Sav 40
40
Wathi wa Kũtaĩa
Kwa mwinĩthya: Savulĩ ĩno yaandĩkiwe nĩ Ndeviti
1Nĩneeteelile ũtethyo wa Mwĩai Ngai nĩ na wũmĩĩsyo.
Nĩvo ĩndĩ weethukĩĩisye na eew'a kĩĩo kyakwa.
2Nĩwambumisye ĩimanĩ ĩthũku mũno,
ambumya mũtondonĩ wa yũmba,
anũngamya ĩvianĩ ĩnene,
na anenga vandũ ve ũsũvĩo nĩũngame vo.
3Nĩwamanyĩisye wathi mweũ,
wathi wa kũtaĩa Ngai waitũ.
Aingĩ makoona na maikĩa,
na mayĩkwatya Mwĩai Ngai.
4Nĩ mũathime mũndũ ũla wĩkwatasya Mwĩai Ngai,
ũla ũtekwatanasya na andũ ala mekathĩĩaa,
ala au nũndũ wa kũthaitha ngai sya ũvũngũ.
5Ame Mwĩai Ngai, Ngai wakwa,
nũtwĩkĩte maũndũ maingĩ ma kũseng'ya,
na mĩvango yaku kũla tũĩ ndĩtalĩka.
Vai ũngĩ ũilyĩ taku!
Kethĩwa nĩndonya kũtavany'a mĩvango ĩsu yonthe,
yĩthĩwa yĩ mingĩ ũkethĩa ndĩtalĩka.
6 #
Aevl 10.5-7
We ndwendeeaw'a nĩ nthembo kana syĩndũ ila syumaw'a,
na ndwendete nthembo sya kũvĩvw'a kana nthembo kwondũ wa ũekeo wa naĩ,
ĩndĩ nũvingũĩte matũ makwa ngwĩw'e.
7Nĩvo ĩndĩ naneenie nasya atĩĩ, “Ninyioo nĩnooka.
Ĩvukunĩ ĩkũnze nĩkũandĩkĩtwe ĩũlũ wakwa:
8We Ngai wakwa, ũtanu wakwa nĩ kwĩanĩsya kwenda kwaku;
mĩao yaku yĩ ngoonĩ yakwa.”
9Ame Mwĩai Ngai nĩnatavanisye ũvoo wa ũtanu,
wũmbanonĩ mũnene wa andũ maku,
kana we nũtũtangĩĩaa.
Nĩwĩsĩ nesa kana nyie ndikaeka kũtavany'a ũvoo ũsu.
10Ndyaavitha ũvoo wa ũlũngalu waku ngoonĩ yakwa,
nĩndavanasya ĩũlũ wa ũlũngalu na ũĩkĩĩku waku.
Ndyaavitha wũmbano mũnene ũvoo wa wendo na ũw'o waku.
11Ame Mwĩai Ngai ndũkalee kũmbony'a tei waku,
wendo waku ũtaolekaa na ũw'o waku ninzũvĩae kĩla ĩvinda!
12Nthyũlũlũkĩtwe nĩ mathĩna maingĩ;
maingĩ matatalĩka!
Naĩ syakwa ningwatĩte ũkethĩa o na nditonya kwona kĩndũ;
nĩ mbingĩ mbee wa nzw'ĩĩ sya mũtwe wakwa,
na nĩnĩminĩte kũkw'a ngoo.
Mboya ya kwĩtya Ũtethyo
(Sav 70.1-5)
13Ame Mwĩai Ngai endeew'a nĩ kũmbonokya!
Ame Mwĩai Ngai ĩkalaate ũndethye!
14Ala mendaa kũmbũaa nĩmasindwe na kũvũavũana.
Ala matanaa yĩla ngũthĩnw'a nĩmalũngw'e na maisonokw'a!
15Tuma ala manthekeeaa mayasya, “Aa! Aa!”
Masaanĩw'a nũndũ wa kũsindwa kwoo.
16Ĩndĩ onthe ala makũmanthaa,
nĩmatane na kwĩw'a mũyo nũndũ waku.
Onthe ala mendete ũtangĩĩo waku,
nĩmaneenae kĩla ĩvinda na kwasya, “Mwĩai Ngai nĩ mũnene!”
17Ngalĩkonĩ ĩla yakwa nyie nĩ ngya na mũthĩni,
ĩndĩ we Mwĩai Ngai ndwaaũlwa ninyie.
Nue mũtangĩĩi na mũtethya wakwa.
Ame Ngai wakwa ndũkekalange.
Currently Selected:
Sav 40: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
