ରମିୟ 13
13
ଅଃଦିକାରି ମଃନ୍କେ ମାନ୍ତାର୍
1ସଃବୁଲକ୍ ଅଃଦିକାର୍ ହାୟ୍ଲା ସାସନ୍କଃର୍ତାର୍ ଲକ୍ମଃନାର୍ କଃତା ମାନା, ବଃଲେକ୍ ଅଃଦିକାର୍ ଇସ୍ୱରାର୍ ତଃୟ୍ ହୁଣି ଆସେଦ୍, ଆରେକ୍ ଜୁୟ୍ସଃବୁ ଅଃଦିକାର୍ ହାୟ୍ରେତା ସାସନ୍କଃର୍ତା ଆଚ୍ତି; ଇସ୍ୱର୍ ସେମଃନ୍କେ ବାଚିଆଚେ । 2ତଃବେ ଜେ ଅଃଦିକାର୍କେ ବିରଦ୍ କଃରେଦ୍, ସେ ଇସ୍ୱରାର୍ ବିଦିର୍ ବିରଦ୍ କଃରେଦ୍; ଆରେକ୍ ଜୁୟି ଲକ୍ମଃନ୍ କଃର୍ତି ସେମଃନ୍ ଅଃହ୍ଣା ଅଃହ୍ଣାର୍ ଉହ୍ରେ ଡଃଣ୍ଡ୍ ଆଣ୍ତି । 3ବଃଲେକ୍ ନିକ କାମ୍ କଃର୍ତା ଲକ୍ମଃନ୍ ମୁଳିକା ଲକ୍ମଃନ୍କେ ନଃଡିର୍ତି, ମଃତର୍ ଜୁୟି ଲଃକ୍ମଃନ୍ କଃରାପ୍ କାମ୍ କଃର୍ତି ସେମଃନ୍ ଡିର୍ତି । ତୁମି କି ଅଃଦିକାର୍ ହାୟ୍ଲା ସାସନ୍ କଃରୁର୍ ଚଃମେ ନଃଡିରୁକ୍ ଇଚା କଃରୁଲାସ୍ ? ତଃବେ ନିକା କାମ୍ କଃରା, ତଃବେ ତାର୍ ତଃୟ୍ହୁଣି ପ୍ରସଂସା ହାଉଆସ୍ । 4ତୁମାର୍ ନିକ ହାୟ୍ଁ ସେ ଇସ୍ୱରାର୍ ତଃୟ୍ ହୁଣି ଅଃଦିକାର୍ ହାୟ୍ଁ ଆଚେ । ମଃତର୍ ତୁମି ଜଦି କଃରାପ୍ କାମ୍ କଃରୁଲାସ୍, ତଃବେ ତୁମି ସାସନ୍କଃର୍ତା ଲକେ ଡିରା, ବଃଲେକ୍ ତୁମିକେ ଦଃଣ୍ଡ୍ ଦେତା ହାୟ୍ଁ ସଃତ୍କଃରି ତାର୍ ଅଃଦିକାର୍ ଆଚେ । ସେ ଇସ୍ୱରାର୍ ତଃୟ୍ ହୁଣି ବାଚ୍ଲା ଚାକର୍ । କଃରାପ୍ କାମ୍ କଃରୁମଃନ୍କେ ଦଃଣ୍ଡ୍ ଦେତା ହାୟ୍ଁ ସେ ଇସ୍ୱରାର୍ ଆଦେସ୍ ମାନେଦ୍ । 5ତଃବେ ତୁମିମଃନ୍ ସାସନ୍ କଃରୁମଃନାର୍ କଃତା ମାନ୍ତା ଦଃର୍କାର୍ ଇସ୍ୱରାର୍ ଦଃଣ୍ଡ୍କେ ଡିରିକଃରି ନୟ୍, ମଃତର୍ ତୁମାର୍ ନିଜାର୍ ମଃନ୍ ଜୁୟ୍ରି ବଃଲ୍ବଃଲି କଃଉଁଲି ସେତାର୍ ଗିନେ ।
6 #
ମାତି ୨୨:୨୧; ମାର୍କ ୧୨:୧୭; ଲୁକ ୨୦:୨୫. ଇତାର୍ ଗିନେ ତୁମିମଃନ୍ ସିସ୍ଟୁ ହେଁ ଦେଉଁଲାସ୍, ବଃଲେକ୍ ସେମଃନ୍ ଇସ୍ୱରାର୍ ସେବାକାରି ହର୍ ଇ କାମେ ଲାଗି ରେଉଁଲାୟ୍ । 7ଜାର୍ ଜାୟ୍ରି ହାଉତାର୍ ତାକେ ସେରି ଦିଆସ୍; ଜାକେ ସିସ୍ଟୁ ଦେଉଁକ୍ ଅୟ୍ଦ୍, ତାକେ ସିସ୍ଟୁ ଦିଆସ୍; ଜାକେ ଡିରୁକ୍ ଅୟ୍ଦ୍, ତାକେ ଡିରା; ଜାକେ ମାନ୍ତି କଃରୁକେ ଅୟ୍ଦ୍, ତାକେ ମାୟଃନ୍ କଃରା ।
