JOHANE 18
18
Go okiwa le go tshwarwa ga Jesu
(Math 26:47-56; Mar 14:43-50; Luke 22:47-53)
1E rile Jesu a sena go bua mafoko a, a tswa le barutwa ba gagwe, ba kgabaganya molatswana wa Kiterone, ba ya kwa go nang le tshimo teng, mme a tsena mo go yone, ene ka esi le barutwa ba gagwe. 2Jaana Jutase, yo o mo okang, le ene a bo a itse felo foo, gonne Jesu o na a tle a ye teng gantsi le barutwa ba gagwe. 3Foo Jutase, ka a bonye mophato wa batlhabani, le maotlana a a tswang kwa ditlhogong tsa baperesiti le Bafarisai, a tla teng a tshotse dipone, le ditime, le dibolao. 4Ke gone Jesu, ka a itse dilo tsotlhe tse di tlaa mo tlelang, a ya go ba kgatlhantsha, a ba raya a re: “Lo batla mang?”
5Ba mo fetola ba re: “Jesu wa Nasaretha.” Jesu a ba raya a re: “Ke nna.” Mme Jutase yo o mo okang, le ene a bo a eme nabo. 6Ke gone, e rileng a ba raya a re: “Ke nna,” ba kata ka morago, ba wela fa fatshe. 7Foo a ba botsa gape, a re: “Lo batla mang?” Ba re: “Jesu wa Nasaretha.”
8Jesu a ba fetola a re: “Ke lo boleletse fa e le nna; mme ka re, fa lo batla nna, lesang ba ba tsamaye.” 9Gore lefoko le dirafale le o le buileng, a re: “Mo go ba o ba nneileng, ga ke a latlhegelwa ke ope.”
10Foo Simone Petere, ka a tshotse tšhaka, a e somola, a rema motlhanka wa moperesiti yo mogolo, a mo kgaola tsebe ya ka fa tsogong le legolo. Leina la motlhanka yoo, e ne e le Maleko. 11 Foo Jesu a raya Petere a re: “Somela tšhaka mo kgatleng; senwelo se Rara o se nneileng, a ga nketla ke se nwa?”
Jesu o isiwa fa pele ga moperesiti yo mogolo Anase
(Math 26:57-58; Mar 14:53-54; Luke 22:54)
12Jalo mophato, o na le mong wa mophato, le maotlana a Bajuta, ba tshwara Jesu, ba mo golega. 13Ba mo gogela kwa go Anase pele; ka gobo ene e le mogwagadia Kaiafase, yo e neng e le moperesiti yo mogolo ka ngwaga oo. 14 Aitse Kaiafase ke ene o gakolotseng Bajuta, gore go ka nna molemo motho a le mongwe fela a swela sešaba.
Petere o itatola Jesu
(Math 26:69-70; Mar 14:66-68; Luke 22:55-57)
15Simone Petere a latela Jesu, le morutwa yo mongwe a dira jalo. Jaana morutwa yo mongwe, yoo a bo a itsiwe ke moperesiti yo mogolo, mme a tsena le Jesu mo lwapeng lwa moperesiti yo mogolo; 16Petere o na a eme fa kgorong ka fa ntle. Foo morutwa yo mongwe, yo o itsiweng ke moperesiti yo mogolo, a tswela kwa ntle, a ya go bua le mosadi yo o disitseng kgoro, mme a isa Petere mo teng. 17Foo lelata le le disitseng kgoro la raya Petere la re: “A le wena o mongwe wa barutwa ba monna yo?” A re: “Nnyaa.”
18Jaana batlhanka le maotlana ba bo ba eme teng, ba gotsitse molelo o o magala; gonne go ne go le tsididi; ba bo ba ikomosa; Petere le ene a nna nabo, a eme a ikomosa.
Jesu o bodiwa dipotso ke Moperesiti yo mogolo
19Moperesiti yo mogolo a botsa Jesu ka ga barutwa ba gagwe, le ka ga thuto ya gagwe. 20Jesu a mo fetola a re: “Ke buile le lefatshe ka ponalo; gale ke ntse ke ruta mo matlong a thuto le mo tempeleng, kwa Bajuta botlhe ba phuthegelang teng; ga ke a buela sepe mo sephiring. 21O mpoletsang? Botsa ba ba nkutlwileng, se ke se buileng nabo; bona bao ba itse dilo tse ke di buileng.”
