Sálmos 60
60
Piradé udaque gajnesṍri u piradedie irajasṍripísi. David ipesudé u jetiga pacadique ore ome. Pésu uje David uté cho dajocaningame amóngosode jé aja síriagosode uñane. David iroi Joab chajni enga chujé edómgosode udore uje ore batigai chise 12.000 iji tuijnai uté uje i tu Echoi.
1Urénga, Dupade á, e bajíome yóguiji te jmete. Jé aja uje basite yógaja quedéjnane. Ájningaránguipíse ua ome yoque to. ¡Ga be ga ajniápo yoquibai rĩ!
2Uje bapésu jnumi uté itãrarachúringai, ga bajuque jnumi uté gai. Be ga apésu dajugupétigade udore jeta ore chisapo ñane rĩ, uje jnumi tãrara gu.
3Bapésu ga barasade ore chejnáreque dajnéone petingaqué uajádejna udore. Ga basíome víno potique ome yoque ga chachia yoquedodie iji gaté.
4Mu e bãrai boidi borapeque uté bandéra iji gaté ome udore ore uje ore dosóñime ua. Uje bangare gai, ga báringai Ũré pijogúsõri tu ome ore ga ore chapídome damajosórone ore ojodie udire.
5Aqueta yógome bãrachu piquetato, ga achajnai yu. Uje bagaidi turásu gu ujetiga barása bedójnarione udore ore chise dáringáringo piraméo.
6Dupade déji dayarite pirosobádejnai uté uje chojninga:
–A yajuguína pijogadi Siquem uté ome uaque jne, ga a jé u jeta yinína yu. Jé aja jeta yajuguína tuijnai ome uaque to jne uje i tu Sucot.
7Yajneque Galaad uté, jé aja Manasés uté; jé basa ga Efraín uté isoldate dipeséode u uje gãreque puniri yui. Ga Judá gajnua tu yoguéraque uje déji yijmanai ome yúringárique pangarate, uje Peduguéjna Cuchábi a tṍraji Judá uté jne gu.
8Yacãra puniri Moab uté aja yesãrapié, uje imoi tu uje cucha bisideque gu. Jé basa ga yṍra yuchiédode aja puniri Edom uté gai, ga imoi tu ujeta yujnué ore gai jne. Jé basa ga a yibite filistéogosode ore gai ome yúringai Pujnuéngaisṍre jne.–
9Uje Peduguéjnai David uté chojninga:
–¿Gosi urásu jeta chijnoque yuja ore inama uaté uéchaminóri pidai? ¿Ga gosi chorase Edom gabi dajeque quigome yu?–
10¿Ama Dupade, jé ca ua u a uje chucuase yógaja ti yui? Ga Dupade á, que ajínapo yógaja yoquijocaningárique rĩ.
11Be ga átaja yógome yocumajosórone ore, uje que cuchárique tṍraji jnanione yocátajaquéode ome ñane gu.
12Mu pujnuéngaisṍre yoque jne, ga gose Dupade uté. ¡A uté chuchiéjna yocumajosórone ore aja jnumi ga chĩro ore aja ti!
Currently Selected:
Sálmos 60: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360