Nth 24
24
-19-
1Ndũkew'ĩe andũ athũku kĩwĩu,
o na ndũkendeew'e nĩ kũtindany'a namo,
2nũndũ ngoonĩ syoo mavangaa kwĩka andũ naĩ,
na maneenaa ndeto sya kũete thĩna.
-20-
3Nyũmba yakawa na ũĩ,
na kũlũlũmĩĩlw'a na ũmanyi.
4Nũndũ wa ũĩ,
tũsũmba twa nyũmba ĩsu nĩtusũaw'a mothwii me vata na ma kwendeesya.
-21-
5Mũndũ mũĩ e vinya kwĩ ngũmbaũ,
na mũndũ wĩ na ũmanyi e vinya kwĩ ũla wĩ na ũtonyi,
6nĩkwĩthĩwa kwa ũtao wa ũĩ mũndũ nũtonya kũthi kaũnĩ,
na vala ve atai aingĩ nĩvethĩawa ũsindi.
-22-
7Kwa ndia, ũĩ nĩ kĩndũ kĩ vinya kwĩthĩwa nakyo.
Ndia ndĩthĩawa na ũndũ ĩosya yĩla maũndũ ma vata meũneenwa wũmbanonĩ.
-23-
8Mũndũ ũla ũvangaa kwĩka maũndũ mathũku,
akeetwa mũeti wa kĩthokoo.
9Mũvango wa ũtumanu nĩ naĩ,
na mũndũ wĩ kĩvũthya nũmenetwe nĩ andũ.
-24-
10Ethĩwa ũkakw'a ngoo ĩvindanĩ ya thĩna,
kwa w'o we wĩ mwonzu mũno!
-25-
11Vonokya ala matwaĩtwe makoawe;
siĩĩa ala makilĩlye kũawa.
12Yĩla wĩasya, “Ithyĩ tũyaamanya maũndũ asu,”
ũla ũsiasya kĩeleelo kya mũndũ akamanya,
ũla ũsũvĩaa thayũ waku nĩwĩsĩ,
na akamũĩva kĩla mũndũ kwĩanana na wĩa wake.
-26-
13Mwana wakwa, ya ũkĩ wa nzũkĩ nĩ mũseo,
na malovoto ma ĩwa masamaa mũyo.
14Manya kana ũu nĩw'o ũĩ ũilyĩ thayũnĩ waku,
waũkwata ũkeethĩwa na wĩkwatyo ĩvindanĩ yũkĩte,
na wĩkwatyo waku ndũkavetwa.
-27-
15Ndũkoveesye mũsyĩ wa mũndũ mũlũngalu ũũvithũkĩe o tondũ mũndũ mũthũku wĩkaa,
o na ndũkanange mũsyĩ wake.
16Nũndũ mũndũ mũlũngalu o na avalũka mavinda maingĩ nĩwũkĩlaa,
ĩndĩ andũ athũku nĩmaminawa nĩ maũndũ ma wanangĩko.
-28-
17Ndũkatane yĩla mũmaitha waku wavalũka,
ndũkatane ngoonĩ yaku aluluutĩka,
18nũndũ Mwĩai Ngai oona ũu ndakendeew'a,
na nũtonya kũeka kũmũkany'a.
-29-
19Ndũkenyamasye nũndũ wa eki ma naĩ,
kana kwĩw'ĩa kĩwĩu ala athũku,
20nũndũ mũndũ mũthũku nde wĩkwatyo wa ĩvinda yĩla yũkĩte,
na taa wa ũla mũthũku ũkavow'a.
-30-
21Mwana wakwa, ĩthĩwa na kĩkĩo kya Mwĩai Ngai na ũinenga mũsumbĩ ndaĩa,
na ndũkekwatany'e na andũ ala mamang'endeaa,
22nũndũ ũkany'o wa Mwĩai Ngai kana wa mũsumbĩ ũkamokĩa kwa kĩthũlũmũko,
na vai mũndũ wĩsĩ wanangĩko ũla makaete.
Ndeto ingĩ sya Andũ Oĩ
23Ii o nasyo nĩ ndeto sya andũ oĩ:
Kwonany'a wendeesyo ũisila ĩkoani ti ũseo.
24Ũla wĩaa ala me na ĩvĩtyo, “Mũi na ĩvĩtyo,”
akaumanĩwa nĩ andũ aingĩ na kũmenwa nĩ nthĩ mbingĩ.
25Ĩndĩ ala makanasya ala me na ĩvĩtyo, makatana,
na kũkwata moathimo maingĩ.
26Ũla ũnenganae ũsũngĩo wa w'o,
nĩ we mũnyanya wa w'o.
27Mbee amba kũmina wĩa waku nza,
seũvya mĩũnda yaku na ĩtina wa ũu aka nyũmba yaku.
28Ndũkamũkũsĩĩe mũtũi waku ũthũku vate kĩtumi,
kana ũneene ndeto sya ũvũngũ.
29Ndũkaaneene wasye, “Ngamwĩka ũndũ ũnambĩkie,
ngeeyĩĩvanĩsya kwa mũndũ ũya kwĩanana na ũndũ ũnambĩkie.”
30Nĩnesĩle mũũndanĩ wa mũndũ mũtulu,
mũũnda wa mĩsavivũ wa mũndũ mũtumanu.
31Nĩnaseng'ie kwona wusĩe mĩw'a kĩla vandũ,
mũũnda ũsu wausũĩte syĩnyeelya,
na ũkũta waw'o wa mavia waĩ mũombokangu.
32Nĩvo ĩndĩ nasyaisye na nasũanĩa,
nĩnoonie na neemanyĩsya ũndũ.
33 #
Nth 6.10-11
Kũkomanga o vanini, kwombosya o vanini,
kũkũnza moko o vanini mũndũ athũmũe,
34nĩvo ĩndĩ ũkya wĩkũkĩa ta kĩng'ei,
na kwaĩwa kũyũka kũilyĩ ta mũndũ wĩ na mĩio ya kaũ.
Currently Selected:
Nth 24: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
