2 Samuel 11
11
Eduguéjna cuchábi David chijna Urías acoté iji gari nanique uje uaté i tu Betsabé
1Jecucha eduguéjna cuchábode ore isoca nanique iji esoi eruei ga ore doi pocaningane iji uté. E mu iji esoi erué uñai ga David que nóna dasoldádode to, mu chiroque dasoldádode ore eduguéjnai Joab aja pocaningai yui ga nóna darógode soldácho, jé ga soldádode udore jnese iji Israel údode. Enga jé u uje israélgosode ore doi pocaningai ome amóngosode ore ga ore chejna ore isoldádode ga ore chacája ore idáidatéi Rabá uté nanique. Mu David chácare iji Jerusalén.
2,3,4Enga chirõre guedéjnoringá uñai uje David nijíji da-siésta ga doi jnumi iji damochápi gai ga chisõre iji daguíjna cuchábi ójo, uje jecucha ore iguíjnane ójodie tiroque ga ore isocabeque jeta ore chácariji daguíjnane udore ójodie nanique. Mu uje qué David chajire erámi iji daguíjnai ójo mu chimo chequé omé uje qué chẽ́sariji yodi. Ga chequé uaté churu dabai gu uje gaidi tu jeta úringa puyé íjnoque iji uje chẽ́sariji yodi iji dayode quigade. Enga David chiroque daroi taja uaté yui jeta catecã́ri uaté ome amanique írique. Uje David iroi diapo rĩ ga chojninga: "Chequé uaté i tu Betsabé, ga uaté dayé u jnani bajai Eliam, enga yocurásai hitítagose Urías acoté uaté." Ga David chojningame daroi: "Be ga abágui uaté ga ajínaño aja de." Uje ore di uaté údi ga David moji gari. Enga jé u uje uaté chajniapója daguíjnai te rĩ.
5Enga chequé uaté e abi déji ajei enga chiroque daroi aja David yui jeta chingo David uje David ica uaté ica. 6Ga David chiroque darógode aja soldádode ore eduguéjnai Joab yui ga ore chojningame uté: "Yoqueduguéjnai David pota jeta aroque hitítagosi aja David yui uje uté i tu Urías enga David catecã́ri uté jne." Ga jé u nanique uje jĩraque Joab chutṍri Urías ujetiga tibágui deduguéjnai David iguíjnai. 7Enga Urías di iji David ga David chojningame:
–¿Jé cho rique uacatígo iji pocaningai a? ¿Jé areque uacasuté Joab to a? ¿Yisoldádode jé uerate ore to rĩ a?–
8Ga Urías chajnai deduguéjnai uruode, ga David chojningame uté:
–Urías, bo yico ga acáji baguíjnai ga ẽ́sariji yodi ga o bajñare to jne.– Uje Urías doi guesi iji David iguíjnai, ga David chiroque dabose unérone aja uté yui ujetiga tagu David gueranone udore. 9Ga ore jno David gueranone údi ome Urías mu que ore chise iji iguíjnai gotique. Mu ore chise uté iji David iguíjnai piagoi uje nóna David iguíjnai piagoi irodisórone iji uté to. 10Uje David irógode ore chingome David uje que Urías chise daguíjnai ga David tibidi uté enga chojningame:
–¿Gotique gu a uje que acáji baguíjnai jeta ope bajñare iji uté uje idája baranone diríca?–
11Ga Urías chajnai David uruode ga chojninga:
–Yoqueduguéjná, ise mu jé ca ajnusina to uje yugúcoji pocaningai gai iji deréjnane udojo. Dupade Uruode pi cajo chácariji cárpa pébi údi. Jé adi tome yasuté Joab, yijorane soldácho ore to. Ga ore moji cárpa pébode údode to iji dajocaningai. Ga que togome yu jeta yibágui yacoté ga yimóji gari uje soldate yu gu. Ga yajnei tu jeta yi pocaningai. Ga que yajnei tu gotique iji yiguíjnai jeta yagu yibosode iji, ga yóji yijódode iji uté rĩ, jeoga yimóji yacoté gari. Yeduguéjná, baroque yu aja yiguíjnai, mu yuruode u udojo ome ua: a jé ca yicáji jne uje yijorane qué ore déji pocaningai gai gu. Jecute yajnei u jeta yi to pocaningai.–
12Mu David chojningame Urías:
–Acarape to iji deréjnai tudé ga a bo dirome.–
Enga Urías qué chácare to iji Jerusalén jé aja dire uñai. 13Ga David tibidi uté jeta taguíji David iguíjnai to. Ga David jnari yote pioi ome uté jeta chóji ga pésu uté ũrusoringuéone. David ajéode u jórogu jetiga chajníja daguíjnai. Mu jé ate uje Urías uté doi guesi ga moji soldádode ore gari to iji David iguíjnai piagode irodisórone ore ejoi ga que chicáji daguíjnai gotique.
