Utu 33
33
Yakobo ikonganeka na Esau
1Yakobo akalola kulongolo akamuwona Esau ibwela pamonga na vandu vaki miya mcheche, ndi penapo akavavagula vana vaki pagati ya Lea na Laheli na vala vavanda vaki vavili va chidala. 2Akavalongolesa vatumisi pamonga na vana vavi, akalanda Lea na vana vaki, akamalakisa Laheli na Yosefu mwana waki. 3Yakobo mwene avalongolili palongolo ahambili kuni igundama pahi mala saba, mbaka peahikili papipi kwa mlongo waki. 4Nambu Esau akahamba kanyata kumpokela Yakobo na kumukumbatila na kumbusu, ndi voha vavili vakavemba. 5Esau pealingulili na kuvawona vamau na vana vavi, akamkota, “Vayani veulongosini navu ava?”
Yakobo akayangula, “Venava ndi vana vala Chapanga ampeli mtumisi waki kwa ubwina waki wa Chapanga?”
6Kangi vatumisi vala vakahegelela na vana vavi, vakagundama kwa utopesa. 7Mewawa vakamhegelela Lea na vana vaki na Laheli na Yosefu mwana waki ndi voha vakagundama cha utopesa.
8Esau akakota, “Mana yaku kyani misambi ihi yenikonganiki nayu kunjila?”
Yakobo akamyangula, “Naholalili kuhengelwa lipyana palongolo yaku veve wa mkulu wangu.”
9Nambu Esau akamyangula, “Wamulongo wangu nivi na vindu vyamahele neju. Vindu vyeuvii navyu vivyayi vyaku wamwene.”
10Yakobo akamjovela, “Kotoka kukita naha! Chondi ngati unipokili chiuganu, upokela na njombi izi zenikuletili. Chakaka chenipaweni pamihu paku, ndi ngati nipaweni pamihu pa Chapanga, ndava cheunipokili bwina. 11Chondi upokelayi njombi zeniziletili, muni Chapanga animotisi neju na nene nivii navyu vyoha vyenigana.” Yakobo ayendalili kumyupa neju mbaka Esau akayidakila kupokela njombi zila.
12Kangi Esau akajova, “Tiye tihambayi na nene yati nikulongolela.”
13Nambu Yakobo akamjovela, “Mkulu wangu umanyili kuvya vana ava ndi vang'enya, na kuvya mambelele na ng'ombi vyenivii navyu vinyongesa. Ngati tigendili kanyata kwa lukumbi lwa ligono limonga ndu, mifuya yoha yati vifwa. 14Mkulu wangu chondi nikuyupa ulongolelayi, na nene yati nikukulanda mbolimboli, yati nihamba ngati vana na mifuya chevihamba, mbaka penikuhikilayi kwenuko ku Seili.”
15Penapo Esau akamkota, “Manya nikulekela vandu vangu vangi.”
Nambu Yakobo akayamngula, “Ndava kyani ukita chenicho? Yikola veve niyidakiliwa palongolo yaku mkulu wangu.”
16Ndi ligono lilo Esau akawuya ku Seili. 17Nambu Yakobo akahamba mbaka ku Sukoti, kwenuko ndi kweajengili nyumba na kujenga mandanda ndava ya mifuya yaki. Ndava yeniyo pandu penapo ndi akapakemela Sukoti.
18Yakobo peawuyili kuhuma ku Padan Alamu, akahika bwina kumuji wa Shechemu ku Kanaani, akajenga vindanda papipi na muji wenuwo. 19Pandu penapo peajengili vindanda agulili kuhuma vakolonjinji vachiveleku va Hamoli dadi wakii Shechemu, kwa vipandi miya vya feza. 20Kwenuko akajenga pandu pa maganga pa kuwusila teta, akapakemela Eli Elohe Isilaeli, mana yaki Chapanga, ndi Chapanga wa Isilaeli.
Currently Selected:
Utu 33: Ngoni
Highlight
Share
Copy
Want to have your highlights saved across all your devices? Sign up or sign in
Ngoni New Testament © The Word for the World Southern Africa and Pioneer Bible Translators, 2020.
