Romános 11

Que Dupade garãte darasade israélgose ore jnese gotique, uje ore peque ajámi déji uje ore chicha danguretigai aja Crísto uté

Jé ũré uje Dupade e chicha darasade israélgose aja ti yui iji dirode udojo.

1Ome israélgosode ore isocai uté, ja seca uñeque chojningárasa ome uyu: "¿Ama jé ũré uje Dupade e garãte darasade israélgose udore ore a?" ¡Mu a jé ca toguírase arĩa! Pijoque uje que garãte ore jnese gu uje israélgose uyu to, uje yãrapi tupúsu Abraham uté. Enga yarané jé upo israélgosode yocuague uña uje i tu Benjamín rĩ.#11:1 Ajnusináño uje Jacob ujnacarode gare ore iji yirídai, uje Benjamín u uñai. Ga israélgosode ore cho danuchúji ore íode, jecute ore uáguedie 12 to nanique, enga Páblo, iguiosode ore uague uaté i tu Benjamín. 2-3Jecute jé yigotápo rĩ uje Dupade que doi ga tṍra darása iyajmane israélgose ore jnese gotique. Ga yojningane u Dupade ajegaidode udore ore uje uté jĩraque chiraja ore iji piquéode icaite.

¿Ama jé ca adúcho proféta Elías uté isocai uté uje purusãracho iji Dupade uruode nanique a?#11:2-3 Elías isocai uté jogadi tu I Reyes 19:10, 14 ore. Uje Elías uté jose ati gusu uté uje chedu Dupade adode iji darasade israélgose ore ujade. Enga jé u uje chijócha Dupade ajei údi ome re uje chejnáreque darasade ore isocade gu, ga chósi tome Dupade: "Pangarádejná, yurasade israélgose e ore chujé barógode proféta udore uñane jnese, enga ore chajnangarase bajnéone gaserãcho aja dejode, uje yẽco yoquẽrapáidode cucha iji udore gai ome ua ica. Enga gusúpusu uecai tu yu iji barógode proféta ujade, ¡mu e ore jnátu yúringárique chuque to!"

4¿Mu cho rique Pangarádejnai uruode ome Elías, uje chajnai uté uruode nanique a? Pangarádejnai chósi tome uté: "Que gusu ua arĩa, Elías. Qué 7.000 jnanione déji israélgosode ore ujade uje ore chedu yu ome yúringai pangurete, enga yingara ore jogadi uje yajegaite ore ome yu gu. Enga que udore uñeque chichaga dagataidie aja jnumi iji ayoré gajnui Baal uté iquei ome uté úringárique pisígai."

5Enga adi jé u uté to iji deréjnane udojo uje israélgosode ore peque ajámi cuse uje ore chicha danguretigai aja Dupade uté. Enga udore ore u uje Dupade ajegaite ore ome re ujetiga ore gajneque uté icaniratiguédatéode bisideque. 6Mu adójnacho uje que tṍraji ore ipesudode dacho gotique. Obiréjna udojo gu uje a ore ipesudode cucha urásu ujetiga Dupade ajegaite ore ome udore, enga a jé ca toguírase ujetiga Dupade icaniratiguédatéi u. ¡Que Dupade icaniratiguédatéi u arĩa, ujetiga gosi doi ga cho doré ome dapesutique cucha!

7¿Ama yocuruode udojo quique ibijoi uté cho rique a? Qui tupúsu uje israélgose jiéode udore chucué jórogui dáringárique ujñapetácho, mu ore chona dajegaidi uté yui. Gusu Dupade ajegaidode udore u uje ore chise. Jé basa ga israélgose amirone udore ore ga, Dupade chisíome páyipie uajádedie ome ore. 8Ga ore isocai uté jé chopísome Dupade uruode uñane quigode, uje chósi te:

"Dupade pésu ga jé ca urénga ore áyipieraque jno, ga ore gajnúone u móquedatéi isagode ore. Cachi ore edodie jogate dore bisideque, uje que ore chimo dajiritique gotique. Jé chopome ore angoninguinone rĩ, uje cachi ore angoninguinone jogate dore bisideque, ga que ore chudute cuchárique go. Ga ore isocai uté jé chuságaja diri tudé." #11:8 Páblo uruode udore tṍraji Dupade uruode iji Deuteronómio 29:4, jé aja Isaías 29:10.