14Iji durasé ga David churúsãre darusarane ome Joab ga chisi ome Urías uté ujetiga chijnóngome dasuté. 15Enga Urías chisi ome David urusarane ome dasuté, ga Joab chajire ga David urusarane quigode u udojo iji darusarane, ga chojninga: "Joáb, acha Urías uté aja uaquesórone ore yúpisi to, ga gusu uté iji dayaritique jne ga a ore chujé uté iji dajocaningai uté to jne."
16Enga Joab e ore chaparu ore idáidatéi Rabá uté gai ga chiroque Urías uté aja pocaningai imosõripísode ore yui jeta cháta raja ore to. 17Uje rabágosode e ore dorási Joab ore, mu ore chimo israélgosode ore isoldádode uñane iji dedai ujuyaquéode piagoi ejoi ga ore chujé Urías, jorane eduguéjna ore iji uté.
18Ga jé u nanique uje Joab chiroque darógode uñeque aja David yui jeta chatata ore adode iji ore jocaningai uté. 19Ga Joab chojningame daroi uté: "Ese David enga atata yoquijocaningai isocade jnese jne ome uté. 20Jé socaseti ájningarãque yoqueduguéjnai David enga chojningame ua jne: '¿Gotique uje idógosipise uáguiji ore idai ujuyaquéode? ¿Ga jé ca arajáyo to uje ore chichagu cuchade iji dajuyaquéode udore uéchade? 21¿Jé ca ajnusináño uje chequé bajéraque chamurase cucaranéraque jnani bajai Abimelec gai nanique ga cachodi jé u uté? Uje jnani bajai Jerobaal ujnacare uté nanique. ¿Gotique gu uje idógosi uáguiji uacajocaninga gajnéone udore ore idai ujuyaquéode udore ga ore chujé yiroque dicase casodé uñane ore?' Enga ujetiga David chósi tome ua jne ga ojningame to jne: 'Basoldádode eduguéjnane udore uñane patĩ́ora hitítagosi Urías to, Yoqueduguéjná.'"
22Joab utocaidi jno ga chicai David jeta chatata Joab ojningane cucha jnese ome David iji uté. Ga David ájningaránguipíse ga uruode jé upúsu Joab urúiso quigode. Ga David chojningame Joab iroi tuté:
–¿Gotique gu uje idógosi uáguiji ore idai ujuyaquéode udore? ¿Ama jé ca arajáyo to a uje ore chichagu cuchade iji dajuyaquéode uéchade? ¿Jé ca ajnusináño ore isocade to iji ore idai Tebes nanique a? Uje chequé bajé chujé Jerobaal ujnacari nanique uje chamurase cucarané uté gai ga cachodi jé u uté. Uje uté i tu Abimelec nanique. ¡Chimo jóroque re uje idógosipise uáguiji ore idai ujuyaquéode udore que! Ga yiroque dicase casodé ore toji dajocaningai uté.–
23Ga soldate gojñangarãi tuté chojningame David:
–Iji taningai diríca ga rabágosode ore isoldádode ore chachẽre yóguiji quedéjnai. Mu uje yujnuéngo ore gai diríca ga jé yijoco ore iji ore idai ujuyaquéode yui. 24Mu uje yirõco ore idai ujuyaquéode, ga docojique oisórone ore chicho yoque iji uté, ga jé u uje ore chujé baroque dicase casodica uñane ore diríca. Enga ore patĩ́ora hitítagosi Urías to diríca.–
25Ga David chojningame soldate gojñangarãi tuté:
–Angome Joab jeta jé ca cho dáyugu ome cuchade udore. Uje pocaningane jé isoca gu jeta chuque uñane iji. Mu angome Joab jetiga jé ore chejna raja pocaningai jeta ore chejna uté idaisórone ore jnese. Ga bo ga atatame basuté udojo, ga apésu jeta uté jnusi rome pocaningai to.–
26Uje Urías acoté chudute dabai ujnomei to uje ore chujé iji pocaningai ga popísiji dabai quigade. 27Udojo quigade ga David chiroque darógode aja uaté yui jeta ore chimánaja David iguíjnai. Ga chácariji to, ga David cho dacoté iji uaté. Ga abi déji ajei. Ga uaté abi chise diri uje base ga diyoqui. Mu que Pangarádejnai Dupade irasique David isocai uté gotique uje chijna jnani quedéjnarique acoté aja re gu, ga doi ga tẽra abai ome pocaningai.
Currently Selected:
2 Samuel 11: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
