Nth 20
20
1Ũkĩ nũetae kĩvũthya na kĩla kĩmilaa kĩetae kĩthokoo,
ũla ũvĩtasya nũndũ wa kũnyw'a ũkĩ ti mũĩ.
2Ũthatu mũnene wa mũsumbĩ nĩ ta kĩlulumo kya mũnyambũ,
ũla ũmũthatasya ethĩawa ayenda kwasya thayũ wake mwene.
3Nĩ ũndũ wĩ ndaĩa mũndũ kwĩvetana na ĩteta,
ĩndĩ ndia nitetanasya.
4Mũndũ mũtulu ndaĩmaa ĩvindanĩ yĩla yaĩlĩte,
kwoou ĩvindanĩ ya ngetha akamantha ĩndĩ ndakakwata kĩndũ.
5Mĩvango yĩ mosũanĩonĩ ma mũndũ nĩ ta kĩw'ũ kĩliku,
ĩndĩ mũndũ wĩ na ũmanyi nũtonya kũmĩtava.
6Kĩla mũndũ atavanasya ĩũlũ wa ũseo wake mwene,
ĩndĩ nũũ ũtonya kwona mũndũ mũĩkĩĩku?
7Mũndũ mũlũngalu ũla wĩkalaa thayũ mwĩanĩu,
syana syake ila wĩtia ikaathimwa.
8Yĩla mũsumbĩ wekalĩla kĩvĩla kyake aumye ũtw'ĩo,
nũvetangaa ũthũku w'onthe ũla woona.
9Nũũ ũla ũtonya kwasya, “Nĩnĩtheetye ngoo yakwa,
nĩ mũtheu ndi na naĩ”?
10Mavia ma kũthima mate ma w'o na ithimi ite syaw'o,
syonthe nithatasya Mwĩai Ngai.
11O na kana kamanyĩkaa kumana na meko mako,
ethĩwa meko mako nĩ maseo na nĩ malũngalu.
12Mwĩai Ngai nĩwe woombie metho ala monaa na matũ ala mew'aa.
13Ndũkende too ndũkatw'ĩke ngya,
amũka na ũkeethĩwa na lĩu mwingĩ.
14Ũla ũkũthooa kĩndũ akayaa ayasya, “Nĩ kĩthũku, nĩ kĩthũku,”
ĩndĩ auma vau ekathĩĩaa ũndũ wakĩthooa kwa thooa mũnini.
15Ethĩwa ũneenaa na ũĩ,
wĩ na kĩndũ kya thooa mũnene mbee wa thaavu kana mavia ma thooa mũnene.
16Osa ngũa ya mũndũ ũla wathanaa kũĩvĩa mũeni thiĩ wake,
myose ĩtw'ĩke ngwatĩlĩĩlyo ũndũ mũeni ũsu ũlea kũĩva.
17Lĩu ũkwatĩtwe kwa ũkengani wĩ mũyo,
ĩndĩ mũndũ amina kũũya wĩthĩawa ũilyĩ ta kĩthangathĩ kĩ kanyw'a.
18Mĩvango ĩlũlũmĩĩlaw'a na ũtao;
enda kaũnĩ ũatĩĩe ũtao wa ũĩ.
19Ũla ũendaa asukanĩte avuanasya syĩmbithĩ,
kwoou ndũkatindany'e na mũndũ ũla ũtindĩaa kũneena.
20Ũla ũumaa ĩthe kana nyinyia,
thayũ wake ũkathela ta taa ũla ũvoeaa kĩvindunĩ.
21Ũtiĩwa wosetwe mĩtũkĩ mwambĩlĩĩlyonĩ,
mũminũkĩlyonĩ waw'o ndũkaathimwa.
22Ndũkaneene wasye, “Ngeeyĩĩvanĩsya ũthũku!”
Ĩkwatye Mwĩai Ngai, na akakũtetheesya.
23Mwĩai Ngai nũthataw'a nĩ mavia ma kũthima mate maw'o,
na ithimi sya ũvũngũ ti nzeo.
24Mwĩai Ngai nĩwe ũtongoeasya mĩendele ya andũ;
andũ matonya kũmanya mĩendele yoo ata?
25Sũanĩa nesa ũtanamba kwatha Ngai kana ũkamumĩsya nthembo,
ethĩwa ti ũu ũkeelila ĩtina.
26Mũsumbĩ mũĩ nũvetangaa ala athũku,
na nũmakanasya vate tei.
27Wasya wa ngoo wa mũndũ nĩ taa wa Mwĩai Ngai,
ũla ũmanthaa kĩla vandũ nthĩnĩ wa mũndũ.
28Ũseo na ũĩkĩĩku nitumaa mũsumbĩ ekala e ũsũvĩonĩ,
ũlũngalu wake nũlũlũmĩĩlasya ũsumbĩ wake.
29Ndaĩa ya anake nĩ vinya woo,
ĩndĩ ndaĩa ya ala akũũ nĩ nzw'ĩĩ yoo yĩ mbuĩ.
30Makũna ala maũmĩasya matheasya ũthũku,
na makũna nĩmatheasya thayũ witũ nginya nthĩnĩ.
Currently Selected:
Nth 20: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