9Enga Eduguéjnai David casicaite uru quigode jé chichaga aja udore to, uje chósi te:

"Yipésupú ga ore chimáta ñane ome dabose unérone iji ñane gari gajiné, mu ore ininaquédatéi uté nóña ga cho pujuyáraque, jé aja trámpa, ujeta chisa udore ore; jé aja cucarané pucuáyaraque ujetiga chucuase ore, uje jé ore tiógara cucha dacadi uté ome re gu.

10Ajuéga ga cuchárique níe ore ajirigode jeta jé ca ore chimópo dajiritique cucha rĩ; enga apésu ga ore guidobo ajnoquéode jno dádi aja ta, ga que toc ujetiga ore chipotingarápo re rĩ iji dínique." #11:10 David uruode udore jogadi tu Sálmos capítulo 69, versículode 22,23 ore. Ga Eduguéjnai David ajei jochaquéode qui jé u uté uje catecã́ri Dupade ome israélgosode ore uje ore chetaque Dupade uté úringai pangurete nanique.

Ome israélgosode ore otigayaquéode udore ga quene guesája yui ome purása quedéjnane ujetiga ore chise dáringane piquetacho to

11Jé idé ga israélgosode ore gajnúone u ayoré cõrachugode udore ore. Mu ja seca gosi chojningápome yu rĩ:

–¿Mu qui turásu ujetiga israélgosode ore cõrapise ga ore noñaji jnumi a?–

¡Úngare, que ore icoraningai qui tu uté gotique! E mu ome ore isijnaringuéone udore ga Dupade pésu ujetiga e guesája yui ome purása quedéjnane jetiga ore chise dáringane piquetacho. Enga Dupade gaidi tu gu jeta israélgosode ore pañaji uté icaniratiguédatéi ome purása quedéjnane udore, ga a ore charatáyime Dupade isocai uté ome ore. Jecute a ore chucuérasi dasocai iji purása quedéjnane udore quigade jeta ore chise dáringárique Jesucrísto iquetacho to.

12Adójnachopísa israélgosode ore isocai uté: Ore icoraningai uté iborátajai tu uje cucha pagutíyabáte oreránguejnane chise erámi unirisórone jnese. Enga uje Dupade chicha israélgosode ore aja ti yui, ga quene jogadi u uje ore gajnéone cucha pagutíyabáte orerã́cho yore purása quedéjnane ore gai, uje Dupade chisíome cutejmai dacaniratigué ome ore.

Jecute ujetiga cucha oreranguipísode udojo tocade uje qué israélgosode ore déji dáringane angoninguite paricho gai, jétapũrérase ujetiga ore chajnírase Dupade gai jne iji siñeque. ¡A jé ca cucha pagutíyabáte oreránguejnane udore chajire re jne ome purása quedéjnane, israélgosode ore jnese, ujetiga Dupade ajegaidode israélgose jnese changureta Jesucrísto ome re to jne!

