Sir 18
18
Ailiil ŋina ka Akuj
1Akuj ŋina eyari ŋikaru ka ŋikaru iŋes abu tosub ibore daadaŋ;
2Ekapolon bon iyookino. #18:3 Iyatakinito ŋakigireta ŋace eŋaet 2b-3: Emam ice mati iŋes bon.
4Nyeinakina Akuj esubuna edio akisera ŋuna a ŋisubuna keŋ
ka ŋae epedori aripiripuun toyenu ŋiticisyo keŋ ŋulu ka aumokin?
5Ŋae epedori ayenun neni etya apedor keŋ ŋina ailiilon?
Ŋae epedori alimun ŋakiro daadaŋ ŋuna ka akisyon keŋ?
6Nyepedoryo iwon alemar ŋadi anakiro a ŋun, kori akiyatakin ŋadi,
kori nyepedoryo iwon ayenun ŋaumokiniata ŋuna etiya Ekapolon.
7Ani apaki ŋina irikakiniata ŋituŋa atamatam ŋakiro ŋun,
erae ageun isyakinete ikes atamatam,
ido ani ejoŋoete ikes atamatam, erubakinete ikes etamete neni ikokinete.
8Ataŋae mono ŋituŋa ka ŋikainyo mono ikes?
Nyo ejok aneni kec ka nyo ejok anaronis a ŋina itiyaete ikes?
9Elalak ŋirwa ŋulu ka akiyar kec erae kedol ŋikaru kec amiat.
10Ikwaan ŋikaru ŋul ekudyoko ka ŋakipi ŋadi ananam,
kori imorut ipei ŋini ka asinyon erae kisikwaanikin ka ŋirwa ŋulu a ŋikaru ka ŋikaru.
11Ŋakiro ŋun, ikes eriŋaakar Ekapolon idarunit ŋituŋa potu neni keŋ,
ka ebukununui akisyon kec neni kec.
12Ite iŋes ŋituŋa ka eyeni atemar asalunet kec erae ŋina a ŋican,
aŋun, einakini ikes akisyon a ŋinapaki daadaŋ.
13Erae akisyon a ŋituŋa ŋina a ŋikidunyet kec,
nai erae akisyon ŋina ke Ekapolon ŋina a ŋinibore eyari a daadaŋ.
Ikiŋenyanakini ka ikisirworiununui ka ikitatami Ekapolon iwon,
ido ikinyaka iwon neni keŋ lopite ŋolo ebuunia ŋamesekin keŋ.
14Eyakar iŋes akisyon neni a ŋulu ecamunete akisirworiuno keŋ,
ka ŋulu iitanito akiwuap ŋikisila keŋ.
Etau ŋolo iyookino anainanakin ibore neni a ŋikulyak
15Ikaakoku, nyimorik ebura ka ŋiticisyo kon ŋulu ajokak,
kori nyimunaiya ainakinet kon a ŋakiro a ŋuna a ŋiyany.
16Nyeyaunete mono ŋakopi ŋakipi neni a ibore a ŋini enomiyarit amwanis a?
Aŋun, nyejok akirot akilo ainakinet.
17Kire, nyepedori mono akirot akilopiyar ainakinet ŋina ajokan a?
Epedor ŋun ŋaarei aryamun aneni a ituŋanan a ŋini ajokan.
18Erae ibaŋaanot ŋini nyejok ka iyanyana,
ido ainakinet a ekainakinan a ŋolo nyecamit ainakin ibore erae ŋina itumuimui ŋakonyen.
Akiitanit ŋina ka atamatam ka akiyokuno bon
19Ani eriŋa iyoŋ nyirworikina, toyenu mono ŋakiro
ka ani eriŋa iyoŋ nyedyakakina, kiyokite akonikuwan erae ŋina eŋale.
20Ani eriŋa atubokino nyedoluno, toripiripi bon ekoniyakae,
ido ani edoli apaki ŋina ikiŋisere ŋakiro, iryamuni iyoŋ akisyonio.
21Ani eriŋa iyoŋ nyedyakakina, kitiditeun bon,
ido ani kidau iyoŋ akisec, toki.
22Nyemaikina ibore idio ikitukuruwo iyoŋ akisiyookin ŋuna idau iyoŋ akikoŋ,
ido nyidar akitodol apaki ŋina ikisiyeŋunia iyoŋ atwanare anakiro a ŋuna irubakinit iyoŋ itiyae.
23Ani eriŋa iyoŋ nyiikina, kitemokin bon;
nyikwaanikinosi ka ituŋanan ŋini ecamit akitem Ekapolon.
24Totam ŋakiro ŋuna ka anyunyura a Ekapolon akoloŋit ŋina ka atwanare kon
ka ŋuna ka apaki a ŋina ka akinyaŋ ŋakiro apaki ŋina ejoŋoo Ekapolon akitere iyoŋ.
25Anapaki a ŋina elalaa akimuj, totamunite apaki ŋina ka akoro;
alorwa a ŋulu ke ebari, totamunite akulyako ka akiitanit.
26Iloconokin ŋakiro ameun naparan akitodol eboŋ;
epedori Ekapolon akitasalun ŋinibore atipei alokiŋaren keŋ.
27Eosokinit ituŋanan ŋini aoson ibore daadaŋ ŋini itiyae iŋes;
ani eyakaun asecit nakibois daadaŋ, emaikina ituŋanan tocoik akitiya ŋuna aronok.
28Ituŋanan ŋini apiiryanan daadaŋ eyeni ŋuna ka aosou,
ido ipuri ituŋanan ŋin ituŋanan ŋini eryamuni aosou.
29Ŋituŋa ŋulu epiiryaka anakirworo ŋakiro, eruwor ŋulu eosok,
ido irworosi ŋakitadapeta ŋuna iyookino.
Akiyokiuno bon
30Nyiwuapit ekibure ŋolo ka akuwan kon,
nai kiretak ekibure ŋolo a ibore a ŋini icamit iyoŋ.
31Ani kicamak iyoŋ akiyar kon eyakaun nalakara ŋina a ekibure a akuwan kon,
ikituruwori iyoŋ ŋini ikikyenatar ŋimoe kon.
32Nyiruwor ŋini ileilei ŋinibore apaki ŋina iryamunitor ibore ŋini alalan,
acepaki ikitukulyakani iyoŋ etyae ŋolo a ibore a ŋin.
33Nyiruwor ekelipanaran anakitemonokin ŋasuban ŋuna erae ŋisiliŋa ŋulu ideniunuyo egyelere akimuj,
tomam ŋisiliŋa eyakasi locwee kon.
Currently Selected:
Sir 18: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.