Romános 6

Gajnareque ujetiga Jesucrísto anguresórone yico yoquisijnaringuéone údi gaté arĩa

E yipatíorango Jesucrísto iji itoringai, ga jé yijínangopó uté aja ĩrijíningai rĩ, iji Dupade edominone

1Uacamóño uje e Dupade chingongara dacaniratiguédatéi aja uyoque uje chĩro yoquisijnaringuéone. Jecute ¿yocorási ringome yocadode iji yoquiquei a? ¿Ja qui turásu ujetiga yico yoquisijnaringuéone údi gaté a, ujetiga Dupade chajnera dacaniratiguédatéi údi ome yoque, ga chĩrope yoquisijnaringuéone gaté a? 2¡Úngare, gajnarenguipise jetiga yocáyipie qui jé urásu udore! Chamáñaje e yoco ayoré toguíji yógome pisijnaringuéone úringane pipesucho. Jecute gajnareque ujetiga yico yoquisijnaringuéone údi iji yocucuecaringuei udé.

3¿Ama jé ca pijógome uaque a? uje Dupade cháta danguresórone uyoque jnese aja Jesucrísto ome bautísmo uje garani u Dupade uté. Enga jé u uje Jesucrísto, yitojmárangoji jnumi. Enga uje e yitojmárangoji jnumi, enga qui jé u uje e yoco yoquibaya Jesucrísto iji itoringai ome bautísmo uté to, iji Dupade edominone.#6:3 Adójnacho uje bautísmo quigode gare: Bautísmo udé qui tupúsu Dupade Ujopié Espíritu Sánto adode ome yoque uje cháta yógaja Jesucrísto uje quene yanguretágo uté, enga jĩraque tocade bautísmo uté. Jé basa ga bautísmo quique uñai tu uje pacaque yoquedodie iji yodi, ga gajnui tu cucha dacadi uté uje e tocade ome Dupade Ujopié adode udore. Uje yicoi bautísmo iji yodi, enga e yipijójome yocanguretigai iji yoquijorane ore edominone, ga imoi tu uje yipatíorango Jesús iji isocade uté jnese, uje toi, jé aja uje pijóchõre uté, jé aja uje nijiápo rĩ iji datoringai quigade.

4Jecute uje yipatíorango Crísto iji itoringai ome bautísmo uté uje garani tu Dupade, ga jé qui u to uje yipatíorango Crísto uté iji ode. Enga uje Jesucrísto Dai Dupade chiringarápo Jesús uté iji itoringai quigade rĩ ome detotiguei úringai ingoningarãque, enga yocadi jé u uté to uje yijínango Jesucrísto uté aja ĩrijíningai uté. Enga jé u uje quene yoquisocai cuse ujetiga yingarángo yocajesui ome yoquijmapié bajé isocai. Chamáñaje Dupade pésu ujetiga Jesucrísto, yitojmárango gu ujetiga yiquecágopo rĩ ome yocúringane icha. 5Uje pijoque gu ujetiga yipatíorango Jesús ome úringai toque, enga ũrepise to uje e yátago yógaja Jesucrísto to uje e piringarangápo rĩ.

6Jé ca yicadíjoi uje yoquipotigué ayoréode uje jecucha chiroque yógaja pisijnaringuéone, e pajópi aja curesei uje yipatíorango Jesucrísto uté. Uje pisijnaringuéone isaque uyoque nanique marínga, Dupade chejñu pisijnaringuéone isapídode iji yoque, jeta jé ca pisijnaringuéone chigarupo uyoque rĩ ome dáringai josipíerãque. 7Uacamóño ujetiga gosi toi ga que toc ujetiga pisijnaringuéone doi ga qué chijocásapo uté áyipie rĩ. Enga yocadi jé cunguésõri uté to.

