Nth 19
19
1Nĩ kavaa mũndũ kwĩthĩwa e ngya ĩndĩ e mũlũngalu,
kũte mũndũ ũneenaa ndeto sya ngũlũ na nĩ mũtumanu.
2Ti ũseo mũndũ kũthangaaĩa ũndũ ate na ũmanyi,
mũndũ ũla wĩkalaataa nĩwaasya nzĩa.
3Yĩla mũndũ walika thĩnanĩ nũndũ wa ũtumanu wake,
nũtũlaa Mwĩai Ngai mũtĩ.
4Ũthwii nũtumaa mũndũ akwata anyanya aingĩ,
ĩndĩ ngya nĩtiawa nĩ mũnyanyae.
5Ngũsĩ ya ũvũngũ ndĩkalea kũkanw'a,
na ũla ũkenganaa ndakavonoka.
6Andũ aingĩ mamanthaa ũseo kuma kwa mũndũ mũlau,
na kĩla mũndũ endaa kũtuma ndũũ na mũndũ ũla ũnenganae mĩthĩnzĩo.
7Ana-a-ĩthe onthe ma mũndũ ngya nĩmamũmenaa,
o namo anyanyae make nĩmevathanaa nake,
o na amaatĩĩa amesũvĩte ndesaa kũkwata o na ũmwe.
8Ũla ũkwataa ũĩ nĩwĩyendete,
ũla wiaa ũmanyi akaendeea nesa.
9Ngũsĩ ya ũvũngũ ndĩkalea kũkanw'a,
na ũla ũkenganaa akaa.
10Ti ũseo ndia kwĩkala yĩ na maũndũ ma kwendeesya thayũ,
na nĩ ũthũku mbeange ngombo kũsumbĩka andũ ma ndaĩa.
11Mũndũ wĩ kĩlĩko nĩwĩsiĩĩaa kũthata mĩtũkĩ,
na kũekea mavĩtyo nĩ ndaĩa kwake.
12Ũthatu wa mũsumbĩ nĩ ta kĩlulumo kya mũnyambũ,
ĩndĩ kwonany'a ũseo wake nĩ ta ĩmwe nyekinĩ.
13Mwana mũtumanu nĩ wanangĩko kwa ĩthe,
na kĩveti kĩ ĩteta nĩ ta malovoto ma mbua matathelaa.
14Mũndũ akwataa ũtiĩwa wa nyũmba na mothwii kuma kwa asyai make,
ĩndĩ kĩveti kĩ kĩlĩko kyumaa kwa Mwĩai Ngai.
15Ũtulu nũtumaa mũndũ akoma too mũnene,
na mũndũ mũtulu nĩwĩw'aa nzaa.
16Ũla ũatĩĩaa mĩao asũvĩaa thayũ wake,
ĩndĩ ũla ũvũthĩĩasya mĩendele yake akakw'a.
17Ũla ũtetheeasya ngya akovethasya Mwĩai Ngai,
nake Mwĩai Ngai akamũĩva nũndũ wa ũu weeka.
18Kany'a mwana waku o yĩla ve wĩkwatyo,
walea kwĩka ũu, ũmũekete anangĩke.
19Mũndũ wĩ ngoo mbingĩ no nginya aĩvĩe,
o na wamũtaany'a, ũkamũtaany'a ĩngĩ na ĩngĩ.
20Ĩthukĩĩsye ũtao na ũyĩtĩkĩla ũmanyĩsyo,
nĩ kana ũkwate ũĩ wa ĩvinda yũkĩte.
21Mũndũ ethĩawa na mĩvango mingĩ ngoonĩ yake,
ĩndĩ kwenda kwa Mwĩai Ngai nĩkw'o kwĩkĩkaa.
22Ũseo wa mũndũ nĩw'o ũtumaa endwa,
na mũndũ ngya e kavaa kwĩ mũkengani.
23Kĩkĩo kya Mwĩai Ngai kĩetae thayũ,
ũla wĩ nakyo ekalaa e mwĩanĩe,
ndakakwatwa nĩ ũndũ mũthũku.
24Mũndũ mũtulu nũlikasya kw'oko kwake ĩsaaninĩ,
na aiemwa nĩ kũkũete kanyw'anĩ wake ĩngĩ.
25Kũna mũndũ wĩ kĩvũthya, na ndia ĩkooĩva,
kany'a mũndũ mũĩ, nake akakwata ũmanyi.
26Mũndũ ũla ũmũng'endeaa ĩthe na kũlũngya inyia wake,
nĩ mwana ũetae kĩvũthya na nthoni.
27Mwana wakwa, woona waeka kwĩthukĩĩsya ũmanyĩsyo,
nũkwelelũka ũtie ũĩ.
28Ngũsĩ ya mana nĩvũthasya sila wa katĩ;
mũndũ mũthũku nĩwendete ũthũku.
29Andũ ala mavũthasya meteelete ũsilĩlo,
nasyo ndia syeteelete kũkũnwa ivoko mĩongonĩ yasyo.
Currently Selected:
Nth 19: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
