JOHANISI 9
9
Yesu a tshi fhodza muthu we a bebwa e bofu
1 Musi Yesu a tshi khou ḓitshimbilela a vhona munna we a bebwa e bofu. 2 Vhafunziwa vhawe vha mu vhudzisa vha ri, “Vhafunzi, uyu muthu a tshi bebwa e bofu, hu nga vha ho tshinya nnyi? Ho tshinya ene muṋe kana ho tshinya vhabebi vhawe?”
3 Yesu a fhindula a ri, “Vhupofu ha hoyu muthu a ho ngo bva kha vhutshinyi ha ene muṋe kana ha vhabebi vhawe; ho vha u itela fhedzi uri Mudzimu a sumbedze vhathu maanḓa awe khae. 4 Riṋe tshashu ndi u futelela u ita mushumo wa o nthumaho ḽi tshi kha ḓi vha masiari; zwenezwino ḓuvha ḽi a kovhela, muthu a si tsha ḓo kona u shuma tshithu. 5 Zwino ndi tshee fhano shangoni ndi Nṋe tshedza tsha shango.”
6 Yesu a ri u ralo a mbo pfela mare fhasi a suka matope ngao a a ḓodza kha maṱo a uyo munna wa bofu; 7a konou mu vhudza a ri, “Tshimbilani ni yo ṱamba khofheni ishani ḽa Silomu.” (Silomu ndi uri “Muḓinḓa”.) Ndi hone uyo munna a tshi ṱuwa a yo ṱamba khofheni, a vhuya a tshi vho vhona.
8 Vhahura vhawe, na vhaṅwe vhathu vhe vha vha vha tshi ḓi mu vhona zwiḽa a tshi kha ḓi tshila nga u humbela, vha vhudzisana vha ri, “Nṋa uyu munna a si onouḽa we a vha a tshi ṱwa o dzula a tshi khou humbela zwifhiwa?”
9Vhaṅwe vha ri, “Ndi ene.” Vhaṅwe vha ri, “A si ene; vha tou fana.”
Hone ene muṋe wazwo a ri, “Ndi nṋe.”
10Vha mu vhudzisa vha ri, “Nṋa zwo ḓa hani ni tshi vho vhona?”
11A fhindula a ri, “Uḽa munna a no pfi Yesu o tou suka matope a nnḓodza kha maṱo a ri, ‘Tshimbilani ni yo ṱamba khofheni Silomu.’ Nangoho nṋe nda ya; ndi tshi tou fhedza u ṱamba nda wana ndi tshi vho kona u vhona.”
12Vha vhudzisa vha ri, “Nṋa onoyo munna u ngafhi?”
Ene a fhindula a ri, “A thi ḓivhi.”
Vhafarisei vha tshi sedzulusa mafhungo a u fhodzwa ha bofu
13Ndi hone vha tshi ṱuwa na uyo munna we a vha e bofu vha mu isa ha Vhafarisei. 14 Hafhu zwiḽa Yesu a tshi suka matope a swingulusa bofu iḽo yo vha i Sabatha. 15Zwino Vhafarisei na vhone vha vhudzisa uyo munna uri nṋa zwo ḓa hani a tshi vho kona u vhona. Ene a vha vhudza a ri, “O tou dzhia matopenyana a nnḓodza kha maṱo; nṋe nda ya nda ṱamba khofheni nda wana ndi tshi vho kona u vhona.”
16 Vhaṅwe Vhafarisei vha ri, “Muthu we a ita zwithu izwo a nga si vhe a tshi bva ha Mudzimu; hufha a sa tevhedzi mulayo wa Sabatha!”
Hone vhaṅwe vha ri, “Nṋa muthu wa mutshinyi a nga kona hani u ita maḓembe mangafhangafha?” Vha tshi ralo ha mbo ḓi vha u fhandekana havho.
17 Ndi hone vha tshi vho tou dovha vha vhudzisa uyo munna vha ri, “Zwino inwi ni ri mini ngae? Ri amba ngauri ndi inwi we na swinguluswa!”
Ene a fhindula a ri, “Nṋe ndi ri ndi muporofita.”
18Vhahulwane vha Majuda vhone vho vha vha sa funi u tenda uri uyo munna o vha e bofu o tou swinguluswa; vha vhuya vha tou vhidza vhabebi vhawe 19vha vha vhudzisa vha ri, “Nṋa uyu ndi ṅwana waṋu? Zwino ni tshi ri o bebwa e bofu zwo ḓo ḓa hani uri a kone u vhona?”
