Nth 16
16
1Mũndũ nĩwĩseũvĩasya mĩvango yake mwene,
ĩndĩ Mwĩai Ngai nĩwe ũnenganae ũtw'ĩo wa mũthya.
2Maũndũ onthe ala mũndũ wĩkaa ethĩawa ayona me maĩlu,
ĩndĩ Mwĩai Ngai nũmanyaa maũndũ ala mũndũ ũsũanĩĩte.
3Nenga Mwĩai Ngai mawĩa maku,
na mĩvango yaku ĩkaaĩla.
4Mwĩai Ngai nũseũvĩtye kĩla kĩndũ na kĩtumi kyakyo,
ĩĩ, o na andũ athũku kwondũ wa mũthenya wa thĩna.
5Mwĩai Ngai nũthataw'a nĩ mũndũ ũla wĩ ngathĩĩo;
manya nesa vyũ kana ndakalea kũkany'a mũndũ ũsu.
6Mavĩtyo nĩmaekeawa nũndũ wa wendo na ũĩkĩĩku,
na nũndũ wa kĩkĩo kya Mwĩai Ngai mũndũ nũtiaa naĩ.
7Mwĩai Ngai endeew'a nĩ mũndũ,
nũtumaa o na amaitha make methĩwa me na mũuo nake.
8Nĩ kavaa mũndũ kwĩthĩwa e na syĩndũ nini na ayĩthĩwa e mũlũngalu,
kũte kwĩthĩwa na ũtandĩthyo mũnene ũkwatĩtwe kwa nzĩa ĩtaĩlĩte.
9Mũndũ nĩwĩseũvĩasya mĩvango yake,
ĩndĩ Mwĩai Ngai nĩwe ũmũtongoeasya maũndũnĩ ala wĩkaa.
10Mũsumbĩ aneenaa na ũtonyi wumĩte kwa Ngai,
na motw'ĩo ala wumasya nĩ ma w'o.
11Mwĩai Ngai endaa ithimi na latili syaw'o,
na mavia onthe ma kũthima ala me mũvukonĩ nĩ wĩa wake.
12Asumbĩ nĩmathataw'a nĩ andũ ala mekaa ũthũku,
nĩkwĩthĩwa ũsumbĩ ũlũlũmĩĩlaw'a nĩ ũlũngalu.
13Mũsumbĩ nĩwendeeaw'a nĩ mũndũ ũla ũneenaa ndeto sya ũlũngalu,
na nĩwendete mũndũ ũla ũneenaa w'o.
14Ũthilĩku wa mũsumbĩ nĩ ta mũndũ ũtũmĩtwe oke kũaa,
ĩndĩ mũndũ mũĩ nũuasya woo ũsu.
15Yĩla mũsumbĩ weethĩwa na ũthyũ mũtanu, ũsu nĩ wonany'o wa thayũ,
na ũseo wake nĩ ta ĩtu ya mbua ya uũa.
16Kwĩthĩwa na ũĩ nĩ kũseo kũte kwĩthĩwa na thaavu,
na kũnyuva ũmanyi nĩ kũseo kũte kũnyuva silĩva.
17Nzĩa ya ala alũngalu ndĩsĩlaa ũthũkunĩ,
na ũla ũsũvĩaa mĩendele yake nũvĩtasya thayũ wake.
18Ngathĩĩo itongoeasya mũndũ akalike wanangĩkonĩ,
na veva wa wĩng'athĩlĩĩlyo ũtongoeasya mũndũ akavalũke.
19Nĩ kavaa kwĩthĩwa na wĩnyivyo na kwĩkalany'a na ngya,
kwĩ kũaana mũtavo na andũ ala mekathĩĩaa.
20Ũla wĩthukĩĩasya momanyĩsyo akaendeea nesa,
na ũla ũĩkĩĩaa Mwĩai Ngai akeethĩawa na ũtanu.
21Mũndũ mũĩ nĩ mũndũ wĩ kĩlĩko,
na ndeto sya kwendeesya nikusasya mũndũ.
22Ũmanyi nĩ kĩthima kya thayũ kwa ũla wĩ naw'o,
ĩndĩ ũtumanu nũeteae ndia ũkany'o.
23Kĩlĩko kya mũndũ mũĩ nĩkĩtumaa aneena ndeto nzeo,
na nĩkĩtumaa ndeto syake ikusya andũ.
24Ndeto nzeo nĩ ta ĩwa ya ũkĩ wa nzũkĩ,
nieteae mũndũ ũtanu na ũima mwĩĩnĩ.
25 #
Nth 14.12
Ve nzĩa yonekaa nĩ mũndũ ĩilyĩ ta ya w'o,
ĩndĩ mũminũkĩlyo wayo ĩtwaa mũndũ kĩkw'ũnĩ.
26Nzaa ya mũthũkũmi nĩtumaa athũkũma na kĩthito,
nũndũ ethĩawa ayenda kũvũna.
27Mũndũ ũte kĩlĩko asũanĩaa kwĩka ũthũku,
na ndeto syake nĩ ta mwaki ũvĩvasya.
28Mũndũ mũthũku nũtumaa andũ maemanwa,
na ũla ũsukanaa nũtumaa andũ me ndũũ nene mataanĩsya.
29Mũndũ mũthũku nũkengaa mũtũi wake,
na kũmũtongoesya mũendelenĩ ũte mũseo.
30Ũla ũveneasya ũngĩ ethĩawa avangĩte kwĩka ũthũku,
na ũla ũtumanasya ilomo nũtumaa ũthũku wĩthĩwa.
31Mũtwe wĩ mbuĩ nĩ ta ngovia ya ũsumbĩ ya ndaĩa;
ĩkwatawa nĩ ala mekala thayũ wa ũlũngalu.
32Mũndũ ũtathataa mĩtũkĩ e kavaa kwĩ mũndũ wĩ ũtonyi;
na ũla ũtekasya ngoo e kavaa kwĩ ũla wũkitaa akakwata ndũa.
33Andũ nĩmakũnaa kula,
ĩndĩ ũtw'ĩo wumaw'a nĩ Mwĩai Ngai e weka.
Currently Selected:
Nth 16: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
