EKEKIELI6 34
34
Abarisia b’Abaisraeli
1Ring’ana ri’Omonene rigacha asende, rigantebia: 2“Aye mwanyabanto, bana, otebie abarisia b’Abaisraeli ng’a aya naro Omonene Nyasae akobatebia: Obobe nobwaino, inwe abarisia b’Abaisraeli, ekiagera mwabeire mokwerageria inwe mweka abanyene! Inee! Tegwenereti abarisia barisie ching’ondi? 3Nigo mokoria echire chinoru, naende mwabeka chianga chiroisirie korwa ase amarionya abo; ee, nigo mokonyenya echire chinoru, korende timori korisia riicho erio moriigotie. 4Echio chire chindeu, timori gochibeka chinguru, na echire chindwaire, timori gochigwenia, na echibunegete, timori gochiboera ebitete, na echiaserebekanire, timori gochiirania asende, na echiasirire, timori gochirigia; mwabeire mogochigambera ase ogochibetereria more nobotindi. 5Ase ayio chiaserebekanire gochia aande onsi, ekiagera chitabwati omorisia, chiabeire endagera ye ching’iti chionsi chi’orosana, ee chiaserebekanire. 6Bono ching’ondi chiane nigo chigotayaya ase ebitunwa bionsi, na ase kera ekegoro egetambe. Ching’ondi chiane chiaserebekanire gochia aande onsi ase ense, na onde tari ogochirigia gose gochiitaa.
7“Ase ayio, inwe abarisia, igwa ring’ana ri’Omonene. 8Omonene Nyasae nigo agoteba iga: Ekeene, buna inche inde moyo, ching’ondi chiane chiabeire chigotwarwa na koba endagera ya kera eng’iti y’orosana, ekiagera omorisia ataiyo, naende abarisia baane tibagendeti korigia ching’ondi chiane, korende babeire bakwerageria boka abanyene, na tari ching’ondi chiane bakorageria. 9Ase ayio, inwe abarisia, igwa ring’ana ri’Omonene: 10Aya naro Omonene Nyasae agoteba: Naama! Inche nigo inde mamincha y’abarisia abwo. Ninganie ching’ondi chiane korwa ase amaboko abo; nimbaange, tibakogenderera koba abarisia be ching’ondi chiane; abarisia abwo tibakogenderera kwerageria boka abanyene. Nintoorie ching’ondi chiane korwa ase emenwa yabo tichiba endagera yabo.
Omorisia omuya
11“Aya naro Omonene Nyasae agoteba: Naama! Ninche bweka omonyene ndarigie ching’ondi chiane, nchinyore na gochirenda. 12Buna koreng’ana omorisia akorigia ching’ondi chiaye chiaserebekanire, ochisangereria amo naende, naboigo nainche ndasangererie ching’ondi chiane, nchitoorie korwa ase chinsemo chionsi aase chiaserebekanete gochia ase rituko rie rirumbe na omosunte omonene. 13Ninchirusie korwa ase egati y’abanto b’ebisaku binde, nchisangererie korwa ase chinse ao ao, erio nchirente ase ense yabo abanyene. Nimbe ngochirisia igoro ase ebitunwa bi’Abaisraeli, na ase chindooche, na ase chinsemo chionsi chi’ense eyio chimenyire nabanto. 14Ninchirisie ase oborisia obuya. Ee, nchibe chikorisia ase oborisia obonoru bw’ebitunwa bi’Abaisraeli. 15Inche omonyene nindisie ching’ondi chiane, naende nchinyore aase chigotimokera. Nabo Omonene Nyasae atebire.
16“Echiasirete ninchirigie nchinyore, na echio chiaserebekanete nchiiranie asende; echibunegete ninchiboere ebitete, na echire chindeu ninchibeke chinguru; korende echire chinoru naende chire ne chinguru ninchisirie, ee, ninchigambie ekina kia boronge.
17“Aya naro Omonene Nyasae agoteba: Inwe ching’ondi chiane, ninache ekina ase egati y’eng’ondi na eng’ondi ende, na ase egati ye chimingichi ne chigoree. 18Inee! Nigo are amang’ana amagusu asemore ng’a komwanyorire oborisia obuya, mwatiringera inse namagoro aino obonyansi obwatigaire? Naende komwanyure amache amakenonoku, mwaturubania namagoro aino ayatigaire? 19Inee! Ching’ondi chiane nigo chirabe chikorisia obonyansi mwatiringire namagoro aino, naende chinywe amache ayio mwaturubanirie namagoro aino?
20“Ase ayio, aya naro Omonene Nyasae agochitebia: Inche bweka omonyene ninache ekina ase egati ye ching’ondi chinoru ne chindeu. 21Nigo mogosukia chiria chindeu namakere aino, na amareko, naende mwachitwoma ne chingunchara chiaino, goika mwachisiarera gochia ase chinsemo chionsi chi’aare. 22Ase ayio nintoorie ching’ondi chiane, gose tichikoba chigotwarwa buna ching’iti. Ninache ekina ase egati y’eng’ondi na eng’ondi ende. 23Ninchibekere omorisia oyomo achirisie, nere Daudi, omosomba one. Ere nachirisie, abe omorisia obo. 24Inche Omonene nimbe Nyasae obo; na Daudi, omosomba one, abe omogambi ase egati yabo. Ninche Omonene nakwanire ayio. 25Ninkore okobwatana kw’omorembe amo nabarabwo. Ninsirie ching’iti chintindi chirue ase ense eyio, na abanto baane mbamenye ase erooro na babe bakorara ase amanani bare nobotoereru.
26“Nimbasesenie barabwo abanyene, na nigo ndasesenie aase onsi aetanaine egetunwa kiane. Nimbatwerie embura ase chingaki chindonge; embura eyio nebe ey’ogosesenia. 27Emete y’emegondo inayame amatunda abo, ne riroba ndiame endagera yaye; barabwo abanyene mbamenye ase ense eyio bare nobotoereru. Ekero ndabune amakorogoto arue ase amagoti abo, mbatoorie korwa ase amaboko ay’abwo babakorete abasomba, erio mbamanye ng’a inche ninche Omonene. 28Tibagotwarwa buna ching’iti naende nabanto b’ebisaku, gose ching’iti chi’orosana tichikobaria. Mbabe bamenyete bare noborendi obuya, gose onde tari oraboboyie. 29Nimbamererie ebimeri bibe ogotogigwa okuya; barabwo mbamenye ase ense eyio, na enchara tekobaria ebaite, gose tibakoba bagochaywa nabanto batamomanyeti Nyasae. 30Barabwo mbamanye ng’a inche Omonene, Nyasae obo, nigo inde amo nabarabwo, naende ng’a Abaisraeli barabwo nabanto baane. Nabo Omonene Nyasae atebire.
31“Inwe neching’ondi chiane, ee, nigo more ching’ondi chie riicho riane, inwe nigo more mwanyabanto, na inche nigo inde Nyasae oino. Nabo Omonene Nyasae atebire.”
Currently Selected:
EKEKIELI6 34: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
