Alo 4

Ngelekany'o ya Avalaamu Ĩyonany'a Vata wa Mũĩkĩĩo

1Twĩasya ata ĩndĩ, ĩũlũ wa Avalaamu ũmae waitũ? 2Kethĩwa atw'ĩkĩthiw'e mũlũngalu nũndũ wa kĩndũ weekie, ethĩwa na kĩndũ kya kwĩkathĩĩa nakyo, ĩndĩ ndekathĩĩa vala ve Ngai. 3#Mwa 15.6; Aka 3.6 Maandĩko Matheu maasya, “Avalaamu nĩwamũĩkĩĩie Ngai, na kwondũ wa ũu Ngai amũtw'ĩĩa kwĩthĩwa mũlũngalu.” 4Kwa mũndũ ũla ũthũkũmaa, mũsaala wake ndũtalawa ta mũthĩnzĩo, ĩndĩ ta kĩndũ ũthũkũmĩe. 5Nake mũndũ ũla ũtekwatasya meko make, ĩndĩ wĩkwatasya Ngai ũla ũtusaa mũvĩtany'a kwĩthĩwa mũlũngalu, mũndũ ũsu akatw'ĩkĩthw'a mũlũngalu kwondũ wa mũĩkĩĩo wake. 6Ndeviti o nake awetie oou yĩla waneenaa ĩũlũ wa ũathimo kwa mũndũ ũla Ngai ũtw'ĩkĩthasya mũlũngalu na ti kwondũ wa meko make. Nĩwaisye:

7 # Sav 32.1-2 “Nĩ aathime andũ ala Ngai ũmaekeete mavĩtyo moo,

na akamavetea naĩ syoo!

8Nĩ mũathime mũndũ ũla Mwĩai ũtaendeeaa kũmũtalĩla naĩ syake!”

9Nĩkũlya, ũathimo ũũ ũwetetwe nĩ kwa ala maĩkawa me oka? Aiee! Ũwetetwe o na kwa ala mataĩkawa. Nĩtwamina kwasya kana mũĩkĩĩo wa Avalaamu nĩw'o watumie Ngai amũtw'ĩĩa kwĩthĩwa mũlũngalu. 10Na ũu weekĩkie ĩndĩĩ? Nĩ atanamba kwaĩkwa kana nĩ amina kwaĩkwa? Kwa w'o nĩ atanamba kwaĩkwa; ti amina kwaĩkwa. 11#Mwa 17.10 Esie kwaĩkwa ĩtina ta kĩndũ kya kũĩkĩĩthya kana nĩwatw'ĩkĩthiw'e mũlũngalu nũndũ wa mũĩkĩĩo yĩla ũtaĩ mwaĩke. Kĩtumi kya ũu kyaĩ kũmũtw'a ĩthe wa andũ ala maĩkĩĩaa Ngai mate aĩke, na kũtalĩlwa ũlũngalu nĩ Ngai. 12O ta ũu nĩ ĩthe wa andũ ala aĩke, na tyo kwondũ wa kwĩthĩwa nĩ aĩke, ĩndĩ o vamwe na kwĩthĩwa nĩmaatĩĩaa ngelekany'o ya mũĩkĩĩo ta ũla Avalaamu ĩthe waitũ waĩ naw'o atanaĩkwa.

Watho wa Ngai Wonekaa Kwĩsĩla Mũĩkĩĩonĩ

13 # Mwa 17.4-6; 22.17-18; Aka 3.29 Yĩla Ngai wathie Avalaamu na nzyawa syake kana akamanenga nthĩ ĩtw'ĩke yoo, ndaaĩka ũu nũndũ Avalaamu nĩweekaa ũndũ mĩao ĩkwasya, ĩndĩ nũndũ wa kwĩthĩwa mũĩkĩĩo wake nĩwatumie Ngai amũtw'a kwĩthĩwa mũlũngalu. 14#Aka 3.18 Kethĩwa andũ ala maatĩĩa mĩao nĩmo maĩ manengwe ũtiĩwa ũsu, mũĩkĩĩo wĩthĩwa ũte na vata, na watho ũsu wĩthĩwa wĩ wa mana. 15Mĩao ĩetae ũthatu wa Ngai, ĩndĩ vala vate mĩao vai kũtũlwa kwa mĩao.

16 # Aka 3.7 Kwoou watho wa Ngai waendanasya na mũĩkĩĩo nĩ kana wosawe ta mumo kuma kwa Ngai, na ũnenganĩtwe kwa nzyawa syonthe sya Avalaamu: Tyo kwa ala maatĩĩaa Mĩao, ĩndĩ o na kwa ala maĩkĩĩaa ta Avalaamu. We nĩ ĩthe waitũ ithyonthe, 17#Mwa 17.5 o tondũ Maandĩko Matheu maĩtye, “Nĩnakũtw'a ĩthe wa mbaĩ mbingĩ.” Avalaamu nĩwe ĩthe waitũ methonĩ ma Ngai ũla we waĩkĩĩie, nake nĩ Ngai ũla ũsyũkasya akw'ũ na wũmbaa syĩndũ ila itaaĩthĩwa. 18#Mwa 15.5 Avalaamu e na wĩkwatyo nĩwaĩkĩĩie vandũ vataĩ wĩkwatyo, kana akeethĩwa ĩthe wa mbaĩ mbingĩ o tondũ watavĩtw'e akewa atĩĩ, “Nzyawa syaku ikeethĩwa syĩ mbingĩ ta ndata sya matunĩ.” 19#Mwa 17.17 Ndaaleela mũĩkĩĩonĩ o na asũanĩa kana mwĩĩ wake weanene na ũla mũkw'ũ, nũndũ aĩ na ũkũũ wa myaka vakuvĩ ĩana, kana asũanĩa ĩũlũ wa Sala mũka wake kwĩthĩwa e ngũngũ. 20Ndaakwatwa nĩ nzika sya kũlea kũĩkĩĩa kĩu Ngai wamwathie, ĩndĩ mũĩkĩĩo wake nĩwaendeeie kwĩthĩwa wĩ mũlũmu, akĩmũkumya Ngai. 21Nĩweesĩ nesa kana Ngai nũtonya kwĩka kĩla wathanĩte. 22Kĩu nĩkyo kĩtumi Avalaamu, kwondũ wa mũĩkĩĩo, “Ngai wamũtw'ĩĩie kwĩthĩwa mũlũngalu.” 23Ndeto isu ikwasya, “Ngai wamũtw'ĩĩie kwĩthĩwa mũlũngalu,” iyaandĩkwa kwondũ wa Avalaamu e weka, 24ĩndĩ o na kwondũ witũ ithyĩ ala tũmũĩkĩĩa Ngai ũla wamũthayũũkisye Yesũ Mwĩai waitũ kuma kwa akw'ũ. 25#Ĩsa 53.4-5 Ngai amũnenganie Yesũ akw'e kwondũ wa naĩ sitũ, na amũthayũũkya nĩ kana tũtuwe kwĩthĩwa alũngalu.

Currently Selected:

Alo 4: KAMBA

Highlight

Copy

Compare