20Vhabebi vhawe vha fhindula vha ri, “Riṋe tshine ra ḓivha ndi uri ndi ṅwana washu na uri o bebwa e bofu. 21Hone uri o swinguluswa hani a si zwine ra zwi ḓivha; hu ḓi nga muthu o mu swingulusaho, na Ene a ri mu ḓivhi. Hufha ene muṋe e munna; mu vhudziseni, u ḓo ḓifhindulela!” 22 Vhabebi vhawe vha tshi vhuya vha ralo ndi uri vho vha vha tshi ofha vhahulwane vha Majuda, vhunga vhenevho vho vha vho no ḓi vhofha ḽa uri ane a vhuya a bula ḽa uri Yesu ndi Mesia u ḓo thathiwa sinagogoni yavho. 23Ndi zwe vha tshi fhindula vha ri, “Hufha ene muṋe e munna. Mu vhudziseni!”
24Vha dovha vha vhidza uyo munna vha mu vhudzisa vha ri, “Ambani ngoho phanḓa ha Mudzimu! Riṋe ri ḓivha uri hoyo munna ndi mutshinyi.”
25Ene a fhindula a ri, “Nṋe zwauri ndi mutshinyi kana a si mutshinyi a thi zwi ḓivhi; tshine nda ḓivha ndi uri ndo bebwa ndi bofu, hone zwino ndi vho vhona.”
26Vhone vha dovha vha vhudzisa vha ri, “Nṋa o tou ni ita mini? O ni swingulusa hani?”
27Ene a fhindula a ri, “Hufha ndo no ḓi ni vhudza ni si thetshelese! Zwino ni kha ḓi ṱoḓa u dovha na zwi pfela mini? Kani-ha na inwi ni vho ṱoḓa u vha vhafunziwa vhawe?”
28Vhone vha thoma u mu sema vha ri, “Mufunziwa wawe ndi enenwi; riṋe ri vhafunziwa vha Mushe. 29 Riṋe ri ḓivha uri Mudzimu o amba na Mushe, a vha uyo muthu a ri ḓivhi na hune a bva hone.”
30Uyo munna a ri, “Zwi a kanukisa! O ntswingulusa, hone inwi a ni ḓivhi hune a bva hone! 31 Roṱhe ri ḓivha uri Mudzimu ha pfi thabelo dza mutshinyi; u pfa dza vhane vha mu hulisa vha ita zwine Ene a funa. 32Zwino tshee shango ḽa sikiwa a ri athu vhuya ra zwi pfa zwa muthu we a swingulusa muthu we a tou bebwa e bofu. 33 Arali hoyu munna o vha a sa bvi ha Mudzimu o vha a sa ḓo kona tshithu.”
34 Vha fhindula vha ri, “Inwi we na tou bebelwa vhutshinyini na alutshela khaho, riṋe ni nga vhuya na ri funza mini-vho.” U ralo vha mbo ḓi mu tumula tshivhidzoni.
Vhupofu ha mbilu
35Yesu a zwi pfa uri vho tumula uyo munna tshivhidzoni. A tshi mu wana a mu vhudzisa a ri, “Nṋa Mubebwa-nga-muthu ni a mu fulufhela naa?”
36Ene a ri, “Kha vha mmbudze uri ndi nnyi Muṋe wanga, uri ndi kone u mu fulufhela!”
37 Yesu a ri, “No no ḓi mu vhona; ndi Nṋe ane a khou amba na inwi.”
38Uyo munna a ri, “Ndi a fulufhela Muṋe wanga!”, u ralo a mbo ḓi gwadama phanḓa hawe.
39 Yesu a ri, “Tshe Nṋe nda ḓela tshone fhano shangoni ndi u haṱula; mabofu a ḓo swinguluwa; vha vhonaho vha ḓo pofula.”
40 Vhaṅwe Vhafarisei vhe vha vha vhe nae henefho vha tshi pfa a tshi ralo vha ri, “Ni songo vha ni tshi khou ṱoḓa u ri na riṋe ri mabofu.”
41 Yesu a fhindula a ri, “Arali no vha ni mabofu ndi musi ni si na mulandu; zwino ni ri ni a vhona, ndi zwine na ḓi dzula ni na mulandu ngazwo.
Currently Selected:
JOHANISI 9: VEN98
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1998. Used with permission. All rights reserved.