Nth 21
21
1Mosũanĩo ma mũsumbĩ matongoeaw'a nĩ Mwĩai Ngai,
Mwĩai Ngai amatongoeasya vala ũkwenda ta kalũsĩ ka kĩw'ũ.
2Maũndũ onthe ala mũndũ wĩkaa onaa me maseo,
ĩndĩ Mwĩai Ngai asiasya kĩeleelo kya mũndũ.
3Mwĩai Ngai nĩwendeeaw'a nĩ ũlũngalu na sila wa katĩ mbee wa nthembo.
4Mĩng'athĩlĩĩlyo na ngathĩĩo nitongoeasya andũ athũku na ĩsu nĩ naĩ.
5Mĩvango ya ala me kĩthito kwa w'o ĩmatongoeasya methĩwe na syĩndũ mbingĩ,
ĩndĩ mũndũ ũla wĩkaa maũndũ ekalaatĩte ndesaa kũkwata syĩndũ.
6Kũkwata mothwii kwa nzĩa ya kũkengana,
nĩ syũki yĩũlũkĩtw'e nĩ kĩseve na mũteo wa kĩkw'ũ;
kũu nĩ kũmantha kĩkw'ũ.
7Ũng'endu wa andũ athũku ũkamananga,
nũndũ nĩmaleaa kwĩka ũla waĩlu.
8Mũendele wa mũvĩtany'a nĩ mũthyoeku,
ĩndĩ mwĩkalo wa ala atheu nĩ mũlũngalu.
9Nĩ kavaa kwĩkala vandũ konanĩ nyũmbanĩ ĩũlũ,
kũte kwĩkala nyũmba nthĩnĩ na mũndũ mũka wĩ ĩteta.
10Mũndũ mũthũku endaa kwĩka ũthũku,
na ndesaa kwĩw'ĩa mũtũi wake tei.
11Yĩla mũndũ wĩ kĩvũthya wakanw'a,
ala mate na ũmanyi nĩmoĩvaa.
Yĩla mũndũ mũĩ wamanyĩw'a,
nũkwataa ũmanyi.
12Ngai, ũla mũlũngalu nũmanyaa kĩla kĩendeeaa nyũmbanĩ ya mũndũ mũthũku,
na nũvalũkasya ala athũku na kũmamina.
13Mũndũ alea kwĩthukĩĩsya kĩĩo kya ngya,
o nake yĩla ũkaĩa ndakethukĩĩw'a.
14Ũthatu nũvoovaw'a nĩ mũthĩnzĩo ũnenganĩtwe kwa kĩmbithĩ,
na ĩtuvi ya wendeesyo yĩnenganĩtwe yĩvithĩtwe nĩyĩolaa ũthatu mwingĩ.
15Yĩla sila wa katĩ waatĩĩwa, ala alũngalu nĩmatanaa,
ĩndĩ ala athũku nĩmathĩnĩkaa.
16Mũndũ ũla wangangaa akauma nzĩanĩ ya ũmanyi,
eyĩthĩĩlaa wũmbanonĩ wa ala akw'ũ.
17Ũla wendaa motanu akatw'ĩka ngya,
ũla wendaa ũkĩ na mauta ndakathua.
18Ũla mũthũku atw'ĩkaa mbovosya ya ũla mũlũngalu,
na mũndũ ũte mũĩkĩĩo atw'ĩkaa mbovosya ya ũla mũlũngalu.
19Nĩ kavaa kũtũa weũnĩ,
kwĩ kũtũa na mũndũ mũka wĩ ngananĩo na ũnyungunyĩasya.
20Nyũmba ya mũndũ mũĩ yĩthĩawa na syĩndũ sya thooa mũnene,
ĩndĩ ndia nĩyanangaa syĩndũ syayo syonthe.
21Mũndũ ũla ũmanthaa ũlũngalu na ũseo,
akeethĩwa na thayũ mũasa, ũlũngalu na kũnengwa ndaĩa.
22Mũndũ mũĩ nũsindaa ndũa ya ngũmbaũ,
na ayananga ngũta ila maneekwatasya.
23Mũndũ ũla ũthimaa kĩla ũkũneena,
nĩwĩsũvĩaa kũlika thĩnanĩ.
24Mũndũ wĩ ngathĩĩo na mĩng'athĩlĩĩlyo etawa, “Mũndũ wĩ kĩvũthya;”
ekaa maũndũ na mĩng'athĩlĩĩlyo na ngathĩĩo.
25Mũndũ mũtulu oaawa nĩ wendi,
nũndũ nũleaa kũthũkũma na moko make.
26Mũthenya w'onthe mũndũ mũtulu ethĩawa na ĩtomo,
ĩndĩ mũndũ mũlũngalu nũnenganae na ndethĩawa na kĩima.
27Nthembo ya mũndũ mũthũku nĩthatasya Mwĩai Ngai,
nĩthatasya mũno mbeange ethĩwa emyumya e na kĩeleelo kĩthũku.
28Ngũsĩ ya ũvũngũ ĩkaa,
ĩndĩ ndeto sya mũndũ mwĩwi nitũaa.
29Mũndũ mũthũku etusaa nĩwĩsĩ kĩla kĩndũ,
ĩndĩ mũndũ mũlũngalu nũsũanĩaa ĩũlũ wa mĩendele yake.
30Vai ũĩ, kĩlĩko kana ũtao wa mũndũ,
ũtonya kũvĩtũka wa Mwĩai Ngai.
31Mbalasi nĩyũmbanaw'a kwondũ wa mũthenya wa kaũ,
ĩndĩ Mwĩai Ngai nĩwe ũetae ũsindi.
Currently Selected:
Nth 21: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
