Nth 22
22
Motao na Mokany'o
1Nĩ kavaa kwĩthĩwa na ĩsyĩtwa ĩseo kwĩ ũthwii mwingĩ,
na kũnengwa ndaĩa nĩ kũseo kwĩ silĩva kana thaavu.
2Athwii na ngya makwatanĩe ũndũ ũũ ũmwe:
Mwĩai Ngai nĩwe wamombie onthe.
3Mũndũ wĩ kĩlĩko nĩwonaa ũthũku wũkĩte na ayĩvitha,
ĩndĩ ala mate na ũmanyi maendeeaa makesa kũũmĩa.
4Ĩtuvi ya wĩnyivyo na kĩkĩo kya Mwĩai Ngai,
nĩ ũthwii, ndaĩa na thayũ.
5Nzĩa sya andũ athũku syĩ mĩw'a na mĩteo,
ĩndĩ ũla ũsũvĩaa thayũ wake ekalaa vaasa nasyo.
6Manyĩsya kana ũndũ kaĩlĩte kwĩkala,
o na keana kaikolwa nĩ ũndũ ũsu.
7Mũndũ mũthwii nũsumbĩkaa ũla ngya,
na ũla ũkovaa nĩ ngombo ya ũla wamũkovethya.
8Ũla ũvandaa ũthũku akaketha thĩna,
na ũtonyi wake wa kwĩka naĩ ũkaminwa.
9Mũndũ mũlau akaathimwa,
nũndũ nũĩsanĩaa lĩu wake na ngya.
10Lũngya mũndũ wĩ kĩvũthya na ngananĩo,
na ĩteta na numangano ikathela.
11Ũla wendete ũtheu wa ngoo na ndeto syake nĩ nzeo,
akatw'ĩka mũnyanyae wa mũsumbĩ.
12Mwĩai Ngai nũsũvĩaa ũmanyi wa w'o;
ĩndĩ nĩwanangaa ndeto sya ala mate na mũĩkĩĩo.
13Mũndũ mũtulu aasya, “Nditonya kumaala,
ve mũnyambũ nza na nũũmbũaa!”
14Kanyw'a wa mũndũ mũka kĩlaalai nĩ ĩima ĩliku;
mũndũ ũla ũthatĩwe nĩ Mwĩai Ngai akalika nthĩnĩ.
15Ũtumanu wusũĩte ngoonĩ ya syana,
ĩndĩ syakanw'a na mũnzyũ ũtumanu ũsu ũkavetwa.
16Mũndũ ũla ũthĩnasya ngya nĩ kana ongeleele ũthwii wake mwene, kana anenge athwii mĩthĩnzĩo,
o nake akatw'ĩka ngya.
Ndeto Mĩongo Ĩtatũ sya Ũĩ
17Tea kũtũ wĩw'e ndeto sya ala oĩ,
na ũyĩkĩa ngoonĩ yaku kĩla ngũũmanyĩsya,
18nũndũ nĩ ũseo kũsyĩkalya thayũnĩ waku,
na kũineenaa kĩla ĩvinda.
19Nĩ kana wĩkwatyo waku wĩthĩwe nthĩnĩ wa Mwĩai Ngai;
kĩu nĩkyo kĩtumi ngũũtavya ndeto isu ũmũnthĩ.
20Ngũandĩkĩe maũndũ manene mĩongo ĩtatũ ma ũĩ,
ma ũkũtaa na ũkũmanyĩsya,
21ngũmanyĩsye ũla ũlũngalu na wa w'o,
nĩ kana ũnenge ala makũtũmĩte ũsũngĩo waw'o.
-1-
22Ndũkoyĩe mũndũ ngya nũndũ nĩ ngya,
kana kũlea kũnenga athĩni sila wa katĩ me kĩsilĩlonĩ,
23nũndũ Mwĩai Ngai akamatetea,
na akamina ala mamathĩnasya.
-2-
24Ndũkatume ndũũ na mũndũ ũthataa mĩtũkĩ,
ndũkekwatany'e na mũndũ ũthilĩkaa,
25ndũkese kwĩmanyĩsya mĩendele yake,
na ũikwatw'a nĩ mũteo.
-3-
26Ndũkethĩwe wĩ ũmwe wa andũ ala mathanaa kana makaĩva thiĩ mũndũ ũla ũkovete aema kũĩva.
27Waemwa nĩ kũĩva,
ũkomo waku mwene ũkooswa.
-4-
28Ndũkaakũĩĩsye ĩkonge ya mũvaka wa tene,
yĩla aaũmae maku mavandie.
-5-
29Waaona mũndũ ũtethasya wĩa wake nesa?
Ũsu akathũkũma asumbĩ,
ndakathũkũma andũ mate ndaĩa.
Currently Selected:
Nth 22: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
