo to, uje a jé ca yirajárase nanique uje pisijnaringuei tu ujetiga yitãráyime ayoré unejai ugúchade, mu jé gusu uje choqui guesi ome yu nanique ome Moisés urusarane cucha puyácho uje chósi te: "Jé ca apota cucha unejátique."
8Uje Moisés urusarane chatata Dupade gãrei cucha uté, mu yipotiguéode ome ayoré unejángone ore ugúchade cho ujetiga pésu danéningame yu gaté uje yudute udore. E chijna piotiguei jeta chiringare pipotiguéode ome cucha unejaque ponáyone iji yajei.
Uacamóño uje pisijnaringuéone que etotiguérique cuse ujetiga íjnoque ley ujetiga chãraque cucha gajnaréngone úringane pipesucho ome uyoque.#7:8 Mu uje ley e cuse ga yoquipotigué ayoréode etotiguei quérã gaté jé aja ujetiga cho daróguiji uyoque. Jecute a jé chorase ujetiga toque yoquipotiguéode udore, uje que pãreque cucháringome uyoque gu.
9Ome Páblo uyu iji yucuecaringué casica ga agúpurai yu ome Moisés urusarane cucha puyácho iroquéode udore. Enga que yo yáyugu yu iji deréjnane udore ome yisijnaringuéone gotique nanique; jé basa ga quene yiraja Dupade garéngone cucha ome Moisés urusarane cucha puyácho nanique, enga e pijógome yu uje yajneque pitoringai ome yiyógayode Dupade iroquéo udore. 10¡Chimo jóroque re! Dupade iroquei uté iborátajai turásu pucuecaringuei ome yu, mu jé iríringui tupúsu pitoringai ome yu, uje yiyó gai gu. 11Cho jeta pisijnaringuéone uté chucué piotiguérique ga tagúome Dupade uru pirosobádode ujetiga chãra yu. Uje pésu ga yijos eti yisocai dérasi ujetiga chimate yu aja pucuecaringuei uté ome yangoninguite guesáringane ome Dupade uru pirosobádode. Mu que yimécãre go, enga gusu yiquique obiréjnai tu pitoringai, ga gose yiyógayode cucha puyácho udore uje chujé yu.
12Jecute e pijoguipise uje que gajnareque Moisés urusarane cucha puyácho udore gotique, mu ujñapetácho jnese. Ga jmapiedie ujñapetei to, ga ũrepíso quigode jnese. Jé aja uje udore jnese eteque iyonguerãi ome dáringane ueracho, uje garani tupúsu Dupade gu. 13Mu jeta ueracho Moisés urusarane udore, ¿ama jé ũrérase jeta udore ipesute pitoringai ome uyu a? ¡Úngare, a jé ca toguírase arĩa! Mu pisijnaringuéone u uje tagúome Dupade uru pirosobate ueradode udore ome yúringai chuque uté. Dupade gaidi tupúsu ome daru pirosobádode udore ujetiga pisijnaringuéone úringane noñánguipíso choqui guesi. Enga jé pijoque uje poritaguipise pisijnaringuéone, ga iquiñiringuetaque iborátajai cucha ome yu, uje pitoringai u, enga gose yiyógayode Dupade iroqué ueracho udore.
Yoquipotigué ayoréode, yocúringane Dupade abío ore cho dajocaningame ñane iji yocajéode
14Yirajágo jnese uje Moisés urusarane cucha puyácho udore tṍraji Dupade uté. Jé basa uyu ga, cachi ayoré yu uje que yetotiguérique cusipise. Enga pẽrate yu ome pisijnaringuéone, uje cho daróguiji yu ga chiroque yu aja dapotigádode cucha noñácho udore gatuaque. 15Mu cachi yirajágode cucha u yipesudode cucha noñácho udore. Uje yipotigádi tu jórogu ujetiga yipésu cucha arégode; mu jé basa ga yetingarane upúsu yetégode cucha udore gatuaque. 16Mu ujetiga ca yajéode upúsu ujetiga yipésu yate gajnaréngone udore, enga obiréjnapise uje jé ũré uje yo cucha ueradode iji Dupade uru pirosobádode udore ore. 17Jecute quene pijoque to uje que uyu upo rĩ uje yipésu yate gajnaréngone gu uje yipota udore úringane pipesucho, mu pisijnaringuéone iji yajei u uje sué yibai.
18E pijoguipise ome yu uje que yátegoningá unátaque dépisiji yajei. Enga yojningai tu yúringai ayoré jnutiminore, uje que cucha onique déji uté. Enga obiréjna yuruode udojo úringane ũréo gu uje yúringai ayoré que juéga yu ome cucha arégode úringane pipesucho, uje yipota jóroga múñi. 19Jecute que toc ujetiga yimate yu aja yipotigádode cucha omío. Uje yajéode upúsu ujetiga jé ca yipésu cucha gajnarétique marínga, cucha gajnaréngone udore u uje yajnera údi. 20Enga jé upúsu yurúiso udore quigode: Ujetiga yipésu yetégode cucha udore, enga obiréjna uje que uyu u uje yipésu, mu pisijnaringuéone iji yajei upúsu uje sué yibai enga chiroque yu aja cucha gajnaréngone úringane pipesucho.
21E yimo cucha dacate tocachui udé ome yu gatuaque: Uje e nimane yáyipie ome cucha arégode úringáringo pipesucho yui, mu páyipie gajnarénguenie iji yajei etotiguei cuse ome yu, ga chãraque yu ome yáyipie ueradedie gaidode cucha udore. 22Jé ũré uje yachietáji Dupade uru pirosobádode iji yáyipie ajépisi, ome yúringai ayoré icha. 23Mu yidójnanga uje ujopíerãque cucha uñai uje déji yúringai ayoré jnutiminore udé, enga yingóri uté cho dajosipié ome yu jeta jé ca yipésu yáyipie icha quigode. Jé basa ga cho daróguiji yu ome pisijnaringuéone úringáringo pipesucho gatuaque.
24-25Que yimécãre yipesudode cucha gajnarécho uje ujuya yu, enga ¡érãtique yiraja yátajasónique ome yu jõ! ¿Ama gosi chirame yu jne a? ome yibai ayoré toguébei tudé uje quique obiréjnai tu pitoringai, ome yate gajnaréngone úringane pipesucho.
Jé ũré iji yáyipie udaque ga yẽra yu ome Dupade uru pirosobádode úringáringo pipesucho udore; jé basa ga yúringai ayoré jnutiminore udé e tẽra re ome darósõri uñai, uje pisijnaringuéone u, enga tagúome pisijnaringuéone uté etotiguei ujetiga chiroque yu.
¡Mu yacãre Dupade gai, uje Yocangarádejnai Jesucrísto adode u uje chirame yu ome yisijnaringuéone, jé aja yúringai ayoré udé josipiedie ome yu!
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360