Sir 13
13
Ŋunacoikina aŋuna a ŋulu irukitotor
1Ani kitap iyoŋ ibore ŋini imidiyere ŋamoru lorukude, idoŋokini ibore ŋin neni kon,
ido ituŋanan ŋini erukito ka ŋini iturono, ikwaan iŋes ka iketuron.
2Nyikeununui ibore ŋini epot aneni kon,
kori nyirukito ka ŋini epol ka tobarite akilo iyoŋ.
Ikokini mono amot ŋina itiyaunitae a ecoto ikwaanikin ka ebinika ŋolo itiyaunitae a asuwat ai?
Epedori amot abwaŋa erae kenaŋakin lobinika.
3Epedori ekabaran adyekar ka epedori daŋ akiyat ŋiyany nadyakeret keŋ;
Eryamunit ikulyakanot ŋican aŋuna ka adyakaret keŋ ka emaikina torubak iyasi
atemar kisyoni iŋes.
4Epedori ekabaran akisitiya iyoŋ jik erae kirae iyoŋ ŋini ijok aneni keŋ.
Nai ani kiyakar iyoŋ akiitanit, ikiesikini iŋes iyoŋ.
5Ani kiyakar iyoŋ idiobore ŋini erae ŋini kon, irukete iyoŋ iboiyete ka iŋes,
isunyari iŋes ibore ŋini iyakar iyoŋ daadaŋ, ikisidoŋ iyoŋ emam ibore.
6Ani ikiitanit iŋes iyoŋ, ikimodikini,
ido emaisyanikini iŋes aloŋaren kon ka ikisimukek iyoŋ.
Ikisirworikini iŋes iyoŋ erimaana, ido ikiŋit tema, “Nyo iitanit iyoŋ?”
7Ikitakadakini iŋes iyoŋ a ŋamuja keŋ a ŋuna abobok, akitodol ŋina isunyarya iŋes
aneni kon ŋarwa ŋaarei kori ŋauni ibore ŋini sek iyakar iyoŋ, ido ekaku itokyenar iyoŋ.
Ani kikiyanyuwa iŋes iyoŋ ekaku, itori iŋes nawae,
ido kimuŋumuŋak akou keŋ.
8Tocoikinite nyikitooliyor ka nyikijamuwar apaki ŋina iyakar iyoŋ nalelyanu kon.
9Ani kikinyar iyoŋ ituŋanan ŋini eyenen alotuŋa nooi, emaikina iyoŋ toruwor ŋini nyiwonyakini nen atipei,
ido erubakini iŋes ikinyarit iyoŋ.
10Nyemaikina iyoŋ kiboiyo kiŋaren ikinyarao, acepaki ikisolooryo iyoŋ,
Nyiwoiya nawae, acepaki imuryakin iyoŋ a nen.
11Nyitamakinit atemar ikwaan iyoŋ ka iŋes,
kori nyikinyomit erwor keŋ ŋolo aoyan; anerae ikitemi iŋes iyoŋ alorwor keŋ a ŋolo aoyan,
ido ani emaisyani iŋes, ikiripiripi iyoŋ.
12Eryenyaaka ŋituŋa ŋulu nyimunonito ŋakiro kon ŋuna nyemaikina ŋituŋa toyenut;
nyikimyekinete ŋituŋa ŋul iyoŋ akitolomar nawana kori lojera.
13Totenite ka tocoite nooi,
anerae ilosi iyoŋ irimit pa iyeni atemar eaunito ŋakiro kon a ilope atwanare nakuwan kon.
14Ani ca eriŋa iyoŋ iyari, tominak Ekapolon, ido tonyara iŋes ikilaku iyoŋ.
15Emina ŋinisubuna ikekikwaanet
ka emina ŋinituŋanan ikekidunyet.
16Erukito ŋisubuna ŋulu eyarete a ŋikabilae kec,
ŋituŋa daŋ erukito make.
17Nyo epedori akisiboi epeot ka imesek kaapei?
Emam ŋuna epedorete akisiboi kaapei ekasecan ka ŋini einakina neni ka Akuj.
18Alikisil eyai kidiŋ ebu ka iŋok?
Alikisil eyai kidiŋ ikabaran ka ikulyakit?
19Erae ŋitukoi anariet akimuj a ŋiŋatunyo;
ikwaŋinapei, erae ŋikulyak itiyaununeete akimuj a ŋikabarak.
20Erae akitiditeuna bon asiilyo aneni a ŋulu iturosi,
ikwaŋinapei, erae ŋikulyak asiilyo aneni a ŋikabarak.
21Ani epalagagauni ekabaran, erae ŋikonei keŋ iŋarakinete iŋes, nai ani epalagagauni ŋini sek itiditeuna bon,
ijukarete iŋes nawae ŋikonei keŋ.
22Ani kibutor ekabaran, epote ŋulu alalak alakun;
ido irwori iŋes ŋakiro ŋuna pa amaikina tolimu, nai elimunete ŋituŋa atemar iyookinit iŋes.
Ani kibutor alorwor keŋ ŋini itiditeuna bon, isoloorete ŋituŋa iŋes;
tari kirwor iŋes ŋakiro ŋuna ka apolou, emam ituŋanan epupokini ŋuna irworo iŋes.
23Ani kirworik ekabaran, ililiŋete ŋituŋa daadaŋ; ecelunete ikes itopoloorito iŋes todolo ŋitoilon kec lodouwon.
Ani kirworik ikulyakit temasi ikes, “Ŋae ituŋanan en?”
Ani nai kitiditeun ituŋanan ŋin aneni kec, ijukarete ikes iŋes kwap.
24Ejok ebari erae kemam asecit eyai tooma keŋ,
erae akulyako aronis anatameta a ŋituŋa a ŋulu nyiwuapito ŋuna ka Akuj.
25Erae ŋuna eya lotau a ituŋanan ikes itoodiunit ereet a ituŋanan, kerae ŋuna ajokak, kori ŋuna aronok.
26Emacar ke etau a ŋolo elakara iŋes ereet ŋolo emaisyani,
nai alimunun ŋakitadapeta, iitanit atamatam nooi.
Currently Selected:
Sir 13: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.