8Uje yirajágo uje yoco yoquibaya Crísto iji cachodi, enga e que potigayaquérique déji yoque go uje a jecucha yocucuecaringué ichai udé iji Crísto a jno dádi gatuaque jne iji deréjna pitade. 9Pijógome yoque gu uje Crísto a jé ca topoi gaté rĩ. Chamáñaje Dupade pésu ujetiga Crísto nijiápo iji datoringai quigade rĩ enga e que toc ujetiga pitoringárique doi enga chopo dajosipié ome uté rĩ. ¡Uje e que pitoringai bisitique pijógome Crísto gu!

10¡Enga qui jé upúsu uje Crísto toi ga chojmara, enga e gusu, ome dáringai pisijnaringuéone jnese ujnuéngaisṍri! Jecute a jé ca topoi rĩ.

Mu Crísto nijiápo iji dáringai toque quigade rĩ, enga e ueca enga chedu Dupade adode jnese ome Dupade úringai pisígai.

11Jecute ome Crísto jmapié uaté, ga uacadi a jé urásu to ujetiga oyo toguíji uágome pisijnaringuéone úringane pipesucho jnese. Jé basa ga oyo uecade iji uaque ome Dupade iroquéode úringane pipesucho, uje e Jesucrísto, uacatojmárañoji jnumi gu.

12-13Jé ũré uje yoquipotigué ayoréode pésu pisijnaringuéone unéningai ome uyoque. Mu jé ca ajuécho jeta pisijnaringuéone chopo daróguiji uacao ayoré toguébei rĩ, jetiga angáchoi uacapotigué ayoréode inejequéode udore uje poritaguipíso. Mu uacajnepídi tu ujetiga aquecáyo ome Dupade iji uacáringai icha uté. Jecute jé ca ẽcho uacadode uñeque gotique jetiga pisijnaringuéone tagúome udore ome cucha gajnarétique. Ajnusináño uje uacajnúone u ayoréode uje ore toi mu ore ecápo rĩ. Jecute cucha ueradi tu ujetiga achayo uacáringane ayoré aja Dupade iquei jnese, ujetiga Dupade uté tagúome uacadode jnese ome cucha arégode úringane pipesucho. 14¡Uje pisijnaringuéone a jé ca chopórase daróguiji uaque rĩ ome dáringai uacajnuéngaisṍre! Nanique uje Moisés urusarane cucha puyácho chiroque uaque, enga jecucha pisijnaringuéone sué uacabáyode. Mu uje Dupade e chejñu Moisés urusarane cucha puyácho isapídode iji uaque, gusu Dupade uté chiroque uaque ome dacaniratiguédatéi iji de, enga chátaja uaque jeta ca apéso pisijnaringuéone.

Uje e piraméo uyógome pisijnaringuéone isapídode udore, ga yocajnepídi tu ujetiga yoco piróguiji yógome cucha uréone quigode, ujetiga yedugo Dupade ome yocadode jnese

15¿Ama yuruode udojo quitique a? Ja seca uñane jos eti yuruode qui tu uje jé areque ujetiga yicoi ga yipéco pisijnaringuérique gu uje Dupade icaniratiguédatéi e chiroque yoque. ¡Mu que jé areque gotique! Uje Dupade chejñu Moisés urusarane udore isapídode iji danguresórone uyoque marínga, que chirame uyógome udore gu ujetiga yipéco pisijnaringuéone. ¡Gajnarenguepise páyipiedie udire gu! 16Uje e uacarajáyo uje pisijnaringuéone chiborátaja pitoringai.

