EKEKIELI6 36
36
Nyasae ogosesenia Abaisraeli
1“Aye mwanyabanto, bana otebie ebitunwa bi’Abaisraeli: Inwe ebitunwa bi’Abaisraeli, igwa ring’ana ri’Omonene! 2Aya naro Omonene Nyasae agoteba: Ababisa baino babasekereire, bagoteba: Ahaa! Aase aimokererete igoro a kare ase baare gosasimera abeire aaito.
3“Ase ayio, bana otebe ng’a aya naro Omonene Nyasae agoteba: Inwe ebitunwa, ababisa baino babasaririe babatigire bosa, babamerire ase chinsemo chionsi, erinde monyare koba enibo y’ebisaku biatigarete, naende abanto babeire bakobakwana bobe na kobachaya. 4Ase ayio inwe ebitunwa bi’Abaisraeli, igwa ring’ana ri’Omonene Nyasae! Aya naro Omonene Nyasae akobatebia inwe ebitunwa, na ebigoro, ne chindooche, na amakura, na amaturi, na emechie eng’anyire na gosakorwa, naende echayire nebisaku bire ase chinsemo chionsi.
5“Ee, aya naro Omonene Nyasae agoteba. Ekeene, nakwanire inde ne ribero rigwoka igoro y’ebisaku bitigarete, na igoro y’Abaedomu bonsi, abwo bairire ense yane koba eyabo, bare ne chinkoro chigogete na ebirengererio bi’oboenenu, erinde baserie abanyene ense, na koyesakora.
6“Aye bana igoro y’ense y’Abaisraeli, otebie ebitunwa, na ebigoro, na amaranya, na amakura, ng’a aya naro Omonene Nyasae agoteba: Rora, nakwanire inde ne risemi na ekeririanda, ekiagera mwachandekire ase ogochaywa nabanto b’ebisaku. 7Ase ayio, aya naro Omonene Nyasae agoteba: Naimokirie okoboko kwane igoro na goteba: Ekeene, abanto abwo b’ebisaku babaetanaine mbachaywe barabwo boka abanyene. 8Korende inwe ebitunwa bi’Abaisraeli, mokinie chinsagia, mwame amatunda ase Abaisraeli, abanto baane, ekiagera barabwo babeire ang’e koirana inka sobo. 9Rora, inche nigo inde ase ensemo yaino, nimbairanere, inwe namoremwe na kobusurwa. 10Ninsangererie abanto abange bache asemore bamenyeo, ee, Abaisraeli bonsi; emechie yaino nemenywe naende, na amatombe naro naagachwe naende. 11Ninsangererie gocha asemore abanto abange, ne ching’iti chinyinge. Abanto mbamentekane babuche, ne ching’iti boigo. Nintige momenywe buna engaki eria ya kare, na nimbakorere amaya abuete aria amatang’ani. Erio nario moramanye ng’a inche ninche Omonene. 12Nindete Abaisraeli, abanto baane, bataare igoro yaino, mbabaire inwe, na inwe mobe omwando obo. Timokogenderera goita abana babo.
13“Aya naro Omonene Nyasae agoteba: Abanto nigo bagoteba ng’a aye ense nigo okoria abanto, naende gwaitire abana b’egesaku kiao. 14Ase ayio bono tokogenderera koria abanto, gose goita abana b’egesaku kiao. Nabo Omonene Nyasae atebire. 15Tinkogotiga osekererwe nabanto b’ebisaku nonya ng’ake, gose togochaywa nabanto. Aye togotiga egesaku kiao kegwe. Nabo Omonene Nyasae atebire.”
Obogima oboyia bw’Abaisraeli
16Naende ring’ana ri’Omonene rigacha asende, rigantebia: 17“Aye mwanyabanto, ekero Abaisraeli bamenyete ase ense yabo, bakayekora ekaba eyetachenegeti goetera ase chinchera chiabo na ogokora kwabo, ekiagera ogokora kwabo nigo kwabete ase obosio bwane buna ogotacheneka kw’omokungu, ekero are nomotienyi. 18Nkaumora endamwamu yane asebare, ekiagera baiterete amanyinga ’abanto ase ense eye, na ekiagera bakorete ense ekaba eyetachenegeti ase ogosasima emegwekano. 19Nkabasiarera gochia ase egati y’abanto b’ebisaku, bakaba besiarerete ase chinse ao ao. Nkabanachera ekina koreng’ana norogendo rwabo, na ogokora kwabo. 20Korende aase aande onsi bagendete ase egati y’abanto b’ebisaku ebio, nigo bakorete erieta riane richenu rikaba eritachenegeti, na abanto bagakwana igoro yabo, bagateba: Aba nabwo abanto b’Omonene, nonya naboigo baserigwe korwa ase ense eyio yaye. 21Korende ngechandera erieta riane richenu erio Abaisraeli bagerete rigakorwa rikaba eritachenegeti ase egati y’abanto b’ebisaku ebio ase bagendete.”
