ABAIBIRANIA 6

1Ase ayio, totige okworokereria kwe ritang’ani gwa Kristo, togenderere toikere oboikeranu. Titobeka naende oboroso bw’okoonchoka korwa ase ogokora gotari nobogima, na obw’okomwegena Nyasae, 2na okworokereria gwe chibatiso, na okobekerwa kw’amaboko, na okobokigwa kw’abakure, na okogambigwa gwa kare na kare. 3Natokore ayio, Nyasae karatwanchere. 4Abwo baikire konyora omobaso, na koigwa ekeegwa gekorwa igoro, na babeire ababwatani b’Omoika Omochenu, 5na koigwa obuya bwe ring’ana ria Nyasae amo nogokora gwe chinguru gw’ekero kegochi‐gocha, 6na nyuma y’ayio kobeatananire, tekonyarekana abwo bakorwe abayia naende ase okoonchorwa, ekiagera bamobambire naende Omwana o Nyasae barabwo abanyene, na komosookia maiso marore. 7Naki omogondo oyokonywa embura egotwa engaki ase engaki, na gokinia chinyeni, chigokonya abwo bakoyorema, nigo okonyora ogosesenigwa gokorwa ase Nyasae. 8Korende korakinie amagwa na amageri, nigo oraangwe na koba ang’e nokorangererigwa, na omoerio oye nogosambwa.

9Korende abanchani, nonya togokwana ayio, ntore nobomaene igoro yaino, ng’a mwanyorire amang’ana amaya kobua, ayakorenta ogotooreka. 10Naki Nyasae tari buna oyotari omoronge, goika eebe emeremo yaino, na obwachani boria mwaorogetie ase engencho y’erieta riaye ekero mwakorerete abachenu, na nonya mbono nkobakorera more. 11Na intwe ntoganetie mono kera oyomo oino aorokie omokia oria goika omoerio, na igo amanye obomaene oboikeranu bw’ogosemeria kwaino. 12Timoba aboro, korende mobe abegi b’abaraire ayabarieretwe chiira, buna omwando, goetera ase okwegena na oboremereria.

Eira ya Nyasae ney’obomaene

13Naki ekero Nyasae arierete Ibrahimu eira agatiana; na ekiagera atarenge nonde omonene komobua asare ere aranyare gotiana, agetiania ere omonyene, 14agateba, “Ekeene, ogosesenia ningosesenie, na okomenta ninkomentekie.” 15Naboigo ase okoremereria Ibrahimu akanyora ayarieretwe eira. 16Naki abanto nigo bagotiana ase oyore omonene kobabua, na omoerio bw’okoamererania nemuma egokoora. 17Ase ayio, ekero Nyasae arigetie koborokia mono kegima abaraire omwando oria abarierete eira buna atanyare koonchora ayaroberetie, akabeka emuma gati. 18Ase igo, ase ebinto bibere bitanyare koonchorwa, ime ase ebio Nyasae takonyara gokwana oborimo, intwe, abatwatameire obotamero, tonyore okoremigwa ogokong’u kobwata ogosemeria koria kwabekirwe bosio bwaito. 19Ogosemeria okwo tore nakorokwo buna ekerochi ki’omoyo, okore ne chinguru, na gotari koonchoka, kogosoa aase are ime moino y’etoto. 20Aase aria Yeso asoete buna omotang’ani oito, na ase engencho yaito, ekero abeire Omokuani Omonene o kare na kare, koreng’ana buna Melkizedeki.

Currently Selected:

ABAIBIRANIA 6: EKEGUSIIBBLE

Highlight

Copy

Compare