ABAIBIRANIA 7

Obokuani bwa Melkizedeki

1Naki Melkizedeki oyio nigo arenge omoruoti o Salemu, omokuani o Nyasae Ore Igoro Mono. Ekero Ibrahimu are koirana korwa ase ogoita abaruoti, Melkizedeki akaumerana nere, akamosesenia. 2Na Ibrahimu akamwatanera ensemo ya ikomi y’ebinto bionsi. Ritang’ani engencho y’erieta ria Melkizedeki nigo ere iga: “Omoruoti bw’Oboronge”, naende nigo are omoruoti o Salemu, engencho yaye: “Omoruoti bw’Omorembe”. 3Ere tarenge na ise, gose na ng’ina, gose ne chisokoro chiaye; tarenge nomochakano bw’amatuko aye, gose nomoerio bw’obogima bwaye, korende ogwekanigwe n’Omwana o Nyasae. Igo agendererete koba omokuani o kare na kare.

4Gaki, rigereria buna omonto oyo arenge omonene! Ibrahimu, omogaaka oito o kare, akamoa ensemo ya ikomi y’ebinto asakorete. 5Na ase abana b’ororeria rwa Lawi, baria baare konyora obokuani, mbaare nogochika korwa ase amachiko koira ensemo ya ikomi korwa ase abanto bamwabo, nonya barabwo barenge ab’ororeria rwa Ibrahimu. 6Korende Melkizedeki, nonya tarenge bw’ororeria rwabo, akaira ensemo ya ikomi korwa ase Ibrahimu, na akamosesenia ere oyorenge ne chiira. 7Okoamererania tikoiyo nonya ng’ake ng’a oria omoke osesenigwa noria omonene. 8Na ase ororeria rwa Lawi mwanyabanto, abakonyorekana namakweri, nkonyora bare ensemo ya ikomi, korende aiga ere oyogwatorwa ng’a moyo are nkoyenyora are. 9Igo nenyare gotebwa, ng’a goetera ase Ibrahimu nonya Lawi, oyore konyora ensemo ya ikomi, nere naruete ensemo ya ikomi, 10ekiagera arenge ase ekebono gia sokororia yaye, ekero Melkizedeki aumeranete na Ibrahimu.

11Gaki, onye oboikeranu bware konyorekana ase obokuani bwa Lawi, naki ase obwo abanto banyorete amachiko, inki kiagerete omokuani onde abekwe, oyore koreng’ana buna Melkizedeki, na tatoretwe koreng’ana buna Haroni? 12Naki obokuani koboraonchorwe, goika okoonchorwa kw’amachiko boigo kobeo. 13Naki omonene oito, amang’ana aya akwanetwe igoro yaye, nigo arenge bw’ororeria ronde oroao, na onde tarenge korwa ase ororeria orwo ore gokorera ase egesasimero. 14Naki igo are maiso marore ng’a ere nigo arwete ase ororeria rwa Yuda. Na ekero Musa akwanete igoro y’ororeria orwo takwanete ing’ana rinde igoro y’abakuani.

15Kerabe omokuani onde oorokire oyore koreng’ana buna Melkizedeki amang’ana ayio nigo are maiso marore mono kobua. 16Ere igo obeire omokuani, tari ase ogochika kw’omoroberio bw’ogotunyana ororeria, korende nase chinguru chi’obogima botari nomoerio. 17Naki obereirwe kirori ng’a.

“Aye n’Omokuani o kare na kare,

koreng’ana buna Melkizedeki.”

18Naki chinguru chi’ogochika koria kwe ritang’ani nigo chiasiretigwe ase engencho y’oboreu bwaye na ogotaisanera kwaye. 19Naki rinde tiriri riaikeranetigwe namachiko. Ribaga ri’ayio ogosemeria okore okuya mono kobua gokarentwa, na ase okwo twamoikire Nyasae ang’e.

20Kobua mono obokuani obo tibwarenge gokoreka botari nemuma. 21Naki abwo baare kobekwa ase obokuani tibare kobekwa amo nemuma, korende Yeso akabonyora amo nemuma goetera asare oyo omotebetie,

“Omonene otianire, gose takoonchora ebirengererio biaye,

Aye n’Omokuani o kare na kare.”

22Gaki, ase ekerengo eke Yeso obeire oyo bw’obomaene bw’okobwatana kore okuya kobua.

23Baria barenge abakuani be ritang’ani barenge abange, ekiagera batangetwe namakweri, tibagendererete, 24korende ere, ekiagera agendererete kare na kare, nare nobokuani botari koonchoka. 25Ase ayio, nare nokobua gw’okobatooria kegima abwo bagocha ase Nyasae goetera asare, ekiagera nigo are moyo botambe ase okobasabera.

26Naki nigo etogwenerete intwe tobe n’Omokuani Omonene buna oyo, oyore omochenu, otari na komocha, otari na kemoa, bwatananetwe korwa ase abanyene ebibe, oimokereretigwe igoro ya igoro. 27Ere tagwenerete korua ebing’wanso kera rituko, buna abakuani bande abanene, ritang’ani ase engencho y’ebibe biaye omonyene, naende ase engencho y’ebibe bi’abanto, ekiagera ayio nigo ayakorete ara rimo rioka ekero eruete ere omonyene. 28Naki amachiko nigo are kobeka abanto abare noboreu babe abakuani abanene, korende ring’ana ri’emuma, eriachete nyuma y’amachiko, riabekire Omwana, oyoikeranetigwe kare na kare.

Currently Selected:

ABAIBIRANIA 7: EKEGUSIIBBLE

Highlight

Copy

Compare