Enga jé yacãra yuruode aja ayoré pirósonique isocai iji erámi tudé. ¿Ama jé ca arajáyo a? ujetiga achayo uágaja gosi jmainie ujetiga angoninguite guesaque uágome uruode, enga e uacasangóri jé upúsu uté. Uje uacabeyoi iroquéode, enga pijoque uje uté sué uacabai ome dáringai uacarósõre uté. Enga pisijnaringuéone adi jé u uté to, jé aja pangoninguite guesáringane ome Dupade. Ujetiga jecucha nimane uacáyipiedie ome pisijnaringuéone úringárique pipesute yui, enga cho ujetiga e uacoyo uacajnesṍri iji pisijnaringuei uté. Jé basa ga ujetiga ẽcho uágome Dupade ujetiga beyoi uté iroquéode, enga cho ujetiga e uacoyo piróguiji uaque iji uté jmainie, enga jé piotiguei tu ome uaque ujetiga beyoi cucha arégode quigode.

17Iji uacacuecaringué casica enga uacoyo uacajnesṍri iji pisijnaringuéone, uje uacabeyoi iroquéode ome uacáringane pisijnaringuéone isacho jnese. Mu yacaranguipise ome Dupade uje cuchade e chécãre re ga angoninguite guesaque uaque ome pacajnaqué uréone quigode. Enga jé u uje uaquejnáño uágaja pacajnaqué uréone udore quigode ome uacáyipiedie jnese, uje pacadique uágome udore ica. 18Jé ũrepise uje e pijnimique uáguiji uacarósõri casica jmainie, uje pisijnaringuéone u; enga jé iji de ga e uacoyo uacasasṍri iji cucha ujñapetade ore.

19(Yacãra yuruode aja ayoré pisatígo, ayoré pirósoningo udore ore isocai iji erámi tudé gu uje ome uacáringane erámi unirísõre ga cachi uajádome uaque ujetiga arajáyo cucha pibojmane quigode udojo uje tṍraji Dupade.)

Iji deréjnane udore iji uacaquigade nanique enga uacoyo uacarósorone iji pate gajnaréngone, pipotigué noñángone ore gatuaque, uje uacagaidode u Dupade garéngone cucha ponáyo ujetiga ejnáño uágaja. Enga jé chiborátaja uje uacangoninguite paritigade ome Dupade uru pirosobádode udore quérã gaté.

Mu jé iji de ga apéso uacáyipiedie ujetiga asíñome uacadode ome cucha ujñapetátigo, ujetiga eduyo oyo uacarósõri iji uté. Uje uacagaidi turásu ujetiga beyoi pate arégode gatuaque ome uacáringane Dupade gajneque.

20Ajnusináño uje pisijnaringuéone chigaru uágome uacáringane pisacho nanique, enga que uacáyipierigui dépisiji jeta beyoi cucha uréone iroquéode gotique. Gusu pisijnaringuéone u uje cho daróguiji uaque. 21Mu ¿cucha pagutíyabátique tṍraji uacáringane pisijnaringuéone isacho a? ¡Íjnoque! Pajegátigai gose uacasoca bajade udore arĩa, jecute e uacajéchome iji de. Uje e pijoque uje udore ore iborátajai tupúsu pitoringai.

22¡Mu e cuchade chécãre re ome uaque! E uacagúsoji uacáringane piraméo ome pisijnaringuéone isagode, enga uacarósõri tupúsu Dupade iji de. Enga e pijoque uje uacagutíñañome uacáringane Dupade isacho uté. Chamáñaje uacáringane Dupade gajneque uté iborátajai tu pate arégode ujetiga ajneráño údi gatuaque iji uacacuecaringuei udé, uje uaqueduyo Dupade gu. Enga que gusu uté, mu uacaquique obiréjnai tupo pucuecaringué eyúgojmai rĩ iji Dupade gari jne.

Páblo jé chigota uje pisijnaringuéone, jé aja Dupade icaniratiguédatéi, ore iborátajade cucha cãra rome ñane

23Pisijnaringuéone a cho darógode oré jne, enga oré u pitoringai ome ore. Jé basa Dupade guẽrate bisidei u pucuecaringué eyúgojmai ga gose Yocangarádejnai Jesucrísto adode ome uyoc.

Currently Selected:

Romános 6: Ayore

Highlight

Copy

Compare