EKEKIELI6 37
37
Rikura riarenge namauga amomo
1Okoboko kw’Omonene kogacha igoro yane, na Omonene akang’ira goetera ase Omoika oye, akambeka ase egati ye rikura riaichire amauga. 2Akang’etia ase egati y’amauga aria, nkarora ng’a nigo arenge amange mono ase rikura riria, naende nkarora ng’a nigo arenge amomo pa. 3Erio akamboria, “Aye mwanyabanto, amauga aya nanyare koba moyo?”
Nkairaneria, nkamotebia: “Aye Omonene Nyasae, naye omanyete.”
4Naende agantebia, “Banera amauga aya, oyatebie: Inwe amauga amomo, igwa ring’ana ri’Omonene! 5Aya naro Omonene Nyasae akobatebia inwe amauga: Rora, nimbeke omoika bw’obomoyo ime yaino, na inwe mobe moyo naende. 6Nimbabekere emeki, mbabekere ne chinyama, nimbatube ne risankwa, naende mbautere omoika bw’obomoyo, na inwe mobe moyo naende. Erio nario moramanye ng’a inche ninche Omonene.”
7Ase ayio nkabana buna Omonene anchigete: na ekero nagendererete kobana, nkaigwa eriogi rinene riarenge negetitiro; amauga ayio agacha amo, riuga rikabwatana neriuga riamwabo. 8Ekero narigereretie, nkarora emeki egacha igoro y’amauga aria, ne chinyama chikaba ase emeki, ne risankwa rikabituba, korende omoika torenge ime yabo.
9Naende Omonene agantebia, “Aye mwanyabanto, bana orangerie omoika, bana oyotebie ng’a aya naro Omonene Nyasae agoteba: Aye omoika, inchuo korwa ase chimbeo inye chi’ense, erio outere aba iga baitetwe omoika bw’obomoyo, erinde babe moyo naende.”
10Erio nkabana buna Omonene anchigete. Omoika bw’obomoyo ogasoa ime yabo, barabwo bakaba moyo, bagatenena namagoro abo; nigo barenge omoganda omonene mono.
11Agwo Omonene agantebia, “Aye mwanyabanto, amauga aya naro egesaku gionsi ki’Abaisraeli. Rora, barabwo nigo bagoteba: Amauga aito omire pa, na ogosemeria gwaito gwasirire; intwe bono twasirigwe kegima. 12Ase ayio, bana ng’a aya naro Omonene Nyasae agoteba: Inwe abanto baane, rora, ninyigore chimbeera chiaino, mbarusieo, erinde mbairanie gochia inka, ase ense y’Abaisraeli. 13Inwe abanto baane, ekero ekio ndaigore chimbeera mbarusieo, erio nario moramanye ng’a inche ninche Omonene. 14Inche Omonene nigo ngoteba iga: Nimbeke omoika one ime yaino, na inwe mobe moyo. Nimbarente, mbabeke ase ense yaino. Erio momanye ng’a ninche Omonene nakwanire ayio, boigo nayakorire.”
Abayuda na Abaisraeli mbabe ab’oboruoti obomo
15Naende ring’ana ri’Omonene rigacha asende, rigantebia: 16“Aye mwanyabanto, imokia enyimbo oyerike: Ase Abayuda na ase Abaisraeli abwo babwatanire nabarabwo. Naende imokia enyimbo ende oyerike: Ase enyomba ya Yusufu (nero eya Efraimu) na ase Abaisraeli bonsi babwatanire nenyomba eyio. 17Chinyimbo echio ochibwatanie amo chibe enyimbo eyemo ere ase okoboko kwao. 18Ekero abanto bamino barakoborie iga: Inee! Nototebie engencho gwakorera iga? 19Obatebie ng’a aya naro Omonene Nyasae agoteba: Rora, ninyimokie enyimbo y’enyomba ya Yusufu (eyio ere ase okoboko gwa Efraimu) amo nebisaku bi’Abaisraeli, ebio biabwatanire nero; erio inyebwateranie amo nenyimbo y’Abayuda, erinde chibe enyimbo eyemo ere ase okoboko kwane.
20“Chinyimbo echio orabe kwarikire ochibwate ase okoboko kwao agwo ase amaiso ’abanto. 21Erio obatebie ng’a aya naro Omonene Nyasae agoteba: Naama! Nindusie Abaisraeli korwa ase egati y’abanto b’ebisaku agwo ase bairetwe, mbasangererie korwa ase chinsemo chionsi, mbarente ase ense yabo. 22Nimbakore babe egesaku ekemo ase ense eyio, agwo ase ebitunwa bi’Abaisraeli. Omoruoti oyomo nabe okogambera bonsi. Tibakogenderera koba ebisaku bibere, gose gwatananeka babe amaruoti abere. 23Tibakogenderera gwesoyia ase ogotacheneka ase ogosasima emegwekano yabo, gose ase ogokora kwabo gw’okogechia, gose ase ogosaria kwabo konde gwonsi. Nimbatoorie korwa ase obomenyo bwabo bwonsi agwo aase bakorerete ebibe, nimbachene. Erio mbabe abanto baane, na inche nimbe Nyasae obo. 24Daudi, omosomba one, nere orabe omoruoti obo, na barabwo mbabe nomorisia oyomo, mbabwatie emeroberio yane echikire, naende babwate amachiko aane na koyakora. 25Mbamenye ase ense eyio chisokoro chiabo chiamenyete, eyio naete Yakobo, omosomba one. Barabwo mbamenyeo, boigo na abana babo, na abachokoro, na abachokororia, goika kare na kare; na Daudi, omosomba one, nere orabe omogambi obo goika kare na kare. 26Ninkore okobwatana kw’omorembe amo nabarabwo; okwo nigo korabe ogwa kare na kare. Nimbabeke aroro, mbamentekanie. Nimbeke Obomenyo bwane Obochenu bobe ase egati yabo kogenderera botambe. 27Obomenyo bwane mbobe amo nabarabwo, na inche nimbe Nyasae obo, na barabwo mbabe abanto baane. 28Ekero Obomenyo bwane Obochenu boragenderere kobeera amo n’Abaisraeli kogenderera botambe, erio abanto b’ebisaku mbamanye ng’a inche Omonene nigo ngochena Abaisraeli.”
Currently Selected:
EKEKIELI6 37: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