13Enga jé idé ga yuruode quisórone upúsu purása quedéjnane uaque, jecute yósi tome uaque: Dupade upúsu uje ichajapite yu aja yúringai apóstol ome uaque, jecute yejna yiguesi ome yajnéone Dupade iroquéo udojo, uje yo cuchadatéji. 14Enga cuchiyi tu gu uje yijnari yujode judío ore ome ore úringáringo piquetacho to, jecute jecucha yucuépisi yisocáringome ore. Jé ũré uje yacate uaque, mu ja seca yacajnaquéode chijocase ore áyipiedie, ga ore charatáyime Dupade icaniratiguéode ome uaque, ga jé chiborátarásaja ujetiga uñane potárasa dáringárique piquetaque to jne. 15Uacamóño gu uje e uacagutíyañome judíode ore uje Dupade chicha ore aja ti yui. Chamáñaje quene piotiguei u ome erámi unirisórone uñane jnese ujetiga Dupade, ore ajéode cho sere ome ñane. E mu ujetiga Dupade chijnapo yurasade aja re rĩ ome ore anguretigai iji Jesucrísto uté jne, ¿ama ore adi uté chiborátarásaja cuchárique a? ¡Surunga! uje a judíode ore gajnui jé u ujetiga quene ayoré totique ecapóji datoringai quigade rĩ, ¡enga a chiborátaja ujetiga erámi jnese chagutíyame ore gaté, enga cuchadatepísi tu jne!

16Ga chósi te yacãrájane cucha ome judíode ore: Ujetiga Dupade cho dajnéngu harína pipocayaque peque bajai uté uje peranome uté, mu qui jé u to uje cho dajnéngu cucha gosi iji harína pipocayaque uté jnese.

Ga jé chopome poria rĩ: Ujetiga Dupade cho dajnéngu poria uaté erode uje chicáji jnumi, a jé ca Dupade chedurase ero aja erode eruei arĩa; mu qui tu uje Dupade a jé chopo dajnéngu jmanecade, cucha goto jnese rĩ.#11:16 Cho ujetiga Páblo acãrájane cucha ome judíode qui tu uje Dupade que chicadígui dáyipie aro ome ore gotique, uje e cho dajnéngu ore, enga jé chuságaja ore ape disi ejode ore. Ome poria ero, enga cho jetiga Páblo ojningane jé u Abraham, Isaac, Jacob ore, enga pore jmanecade u udore ape disi ejode. (A poria uaté gajnui tu Israel.) Cho jetiga harína pipocayaque peque bajai uté uje peranome Dupade gajnui tu israélgosode ore dáqui ujnomerane Abraham, Isaac, Jacobo ore to; jé basa ga cucha gosi iji harína pipocayaque uté jnese cho jetiga gajnui tupo ore ape disi ejode jnese rĩ.

Páblo chacãra judíode, purása quedéjnane ore aja poridie uje ore i tu olívo jnese

17Jé ũré uje judíode ore gajnua tu pore pacáraque uje poria uaté ueradé, ga i tu olívo. Ga paquesuque uaté jmanecade uñane ome Dupade, ga parãcho. E mu ome purása quedéjnane uaque ga uacajnua tu poria uje i tu olívo to, mu poria uaté suéji monte bisideque. Mu Dupade doi poria gajnarengue uaté jmanecade uñane uje suéji monte bisideque ga chichagája daquesugode pore ueradé uaté jmanecade jogadode. Ga jé u uje quene udore ore cho deróji pore ueradé uaté ga ore chagutíyame ijóningai to ome dáringane ueca.

18¡Mu jé ca purása quedéjna uacuñeque dorási ga poja jmanecaque bajade ore ome dáringane parãcho iji pore ueradé uaté! Jeta apotárasa báringárique dicotare, mu ajnusina uje que toc ujetiga jmanecaque pichagájai doi ga pésu ero jeta quérã mu ero u uje pésu jmanecaque pichagájai uté jeta ijõre, enga gose uje catája cucha goto uaté ero gu.

19Mu ja seca etaque yuruode ga ojningárasa ome yu jne: "Adójnanga uje Dupade chaquesu pore ueradé jmanecaque bajade enga tṍra ore, uje gaidi tu gu jeta pichagárasa yu aja ore jogadi."

20Mu a yichajnárasi baruode ga yojningárasome ua: "Jé ũré ua uje paquesuque pore ueradé jmanecaque bajade, mu paquesuque ore gu uje íjnoque panguretigai iji ore. Jé basa ga bacatája cucha goto iji poria uaté ero ome banguretigai uté. Jecute jé ca asi babai, mu ajuse beo, ga atodo jeta ajnime ore jmané. 21Ujetiga Dupade que chãraque pore ueradé jmanecade ore, uje jmanecapíso ore múñi, ¿ama ajos eti charanguirase ua yá, ujetiga basocade jé cunguésõri ore isocade?"