ଏକ୍ ଆରେକ୍ କେଏ ଲାଡ୍
8ସଃବ୍କେ ଲାଡ୍ କଃର୍ତା ରିଣେ ରିଣ୍ୟା ଅଃଉଆ ଆର୍ ବିନ୍ ବିସୟେ କାର୍ ତଃୟ୍ ହେଁ ରିଣ୍ୟା ଅଃଉଆ ନାୟ୍; ବଃଲେକ୍ ଜେ ସଃବ୍କେ ଲାଡ୍ କଃରେଦ୍ ସେ ବିଦି ମାନି ଆଚେ । 9ବଃଲେକ୍ ଦାରିକାମ୍ କଃରା ନାୟ୍, ନଃର୍ ମାରା ନାୟ୍, ଚରି କଃରା ନାୟ୍, ଲକାର୍ କାୟିରି ହେଁ ଲଃବ୍ କଃରା ନାୟ୍, ଆରେକ୍ ଜଦି କାୟି ବଲ୍ ରଃୟ୍ଦ୍, ସେସଃବୁ ବିଦି ଗଟେତଃୟ୍ ଆଚେ, “ତୁମାର୍ ହଃଳ୍ସା ଲକେ ନିଜାର୍ ଜିବନ୍ ହର୍ ଲାଡ୍ କଃରା ।” 10ତୁମି ଗଟ୍ଲକେ ଲାଡ୍ କଃର୍ତି ରିଲେକ୍ ତାକେ କଃବେ ହେଁ ଅଃନ୍ୟାୟ୍ ନଃକେରାସ୍ । ସେତାକ୍ ଲାଡ୍କଃର୍ତାର୍ ଗିନେ ସଃବୁ ବିଦି ମାନୁକ୍ ଅୟ୍ଦ୍ ।
11ଆରେକ୍, ଅଃବେ ତୁମିମଃନ୍ ନିଦେହୁଣି ଜଃଗ୍ରତ୍ ଅଃଉତା ବେଳା ଆସି ଆଚେ, ଇରି ଜାଣି ଇ ସଃବୁ କଃରା; ବଃଲେକ୍ ଅଃମିମଃନାର୍ ବିସ୍ୱାସ୍ କଃଲା ଦିନ୍ହୁଣି ଅଃବେ ମୁକ୍ତି ହାଉତାର୍ ଅଃମାର୍ ଅଃଦିକ୍ ଚଃମେ । 12ରାତି ସଃରୁଲି ଉଜାଳ୍ ହାଉଁଲି, ଦିନ୍ ଚଃମେ ଆଚେ, ତଃବେ ଆସା ଅଃମିମଃନ୍ ଅଃନ୍ଦାରେ କଃର୍ତା କାମ୍ମଃନ୍ ଚାଡିକଃରି ଉଜାଳେ ଜୁଜ୍ କଃରୁକେ ଟିକ୍ ସଃଜ୍ ହିନ୍ଦୁଆଁ । 13ରଃଙ୍ଗ୍ରଃସିଆ, ମଃଦ୍ ମାତୁଆଳି, ଗଃଗାଳାର୍ କଃରାପ୍ କାମ୍ ସଃବୁ ଆର୍ ନିଲାଜ୍ୟା, କଳିକଜ୍ୟା ଆର୍ ଡାରା ଇସଃବୁୟ୍ ଜିବନ୍ ନଃକାଟି ଆସା, ଉଜାଳେ କାମ୍ କଃର୍ତା ଲକାର୍ ହର୍ ନିକ ଜିବନ୍ କାଟୁଆଁ । 14ମାପୁର୍ ଜିସୁ କ୍ରିସ୍ଟର୍ ଅଃସ୍ତର୍ସଃସ୍ତରେ ସଃଜଃବାଜ୍ ଅୟି, ହାହ୍କେ ଚାଡା, ହାହ୍ ଆର୍ ଗଃଗାଳାର୍ ଇଚାକ୍ ହୁର୍ନ୍ କଃରୁକେ ମଃନେ ଚିତା କଃରା ନାୟ୍ ।
Currently Selected:
ରମିୟ 13: BPL25
Highlight
Share
Copy
Want to have your highlights saved across all your devices? Sign up or sign in
The Bodo Parja Bible © The Word for the World International and Bodo Parja Translation Samithi, Dasamanthpur, Odisha, 2025.
