Alo 6

Twĩ Thayũ nũndũ wa Klĩsto

1Twĩasya ata ĩndĩ? Twaĩlĩte kũendeea na kwĩka naĩ nĩ kana mumo wa Ngai wingĩvĩĩe mũno mbee? 2Aiee, ũu ti w'o! Maũndũnĩ ma naĩ ithyĩ nĩtwakwie, kwoou kũtonyeka ata tũendee na kwĩka naĩ? 3Nũndũ nĩmwĩsĩ nesa kana ithyonthe ala twavatisiwe twĩthĩwe mũamba na Klĩsto Yesũ, twavatisiwe twĩthĩwe mũamba nake kĩkw'ũnĩ kyake. 4#Akol 2.12 Kwoou kwĩsĩla ũvatisonĩ witũ, nĩtwakwie na twathikwa vamwe na Klĩsto, nĩ kana o ũndũ wathayũũkiw'e kuma kwa akw'ũ kwa ũtonyi mũnene wa Ĩthe wake, o naitũ twĩthĩwe tũtonya kwĩkala mwĩkalo mweũ.

5Nũndũ ethĩwa tũkwatanĩtw'e nake kwa kũkw'a o tondũ we wakwie, o ta ũu tũkakwatanw'a nake kwa kũthayũũkw'a o tondũ we wathayũũkiw'e. 6Nĩtwĩsĩ kana ũmũndũ witũ wa tene nĩwambiwe vamwe na Klĩsto ngelany'onĩ, nĩ kana wendi witũ wa kwĩka naĩ wanangwe tũikasyoke kwĩthĩwa ngombo sya naĩ ĩngĩ. 7Nũndũ yĩla mũndũ wakw'a ethĩawa athaw'a kuma vinyanĩ wa naĩ. 8Ethĩwa tũkw'ĩte vamwe na Klĩsto, nĩtũkũĩkĩĩa kana tũkeethĩwa thayũ vamwe nake. 9Nĩtwĩsĩ kana Klĩsto nĩwathayũũkiw'e kuma kwa akw'ũ na ndakakw'a ĩngĩ; kĩkw'ũ kĩina ũkũmũ ĩũlũ wake. 10Kĩkw'ũ kĩla wakwie, akwie kwondũ wa naĩ atakakw'a ĩngĩ; naw'o thayũ ũla yu wĩkalaa, ekalaa kwondũ wa Ngai. 11Kwoou o nenyu ĩyosei ta mwĩ akw'ũ maũndũnĩ ma naĩ, ĩndĩ mwĩkale thayũ wenyu kwondũ wa Ngai nthĩnĩ wa Klĩsto Yesũ.

12Mũikaeke naĩ yĩthĩwe na ũkũmũ ĩũlũ wa mĩĩ yenyu ĩla ĩkusaa, na kũtuma mwĩka mawendi ma mwĩĩ. 13O na mũikaeke ĩmutha yenyu o na yĩmwe yĩtw'ĩke ya kwĩkaa naĩ. Vandũ va ũu, ĩnenganei kwa Ngai ta andũ mathayũũkĩtw'e kuma kĩkw'ũnĩ, na mũinengane mamutha menyu onthe kwake matũmĩwe kwa kwĩkaa ũla ũlũngalu. 14Naĩ ndyaĩlĩte kwĩthĩwa na ũkũmũ ĩũlũ wenyu ĩngĩ, nũndũ mũitongoew'e nĩ mĩao, ĩndĩ mũtongoew'e nĩ mumo wa Ngai.

Twĩ Ngombo sya Kwĩkaa ũla Ũlũngalu

15Twĩasya ata ĩndĩ? Twĩke naĩ nĩkwĩthĩwa tũitongoew'e nĩ mĩao ĩndĩ nĩ mumo wa Ngai? Aiee, ũu ti w'o! 16Nĩmũkũlya, inyw'ĩ no mwĩsĩ kana ethĩwa nĩmweenengane kwa mũndũ mũtw'ĩke ngombo syake na kũmwĩw'aa, mũtw'ĩkaa ngombo sya mũndũ ũsu mwĩw'aa? Nĩmũtonya kũtw'ĩka ngombo sya naĩ na kwoou mũikw'a, kana mũkatw'ĩka ngombo mbĩwi sya Ngai na kwoou mũituwa kwĩthĩwa alũngalu. 17Ĩvinda yĩ navu ĩtina mwaĩ ngombo sya naĩ, ĩndĩ yu nĩngũmũtũngĩa Ngai mũvea nũndũ mwĩthĩĩtwe mwĩ ewi vyũ kwĩanĩsya momanyĩsyo ala mwamanyĩiw'e, 18na o ta ũu ĩtina wa kũthaw'a kuma naĩnĩ, mũtw'ĩkĩte ngombo sya kwĩkaa ũla ũlũngalu. 19Nĩtũmĩa ndeto ii andũ matũmĩaa nũndũ wa wonzu wenyu wa kũelewa nĩ maũndũ. O ũndũ ĩvindanĩ yĩmwe mwanenganĩte mamutha menyu kwĩthĩwa ta ngombo sya kwĩkaa ũla ũvuku na kwĩkaa ũthũku mbee na mbee, o ta ũu yu no nginya mũnengane mamutha asu kwĩthĩwa ngombo sya kwĩkaa ũla ũlũngalu, nĩ kana mwĩthĩwe mwĩ atheu.

20Yĩla mwaĩ ngombo sya naĩ, mwaĩ na ũthasyo wa kũlea kwĩka ũla ũlũngalu. 21Ĩndĩ mwakwatie ũtethyo mwaũ ĩvindanĩ yĩu kwa kwĩka maũndũ ala yu mũmew'ĩaa nthoni? Mũminũkĩlyo wa maũndũ asu nĩ kĩkw'ũ! 22Ĩndĩ yu nũndũ nĩmũthaĩtw'e kuma naĩnĩ na mũkatw'ĩka ngombo sya Ngai, ũtethyo ũla mũũkwata nĩ kũtuwa atheu, na mũthya wa ũu nĩ thayũ ũtathela. 23Nũndũ ĩtuvi ya naĩ nĩ kĩkw'ũ, ĩndĩ mũthĩnzĩo wa Ngai nĩ thayũ ũtathela kwĩsĩla kwa Mwĩai waitũ Yesũ Klĩsto.

Currently Selected:

Alo 6: KAMBA

Highlight

Copy

Compare