Alo 7

Ngelekany'o kuma Mũtwaanonĩ

1Mbaitũ, vate nzika nĩmũkũelewa nĩ kĩla ngũmũtavya, nũndũ nĩneena na andũ mesĩ mĩao. Mĩao yovaa mũndũ ĩvindanĩ yĩla wĩ thayũ. 2Kwa ngelekany'o, mũndũ mũka mũtwae nĩwovetwe nĩ mĩao kwa mũũme ĩvindanĩ yĩla mũũme wĩ thayũ. Ĩndĩ mũũme akakw'a, mũndũ mũka ũsu ethĩwa athaw'a kuma mĩaonĩ ĩsu. 3O ta ũu mũndũ mũka ũsu akatwawa nĩ mũndũ-ũme ũngĩ mũũme e thayũ etwa kĩlaalai, ĩndĩ mũũme akakw'a, mũndũ mũka ũsu ethĩwa e na ũthasyo kwĩanana na mĩao, na akesa kũtwawa nĩ mũndũ ũngĩ ndetwa kĩlaalai. 4Ũu now'o kũilyĩ kwenyu mbaitũ. Nĩmwakwie maũndũnĩ ma Mĩao kwĩsĩla mwĩĩnĩ wa Klĩsto nĩ kana mũtwawe nĩ ũngĩ, nake nĩ ũsu ũla wathayũũkiw'e kuma kwa akw'ũ, nĩ kana tũtonye kũmũsyaĩa Ngai ũsyao. 5Yĩla twaĩ maũndũnĩ ma mwĩĩ, mawendi maitũ mathũku maamũkaw'a nĩ ĩla mĩao, na nĩmatethasya wĩa nthĩnĩ wa mamutha maitũ na kũsyaĩaa kĩkw'ũ ũsyao. 6Ĩndĩ yu kwa kũkw'a maũndũnĩ ma kĩu kyatwovete, nĩtũthaĩtw'e kuma Mĩaonĩ nĩ kana tũthũkũmae mwĩkalĩlenĩ mweũ wa Veva, na ti ũla mwĩkalĩlenĩ mũkũũ wa mĩao mĩandĩke.

Mĩao na Naĩ

7 # Kuma 20.17; Kũt 5.21 Twĩasya ata ĩndĩ? Mĩao yo nĩ naĩ? Aiee, ũu ti w'o! Kethĩwa ti ũndũ wa Mĩao, ndyĩthĩwa naamanya naĩ nĩ myaũ. Ndyĩthĩwa naamanya kwĩw'a ĩtomo nĩ kwĩka ata kethĩwa Mĩao ndyaasya, “Ndũkew'e ĩtomo.” 8Ĩndĩ naĩ ĩitũmĩa mwĩao ũsu, nĩyoonie mwanya wa kũtuma nĩthĩwa na ĩtomo ya kĩla mũthemba. Ĩndĩ vala vate mĩao, naĩ nĩ ta kĩndũ kĩkw'ũ. 9Nyie ve ĩvinda naĩ thayũ yĩla mĩao ĩtaĩkw'o, ĩndĩ yĩla mwĩao wookie, naĩ yasyũka, 10na kwa nzĩa ĩsu nakw'a. Mwĩao ũsu, ũla waĩ wa kũete thayũ, kwakwa waetie kĩkw'ũ. 11#Mwa 3.13 Nũndũ naĩ nĩyoonie mwanya mwĩaonĩ ũsu yangenga, na kwĩsĩla mwĩaonĩ o ũsu, yambũaa.

12Kwoou ĩndĩ, Mĩao nĩ mĩtheu na ũla mwĩao nĩ mũtheu, nĩ mũlũngalu na nĩ mũseo. 13Nĩkũlya, ũu nĩ kwasya kana kĩla kĩseo nĩkĩtumĩte nĩkw'a? Aiee, ũu ti w'o! Naĩ nĩyo yeekie ũu; nĩyambũaie ĩitũmĩa kĩla kĩseo nĩ kana yonanw'e kwĩthĩwa nĩ naĩ, na kwĩsĩla ũla mwĩaonĩ ĩtonye kũtw'ĩka nthũku mũno.

Kaũ ũla Ũendeeaa Nthĩnĩ wa Mũndũ

14Nĩtwĩsĩ kana Mĩao nĩ ya veva, ĩndĩ nyie nĩ o mũndũ, nĩthooetw'e naĩnĩ ta ngombo. 15#Aka 5.17 Ndieleawa nĩ kĩla nĩkaa, nũndũ kĩla nendaa kwĩka tikyo nĩkaa, na kĩla nĩmenaa kwĩka nĩkyo nĩkaa. 16Yu ethĩwa nĩkaa kĩla ndekwenda kwĩka, nĩngwĩtĩkĩla kana Mĩao nĩ mĩseo. 17Kwoou ti inyie nĩkaa maũndũ asu mathũku; naĩ ĩla yĩkalaa nthĩnĩ wakwa nĩyo yĩkaa maũndũ asu. 18Nĩnĩsĩ kana vai ũndũ ũseo ũtũaa nthĩnĩ wakwa, kana kwa nzĩa ĩngĩ, ũtũaa ũmũndũnĩ wakwa. Nĩnĩthĩawa na wendi wa kwĩka ũla ũseo, ĩndĩ nditonya kũwĩka. 19Nũndũ ũndũ ũla ũseo nendaa kwĩka ndiwĩkaa, ĩndĩ ũndũ ũla mũthũku ndendaa kwĩka nĩw'o nĩkaa. 20Ethĩwa ĩndĩ nĩkaa kĩla ndekwendaa kwĩka, kũu nĩkwonany'a kana ti inyie nĩkaa ũndũ ũsu, ĩndĩ nĩ naĩ ĩla ĩtũaa nthĩnĩ wakwa.

21Kwoou nĩnĩmanyĩte ũũ nĩ ta mwĩao kana yĩla ngwenda kwĩka ũla ũseo, nĩthĩaa nĩnyuvie ũla ũthũku. 22Nthĩnĩ ngoonĩ yakwa, nĩtanĩaa Mĩao ya Ngai, 23ĩndĩ nĩngwona mwĩao wa mũthemba ũngĩ ũũtethya wĩa mamuthanĩ makwa, naw'o wĩũkita mwĩao ũla wĩtĩkĩlĩtwe nĩ kĩlĩko kyakwa. Mwĩao ũsu ũndw'ĩkĩthĩtye ngombo ya mwĩao wa naĩ ũla wĩ mamuthanĩ makwa. 24Nyie ko nde thĩnanĩ! Nũũ ũla ũkũndaanany'a na mwĩĩ ũũ ũũtuma nĩkw'a? 25Nĩmũtũngĩa Ngai mũvea, ũla ũkwĩka ũu kwĩsĩla kwa Mwĩai waitũ Yesũ Klĩsto.

Kwoou ĩndĩ, nyie nĩ ngombo ya mĩao ya Ngai kĩlĩkonĩ, ĩndĩ mwĩĩnĩ nĩ ngombo ya mĩao ya naĩ.

Currently Selected:

Alo 7: KAMBA

Highlight

Copy

Compare