Sir 16
16
Akisicanet a Akuj ŋikasecak.
1Nyiitanit aryamun ŋidwe ŋulu alalak ŋulu emam ajokis eyai
ka nyilelyani aŋuna a ŋiletok a ŋulu nyiwuapito ŋuna ka Akuj.
2Ani kepitut ikes, nyilelyan aŋuna kec,
mati eyakatar ikes akitopoloorit Ekapolon.
3Nyikinyomit eyare kec, kori nyikinyomit alalau kec;
anerae epedori ipei ajokyar akilo aliput,
ido atwanare emam ikoku, ejok akilo ayakau ka ŋidwe ŋulu nyiwuapito ŋuna ka Akuj;
4anerae alotooma ipeituŋanan ŋini epiiryana, ilelebun ŋituŋa lotaun,
nai alotooma ateker ŋina nyiwuapit ŋikisila, eruwor etaun ereŋorot.
5Adau ayoŋ akiŋolikin ŋakiro ŋuna alalak ŋuna ikote ŋun
ka adau ayoŋ akiirar ŋakiro ŋuna ikinomorete akilo ŋun.
6Eyakaun anyunyura ŋina ke Ekapolon natukot a ŋikasecak,
ido eriraununui anyunyura ŋina ke Ekapolon anakwap a ŋina nyiwuapitere ŋuna ke Ekapolon.
7Abu Ekapolon nyisyoni ŋituŋa ŋulu koloŋ, ŋulu aoyak toburok,
ŋulu apotu aŋuna ka agogoŋ kec toŋero iŋes.
8Abu Ekapolon nyimyek ŋikidunyet a Lot,
ŋulu abu iŋes toŋer aŋuna ka akituro kec.
9Abu iŋes nyitoodiu akisyon keŋ neni a akwap a ŋina alosikinit iŋes amunyar,
neni a ŋulu abu iŋes toŋer aŋuna a ŋasecisya kec;
10kori neni a ŋasigarya a ŋuna alosete a ŋakejen a ŋuna arae ŋalipyo ŋamiae ŋakanikapei, a ŋuna apotu tocunakin aŋuna ka akisyanu kec.
11Tari daŋ kerae toyai nen ipeituŋanan ŋini itogogoŋit akou keŋ,
keruworo ŋakiro ŋuna ka aumokin kerae kebucar iŋes nyisicana.
Erae neni a Ekapolon eponitotor akisyon ka anyunyura, eyakar iŋes apedor ŋinakisyoniyet,
nai epedori daŋ abukun anyunyura.
12Lopite ŋolo epoloo nooi akisyon ŋina a Ekapolon epol daŋ akekisicanet, etubonokini iŋes ituŋanan lopite ŋolo itiyator ituŋanan.
13Nyebucaror ekasecan ibore ŋini ekokounit,
ido nyimikio ŋulu idarito ainakino ibore anakiwuapit kec ŋuna ka Akuj.
14Einakinit iŋes ŋituŋa apaki ŋinakitiyaet ŋuna eryamuniata akisyonio;
eryamununui ŋinituŋanan ibore lopite ŋolo itiyator iŋes. #16:15 iyatakinito ŋakigireta ŋace eŋaet 15: Abu Ekapolon kitogogoŋ akou a erwosit a Ijipit, ido abu nyecamu ŋuna a Ekapolon ikotere ŋituŋa eyenunete ŋiticisyo ŋulu a Ekapolon.
16Itoodiununui Ekapolon akisyon keŋ neni a ŋisubuna keŋ a daadaŋ,
atyaka iŋes akica anakirwonut isitiyat akipimet.
17Nyitema, “Aŋopikinit ayoŋ Ekapolon,”
ka ŋae alokidiama nooi akatamunit ayoŋ?
Nyakayenete ayoŋ ŋituŋa ŋulu alalak,
anerae ŋae ayoŋ alotooma ŋisubuna ŋulu alalak nooi?
18Utukui, emaranikinete nakuj ka kidiama nooi,
emaranikinete auwuat ka akwap apaki ŋina ebunio Ekapolon.
19Emaranikinete ka iryaŋiryaŋakin ŋimoru ka ŋakisyakinet a akwap apaki ŋina iŋolikinia Ekapolon ikes.
20Nai mam ŋatameta a ituŋanan ŋuna eyenunete ŋakiro ŋun
ka ŋae epedori ayenun ŋuna ecamit iŋes kiwuapae?
21Nyitatakanunitae ŋiticisyo a Ekapolon ŋulu alalak
lopite ŋolo nyetakania aneni a ituŋanan a idio ekuwuam ŋolo ekusi nooi.
22Ŋae erae kiserau ŋiticisyo a Ekapolon ŋulu ka akiyookino,
kori ŋae epedori akidarun?
Anerae ŋuna atubu iŋes elwaka akilo.
23Erae ŋun ŋatameta a ŋini edit ayenun, ituŋanan ŋini nyetamatamae ka ŋini emodyanakinio, etami iŋes ebaŋaana.
Etakani aosou a Akuj alosubuna
(Akisy. 1:1-2, 4a)
24Topupokinae ayoŋ, ikaakoku, ido toryamu aosou,
ido topupok ejok ŋakiro kaŋ.
25Eketatami ayoŋ iyoŋ ŋuna iyookino ŋuna emaikina kiwuap,
ido akalimokini ayoŋ iyoŋ ŋuna iyookino ŋuna ka aosou.
26Ani esubuni Ekapolon ŋisubuna keŋ anakisyakinet,
abu kiwuak ŋolosubuna nakibois ŋina emaikina eyai.
27Abu iŋes kiwuanak ŋisubuna keŋ lopite ŋolo emaikina eyakatar ŋikaru ka ŋikaru ka amaikina eyakae kec ikoni nen ananyameta a daadaŋ.
Nyemaikina ikes tonyam akoro, kori toryamut eupanu,
ido nyemaikina ikes kimyekis ŋuna emaikina kitiyata.
28Nyemaikina ikes tocunakin neni a ŋinice,
ido apotu ŋisubuna nyeŋero ŋakiro a Ekapolon.
29Abu nai Ekapolon kiŋolik akwap,
ido kilelebik nakwap ŋiboro ŋulu ajokak.
30Abu kilelebik nakwap ŋisubuna ŋulu a ŋolokabila,
ido kwap pei emaikina ikes toboŋosi.
Currently Selected:
Sir 16: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.