22Ya re a sena go bua lefoko le, mongwe wa maotlana a a emeng teng a gatla Jesu ka thobane, a re: “A o fetola moperesiti yo mogolo jalo?”
23Jesu a mo fetlola a re: “Fa ke buile bosula, supa ka ga bosula, mme fa ke buile sentle, o nkgalelang?”
24Foo Anase a mo isa a golegilwe kwa go Kaiafase moperesiti yo mogolo.
Petere o itatola Jesu gape
(Math 26:71-75; Mar 14:69-72; Luke 22:58-62)
25Jaana Simone Petere a bo a eme a ikomosa. Mme ba mo raya ba re: “A le wena o mongwe wa barutwa ba gagwe?” A itatola a re: “Nnyaa.”
26Mongwe wa batlhanka ba moperesiti yo mogolo, e le tsala ya yo Petere o mo kgaotseng tsebe, a re: “A ga ke a go bona o na nae kwa tshimong?”
27Foo Petere a ba a itatola gape; mme koko e tona ya akofa ya lela.
Jesu o fa pele ga Pilato
(Math 27:1-2,11-14; Mar 15:1-5; Luke 23:1-5)
28Ba tlosa Jesu fa go Kaiafase ba mo isa kwa ntlong ya tshekelo, mme ga bo go le ka maphakela; mme bone ka bosi ba se ka ba tsena mo ntlong ya tshekelo, gore ba se ka ba itshekololwa, e le gore ba je Tlolaganyo. 29Foo Pilato a tswela kwa go bone a re: “Lo supa molato ofe mo monneng yo?”
30Ba mo fetola ba re: “Fa monna yo e ka bo e se modira bosula, re ka bo re se ka ra mo go neela.”
31Foo Pilato a ba raya a re: “Mo itseeleng, lo mo sekise ka fa molaong wa lona.” Bajuta ba mo raya ba re: “Ga re a letlelelwa go bolaya motho ope,” 32 e le gore lefoko la ga Jesu le dirafale, le o kileng a le bua ka a kaya mokgwa wa loso lo o tlaa lo swang.
33Foo Pilato a tloga a boela mo ntlong ya tshekelo, mme a bitsa Jesu, a mo raya a re: “A ke wena Kgosi ya Bajuta?”
34Jesu a mo fetola a re: “A o bua lefoko le ka wesi, gongwe ba bangwe ba le go boleletse ka ga me?”
35Pilato a mo fetola, a re: “A ke Mojuta? Aitse morafe wa ga eno, le ditlhogo tsa baperesiti, ke bone ba ba go nneetseng. O dirileng?”
36Jesu a mo fetola a re: “Bogosi jwa me ga se jwa lefatshe leno; fa bogosi jwa me e ka bo e le jwa lefatshe leno, batlhanka ba me ba ko ba tlhabana, gore ke se ka ka neelwa Bajuta; mme jaana bogosi jwa me ga se jwa mono.”
37Foo Pilato a mo raya a re: “Mme a o kgosi?” Jesu a mo fetola a re: “Wena wa re ke kgosi. Ke tsaletswe gone moo, mme ke tletse gone moo mo lefatsheng, gore ke supe ka ga boammaaruri. Mongwe le mongwe yo o leng wa boammaaruri o utlwa lentswe la me.”
38Pilato a mo raya a re: “Boammaaruri ke eng?”
Jesu o atlholelwa loso
(Math 27:15-31; Mar 15:6-20; Luke 23:13-25)
Ya re a sena go bua jalo, a ba a tswela gape kwa Bajuteng, a ba raya a re: “Ga ke bone molato mo go ene. 39Mme lona e ne e re go le Tlolaganyo, lo na le temalo ya gore ke lo gololele mongwe, ke gone a lo rata ka lo gololela Kgosi ya Bajuta?”
40Foo ba goa ka thata gape ba re: “E seng monna yo, mme a e nne Barabase.” Mme Barabase ya bo e le senokwane.
Currently Selected:
JOHANE 18: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.