EKEKIELI6 38
38
Gogi okoba egekorero kia Nyasae
1Ring’ana ri’Omonene rigacha asende, rigantebia: 2“Aye mwanyabanto, onchoka origererie Gogi bw’ense ya Magogi, oyore omogambi bw’ense ya Rosi, na eya Meseki, na eya Tubali, obane mamincha yaye, 3omotebie ng’a aya naro Omonene Nyasae agoteba: Aye Gogi, omogambi omonene bw’ense ya Rosi, na eya Meseki, na eya Tubali, inche nigo inde mamincha yao. 4Ninkoonchore gochia nyuma, ning’agie ebigobanio ase chintakunero chiao erinde nkorente aye amo nabarwani bao bonsi b’esegi, ne chibarasi, na abariini be chibarasi, bonsi ababogoretie ebirwanero bi’esegi; omoganda oyio omonene nigo orabe obogoretie ching’aya, ne chinguba, na emioro. 5Abarwani b’Ayemi, na aba Etiopia, na aba Libia, mbabe amo nabarabwo; bonsi mbabe babogoretie chinguba na ebigogwa b’ebioma. 6Gomeri amo nomoganda oye bwonsi bw’esegi, na egesaku gia Togarima kemenyete aare, ensemo ya sugusu, amo nemeganda yaye yonsi, ee, abanto abange mbache amo naye. 7Eariganie, bwebeke ang’e, aye amo nomoganda oyio osangererekanire asore. Aye obe omoraai obo. 8Nyuma y’amatuko amange noche korootwa naende. Ase emiaka egochi‐gocha nogende ase ense eria yarenge nesegi, korende bono nigo ere nobotoereru, ense eria ase abanto basangereretigwe korwa ase ebisaku ebinge, agwo ase ebitunwa bi’Abaisraeli biarenge bigendererete koba bosa botambe. Abanto bonsi b’aroro nigo barentetwe korwa ase ebisaku ao ao, na bono nao bamenyete bare nomorembe. 9Aye notiire, obachiere buna ekembugu‐mbugu, obe buna riire otube ense, aye na emeganda yao yonsi, na abanto abange bare amo naye.
10“Aya naro Omonene Nyasae agoteba: Ase engaki eyio aye nigo orabe nemeroberio ase ebirengererio biao, oraroberie gokora ayare amabe. 11Aye nigo oratebe iga: Ngochiera inde ense ere nemechie etagiteiri chindwaki; ning’umokere abanto abwo begaarete bare nobotoereru; bonsi nigo bamenyeteo bategitereti chindwaki, tibabwati ebiita gose emekorogoto egosieka. 12Norengererie gochia gosakora na kwenyorera ebinto ase okorambora okoboko kwao gochia aase arenge bosa na bono amenyirwe nabanto. Ee, norambore okoboko kwao gochia ase abanto basangereretigwe korwa ase ebisaku ao ao, na bono mbabwate chitugo na ebinto ebinge, agwo ase bamenyete egati‐gati y’ense. 13Erio abanto ba Seba, na aba Dedani, na abaonchoreria ba Tarisisi, amo nabatang’ani babo bonsi banga chindo chinsae mbakoborie: Nigo gwachire gwosa na gosakora? Inee! Nigo gwasangereirie emeganda yao gocha koira ebisakorwa, buna chitahabu, ne chifeta, ne chitugo, na ebinto, erinde oire ebisakorwa ebinge?
14“Ase ayio, aye mwanyabanto, bana otebie Gogi ng’a aya naro Omonene Nyasae agoteba: Ase engaki eyio Abaisraeli, abanto baane, mbabe bamenyete ase obotoereru, nario oramanye amang’ana ayio. 15Erio noche korwa aase ao, agwo sugusu y’aare; nigo orache amo nabanto abange, bonsi bariinete chibarasi, bare omoganda omonene ore nabarwani esegi abange. 16Aye Gogi, nochiche korwania Abaisraeli, abanto baane. Noche buna riire otube ense eyio. Ase amatuko agochigocha ninkorente orwanie ense yaane, erinde abanto b’ebisaku bamanye inche, ekero ndeorokie ase amaiso abo ng’a inche inde omochenu ase egati yaino. 17Aya naro Omonene Nyasae agoteba: Aye naye omonto oria nakwanete igoro yao ase chingaki chia kare goetera ase abasomba baane ababani b’Abaisraeli; barabwo bakaba bakobana emiaka ase emiaka ng’a ninkorente orwanie Abaisraeli.
Nyasae okoa Gogi egesusuro
18“Korende ase rituko erio Gogi arache korwania ense y’Abaisraeli, endamwamu yane entindi inayoke buna omorero. Nabo Omonene Nyasae atebire. 19Nakwanire inde nerisemi na ekeririanda kenga omorero ng’a ekeene ase rituko erio omotengecho omonene nobe ase ense y’Abaisraeli. 20Erio chinswe chire nyancha, ne chinyoni chia igoro, ne ching’iti chire ase ense, na chionsi echikwagura ase riroba, nchitengechigwe ase obosio bwane, amo nabanto bare ase ense. Ebitunwa mbitegoke bigwe inse amo nebitare, na kera oboagacho mbogwe inse. 21Omonene Nyasae nigo agoteba iga: Nindete omoro orwanie Gogi agwo ase ebitunwa biane bionsi, erio kera omonto aite oyomwabo nomoro. 22Nimonachere ekina goetera ase oborwaire bogoita, na ogoiteka kw’amanyinga; nindete igoro yaye, na igoro y’emeganda yaye y’esegi, na abanto abange bare amo nere, embura ere nomoubera, na amagena are nomorero mbibaite. 23Ninyeorokie ng’a inche nomonene na omochenu; ninyemanyekanie ase amasio ’ebisaku ebinge. Erio abanto mbamanye ng’a inche ninche Omonene.
Currently Selected:
EKEKIELI6 38: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
