Alo 8

Kwĩkala Tũtongoew'e nĩ Veva wa Ngai

1Vai ũsilĩlo yu kwa ala me nthĩnĩ wa Klĩsto Yesũ. 2Nũndũ mwĩao wa Veva ũla ũtũnengae thayũ nthĩnĩ wa Klĩsto Yesũ, nũnthaĩtye kuma mwĩaonĩ wa naĩ na kĩkw'ũ. 3Ngai nĩweekie kĩla Mĩao ĩtaĩ ĩtonya kwĩka nũndũ wa wonzu wa mũndũ. Kwa kũtũma Mwana wake mwene e na mwĩĩ ũvw'ana ĩno yaitũ yĩkaa naĩ, na ta nthembo kwondũ wa naĩ, nĩwaanangie naĩ nthĩnĩ wa mwĩĩ, 4nĩ kana maũndũ maĩlu ala Mĩao yendaa mekwe, matonye kwĩanĩw'a nthĩnĩ waitũ ithyĩ ala twĩkalaa kwĩanana na maũndũ ma kĩ-veva, na ti kwĩanana na maũndũ ma kĩ-mũndũ. 5Nũndũ andũ ala mekalaa kwĩanana na maũndũ ma kĩ-mũndũ masũanĩaa o maũndũ ma kĩ-mũndũ, ĩndĩ ala mekalaa kwĩanana na maũndũ ma kĩ-veva masũanĩaa o maũndũ ma kĩ-veva. 6Mosũanĩo ma kĩ-mũndũ maetae kĩkw'ũ, namo mosũanĩo ma kĩ-veva maetae thayũ na mũuo. 7Kwa kĩtumi kĩu, andũ ala maatĩĩaa mosũanĩo ma kĩ-mũndũ nĩ amaitha ma Ngai, nũndũ maikwataa Mĩao ya Ngai, na kwa w'o maitonya kũmĩkwata. 8Andũ ala maatĩĩaa mawendi ma mĩĩ yoo maitonya kũmwendeesya Ngai.

9Ĩndĩ inyw'ĩ mũyĩkalaa kwĩanana na maũndũ ma kĩ-mũndũ; mwĩkalaa kwĩanana na maũndũ ma kĩ-veva nĩkwĩthĩwa Veva wa Ngai atwĩe nthĩnĩ wenyu. Mũndũ ũla ũte na Veva wa Klĩsto, ũsu ti wake. 10Ĩndĩ ethĩwa Klĩsto atwĩe nthĩnĩ wenyu, o na kau mĩĩ yenyu nĩ mĩkw'ũ kwondũ wa naĩ, veva wenyu wĩ thayũ#8.10 veva wenyu wĩ thayũ: KanaVeva nĩwe thayũ wenyu nũndũ wa kũtw'ĩkĩthw'a alũngalu. 11#1Ako 3.16 Ethĩwa Veva wa Ngai ũla wamũthayũũkisye Yesũ kuma kwa akw'ũ atwĩe nthĩnĩ wenyu, Ngai ũsu wathayũũkisye Klĩsto Yesũ kuma kwa akw'ũ, akathayũũkya mĩĩ yenyu o nayo ĩla ĩkusaa aitũmĩa Veva wake ũla ũtwĩe nthĩnĩ wenyu.

12Kwoou ĩndĩ mbaitũ, twĩ na thiĩ, na ti wa kwĩkala kwĩanana na maũndũ ma kĩ-mũndũ. 13Nũndũ mwekala kwĩanana na mawendi ma mĩĩ yenyu, nĩmũũkw'a. Ĩndĩ ethĩwa kwa nzĩa ya Veva nĩmũũmina meko ma mwĩĩ, nĩmũkwĩkala thayũ. 14Andũ onthe ala matongoeaw'a nĩ Veva wa Ngai, asu nĩmo syana sya Ngai. 15#Mk 14.36; Aka 4.6 #Aka 4.5-7 Nũndũ Veva ũla mũnengetwe ti wa kũmũtw'a ngombo sya w'ĩa ĩngĩ, ĩndĩ mũnengetwe Veva wa kũmũtw'a syana sya Ngai, na nĩ kwa Veva ũsu tũmwĩkaĩlaa Ngai tũimwĩta, “Nau, Asa.” 16Veva o ũsu nũkũsĩĩaa vamwe na maveva maitũ kana ithyĩ twĩ syana sya Ngai. 17Nayu nũndũ twĩ syana sya Ngai, tũkakwata ũtiĩwa w'onthe ũla Ngai wiĩe andũ make, na o ta ũu tũkakwata ũtiĩwa vamwe na Klĩsto, nũndũ ethĩwa kwa w'o tũthĩnaw'a vamwe na Klĩsto, tũkakumw'a vamwe nake.

