LUIMBOIMBO 1
1
1Luimboimbo, nga Solomoni.
Musidzana: “Ivhani khosi yanga!”
2 Nkhiseni! Nkhiseni ni tshi dovha!
Lufuno lwaṋu lu ḓifha u fhira waini.
3 Zwiḓolo zwaṋu zwi tou nukhelela.
Dzina ḽaṋu ndi tshi ḽi pfa
zwi nga ndi pfa zwiḓolo zwo shululwaho.
Ndi zwine na tou vha tshililelwa tsha vhasidzana.
4 Nkokodzeni ri mbo ḓi ṱaha,
ni mbo ḓi vha khosi yanga,
ni nnyise pfamoni dzaṋu!
Ri ḓo dzula roṱhe ro takala,
ndi tshi khoḓa lufuno lwaṋu lu no takadza u fhira waini.
Vhasidzana vhoṱhe vha tshi ni funa a zwi kanukisi.
Musidzana o swifhadzwaho nga ḓuvha
5Inwi vhasadzi vha Jerusalema,
nṋe ndo swifhala, hone ndo naka.
Ndo swifhala unga dennde dza Kedara,
hone ndo naka
unga lupila lwa pfamo ya Solomoni.
6Ni songo nṱalela nga u vhona ndo swifhala,
ndó swa nga ḓuvha;
khaladzi dzanga vho mpfara nga tshiṱuhu,
vha ntshumisa tsimuni ya minḓirivhe,
lunako lwanga, yone tsimu yanga,
nda lu ṅaledza.
7Edzonu mmbudza,
inwi mufunwa wa mbilu yanga:
Nngu dzaṋu ni dzi lisa ngafhi?
Masiari ḓuvha ḽi tshi fhisa ni dzi awedza ngafhi?
Vhaṅwe vhalisa vha ḓo ri mini
vha tshi vhona ndi tshi tendeleka ndi tshi ni ṱoḓa?
Muṱhannga:
8A ni hu ḓivhi naa,
inwi ni no fhira vhasadzi vhoṱhe nga lunako?
Tevhelani vhuṱala ha sambi,
ni wanele mbudzi dzaṋu pfulo tsini ha dennde dza vhalisa.
Solomoni a tshi ambisa musidzana:
9Mufunwa wanga,
ni ntakadza unga bere ya tsadzi i no kokodza gariki yanga
i no bva ha Farao.
10Ṱhaha dzaṋu dzo naka hani nó ḓiṱama nga zwiṅina,
nó tanda mukulo waṋu nga vhulungu ha tsetshela!
11Nṋe ndi ḓo ni itela vhulungu ha musuku
ho vangiwa nga siliva.
Musidzana a tshi landula:
12 Musi khosi i pfamoni dzayo na vhaṱanuni,
nṋe tshiḓolo tshanga tsho vha tsho ḓadza muya
nga u nukhelela u ḓifha,
13mufunwa wanga a tshi nga tshiḓolo tsha zwinukheleli
hezwi o ḓitika nga maḓamu anga.
14Mufunwa wanga u nga maluvha a ḓaka
ane a fhufhuma masimuni a minḓirivhe,
masimuni a Engedi.
Solomoni:
15No naka hani, mufunwa wanga,
no naka hani!
Maṱo aṋu a penya unga a ḽiivha.
Musidzana (a tshi amba na muṱhannga wawe):
16No naka hani, mufunwa wanga!
Ni ntakadza hani!
Ri ḓo shuvhama hatsini vhudala,
ha vha hone vhulalo hashu.
17Mikedara i ḓo vha yone phuphu
dza pfamo yashu,
ṱhanga í miṱaululo.
Currently Selected:
LUIMBOIMBO 1: VEN98
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1998. Used with permission. All rights reserved.