22“Ase ayio, tebia Abaisraeli ng’a aya naro Omonene Nyasae agoteba: Inwe Abaisraeli, tingokora ayio ase engencho yaino, korende nase engencho y’erieta riane richenu, erio mwakorire koba eritachenegeti ase egati y’ebisaku ebio ase mwagendete. 23Ninchene erieta riane rinene, erio riakoretwe rikaba eritachenegeti ase egati y’abanto b’ebisaku, erieta erio inwe mwakorete rikaba eritachenegeti ase egati yabo. Ekero ndeorokie ase amaiso abo ng’a nomochenu inde ase egati yaino, erio nario abanto b’ebisaku baramanye ng’a inche ninche Omonene. Nabo Omonene Nyasae atebire. 24Nimbasangererie inwe korwa ase egati y’abanto b’ebisaku na korwa ase chinse chionsi, erio mbarente ase ense yaino. 25Nimbanyororokerie amache amakenonoku, na inwe mocheneke korwa ase ogotacheneka kwaino gwonsi, na korwa ase emegwekano yaino mogosasima. Ee, nimbachene. 26Nimbae chinkoro chinyia, na mbeke omoika omoyia ime yaino; nindusie korwa ase emebere yaino chinkoro echio chire chinkong’u buna rigena, naende mbae echire chinyororo buna chinyama. 27Nimbeke omoika one ime yaino, erio mbaonchore mobwatie emeroberio yane echikire, morende amachiko aane na moyakore. 28Inwe momenye ase ense eyio naete chisokoro chiaino; inwe mobe abanto baane, na inche imbe Nyasae oino. 29Nimbatoorie korwa ase ogotacheneka kwaino gwonsi. Nimbarentere endagera, inyementekanie mono, tingotiga enchara eche asemore. 30Nimente amatunda ase emete, na emegondo yame chindagera chinyinge, nario abanto b’ebisaku batabaise kobasekerera ase engencho y’enchara. 31Erio moinyore chinchera chiaino chimbe, na ogokora kwaino gotarenge okuya, mwegeche inwe abanyene ase engencho y’obobe bwaino, na ogokora kwaino gw’okogechia. 32Inwe Abaisraeli, tingokora amaya ayio ase engencho y’ogokora kwaino; momanye amang’ana ayio buya kegima. Inwe goika mosookigwe ase engencho y’ogokora kwaino. Nabo Omonene atebire.”
33“Aya naro Omonene Nyasae agoteba: Ase rituko erio ndabe nabachenire korwa ase ebibe biaino bionsi, nindue ribaga emechie eyio emenywe, na amaagacho ayio atagoretwe aagachwe naende. 34Ense eyio yatigetwe ere bosa neremwe naende, gose abaeti tibakoyerora egendererete koba bosa. 35Abanto mbatebe:” “Ense eye yasaretigwe egatigwa ere bosa, bono yabeire buna omogondo o Edeni, na emechie eyio yatagoretwe egatigwa ere amaturi, bono yamenyirwe na kogiterwa chindwaki. 36Erio abanto b’ebisaku ebio biatigarete bibaetanaine mbamanye ng’a inche ninche Omonene naagachire aase agwo aasaretigwe, naende nasimekire chimbusuro ase emegondo yatigarete ere bosa. Ninche Omonene nakwanire, goika nkore ayio.”
37“Aya naro Omonene Nyasae agoteba: Ninyanchere Abaisraeli bamborie ng’a mbakorere ayio; mbabuchie babe buna amaicho e ching’ondi. 38Nimbamentekanie babe abange buna ching’ondi chichenegete chirabe echi’ebing’wanso agwo Yerusalemu, ase engaki y’Amatuko Amanene; barabwo mbaichore ase emechie yatigetwe ere amatombe. Erio nario baramanye ng’a inche ninche Omonene.”
Currently Selected:
EKEKIELI6 36: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