Ũkumyo ũla Ũkethĩwa

18Nosaa mathĩna ma ĩvinda yĩĩ tũĩ oou ta kĩndũ kya mana, ngĩmaelekany'a na ũkumyo ũla ũkavuanw'a kwitũ. 19Syũmbe syonthe nĩsyeteelaa na mea maingĩ Ngai avuany'e syana syake. 20#Mwa 3.17-19 Nũndũ syũmbe nĩsyatw'ĩkĩthiw'e kwĩthĩwa itetonya, ti kwa ngenda yasyo, ĩndĩ nũndũ wa kwĩthĩwa Ngai endie kwĩthĩwe kũilyĩ ũu. Ĩndĩ ũu wĩ o vo, ve na wĩkwatyo 21kana mũthenya ũmwe Ngai nũkovosya syũmbe o nasyo nĩ kana iikakwatwe nĩ wanangĩko, na kũilikya ũkumyonĩ wa syana sya Ngai. 22Nĩtwĩsĩ kana kũvika o na yu, syũmbe syonthe nilumaa nĩ woo ta wa mũndũ mũka ũkwaũnya. 23#2Ako 5.2-4 Ĩndĩ ti syũmbe syĩ syoka iũluma nĩ woo, ithyĩ o naitũ ala Veva ũtwĩe nthĩnĩ waitũ ta mũthĩnzĩo wa mbee wa Ngai, no tũlumaa nthĩnĩ waitũ tweteelete Ngai atũtw'ĩkĩthye syana syake kwa kwovosya mĩĩ yaitũ. 24Nũndũ kwa wĩkwatyo nĩtwoovoiwe, ĩndĩ wĩkwatyo wa kĩndũ mũndũ ũminĩte kũkwata ti wĩkwatyo, nũndũ nũũ ũla wĩkwatasya kũkwata kĩndũ wĩ nakyo? 25Ĩndĩ ethĩwa twĩĩkwatya kũkwata kĩndũ tũtanamba kũkwata, twĩkyeteela na wũmĩĩsyo.

26O ta ũu Veva nũtũtetheeasya wonzunĩ witũ. Ithyĩ tũyĩsĩ ũndũ twaĩlĩte kũvoya, ĩndĩ Veva mwene nũtũvoyeaa kũla kwĩ Ngai na kũluma kũtaweteka. 27Nake Ngai ũla wonaa kĩla kĩ ngoonĩ ya mũndũ, nĩwĩsĩ kĩla Veva ũsu ũkwenda, nũndũ Veva ũsu avoyeaa andũ ma Ngai kwĩanana na kwenda kwa Ngai.

28Nĩtwĩsĩ kana nthĩnĩ wa maũndũ onthe Ngai atethasya wĩa nĩ kana ameke nesa ala mamwendete,#8.28 Maandĩko amwe ma tene ma Ndeto ya Ngai maĩtye Nĩtwĩsĩ kana syĩndũ syonthe itethasya wĩa vamwe iete moseo kwa ala mamwendete Ngai namo nĩ ala wĩtĩte kwĩanana na mũvango wake. 29Nĩkwĩthĩwa asu Ngai wanyuvie kuma tene nĩmo wavangie kuma tene mavw'ananw'e na Mwana wake, na nĩ kana ũ Mwana ethĩwe wa mbee katĩ wa syana mbingĩ sya mũsyĩ ũmwe. 30Na kwoou asu Ngai wavangie kuma tene nĩwametie, na asu weetie nĩwamatwie alũngalu, na asu watwie alũngalu nĩwamalikilye ũkumyonĩ wake.

Wendo wa Ngai Kwĩsĩla kwa Yesũ Klĩsto

31Kumana na maũndũ asu onthe tũtonya kwasya ata? Ethĩwa Ngai e ngalĩko ĩla yaitũ, nũũ ũla ũtonya kũtwĩka ũndũ? 32Ngai ũla ũtaamwĩw'ĩa tei Mwana wake mwene, ĩndĩ wamumisye ethĩwe nthembo kwondũ witũ ithyonthe, akalea ata kũtũnenga o ta ũu syĩndũ ila ingĩ syonthe? 33Nũũ ũla wĩsikata anyuve ma Ngai? Ngai mwene nĩwe ũmatusaa kwĩthĩwa alũngalu! 34Nũũ ĩndĩ ũla wĩmasilĩla? Vai ũmwe! Klĩsto Yesũ ũla wakwie, ĩĩ, na mbee wa vau, wathayũũkiw'e kuma kwa akw'ũ, e ngalĩko ya kw'oko kwa aũme kwa Ngai aitũvoyea.

35Nũũ ũla wĩtũvathany'a na wendo wa Klĩsto? Nĩ monyamao, kana woo, kana thĩna, kana nzaa, kana ndw'ĩkĩwa, kana mũisyo, kana kĩkw'ũ? 36#Sav 44.22 O tondũ Maandĩko Matheu maĩtye,

“Kwondũ waku twĩthĩawa mũisyonĩ wa kũawa kĩla mũthenya,

twosawa ta malondu ma kũthi kũthĩnzwa.”

37Aiee, maũndũnĩ asu onthe twĩ na ũsindi mũnene kwondũ wake ũla watwendie. 38Nũndũ nyie nĩnĩsĩ nesa ki kana vai kĩndũ kĩtonya kũtũvathany'a na wendo wa Ngai: Kĩkw'ũ kana thayũ, kana alaĩka, kana mavinya angĩ ma ĩtunĩ, kana maũndũ ma yu, kana ala makoka, kana monene, 39kana kĩndũ kĩ ĩũlũ wa nthĩ, kana kĩ na ku nthĩ, kana kĩndũ o na kĩva katĩ wa syonthe ila syaaũmbwa, vai kĩmwe kĩkethĩwa kĩtonya kũtũvathany'a na wendo wa Ngai ũla twĩ naw'o nthĩnĩ wa Klĩsto Yesũ Mwĩai waitũ.

Currently Selected:

Alo 8: KAMBA

Highlight

Copy

Compare