22Jecute adójnangapísa Dupade adode udojo, uje icaniratiguei choquípisiji guesi, jé aja imenuringuei uté: Ome judíode uje e ore cṍra ome dotigayaquéode ome Dupade uté, ga bamo uje Dupade chijna damenuringuei aja ore; jé basa ga e bapáñaji uté icaniratiguei uté ome ua. Mu ujetiga jé ca ajo ua aja uté icaniratiguei uté ome ua ga, a oidi tupo damenuringuei aja ua jne rĩ, ome báringárique garanája guesi iji pore ueradé uaté. 23Enga Dupade uté isocai ome judíode udore a chécãre re to jne, ujetiga jé ca ore jnopo dotigayaquéode ome uté údi rĩ. Uje paquesuque ore iji pore ueradé olívo uaté nanique marínga, ujetiga ore changuretápo uté rĩ, enga jé u jne ujetiga Dupade chichagápo ore aja dajogadi cásodicáite rĩ. ¡Que cucha ibiratique cuse ome Dupade arĩa, jecute ujopié cuse jeta chichagápo ore aja pore ueradé uaté rĩ!

24Ajnusina uje barané pore unejangue nanique. Jé ũré uje i tu olívo to, mu monte jogoto, ga sué bisideque. Mu Dupade doi ga chaquesu ua iji pore unejangue uaté, ga chichaga ua aja jmanecai jogadi iji pore ueradé olívo uaté. Enga cho jeta jé ca pisocárique dérasi ujetiga acatája poria uaté, mu que toc ujetiga Dupade chirajaque dasocai ome cuchade udojo. Jecute uje Dupade juéga jeta pichagája ua aja pore ueradé uaté, uje unejanguipise ua ome nanique múñi, jétapũrérase ujetiga doi pore ueradé uaté jmanecaque bajade ga chichagápo ore aja dajogadi cásodicáite jne rĩ.

Dupade áyipie aro a tocade jne ome israélgosode, uje a quene ore chécãre dáyipie quigode, ga a ore chajni uté gai jnese jne

25Yujode Jesús anguresõre uje uacagúsoi purása quedéjnane ujade á, Dupade áyipie iyajmenie cuse ome israélgosode uje gajnui u cucha pipoguiétique, mu cho jetiga quene chuchẽre dabai ome uaque. Ja seca abóyoja israélgosode ome uacáringane ijoyatácho, jecute yipota ujetiga arajáyopise Dupade áyipiedie udire quigode. Ujetiga Dupade ajegaidode jnese iji purása quedéjnane uacajade eso uacáringane piquetacho ome uté, enga jogadi jé u uté uje quene israélgosode ore áyipie uajádedie eruei tu. 26Enga adi jé u uté ujetiga israélgosode jnese quene chise dáringane piquetacho to. Enga pijoguipise udojo ome proféta uñai urusarane iji Dupade uruode, uje chósi te:

"Dupade Júdebei Piquetangore uté a tṍraji Sión jne.#11:26 Pichajapite israélgosode ore idai Jerusalén aja Cucarani Sión uté ójo uje ore pésu ore idai uté nanique. Quĩrique ore cho jogadi chojmara ome ore. Ga uté a chĩro Jacob ujnié disi ejode ore úringane máracho jnese jne";

27"Enga a yarecujate pirosobádedie quigode jé upúsu udojo ome ore jne ujetiga yinoningase ore isijnaringuéone." #11:27 Dupade uruode udojo jogadi tu Isaías 59:20-21; jé aja Isaías 27:9; jé aja Jeremías 31:33-34 ore.

28Ome pujnomé ueradi uté uje garani tu Dupade ga, israélgosode ore chetaque uté, jecute ore cho damajo Dupade jé idé. Mu uacagutíyañome ore isocai uté, uje jé qué piotiguei tu ome purása quedéjnane uaque jeta angáchoi pujnomé ueradi uté quigode. Mu ome israélgosode ore úringane Dupade urása uté ga, que cuchárique chécãre re ome uté. Chamáñaje Dupade jé ajegaite aro israélgosode ore iji taningárique nanique, ga cho darasapísiji ore dai cásodicáite nanique enga chichaga cucha ueradode aja ore yui. Jecute que cha chijnóra ore uje ijnoraquei uté jé chuságaja ore ujnié disi ejode ore jnese. 29U gu uje a Dupade e chichagárasa cuchade aja gosi yui, ga que isocai tu ujetiga qué chijnapo deranone udore iji gosi gari rĩ. Jé upo rĩ uje que chécãrapo dáyipie quitique ome gosi úringárique pibijnangaite rĩ. Ujetiga e chĩ́care ome gosi, enga jé jogate.

30Uacamóño iji uacaquiga cásodicáite, ga angoninguite parique purása quedéjnane uágome Dupade. Mu e Dupade tajia uaquei, uje israélgosode angoninguite paritigade chiborátaja uacáringane Dupade osongaquei gajnesóño. 31Enga quiguípisome israélgosode ore isocade iji diri tudé uje qué ore jno dangoninguite paritigade údi ome Dupade uté; e mu Dupade gaidi tu ujetiga ore pañaji uté osongaquei ome uaque, ga iborátajai tu jne ujetiga quene ore cho dajnéngu uté osongaquéode ome re to.

32Jecute adójnachopísa ome pisocade udojo uje Dupade e chĩ́care erámi unirisórone yocúringane angoninguite paricho jnese. Jetiga judíode u, jeoga purása quedéjnane u, mu jé chapuse yógaja jnese. Enga yocajnúone u pujurúgayode ome Dupade uté jnese, uje uté noñome uyóguiji yocangoninguite paritigade jmainie. E mu Dupade gaidi tupúsu ujetiga cho dosongaquéode gajnesóño iji uyoque jnese.

¡Picotaque opejã Dupade uté!

33¡Urénga, cucha pitijabátedaté Dupade isocade jnese, jõ! ¡Idájapísiji guesi uté gajnéone cucha oreránguejna! ¡Ga jé chopome uté úringai áyuquetotinguerã́que rĩ, uje cuchadatépise! ¡Irajatáguejna Dupade ga irajatigai que eruénique erãpe cuse gotique to! ¡A jé ca toguírase ujetiga gosi áyipieraque chimécãre Dupade uté áyipie quigode, jõ! ¡Ga jé chopome uté jmapiedie atígo ome yoque rĩ, uje yoquirajatigade chiságui uté jmapiedie udire isocade!

Jé udore cho Dupade uruode, uje chojninga:

34"¿Ama gosi te a, uje e chiraja Pangarádejnai uté áyipiedie udire?

¿Jeoga gosi e chise dáringai Pangarádejnai uté oquisõre ome cuchade?" #11:34 Proféta Isaías urusãracho udojo, ga jogadi tu Isaías 40:13 iji Dupade Uruode.

35"¿Jeoga gosi chisíome dẽratique cucha ome Pangarádejnai uté bajaque, ga quigade enga Pangarádejnai dorási ga cho uté gosi icaniratiguei oré a?"#11:35 Purusarane udojo tṍraji Dupade uruode iji Job 41:11. ¡Que uñeque déji, arĩa, uje que Dupade ijnose carutique déji uñeque gari!

36Ũrepise uje cucha ponáyone jnese garani tu Dupade, uje uté ajéo gu jeta pésu cuchade jnese ome re, enga ipesute cuchade udore jnese ome dáringai ujopíerãque cuchape.

¡Jé tiógarapísa ujetiga jecucha ga yisígo Dupade uté gai ome úringai ingoningarãque iji deréjna pitade gatuaque! Qui jé upúsu, Amén.

Currently Selected:

Romános 11: Ayore

Highlight

Copy

Compare